Gyedzi Atwer
Ekyingye siw hɛn kwan a yɛdze hu anwanwadze, mbom gyedzi ho adwen wɔ Agyenkwa no mu bue ɔsor tum.
Abrabɔ tafɛrbanyinmbɔmu horow besi dɛn benya nsunsuando wɔ hɛn gyedzi wɔ Jesus Christ mu? Na ebɛn nsunsuando na hɛn gyedzi benya wɔ dɛw na asomdwee a yenya wɔ abrabɔ yi mu no do?
Nna afe no yɛ 1977. Ahomatromfo no frɛe, na amandzɛɛbɔ no tseew hɛn akoma. Nna Carolyn na Doug Tebbs reyɛ ahoboa etu akɛtsena hɔn fie fofor mu ber a wowiee esũapɔn. Elderfo quorum bae bɛhyehyɛɛ ndzɛmba guu kaar a wɔdze rokɔ no mu. Doug, esi no pi dɛ kwan no mu da hɔ ana orutu kaar no akɔ n’ekyir epue no, sanee hwɛɛ kwan no do kor so. Dza woennhu nye dɛ ne babaa, Jennie, a otwaa mu fa kaar n’ekyir wɔ mber a nna ɔnnsɛ mu ara. Hɔ no ara, hɔn dɔfo Jennie fii mu.
Ebɛn asɛm besi ekyir yi? Ana yaw a ɔdɔ bun mu a wɔtsee na ɔhwer a wonntum nsusu a wɔtsee no bɛma ekã a wonnkotum esiesie abɛda Carolyn na Doug ntamu, anaa annyɛ a ɔbɛkyekyer hɔn akoma abɔ mu na wɔahyɛ hɔn gyedzi dzen wɔ Ɔsor Egya no ne nhyehyɛɛ no mu?
Hɔn amandzehu kwan no mu ayɛ tsentsen nye ɔyaw dze, naaso sunsum mu dzenhyɛ fi beebi bae dɛ mma wɔnnhwer enyidado, na “mma [wɔ]mmpa abaw.”1 Dɛm awarfo anwanwafo yi nyaa Christ su mpo mbordo. Pisi mbordo. Ayamuhyehye mbordo. Wɔgyee dzii dɛ, wɔ Ne mber mu, Nyankopɔn behyira hɔn wɔ hɔn amandzehu mu ma eesi hɔn yie.2
Yaw na dza ɔahwer no ronnkɔ na onnkotum akɔ korakoraa dze, naaso Carolyn na Doug enya awerɛkyekyer wɔ awerɛhyɛmu dɛ wogyina pintsinn wɔ ahyɛmu kwan no do no, hɔn dɔfo Jennie bɛyɛ hɔn dze afebɔɔ.3
Hɔn fasusu ahyɛ me gyedzi dzen wɔ Ewuradze ne nhyehyɛɛ no mu. Yennhu ndzɛmba nyina. Ɔno hu. Ewuradze kãa kyerɛ Joseph Smith wɔ Liberty efiadze dɛ “dɛm ndzɛmba yinom nyina bɛma wo ntɔhunii, na ɔbɛyɛ wo mfaso. Nyimpa Ba no duaa iyinom nyina mu. Ana eyɛ kɛse sen no?”4
Ber a yɛgye Ewuradze ne pɛ to mu no, Ɔkyerɛkyerɛ hɛn mbrɛ yebesi nye No anantsew.5 Meyɛ aberantsɛba asɛmpasomafo a morosom wɔ Tahiti no, wobisaa me dɛ minhyira abofra bi a ɔyar. Yɛdze hɛn nsa guu ne tsir do na yehyiraa no dɛ onya ahotɔ. No mpɔw mu hyɛɛ ase dɛ ɔreyɛ dzen, mbom ɔsanee yar bio. Mpɛn a otsia ebien no yehyira no a ɔmaa nsunsuando kor noara. Ɔserɛ a otsia ebiasa baa. Yɛserɛ Ewuradze dɛ Ne pɛ nyɛ hɔ. Ekyir no annkyɛr, na dɛm sunsum abofra yi sanee kɔr no ɔsor fie.
Mbom yenyaa asomdwee. Nna yɛpɛ dɛ abofra no tsena ase, naaso nna Ewuradze wɔ nhyehyɛɛ fofor. Yɛregye Ne pɛ ahyɛ hɛn dze ananmu no yɛ adze tsitsir a yɛdze nya dɛwdzi a hɛn tsebew mmfa ho.
Gyedzi a ɔda famu a yenya wɔ Jesus Christ mu ber a yɛhyɛ ase sũa Noho asɛm no botum aka hɛn akoma mu ber a yehyia abrabɔ n’aperdzi horow. Hɛn gyedzi wɔ No mu botum na ɔbɔboa hɛn wɔ ɔbra ne dzen mu. Ampaara, yebohu dɛ dza ɔda famu wɔ ɔbra ne dzen no n’afã kor no mu wɔ hɔ6 sɛ yegyina “[pintsinn] wɔ Christ mu, nya enyidado a ɔhyerɛn na odzi mu.”7
Abrabɔ no no botae ɔfã bi nye dɛ yɛma kwan ma dza obotum ayɛ fintsidua no abɛyɛ kankɔ ber a yɛfow dza mefrɛ no “gyedzi atwer” no”—atwer osiandɛ ɔkyerɛ dɛ gyedzi nngyina faakor. Otum kɔ sor anaa ɔba famu ɔnam nsanmunyi a yɛyɛ no.
Ber a yɛper dɛ yɛbɔto hɛn gyedzi wɔ Agyenkwa no mu no, bia yennkotum atse Nyankopɔn no dɔ ma hɛn ase emudzi mu na ebia yeedzi Ne mbra do dɛ ɔyɛ hɛn asɛdze. Afɔbu mpo tum bɛyɛ dza okenyan hɛn kɛse sen ɔdɔ. Bia yɛnye No nnyaa nkitahodzi ankasa ho suahu sesei.
Ber a yɛhwehwɛ dɛ yɛbɔto hɛn gyedzi mu no, hɛn adwen botum ayɛ konsee wɔ dza James kyerɛkyerɛɛe no ho. Ɔkaa hɛn dɛ “gyedzi a ndwuma nnkã ho nnsow aba.”8 Yebotum ahwe ase sɛ yɛdwen dɛ biribiara gyina hɛn do a. Ahotodo mbordo wɔ hɛn ankasa hɛnho do botum esiw hɛn kwan dɛ yebebisa ɔsor tum.
Mbom ber a yɛdze gyedzi wɔ Christ mu kɔ kan no hɛn adwen hyɛ ase sakyer. Yehu dɛ setsie na gyedzi wɔ Agyenkwa no mu ma yɛfata dɛ yebenya No Sunsum ma ɔnye hɛn aatsena aber nyina.9. Setsie nnyɛ ahomtsew bio mbom dza yɛhwehwɛ.10 Yehu dɛ setsie ma Nyankopɔn ne mbrasɛm boa ma Ɔgye hɛn dzi. Ɔgye hɛn dzi a yenya kan mbordo. Dɛm kan no dzi hɛn kan wɔ abrabɔ akwantu mu na ɔboa hɛn ma yehu kwan a ɔsɛ dɛ yɛfa do yie.
Mbom bi kã ho. Ber a hɛn gyedzi wɔ Agyenkwa no mu nyin no, yehu nsesã kakra a hɛn ɔsor ntseasee wɔ hɛn na Nyankopɔn nkitahodzi kã ho—nsesã nkakrankakra a ɔkɔ do fi “Ebɛnadze na mepɛ?” dze kɔ “Ebɛnadze na Nyankopɔn pɛ?” Tse dɛ Agyenkwa no, yɛpɛ dɛ yɛyɛ “nnyɛ dɛ mbrɛ mepɛ bi a, na mbrɛ ɔwo epɛ a.”11 Yɛpɛ dɛ yɛyɛ Nankopɔn n’edwuma na yɛyɛ edwindze wɔ Ne nsamu.12
Hɛn mpontu no yɛ onnyiewiei dze. President Russell M. Nelson akyerɛkyerɛ dɛ dodow wɔ hɔ a Ɔsor Egya pɛ dɛ yehu.13 Ber a yetu mpon no, yɛtse dza Ewuradze kyerɛkyerɛɛ Joseph Smith no ase yie: “Na sɛ hom dzi me mbrasɛm do a hom nsa bɛkã ne mãhyɛ no, na wɔahyɛ hom enyimnyam wɔ mo mu; … mese hom dɛ, hom nsa bɛkã adom akɔ adom mu.”14
Ɔsor dodow a yɛbɔfow akɔ wɔ gyedzi atwer no do yɛ hɛn egyinasi. Elder Neil L. Andersen kyerɛkyerɛɛ dɛ, “Nnyɛ akradze na ɔbɛma wo gyedzi enyin mbom wo nsanmuyi a.’’15 Yebotum ayɛ nsanmuyi a ohia ma hɛn gyedzi enyin wɔ Agyenkwa no mu.
Susu nsunsuando ho a nsanmuyi dze bae ber a Laman na Lemuel sian famu wɔ gyedzi atwer no do na Nephi fowee sor sor. Ana nkyerɛmu pefee bi wɔ hɔ kyɛn nsonsonee a ɔda Nephi ne nyiano “Mobɔkɔ akɛyɛ”16 na Laman na Lemuel a, ɔnnkyɛree yi ara woehu ɔbɔfo, hɔn nyiano dɛ “ɔbɛyɛ dɛn bɛyɛ na Ewuradze [bɛgye]?”17hɔn ntamu.
Ekyingye siw hɛn kwan a yɛdze hu anwanwadze, mbom gyedzi ho adwen wɔ Agyenkwa no mu bue ɔsor tum.
Sɛ hɛn gyedzi mpo yɛ mbrɛw a, Ewuradze ne nsa bɛtsen daa.18 Mfe pii a abɛsen no, minyaa asɛdze dɛ menkɛkyekyer stake bi bio wɔ Nigeria. Ekyir koraa no, wɔsesãa da no. Nna banyin bi wɔ stake no mu a wɔayɛ n’adwen dɛ obefi kurow no mu hɔ wɔ ehyiadzi da no a odzi kan no. Nna osuro dɛ wɔbɛfrɛ no stake president.
Ɔkɔree no onyaa akwanhyia huuhu bi, naaso hwee annyɛ no. Iyi maa osusuu siantsir a wɔdze no nkwa kyɛɛ no. Ɔsaan hwɛɛ n’adwenpɔw a ɔbɔe no do. Onuu noho na ahobrɛadze mu ara ɔbaa ehyiadzi no ase wɔ da fofor no mu. Na nyew, wɔfrɛɛ no dɛ ɔmbɛyɛ stake president fofor no.
Elder Neal A. Maxwell kyerɛkyerɛɛ dɛ: “yɛdze hɛn pɛ roto Nyankopɔn ne dze ho nko na yebenya enyigye a ɔhyɛ mã. Dza osuar kyɛn dɛm biara dze kyɛfã a osuar ba.”19
Ber a yɛayɛ “ndzɛmba nyina a hɛn ahom botum” ekyir no, nna mber aso dɛ “[ye]gyina pintsinn … hwɛ Nyame no nkwagye.”20 Muhun iyi ber a nna mosom McCormick ebusua no. Ɔawar mfe 21, Mary Kay som nokwar mu wɔ no ɔfrɛ horow mu. Nna Ken nnyɛ Asɔrba na onnyi pɛ biara dɛ ɔbɛyɛ, eso ɔdɔ ne yer ntsi, ɔsaan mu yii dɛ ɔnye no bɔkɔ asɔr.
Kwesida bi minyaa nkenyan dɛ menye Ken nkyɛ me dase. Mibisaa no dɛ mubotum a. Nna ne nyiano no da famu pefee: “Oho, meda ase.”
Moho boow me. Meenya nkenyan na maper dɛ mebedzi do. Nna ɔyɛ me dɛ oye dɛ misi gyinae dɛ mayɛ m’afamudze. Naaso mobɔɔ mpaa na modwendwen ho ekyir no, muhun dɛ ɔwɔ mu dɛ dza meyɛɛ no ye, naaso medze moho too mara moho do dodow na ketseketse koraa wɔ Ewuradze do.
Ekyir no, mesanee, mbom wɔ adwenpɔw fofor mu. Mobɔkɔ ara dɛ edwindadze wɔ Ewuradze nsamu a menndze pɛ biara gyedɛ medzi Sunsum no do. Mo nokwafo boafo Gerald Cardon kã ho no, yɛhɛɛn McCormick fie hɔ.
Ɔannkyɛr, minyaa nkyenyan dɛ monto nsa mfrɛ Gerald ma ɔntow “Minyim Dɛ Mo Pomfo Tse Ase.’’21 Ɔhwɛ me a nna ɔnntse ase, naaso ɔwɔ gyedzi wɔ me gyedzi mu no, ɔyɛe. Sunsum pa bi hyɛɛ dan no mu mã. Nkenyan no baa dɛ yɛnto nsa mfrɛ Mary Kay na Kristin, hɔn babaa, ma wɔnkyɛ hɔn dasegye. Ber a wɔyɛ dɛm no, Sunsum no yɛɛ kɛse. Mpo, Kristin ne dasegye ekyir no, nna nyinsuwa resian Ken n’afon ho.22
Nyame afa nhyiamu no. Ɔannkã akoma ara mbom ɔsakyeer akoma afebɔɔ. Sunsum Krɔnkrɔn no tum no ahohor mfe eduonu-biakõ ekyingye egu. Dapɛn ekyir no, wonumaa Ken. Afe kor ekyir no, wɔsɔɔw Ken na Mary Kay ano wɔ Ewuradze ne fie ma mber yi nye mbersantsen nyina mu.
Hɛn nyina abɔ mu enya suahu wɔ dza ɔkyerɛɛ dɛ yɛdze Ewuradze ne pɛ rehyɛ hɛn pɛ ananmu, na hɛn gyedzi wɔ No mu nyinii.
Meserɛ susu nsɛmbisa a Nyame no nkɔnhyɛfo krɔnkrɔn ebisa yi ber a eper fow wo gyedzi atwer:
Ana meyi ahantan akwa?22
Ana mema Nyame n’asɛm kwan wɔ m’akoma mu a?”23
Ana mema kwan ma wohyira m’amandzehu ma esi me yie?24
Ana mayɛ krado dɛ mebɛma mepɛ akɔ akɛhyɛ Egya no ne pɛ mu?25
Sɛ matse nka dɛ mobɔtow ɔpon ho ɔdɔ ndwom pɛn a, ana metse dɛm nka no sesei?26
Ana mema Nyame dzi nyim wɔ m’abrabɔ mu?27
Sɛ ihu dɛ wo anamɔn sesei nye wo gyedzi wɔ Agyenkwa no mu no bɔ ebira a, nna meserɛ hwehwɛ w’ekyir kwan bra Ne nkyɛn. Wo nkwagye ntowdo na w’asefo hɔn dze gyina ɔno do.
Hom ma yenduadua gyedzi amba no wɔ hɛn akoma no bun mu. Hom ma yɛnkora dɛm amba yi do yie ber a yɛdze hɛnho fam Agyenkwa no ber a yerisie ahyɛmudzi horow a yɛnye No wɔ. Jesus Christ ne dzin mu, amen.