Mbrɛ Nyankopɔn Dɔɔ Hɛn Nye Yi
Nyankopɔn dɔɔ hɛn dɛ Ɔannsoma ne Ba a Ɔwoo no Kor no dɛ—ombobu hɛn atsɛn, na dɛ mbom Ɔmbɛgye hɛn nkwa.
“Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannhera, na oeenya onyiewiei nkwa.” (John 3:16). Ber a odzi kan a medze hun dɛm asɛm yi, nna minnyi asɔrfi mu anaa ebusua ewimbir nhyiamu ase. Nna morohwɛ agodzi dwumadzi bi wɔ tɛlɛbihyɛn do. Station biara mobɔhwɛ no, ɔmmfa ho agodzi biara a ɔrokɔ do no, annyɛ koraa no nna nyimpa kor kitsa asɛnkyerɛdze a ɔakyerɛw “John 3;16” wɔ do.
Maabɔdɔ nkyekyɛmu 17 no so dɛm ara: “Na Nyankopɔn annsoma ne Ba wɔ wiadze dɛ ombobu wiadze atsɛn, na dɛ wondua no do ngye wiadze nkwa.”
Nyankopɔn somaa Jesus Christ, Ne Ba kortoo wɔ honam mu, dɛ ɔmfa No nkwa nto hɔ ma hɛn mu kor biara. Ɔyɛɛ iyi osiandɛ Ɔdɔ hɛn na Ɔyɛɛ nhyehyɛɛ ama hɛn mu kor biara asan akɔ Ne nkyɛn wɔ fie.
Eso iyi nnyɛ dɛ kuntu tam tɛtɛr a ɔyɛ dɛ ɔsɔw adze nyina do a, ɔyɛ edwuma anaa ɔnnyɛ edwuma nhyehyɛɛ bi. Ɔyɛ ankorankor nhyehyɛɛ a, Ɔsor Egya dze too hɔ, Ɔno a Onyim hɛn akoma, hɛn edzin, na dza ohia No dɛ yɛnyɛ. Dɛn ntsi na yɛgye dɛm dzi? Osiandɛ wɔakyerɛkyerɛ no wɔ kyerɛwsɛm krɔnkrɔn no mu.
Moses tsee no mpɛn pii dɛ Ɔsor Egya kã dɛm nsɛm yi “Moses, me babanyin” (hwɛ Moses 1:6; hwɛ verses 7, 40 so). Abraham sũaa dɛ ɔyɛ Nyankopɔn ne ba a, wɔsan mu yii no ma n’edwuma mpo ansaana wɔbɔwo no (hwɛ Abraham 3:12, 23). Ɔnam Nyankopɔn ne nsa do, wɔdze Esther sii nhyɛdo gyinabea ma ɔgyee no nkorɔfo (hwɛ Esther 4). Na Nyankopɔn dze No werɛ hyɛɛ akataasiaba, abaawa bi mu, dɛ ɔbɛgye nkɔnhyɛnyi tseasefo ho dase ama Naaman enya ayarsa (hwɛ 2 Ahemfo 5:1–15).
Nkankara modɔ dɛm barimba pa no a, nna ɔyɛ tsia a, ɔfoow dua ama oehu Jesus no. Nna Agyenkwa no nyim dɛ ɔhyɛ hɔ, ogyinae, hwɛ nkorbata no mu wɔ sor, na ɔkãa dɛm nsɛm yinom: “Zacchaeus, … si famu” (Luke 19:5). Na hɛn werɛ nnkotum efir dɛm mfe duanan aberantsɛba a ɔkɔr kwaa mu na osũa mbrɛ nhyehyɛɛ no si yɛ ankorankor dze ankasa: “[Joseph,] oyi nye mo Dɔba no. Tsie No!” (Joseph Smith—Abakɔsɛm 1:17).
Enuanom na nkyerɛbaa, Ɔsor Egya ne nhyehyɛɛ no tsim hɛn do na ɔno nye Agyenkwa no no soma no ne siantsir. Hɛn mu kor biara, ankorankor, yɛ Hɔn edwuma na Hɔn enyimnyam.
Emi no, kyerɛwsɛm nwoma biara nnyi hɔ a ɔkyerɛ iyi mu yie sen me Ahyɛmu Dadaw nsũae. Tsir biara mu no yehu mfatoho horow fa mbrɛ Ɔsor Egya na Jehovah dze hɔnho hyɛ hɛn abrabɔ mu wɔ ankorankor kwan do.
Ndaansa yi yeesũa Joseph, Jacob no dɔba no ho nsɛm. Fi ne mberantsɛber mu, nna Joseph wɔ enyimnyam kɛse wɔ Ewuradze enyim, naaso ɔfaa amandzehu kɛse mu wɔ n’enuanom hɔn nsa ano. Adapɛn ebien a abasen yi, mbrɛ Joseph sii dze n’enuanom hɔn bɔn kyɛ hɔn no kãa hɛn mu pii. Come, Follow Me mu no, yɛkan dɛ: “Akwanhorow pii mu no, Joseph n’abrabɔ da Jesus Christ nedze ho pɛpɛɛpɛr. Hɛn bɔn ma Ɔfaa ɔyaw dzendzen mu dze, naaso Agyenkwa no ma hɛn bɔnfakyɛ, a ɔgye hɛn fi hyɛbea a omuo koraa sen ɔkɔm mu. Sɛ hɛn na yehia bɔnfakyɛ anaa yehia dɛ yɛdze kyɛ o—mber bi mu no hɛn nyina hia dɛ yɛyɛ ebien no nyina—Joseph ne fasusu gya hɛn kɔ Agyenkwa no hɔ, ayarsa na nkabɔmu nokwar farba no.”
Adzesuadze a mepɛ wɔ dɛm asɛm no mu no fi Joseph no nuabanyin Judah hɔ a, odzii dwuma dze boa Nyankopɔn ne ankorankor nhyehyɛɛ ma Joseph. Mber a Joseph n’enuanom yii no mae no, Judah kasae ma wɔgyee too mu dɛ wonnkokum Joseph mbom wɔbɔtɔn no akɔ nkowasom mu (hwɛ Genesis 37:26–27).
Mfe pii ekyir no, okehia dɛ Judah na n’enuanom fa hɔn nua kakraba, Benjamin, kɔ Egypt. Ahyɛse no hɔn egya ammpen. Naaso Judah bɔɔ Jacob anohoba bi—ɔdze Benjamin bɛba fie.
Wɔsɔɔ Judah n’anohoba no hwɛe wɔ Egypt. Mfom mu ara wobua aberantsɛba Benjamin fɔ wɔ bɔn bi ho. Ampaara, Judah dzii n’anohoba no do, dze noho mae dɛ wɔmfa no nto fiadze nhyɛ Benjamin n’ananmu. Ɔkã dɛ, “na mibesi no dɛn na makɔ m’egya nkyɛn, na abofra no nnka mo ho?” (hwɛ Genesis 44:33–34). Nna Judah esi pi dɛ obedzi n’anohoba no do dze Benjamin asan akɔ dwodwoodwo. Ana ɔyɛ a inya atsenkã ma binom dɛ ma Judah nyae fa Benjamin ho no?
Ana nnyɛ dɛm atsenkã yi na awofo wɔ fa hɔn mba ho? Atsenkã a asɛmpasomafo nya wɔ nkorɔfo wɔsom hɔn no ho? Atsenkã a Primary na mbabun baanodzifo wɔ fa hɔn a wɔkyerɛkyerɛ hɔn na wɔdɔ hɔn ho?
Mbrɛ etse biara anaa asetsena a ewɔ mu sesei no, obi wɔ dɛm atsenka yi ara bi wɔ wo ho. Obi pɛ dɛ ɔsan ekyir nye wo kɔ Ɔsor Egya hɔ.
M’enyi sɔ wɔ hɔn a wɔmmpa abaw wɔ hɛn ho da, a wɔkɔ do hue hɔn akra mu yi mpaa ma hɛn, na wɔkɔ do kyerɛkyerɛ na wɔboa hɛn ama yeedzi mu dɛ yɛbɛsan aakɔ fie wɔ hɛn Egya nkyɛn wɔ Sor.
Ɔnkyɛree nyɛnko dɔfo bi a ɔwɔ COVID- 19 dzii nda 233 wɔ asopitsi. Dɛm mber no, n’egya a oewu bɛsera no a, ɔmaa no amandzɛɛbɔ bi dɛ ɔmfa nkɛma ne nananom. Mpo wɔ ntwamutam n’ekyir no, dɛm nana dɔfo yi wɔ pɛ dɛ ɔboa ne nananom ma wɔsan kɔ hɔn ɔsor fie.
Mpontu mu ara, Christ n’esuafo rekaakaa “Benjaminfo” a wɔwɔ hɔn abrabɔ mu. Wiadze nyina mu no, wɔatse Nyame no nkɔnhyɛnyi ɔtseasefo, President Russell M. Nelson no totorbɛnto ɔfrɛ no. Mberantsɛ na nkataasia dze hɔnho ahyɛ Ewuradze ne mbabun nsordaafo no mu. Ankorankor nye ebusua ebusua retsen kɔ abowano wɔ ɔsom sunsum mu a—wɔrodɔ, wɔrekyɛ, na wɔroto nsa frɛ anyɛnkofo na fipamfo dɛ wɔmbra Christ hɔ. Mbabun na mpanyin rekaakaa na wɔreper dɛ wobesie hɔn ahyɛmudzi—wɔrehyɛ Nyame ne temple horow mã, wɔrohwehwɛ ebusuafo ewuakɔr hɔn edzin, na worigyina agye ayɛdze horow ama hɔn.
Ebɛnadze ntsi na yɛroboa binom ma wɔasan akɔ Ne nkyɛn ka Ɔsor Egya no ne ankorankor nhyehyɛɛ ma hɛn no ho? Osiandɛ dɛm na yɛdze bɛyɛ dɛ Jesus Christ. Ɔkrɔn koraa no, Judah na Benjamin hɔn asɛm yi kyerɛkyerɛ hɛn fa Agyenkwa no n’afɔrbɔ ma hɛn ho. Ɔnam No Werdam Afɔrbɔ do, Ɔdze No nkwa mae ama ɔdze hɛn aba fie. Judah ne nsɛm no kyerɛ Agyenkwa no dɔ: “Mibesi no dɛn na makɔ m’egya nkyɛn, na [hom] nnka mo ho?” Dɛ Israel mboaboanofo no, dɛm nsɛm no botum ayɛ hɛn so hɛn dze.
Anwanwadze na ehumbɔbɔr a ɔyɛ Ɔsor Egya ne nhyehyɛɛ ho ahyɛnsewdze no ahyɛ Ahyɛmu Dadaw no mu mã. 2 Ahemfo 4 mu no, wɔdze asɛmfua “ɔbaa da bi” dze esi do mpɛn ebiasa dze akyerɛ dɛ nsɛm a ohia sisi wɔ Nyame ne mber mu, na adze ketseketse biara nnsuar mma no.
Me nyɛnko fofor Paul dzi dɛm nokwar yi ho dase. Paul nyinii wɔ ofi a nna ɔyɛ a enyimtsiabu wɔ mu na daa daa wɔnngye nyamesom nnto mu mu. Ber a ɔkɔr skuul wɔ nsordaafo bea wɔ Germany no, ohun nkyerɛbaa beenu a nna ɔyɛ dɛ wɔwɔ sunsum mu kan bi. Obisaa siantsir a wɔyɛ soronko no dze nyiano bae dɛ wɔdɔm Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no.
Annkyɛr Paul hyɛɛ ase nye asɛmpasomafo hyiae na wɔtoo nsa frɛ no dɛ ɔmbra asɔr. Kwesida no, osianee fii hɛn mu no, ohun mbanyin ebien a wɔhyɛ ntar sordze efufuw na wɔbobɔ tie. Obisaa hɔn dɛ ana wɔyɛ Asɔr no ne elderfo a. Wobuaa dɛ nyew, ntsi Paul dzii hɔn ekyir.
Ɔsom no rokɔ do no, ɔsɛnkafo no tsen nsa wɔ nkorɔfo a wɔwɔ dɔm no mu no do na ɔto nsa frɛ hɔn dɛ wombedzi dase. Dasedgye biara n’ewiei no, nyia a ɔbɔ kyen no ma ayekoo wɔ kyen no do na dɔm no tsẽa mu, “Amen.”
Ber a ɔsɛnkafo no frɛ Paul no, ɔsoɛree na ɔkãa dɛ, “Minyim dɛ Joseph Smith yɛ nkɔnhyɛnyi na Mormon Nwoma no yɛ nokwar.” Kyen ayekoo anaa amen biara ammba. Ekyir no Paul hun dɛ wɔafom asɔr ɔrokɔ no. Annkyɛr Paul hun kwan kɔr beebi kor no ankasa na wonumaa no.
Paul no nnuma da no, asɔrba bi a onnyim no kãe kyerɛɛ no dɛ, “Agye me nkwa.” Nna adapɛn bi a wɔabasen, dɛm banyin no ayɛ n’adwen dɛ ɔbɔhwehwɛ asɔr fofor na ɔkɔr asɔr a nkyenbɔ na amen wɔ mu. Ber a banyin no tsee Paul ne dasegye wɔ Joseph Smith na Mormon Nwoma no ho no, ohun dɛ Nyame nyim no, na onyim n’aperdzi, na ɔwɔ nhyehyɛɛ bi ma no. Ma Paul na dɛm banyin no, “ɔbaa da bi,” ampaara!
Hɛn so yenyim dɛ Ɔsor Egya wɔ ankorankor enyigye ho nhyehyɛɛ ma hɛn mu kor biara. Ɔnam dɛ Nyame somaa No Dɔba ma hɛn no ntsi, anwanwadze a yehia no “[bɛba] da no [ara]” a ohia ma Ne nhyehyɛɛ ahyɛ mã.
Megye dase dɛ afe yi yebotum esũa pii fa Nyankopɔn ne nhyehyɛɛ ma hɛn ho wɔ Ahyɛmu Dadaw no mu. Dɛm nkyerɛwee krɔnkrɔn no kyerɛkyerɛ nkɔnhyɛfo hɔn edwuma wɔ mber ɔdandan mu na wɔkyerɛ Nyankopɔn ne nsa wɔ wiadze a nna adwensɛɛ na mpɛn pii basabasayɛ wɔ mu mu. Ɔsan so fa agyedzifo ahobrɛadzefo a wɔdze gyedzi hwɛ hɛn Agyenkwa no ne mbae kwan dɛ mbrɛ hɛn so hwɛ no kwan na yɛyɛ ahosiesie ma Ne, Mbae a Otsia Ebien no—Ne enyinmyam mbae a, wɔahyɛ ho nkɔm dadaada no.
Kɛpem dɛm da no, yennkotum dze hɛn honam enyiwa ehu Nyankopɔn ne nhyehyɛɛ ma hɛn abrabɔ ne fã beebiara (hwɛ Nkyerɛkyerɛ na Ahyɛmudzi 58:3). Naaso yebotum akaa Nephi ne nyiano ber a ohyia dza ɔnntse ase: ɔwɔ mu dɛ nna onnyim ndzɛmba nyina n’askyerɛ, nna onyim dɛ Nyankopɔn dɔ Ne mba (hwɛ 1 Nephi 11:17).
Iyi nye me dasee wɔ dɛm Sabbath anapa fɛɛfɛw yi. Hom ma yɛnkyerɛw no wɔ hɛn akoma mu na yɛmma kwan ma ɔmfa asomdwee, enyidado, na onyiewiei dɛwdzi nhyɛ hɛn akra mu mã: Nyankopɔn dɔɔ hɛn dɛ Ɔannsoma ne Ba a Ɔwoo no Kortoo no dɛ—ombobu hɛn atsɛn, na dɛ mbom Ɔmbɛgye hɛn nkwa. Jesus Christ ne dzin mu, amen.