Nsɛnkã Nyienyim

President Dallin H. Oaks ne Kasaa

Ɔpamfo a Odzi Kan wɔ President a Odzi Kan na n’Apamfo mu

Yɛdze enyidzi ma Nyankopɔn ne mbabaa wɔ nhyiamu soronko yi mu ber a yetsim wɔ hɔn dadwen na hɔn ekuw dze do.

Me nkyerɛbaa adɔfo, ber a yɛhyɛ wiadze mfɛndzanan ehyiadzi ne mbaa nhyiamu soronko yi ase no, ɔyɛ me enyigye dɛ medze nsɛnkã nyienyim a ofi President a Odzi Kan na n’Apamfo hɔ no to gua.

Hɛn Memenda ewiaber nhyiamu horow no wɔ botae nsonsonee na etsiefo nsonsonee ho abakɔsɛm. Ewimbir yi yɛdze kã dɛm abakɔsɛm no ho ber a yɛhyɛ botae fofor ase na nyɛbew a ɔbɔkɔ do akyɛr ara yie. Jesus Christ asɛmpa no nnsesã. Asɛmpa nkyerɛkyerɛ no nnsesã. Hɛn ankorankor ahyɛmudzi horow no nnsesã. Mbom, mber rugu mu no, nhyiamu horow no a yehia dze da hɛn nsɛm edzi no bɛsesã na mbrɛ ɔbɛdan biara no mber rugu mu no ɔbɔkɔ do asesã.

Sesei, Memenda ewimbir nhyiamu yi yɛ wiadze mfɛndzanan ehyiadzi nhyiamu, nnyɛ kuw biara ne nhyiamu. Tse dɛ wiadze mfɛndzanan ehyiadzi nhyiamu ahorow no nyina no, no ho nhyehyɛɛ, hɔn a wɔkɛsa, na ndwom no nyina no President a Odzi Kan na n’Apamfo na wɔkyerɛ.

Yɛase President Jean B. Bingham, Relief Society President no dɛ, ɔmfa nhyiamu yi nhyehyɛɛ no nto gua. Ndaamba Memenda ewimbir nhyiamu horow no, Asɔr no Wiadze Mfɛndzanan Edzibewdzifo no hɔn mu baako na ɔdze nhyehyɛɛ no bɔto gua, tse dɛ Relief Society, Young Women, na Primary Presidencyfo, dɛ mbrɛ President a Odzi Kan na n’Apamfo no bɛkyerɛ.

Anafua yi, wiadze mfɛndzanan ehyiadzi ne Memenda ewimbir nhyiamu yi betsim wɔ Latter-day Saintfo mbaa hɔn dadwen do. Iyinom bɛka ho, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne nkyerɛkyerɛ, Asɔr no n’ahyɛdze a tsitsir ara ɔfa mbaa ho, a asodzi nyina na ekuw ndwuma a Asɔr mu mbaa na nkataasia kã ho. Yɛgye enyim ara bɔ nhyiamu yi no dawur kɔ etsiefo a wɔwɔ wiadze nyina mu dze, tse dɛ wiadze mfɛndzanan ehyiadzi nhyiamu nyina no, naaso etsiefo a wɔato nsa afrɛ hɔn aba Ehyiadzi Asoɛe aba nhyiamu yi ase no, nye mbaa na nkataasia a woedzi mfe 12 na no mboree. Yɛnye asɔfodzi baanodzifo binom a wɔhwɛ ekuw a wɔreba nhyiamu yi do no akã ho.

Dza yɛrehyɛ ase wɔ ha yi, nye nkitahodzi ho mboa ndzɛmba a sesei Ewuradze ne wiadze nyina mu Asɔr baanodzifo na asɔrmba nsa tum kã no ara yie. Jesus Christ asɛmpa nkyerɛkyerɛ no wɔ hɔ ma obiara, ntsi ɔno nye hɛn botae tsitsir na yɛtserɛw mu ma obiara. Yɛdze enyidzi ma Nyankopɔn ne mbabaa wɔ nhyiamu soronko yi mu ber a yetsim wɔ hɔn dadwen na hɔn ekuw dze do.

Ɔyɛ hɛn enyisɔ dɛ afei abaɛfor dawurbɔ mfir ma Asɔr baanodzifo no tum ma wɔyɛ ntsetsee tɔɔtsen ma etsiefo pɔkyee binom wɔ mbew do. Ɔyɛ hɛn enyigye so dɛ sesei akwantu ho kwan rodɔɔ sõ. Ɔno ma kwan ma yɛsoma Asɔr baanodzifo ma wɔtaa kɛyɛ enyim-na-enyim baanodzifo ntsetsee wɔ mbew do.

Iyi nye Ewuradze Jesus Christ n’edwuma no. Yɛyɛ N’asomfo, a No Sumsum kyerɛ hɛn kwan. Yɛdze hɛn Ewuradze hyira horow no hyira ekuw yi mu baanodzifo na mbaa na nkataasia anokwafo a wɔsom Ewuradze wɔ ekuw yinom mu na wɔ hɔn ankorankor abrabɔ mu. Jesus Christ ne dzin mu, amen.