Sunsum mu Ahoɔhar Pa no Tum

President Russell M. Nelson ne Kasaa

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President

Mebɛpɛ dɛ mususu ndzeyɛɛ pɔkyee enum a ɔboboa hɛn ma sunsum mu ahoɔhar pa atahye.

Mo nuanom na nkyerɛbaa, modɔ hom. Ɔsom me bo dɛ menya kwan nye hom rekɛsa ndɛ. Mobɔ mpaa ma hom daa dɛ hom benya bambɔ efi otsĩafo no kutukubɔ yaayaw no na ɔhaw biara mu no, hom benya ahoɔdzen dze epia akɔ enyim.

Nsɔhwɛ binom yɛ bun mu kokoa mu adzesoadze a obiara nnkotum ehu. Binom so da edzi wɔ wiadze nyina mu. Ɔkõ a ɔrokɔ do wɔ Europe boka afamu yɛ iyinom mu kor. Makɔ Ukraine na Russia mpɛn pii. Modɔ dɛm aman no, no nkorɔfo, na hɔn kasaa no. Musũ na mobɔ mpaa ma hɔn a wentwiwentwi yi akã hɔn nyina. Yɛyɛ asɔr no, yɛreyɛ dza yebotum ayɛ nyina dze aboa hɔn a wɔrehaw na wɔreper hɔn nkwa. Moto nsa frɛ obiara dɛ wɔnkɔ do nkye kɔm na wɔmbɔ mpaa mma hɔn a mbusu yi repira hɔn no. Ɔkõ biara yɛ ewurkãdze yaayaw a otsia biribiara a Jesus Christ gyina do na Ɔkyerɛkyerɛ.

Hɛn mu biara nnkotum ahyɛ aman do anaa binom hɔn ndzeyɛɛ do, anaa hɛn ebusua ebusua mu mba mpo do. Naaso yebotum ahyɛ hɛnho do. Nuambanyin na nkyerɛbaa adɔfo, mefrɛ ndɛ nye dɛ, dɛ hom begyaa ɔkõ ahorow a origyam wɔ hom akoma, hom fie, na hom abrabɔ mu. Hom mfa adwen biara dɛ hom bepira binom nsie—sɛ dɛm adwen no yɛ akoma hyew, tɛkyerɛma a ɔasew, anaa ayawdzi ma obi a ɔafom wo. Agyenkwa no hyɛɛ hɛn dɛ yɛndan asowa kor no so mma no,¹ dɛ yɛndodɔ hɛn atamfo, na yɛnsɔr mma hɔn a wobu hɛn enyimtsia.²

Ɔbɛyɛ yaw na wɔayɛ dzen dɛ yebegyaa ebufuw mu a yɛwɔ atsenkã dɛ hɛn asɛm tsen. Bia ɔbɛyɛ dɛ ma yennkotum dze hɔn bɔn akyɛ, hɔn a hɔn ndzeyɛɛ bɔn sɛɛ binom a wonyim hwee no. Naaso, Agyenkwa no tu hɛn fo dɛ, “yɛmfa nyina hɔn bɔn nkyɛ.”³

Yɛyɛ Asomdwee Hen n’akadofo. Sesei kyɛn ber biara no, yehia asomdwee no a Ɔno nko botum dze aba. Hɛn enyi besi dɛn bɛda asomdwee kwan wɔ wiadze mu ber a yɛronnhwehwɛ ankorankor asomdwee na koryɛ? Nuambahyin na nkyerɛbaa, minyim dɛ dza murususu yi nnyɛ mberɛw. Naaso Jesus Christ akadofo wɔ dɛ wɔkyerɛ fasusu pa ma wiadzemba nyina edzi do. Mototɔ serɛ hom dɛ hom nyɛ dza hom botum ayɛ nyina mmfa nnsiw ankorankor wentwiwentwi a sesei ɔregyam wɔ hom akoma na abrabɔ mu no.

Ɔfrɛ yi dɛ yenyɛ ho biribi no mefaa adwen bi ndaansa yi a wɔkaa me wɔ ber a morohwɛ baskɛtbɔl agordzi bi.

Agordzi no mu no, mber afã a odzi kan no yɛɛ etsipɛn a, nna ɔdandan. Nkyii, aka simaba enum ara no wɔ afã a odzi kan mu no, kuw kor mu ɔkansifo toow bɔɔl fɛɛfɛw bi hyɛɛ mu nyaa nkanee ebiasa. Ɔka simaba kor ara no, no kuwba bi kyeer bɔɔl no a onyaa nkanee kor so ber a mponee abɛn robɔ no! Ntsi dɛm kuw no kɔr nsiesie dan no mu a wɔwɔ nkaanee anan mbordo nye ahoɔhar a ɔda edzi. Wotumii dze dɛm ahoɔhar kɔr afã ebien no dze nyaa konyimdzi wɔ agordzi no mu.

Ahoɔhar yɛ ndam. Hɛn nyina enya ho sũahu bi—mfatoho, wɔ kaar a ɔkɔ hahar anaa adwen a ɔnnsaa a awerɛfir mu ara ɔdan ekyingye.

Ntsi mibisa, ebɛnadze na obotum ekenyan sunsum mu ahoɔhar? Yeehu ahoɔhar pa na ahoɔhar bɔn ho mfatoho. Yenyim Jesus Christ akadofo a wɔbɛsakyeree na hɔn gyedzi nyinii. Naaso yenyim hɔn a nna hɔn gyedzi sii pi a wɔsaan hɔn ekyir. Ahoɔhar botum adan akɔ ɔfã biara.

Yennhia sunsum mu ahoɔhar pa nnkyɛn ma yehia no ndɛ no, ama yɛdze aabra bɔn na mber mu nsɛnkyerɛdze sum a ɔrehyɛ dzendzen ntsɛm no. Sunsum mu ahoɔhar pa bɛma yɛakɔ kan wɔ suro na dadwen a wiadze nsan yarba, asorɛkyɛ begyabegya, asaasetsir mu opuw, na nsordaafo akõkoekõ dze ba no. Sunsum mu ahoɔhar botum aboa hɛn ma yegyina otsĩafo omumuyɛnyi n’ekutukubɔ ano na yeesiw no mbɔdzembɔ dɛ ɔbɛbra hɛn sunsum mu fapem no.

Ndzeyɛɛ pii na obotum ekenyan sunsum mu ahoɔhar pa. Setsie, ɔdɔ, ahobrɛadze, ɔsom, na enyisɔ⁴ yɛ no mu kumaa.

Ndɛ mebɛpɛ dɛ mususu ndzeyɛɛ pɔkyee enum a ɔboboa hɛn ma sunsum mu ahoɔhar pa atahye.

Odzi kan: Kɔ ahyɛmu anamɔn kwan no do na nantsew do.

Ɔnnkyeree na, minyaa adaaso pefee a mihyiaa dɔm kuw kɛse bi. Wobisaa me nsɛmbisa pii, no mu dodow fa ahyɛmu anamɔn kwan no na siantsir a ohia kɛse.

M’adaaso mu no, mekyerɛkyerɛɛ mu dɛ yɛhɛn ahyɛmu anamɔn kwan no do ber a wonuma hɛn na yɛnye Nyankopɔn ridzi hɛn ahyɛmu a odzi kan no.⁵ Ber biara a yedzi sacrament no, yɛbɔ anohoba bio dɛ yɛbɛfa Agyenkwa no ne dzin ato hɛn do, yɛakaa No, na yeesie Ne mbrasɛm.¹⁶ Ɔno ekyir no, Nyankopɔn ma hɛn awerɛhyɛmu dɛ yebotum enya Ewuradze no Sunsum no wɔ hɛn nkyɛn aber nyina.

Ekyir no yedzi ahyɛmu binom kã ho wɔ temple, bea a yenya anohoba akɛse mpo. Ayɛdze na ahyɛmudzi ma hɛn kwan wɔ nyame tum ho. Ahyɛmu anamɔn kwan no nko nye kwan a ogya kɔ nkwagye ntowdo na onnyiewiei nkwa mu.

M’adaaso mu no, nkyii ɔbaa bi bisaa me mbrɛ obi a woebu n’ahyɛmudzi do no botum asan akɔ anamɔn kwan no do. Me nyiano ma n’asɛmbisa no gya hɛn kɔ mo nsusui a otsia ebien no do.

Hom nkopue daa daa nnuho enyigye mu no do.

Osi dɛn na nnuho ho hia tsitsir? Alma kyerɛkyerɛɛ dɛ “mma wɔnnkã asɛmpa biara gyedɛ nnuho nye gyedzi wɔ Ewuradze mu ho.⁷ Wɔhwehwɛ nnuho efi obiara a ɔsɛ nkontaabu hɔ na ɔpɛ onnyiewiei enyimnyam no.⁸ Wonnyi biara mmfi mu. Nyikyerɛ bi a wɔdze maa Nkɔnhyɛnyi Joseph Smith mu no, Ewuradze kasaa tsiaa asɔpɔn Asɔr baanodzifo a wɔannkyerɛkyerɛ hɔn mbofra asɛmpa no.⁹ Nnuhu nye saafee a yɛdze nya mpontu. Gyedzi a ho tsew ma yɛkɔ kan wɔ ahyɛmu anamɔn kwan no do.

Meserɛ mma hom nnsuro anaa hom nntwentweɔn nnuhu. W’awerɛhowdzi yɛ Satan dɛw. Twa do tsiabaa. Yi ne nhyɛdo fi w’abrabɔ mu. Hyɛ ase ndɛ dɛ irinya enyigye a ofi erepɔr nyimpa su no egu.¹⁰ Agyenkwa no dɔ hɛn aber nyina mbom nkanka ber a yenu hɛnho. Ɔabɔ anohoba dɛ kansa “mbepɔw botutu akɔ na akoko atwetwe hɔnho … na mbom m’ayamuyie dze orunntutu mmfi wo nkyɛn.”¹¹

Sɛ inya atsenkã dɛ aman efi ahyɛmu anamɔn kwan no do akɔ ekyir dodow anaa efi ho akyɛr dodow na innyi kwan biara a edze bɛsan a, dɛm no nnyɛ nokwar koraa.¹² Meserɛ kohu wo bishop anaa nkorbata mu President. Ɔno nye Ewuradze n’ananmusinyi na ɔbɔboa wo ma enya nnuhu ho enyigye na ahotɔ ho sũahu.

Afei, kɔkɔbɔ yi: Eresan aba ahyɛmu anamɔn kwan no do nnkyerɛ dɛ abrabɔ bɛyɛ mberɛw. Ɔyɛ dzen papaapa dɛ ebɛfa anamɔn kwan yi do na ɔtɔfabi a ɔtse dɛ afowee tsentsen bi.¹³ Naaso, wɔahyehyɛ afowee no dɛ ɔbɔsɔ hɛn ahwɛ na wɔakyerɛkyerɛ hɛn, ama wɔaatsew hɛn nyimpa su ho, na wɔaboa hɛn ma yɛabɛyɛ ahotseweefo. Ɔno nye kwan nko a ogya kɔ nkwagye ntowdo mu. Nkɔnhyɛnyi kor bi¹⁴ kãa “Nhyira nye ahomka tsebew a hɔn a wodzi Nyankopɔn ne mbrasɛm do no wɔ mu” ho asɛm. “Na hwɛ, woehyira hɔn wɔ adze nyina mu, wɔ honam nye sunsum nyina mu; na sɛ wosuo nokwar no mu dze kɔ ewiei a … [wɔgye] hɔn akɔ sor, [na] wɔnye Nyankopɔn aakɛtsena wɔ enyigye a onnyi ewiei da tsebea no mu.”¹⁵

Erenantsew ahyɛmu anamɔn kwan no do, na edze daa daa nnuho akã ho no, ma sunsum mu ahoɔhar pa ahoɔdzen.

Mo nsusui a otsia ebiasa: Suã Nyankopɔn ho asɛm na mbrɛ Osi yɛ No ndwuma.

Hɛn taferbanyinmbɔmu horow ndɛ mu nye yebohu soronko a ɔda Nyankopɔn ho nokwar na Satan ne ndaadaa ntamu. Dɛm ntsi na Ewuradze abɔ hɛn kɔkɔ dɛ “bɔ mpaa aber nyina, … ama [y]eedzi Satan do konyim, na ama [y]eetum eguan efi Satan no nkowaa a wodzi dwuma ma no no hɔn nsa.”¹⁶

Moses ma hɛn fasusu wɔ mbrɛ yebesi bohu soronko a ɔda Nyankopɔn na Satan ntamu. Ber a Satan bae robɔsɔ Moses ahwɛ no, ohun ndaadaa no osiandɛ nna ɔnye Nyankopɔn nyaa nkitahodzi enyim-na-enyim no ɔnnkyeree. Moses hun Satan ne nyimpa ban ntsɛmara na ɔhyɛɛ no dɛ ofi hɔ mfi.¹⁷ Ber a Satan wɔɔw do no, nna Moses nyim mbrɛ obesi bɛfrɛ Nyankopɔn agye mboa binom akã ho. Moses nyaa ɔsor ahoɔdzen na ɔkãa abɔnsam no enyim bio, rese dɛ, “Fi me nkyɛn fi Satan, osiandɛ Nyame kor yi nko na mobɔsom no, nyia ɔyɛ enyimnyam Nyame no.”¹⁸

Ɔsɛ dɛ yedzi dɛm fasusu no do. Pam Satan ne nhyɛdo fi w’abrabɔ mu! Meserɛ mma nnkã no do nnkɛhyɛ “awerɛhow nye mbusu a onnyi ewiei no bun ase.”¹⁹

Dasegye a “wɔdze Nyankopɔn n’asɛmpa no” annyɛn hɔn, no botum edwuruw egu ntsɛm a ɔyɛ nwanwa.²⁰ Dɛm ntsi, Satan n’ano edur yɛ pefee: Yehia yɛrosɔr Nyame na yerusũa N’asɛmpa no ho daa daa sũahu. Mototɔ serɛ hom dɛ hom mma Nyankopɔn ndzi nyim wɔ hom abrabɔ mu. Hom mma no mber mu dodow a oye. Hom reyɛ dɛm no, hom nhyɛ mbrɛ hom sunsum mu ahoɔhar pa bɛyɛ no nsew.

Nsusui nkanee 4: Hom nhwehwɛ anwanwadze na hom enyi nda no kwan.

Moroni si hɛn tadua dɛ “Nyankopɔn nngyaa dɛ ɔyɛ anwanwadze.”²¹ Kyerɛwsɛm nwoma biara kyerɛ mbrɛ Ewuradze si pɛ dɛ Ɔdze Noho gyegye hɔn a wɔgye No dzi no hɔn abrabɔ mu.²² Ɔpaa Po Memen no mu maa Moses, Ɔboaa Nephi ma ne nsa kãa ayewa mprɛtse no, na Ɔdze duaa Nkɔnhyɛnyi Joseph Smith do dze N’Asɔr sanee bae. Anwanwadze yinom mu kor biara gyee mber na bia ɔnnyɛ dza dɛm ankorankor no bisaa fii Ewuradze hɔ ahyɛse no.

Kwan no ara do no, Ewuradze dze anwanwadze behyira wo sɛ egye No dzi, na “nngye biribiara ho kyim no.”²³ Yɛ sunsum mu edwuma fa hwehwɛ anwanwadze horow. Mpaabɔ mu ara bisa Nyame ma Ɔmboa wo ma fa dɛm gyedzi no dzi dwuma. Mobɔ wo anohoba dɛ ibenya sũahu ama woho dɛ Jesus Christ “ma nyia a ɔtɔ bitsi ahoɔdzen, na nyia a onnyi ahom no ɔto n’ahoɔdzen mu.”²⁴ Ndzɛmba kumabaa na ɔbɛma wo sunsum mu ahoɔhar akɔ ntsɛntsɛm akyen dɛ iruhu Ewuradze a ɔroboa wo ma etutu bepɔw a ɔwɔ w’abrabɔ mu no.

Nsusui nkanee 5: Gyaa wentwiwentwi wɔ wankasa w’abrabɔ mu.

Misi me frɛ do dɛ gyaa wentwiwentwi wɔ wankasa w’abrabɔ mu. Kyerɛ ahobrɛadze, akokodur, na ahoɔdzen a wohia dze akyɛ na wɔdze ahwehwɛ bɔnfakyɛ. Agyenkwa no abɔ anohoba dɛ “na sɛ [yɛ]dze nyimpa hɔn mfom kyɛ hɔn a, [hɛn] ɔsor Egya dze bɛkyɛ [hɛn].”²⁵

Adapɛn ebien ntamu yɛbɛhyɛ Easter fa. Ber yi na ber no ntamu no, moto nsa frɛ wo dɛ ebegyaa ankorankor wentwiwentwi a ɔbrɛ wo adze. Ana biribi wɔ hɔ a obotum akyɛn dza ɔyɛ enyisɔ a ɔfata ma Jesus Christ No Werdambɔ? Sɛ bɔnfakyɛ yɛ dɛ ma onnkotum aba a, totɔserɛ tum a odua Jesus Christ no werdam bɔgya no mu ma ɔmboa wo. Ber a ereyɛ dɛm no, mobɔ wo ankorankor asomdwee na sunsum mu ahoɔhar a ɔbɛyerɛw ho anohoba.

Ber a Agyenkwa no bɔɔ werdam maa adasa nyina no, Obue kwan maa hɔn a wɔka No do no ama woeetum eenya N’ayarsa, ahoɔdzen, na ɔpon no tum. Sunsum mu ndzinoa yinom no wɔ hɔ ma hɔn a wɔhwehwɛ dɛ wobetsie No na wɔka No do.

Mo nuambayin na nkyerɛbaa adɔfo, medze m’akoma nyina mu ntotɔserɛ no, hom nkɔ ahyɛmu anamɔn kwan no do na hom nnantsew do. Hom nya daa daa nnuhu ho enyigye. Hom nsũa Nyankopɔn ho nsɛm na mbrɛ Osi yɛ edwuma. Hwehwɛ anwanwadze na ma w’enyi nda do kwan. Per dɛ ebeyi wentwiwentwi akwa wɔ w’abrabɔ mu.

Ber a hom yɛ ahwehwɛdze yinom no, mobɔ hom anohoba dɛ hom tum bɔbor do dze ahoɔhar akɔ kan wɔ ahyɛmu anamɔn kwan no do, akwansiwdze biara a hom hyia no mpo mmfa ho. Na mobɔ hom ahoɔdzen kɛse a wɔdze betsia nsɔhwɛ, asomdwee mbordo, ahotɔ fi suro ho, na koryɛ wɔ hom ebusua ebusua mu ho anohoba.

Nyame tse ase! Jesus nye Christ no! Ɔtse ase! Ɔdɔ hɛn na Ɔbɔboa hɛn. Megye iyi ho dase wɔ Ɔpomfo, Jesus Christ, ne dzin krɔnkrɔn no mu, amen.