Ahyɛmudzi Ananmɔn kwan no: Onnyiewiei Nkwa Kwan no
Emudziyɛ anamɔn kwan no nye ahyɛmu anamɔn kwan no, na Jesus Christ na ɔwɔ ayɛdze na ahyɛmudzi horow nyinara ne finimfin.
Ɔhen otumfo bi pɛɛ dɛ ne babanyin bedzi hen wɔ n’ahenman horow no mu kor do. Nna ɔwɔ dɛ ɔhen babanyin no sũa adze na onyin wɔ nyansa mu dze tsena ahengua no do. Da kor bi, ɔhen no nye ne babanyin no hyiae na ɔdze ne nyehyɛɛ too n’enyim. Wɔgyee too mu dɛ ɔhen no ne babanyin no bɔkɔ kurow fofor do ekenya sũahu horow. Obehyia nsɔhwɛ dɛmara dɛ obedzi dɛw wɔ ndzɛmba apapa pii a ɔwɔ hɔ no. Ɔhen no somaa no wɔ kurow no mu, a nna enyi da kwan dɛ ɔhemba no kyerɛ no nokwardzi ma ɔhen no na ɔda no edzi dɛ ɔfata dɛ onya ndzinoa na asodzi a ɔhen no wɔ ma no no. Wɔmaa ɔhen no ne babanyin no fahodzi dɛ ɔbɛsan mu eyi dze agye ndzinoa na asodzi yinom anaa ɔnnkɛgye, a ogyina n’apɛdze na no nokwardzi do. Minyim pefee dɛ hom pɛ dɛ wohu dza ɔtoo ɔhen ne ba ba banyin no. Ana ɔsanee bedzi ahenman no do a?
Mo nuanom na nkyerɛbaa adɔfo, hɛn mu kor biara yɛ ɔhemba anaa ɔhembabaa. Ɔsor Egya dɔfo dze hɛn aba ɔnnkyebo asetsena yi mu ma yeenya nyimpadua ho dɛwdzi a ɔnam Jesus Christ no Werdambɔ na Wusoɛr do no ɔbɛyɛ bɛkyebo. Enyi da hɛn kwan dɛ yɛbɛsan akɔ Nyankopɔn ne nkyɛn ber a yɛkyerɛ dɛ [yɛ] “bɛyɛ ndzɛmba nyinara a Ewuradze [hɛn] Nyankopɔn bɛhyɛ [hɛn] ho mbra no’’ (Abraham 3:25).
Ɔbɔboa hɛn no, Agyenkwa no bae bɔpon hɛn na ɔkyerɛ anamɔn kwan no a wɔdze san kɔ Nyankopɔn hɔ. Wɔto nsa dze frɛ Nyankopɔn ne mba dɛ wɔmbra Agyenkwa no hɔ na wondzi mu wɔ No mu. Kyerɛwsɛm mu no, yehu ɔfrɛ ma hɛn dɛ yɛmbra Ewuradze hɔ no woesi do bɔbor mpɛn 90, na no mu bɔbor fã yinom yɛ ankorankor ɔfrɛ fi Ewuradze Nankasa hɔ. Eregye Agyenkwa no ɔfrɛ ato mu no n’asekyerɛ nye dɛ yebenya N’ayɛdze horow no na yebesie hɛn ahyɛmudzi a yɛnye No edzi no. Jesus Christ “nye ɔkwan no, nye nokwar no, nye nkwa no’’ (John 14:6) na Ɔto nsa frɛ hɛn “nyinara dɛ [yɛ] mbra ne nkyɛn mbenya ne papayɛ; na ɔmmpow obiara a ɔba ne nkyɛn’’ (2 Nephi 26:33).
Hɛn asɛmpa no nsũae na nkyerɛkyerɛ ma hɛn nsakyeree kɔ Ɔsor Egya na Jesus Christ hɔ a no mu dɔ na ɔboa hɛn ma yɛbɛyɛ tse dɛ Hɔn yie. Kaansa nnyɛ ndzɛmba nyina a ɔfa mber pɔtsee na kwan a nkwagye ntowdo ho nhyira a wɔdze bɛma na woeyi akyerɛ mpo no, naaso yɛwɔ ho awerɛhyɛmu (M. Russell Ballard, “Hope in Christ,” Liahona, Esusɔw Aketseaba 2021, 55).
Alma ɔsɔfo panyin no, rekyerɛkyerɛ wɔ Zarahemla no, kãa Jesus Christ no ɔfrɛ ho asɛm a no mu dɔ:
“Hwɛ, ɔato ne nsa refrɛ adasa nyinara, na ɔatserɛw ehumbɔbɔr abasa no mu wɔ hɔn do, na ɔse: Hom nnu homho, na mebɛgye hom.
Nyew, ɔse: Hom mbra me nkyɛn na hom mbedzi nkwadua no n’eduaba’’ (Alma 5:33–34).
Agyenkwa Nankasa to nsa frɛ hɛn dɛ yɛmbra No hɔ na yɛmfa No kɔndua nto hɛn do ama yeenya ahomgye wɔ wiadze begyabegya yi no mu (hwɛ Matthew 11:28–29). Yɛba Christ hɔ “ber a yesie gyedzi wɔ [No] mu, yenu hɛnho daadaa, Yɛnye Nyankopɔn dzi ahyɛmu ber a yɛgye nkwagye na nkwagye ntowdo ayɛdze horow, na yɛsɔw kodu ewiei ber a yedzi ahyɛmu no do’’ (General Handbook: Serving in The Church of Jesus Christ of Latter-day Saints, 1.2.1, ChurchofJesusChrist.org). Emudziyɛ anamɔn kwan no nye ahyɛmu anamɔn kwan no, na Jesus Christ na ɔwɔ ayɛdze na ahyɛmudzi horow nyinara ne finimfin.
Ɔhen Benjamin kyerɛkyerɛɛ dɛ osian ahyɛmudzi a yedzi no ntsi, yɛabɛyɛ Christ ne mbambanyin na mbabaa, a wɔawo hɛn wɔ sunsum mu, na wɔ Ne tsir ase no ntsi yeenya fahodzi, osiandɛ “dzin biara nnyi hɔ a wɔdze ama a nkwagye bodua do aba’’ (hwɛ Mosiah 5:7–8). Wɔgye hɛn nkwa ber a yetsim kodu ewiei ber a “yɛnantsew Nyame tseasefo ne Ba no n’anamɔn mu’’ (2 Nephi 31:16). Nephi tuu fõ dɛ wɔnnyɛ ne nyinara dɛ erehɛn anamɔn kwan tseabaa na heaheaba no mu ara; otwar dɛ “[yɛ] per kɔ kan gyina pintsinn wɔ Christ mu, na [ye] nya enyidado a ɔhyerɛn na odzi mu, na [ye] nya Nyankopɔn nye nyimpa nyina ho dɔ’’ (hwɛ 2 Nephi 31:19–20).
Christ ne nkyerɛkyerɛ no boa hɛn ma yehu ahyɛmu anamɔn kwan no na yɛnantsew do, na ɔahyehyɛ asɛmpa no ara ma dɛ yɛnam ayɛdze na ahyɛmudzi krɔnkrɔn do na yɛgye Ewuradze n’anohoba nhyira no. Nyankopɔn no nkɔnhyɛnyi, President Russel M Nelson tuu hɛn fõ wɔ ne Sanda 16, 2018 dawurbɔ mu dɛ, “Kɔdo nantsew ahyɛmudzi anamɔn kwan no do. Hom pisi dɛ hom bɛkã Agyenkwa no do, ber a hom nye No dzi ahyɛmu na nkyii hom sie dɛm ahyɛmudzi no, bobuei sunsum mu nhyira na ndzinoa biara a ɔwɔ hɔ ma mbanyin, mbaa, na mbofra a wɔwɔ beebiara no mbobow ama hom. … Ewiei no a hɛn nyina per ho nye dɛ yebenya Ewuradze fie mu tum akyɛdze, wɔasɔw hɛn ano dɛ ebusua ebusua, yedzi nokwar ama ahyɛmu a yɛayɛ no temple mu ama yɛafata Nyankopɔn akyɛdze a ɔsõ kyɛn akyɛdze biara, ɔyɛ onnyiewiei nkwa no’’ (“As We Go Forward Together,” Liahona, Ebɔbira. 2018, 7).
Nyankopɔn nnkegyaa Ne nkitahodzi mu, anaa Ɔnnkɛfa onnyiewiei nkwa ho nhyira anohoba akam ahyɛmudzi siefo nokwafo biara a ɔnye no wɔ no. Na ber a yedzi ahyɛmu krɔnkrɔn horow nyi no, yɛtwe bɛn Agyenkwa no yie. Elder David A. Bednar kyerɛkyerɛɛ hɛn ndeda dɛ asɛmpa ahyɛmudzi na ayɛdze horow no dzi dwuma wɔ hɛn abrabɔ mu tse dɛ kɔmpas a ɔma hɛn akwankyerɛ tsitsir dɛ yɛmbra Christ hɔ na yɛmbɛyɛ tse dɛ Ɔno yie.
Ahyɛmudzi horow kyerɛ anamɔn kwan dze san kɔ Nyankopɔn hɔ. Enuma na eregye Sunsum Krɔnkrɔn ayɛdze horow no, asɔfohyɛ, na sacrament no, gya hɛn kɔ Ewuradze ne temple ma yeenya Ne nkwagye ntowdo ayɛdze no.
Mebɛpɛ dɛ mekã ndzɛmba ebien a hɛn Agyenkwa tsĩi mu dze boa hɛn ma nokwar mu ara yesie ahyɛmudzi no.
-
Sunsum Krɔnkrɔn no botum akyerɛkyerɛ hɛn, abɔ hɛn nkaa wɔ Agyenkwa ne nkyerɛkyerɛ ho, na ɔnye hɛn atsena afebɔɔ (hwɛ John 14:16, 26). Obotum ayɛ hɛn daa daa adamfo na ɔaweɔn hɛn wɔ ahyɛmu anamɔn kwan no do. President Russell M. Nelson kyerɛkyerɛɛ dɛ “nda a ɔreba mu no, yennkotum enya sunsum mu nkwa a Sunsum Krɔnkrɔn ne bambɔ, n’akwankyerɛ, na ne daa daa nhyɛdo nnkã ho’’ (“Revelation for the Church, Revelation for Our Lives,” Liahona, Esusɔw Aketseaba 2018, 96).
-
Agyenkwa no hyehyɛɛ sacrament ayɛdze no, ama aber nyina yɛakaa No na yeenya no Sunsum ma Ɔnye hɛn atsena. Enuma bue onnyiewiei nkwa mbobow no, na sacrament no boa hɛn ma yɛper kɔ kan pintsinn mu wɔ ahyɛmu anamɔn kwan no ho. Ber a yedzi sacrament no ɔbɛyɛ dasegye dze ama Egya no dɛ yɛkaa Ne Ba no aber nyina. Na ber a yɛkaa No aber nyina na yesie Ne mbrasɛm no, yebenya No Sunsum ma Ɔnye hɛn atsena. Dza ɔka anohoba yi ho no, Ewuradze yɛ bɔnfakyɛ anohoba no fofor ber a ahobrɛadze mu ara yenu hɛnho fi hɛn bɔn ho.
Yeridzi nokwar ama hɛn ahyɛmudzi no, ɔwɔ dɛ yɛbɔ mbɔdzen dɛ aber nyina yebenya Sunsum no ma oesiesie hɛn ma yeedzi sacrament no emudzi mu, na, dɛmara so, yeedzi sacrament no daa ama aber nyina yeenya Sunsum no ma ɔnye hɛn atsena.
Mber a nna hɛn basiaba edzi mfe enum no, nna ɔwɔ kaar nhwɛdo kakraba bi a wɔdze battery hyɛ mu na ɔpɛ na otwuw dze kyin fie hɔ. Ewimbir bi, ɔbaa me nkyɛn na ɔsee dɛ, “Paapa, me kaar no nnkɔ bio. Ana yebotum enya petrol efi wo kaar no mu dze egu mu ama oetum akɔ bio a Ebia ohia petrol tse dɛ wo dze no dze akɔ.’’
Ekyir no muhun dɛ nna battery n’ahoɔdzen no akɔ famu, ntsi mesee no dɛ dɔnhwer kor mu no yɛbɛma ɔasan akɔ bio. Ɔdze enyigye dodoodow no, ɔkãa dɛ, “Nyew! Yɛdze bɔkɔ petrol station.’’ Medze battery no hyɛɛ enyinam fibea bi mu bɔkɔɔ dɛ obenya ahoɔdzen, na dɔnhwer kor ekyir no, nna otum twuw kaar no, a battery a ahoɔdzen aba mu na ɔma no ahom. Ofi hɔ rokɔ no osũae dɛ ohia dɛ aber nyina ɔbɛsan ama battery no ahoɔdzen ber a ɔdze bɛhyɛ enyinam fibea bi mu.
Dɛ mbrɛ hɛn basiaba no sũae nkitahodzi a ɔda battery na ahom a ɔdze botwuw n’agodzi kaar ntamu no, dɛmara na hɛn so yesũa wɔ Jesus Christ, sacrament no, na Sunsum no ho. Yehia Sunsum no mboa ma ɔaboa hɛn ma yeduadua ɔnnkyebo mu, ber a nokwar mu ara yesie ahyɛmudzi horow, na yehia sacrament no ma ɔama hɛn sunsum no ahoɔdzen. Yɛreyɛ hɛn enuma ahyɛmu fofor na yeridzi sacrament no ma nokwardzi dze ma ahyɛmudzi horow nkaa nyinara yɛ ndam. Wɔama hɛn enyigye ewiei ho awerɛhyɛmu ber a mpaabɔ mu ara yesũa na yedzi Agyenkwa ne nsato no nyi na yedzi N’anohoba nhyira ho dɛw. Ɔkãa dɛ, “Aama hom eetum aatsew homho efi wiadze nkekãa ho, hom nkɔ mpaabɔ fie wɔ me da krɔnkrɔn no mu nkedzi sacrament’’ (Doctrine and Covenants 59:9).
Midzi dase dɛ wɔbɔ ahyɛmudzi siefo no anohoba dɛ wobenya “asomdwee wɔ wiadze yi mu, na onnyiewiei nkwa wɔ wiadze a ɔreba no mu’’ (Nkyerɛkyerɛ na Ahyɛmudzi 59:23). Megye dase dɛ ber a daa hom dua sacament do dzi Agyenkwa ne sɛnkyerɛdze no, hom benya No Sunsum ma ɔaweɔn hom wɔ ahyɛmu anamɔn kwan no do na hom edzi nokwar ama hom ahyɛmudzi. Jesus Christ ne dzin mu, amen.