ការបំផុសគំនិតពីព្រះវិញ្ញាណ

ដោយអែលឌើរ ហ្គែរី អ៊ី ស្ទីវ៉ែនសុន

ក្នុងកូរ៉ុមនៃពួកសាវកដប់ពីរនាក់

ភាពជាដៃគូនឹងព្រះវិញ្ញាណបរិសុទ្ធជានិច្ច គឺជាអំណោយទានខាងវិញ្ញាណដ៏អស្ចារ្យបំផុតមួយ ដែលពួកបរិសុទ្ធថ្ងៃចុងក្រោយពេញចិត្ត ។

សេចក្ដីផ្ដើម

ថ្មីៗនេះ ក្រសែភ្នែកកីឡាពិភពលោកបានផ្តោតលើការប្រកួតបាល់ទាត់នារីពិភពលោក ហ្វីហ្វាឆ្នាំ ២០២៣ ដែលប្រទេសអូស្ត្រាលី និងនូវែលសេឡង់ធ្វើជាម្ចាស់ផ្ទះ ។ បានចម្រាញ់អត្តពលិកលំដាប់ពិភពលោកក្រុមជម្រើសជាតិជាង ២០០ ក្រុមមកពីជុំវិញពិភពលោកបានបង្ហាញពីភាពក្លាហាន ការលះបង់ ទេពកោសល្យ និងអត្តពលិកកម្មនិយមរបស់ពួកគេ ខណៈដែលពួកគេប្រកួតដើម្បីកិត្តិយសខ្ពង់ខ្ពស់នៃពិភពបាល់ទាត់ ។

យើងស្ងប់ស្ងែងដល់កីឡាករជាច្រើន និងវិញ្ញាសាផ្សេងៗទៀត ដែលសម្រេចបានជោគជ័យខ្ពស់បំផុតក្នុងជំនាញរបស់ពួកគេ ។ យើងនិយាយអំពីទេពកោសល្យ ឬអំណោយទានដែលព្រះប្រទានឲ្យពួកគេ ។ ការណ៍នេះរាប់ទាំងអ្នកមានអំណោយទានខាងរាំ កាយសម្ព័ន្ធ តន្ត្រី សិល្បៈ ល្ខោន គណិតវិទ្យា វិទ្យាសាស្ត្រ និងអ្វីៗជាច្រើនទៀត ។ បុគ្គលម្នាក់ៗទាំងនេះបង្ហាញពីអំណោយទានដែលព្រះប្រទានឲ្យ ដោយពួកគេខិតខំប្រឹងប្រែង ការសិក្សា និងការអនុវត្តដុសខាត់ និងឲ្យកិត្តិយសពេញមួយជីវិត ។ អំណោយទានដែលព្រះប្រទានធ្វើឲ្យមនុស្សមានអំណោយទាន ។

អនុវត្តអំណោយទានខាងវិញ្ញាណ

ពេលមើលតាមកែវភ្នែកនៃដំណឹងល្អ ព្រះប្រទានអំណោយទានដល់បុត្រាបុត្រីរបស់ទ្រង់នូវអំណោយទានខាងវិញ្ញាណជាច្រើន ធ្វើឲ្យពួកគេក្លាយជាបុគ្គលដែលមានអំណោយទានខាងវិញ្ញាណ ។ សមាជិកសាសនាចក្រដែលរក្សាសេចក្តីសញ្ញាត្រូវបានប្រទានអំណោយទាននៃព្រះវិញ្ញាណ ដែលរួមមានអំណោយទាននៃទីបន្ទាល់អំពីព្រះយេស៊ូវគ្រីស្ទ ជាព្រះអង្គសង្គ្រោះរបស់យើង អំណោយទាននៃព្រះវិញ្ញាណបរិសុទ្ធ អំណោយទាននៃសេចក្តីជំនឿដើម្បីព្យាបាល និងប្រោសឲ្យជា អំណោយទាននៃការញែកដឹង អំណោយទាននៃការទទួលអព្ភូតហេតុ និងអំណោយទាននៃប្រាជ្ញា និងចំណេះដឹង ។^១ ព្រះអម្ចាស់អញ្ជើញយើងឲ្យស្វែងរកអំណោយទានដ៏ល្អបំផុត ពោលគឺអំណោយទានខាងវិញ្ញាណ ។ ទ្រង់ប្រទានអំណោយទានខាងវិញ្ញាណដើម្បីប្រទានពរដល់យើង ហើយប្រើទៅប្រសិទ្ធពរអ្នកដទៃ ។^២

ចូរត្រឡប់ទៅការប្រៀបធៀបរបស់យើងអំពីអ្នកប្រកួតដែលមានអំណោយទានជាច្រើនវិញ វាជារឿងសំខាន់ដើម្បីចងចាំថា អំណោយទានតែម្យ៉ាងមិនមែនធ្វើឲ្យយើងក្លាយជាមនុស្សពូកែនោះទេ ។ ថ្វីដ្បិតតែទេពកោសល្យពីធម្មជាតិពិសេសក៏ដោយ តាមរយៈការប្រឹងប្រែង និងខំហាត់ ដែលអ្នកប្រកួតខិតខំដុសខាត់ និងសំលៀងនោះអាជីពរបស់ពួកគេ ឈានទៅដល់កម្រិតពូកែបំផុត ។ សូម្បីតែអំណោយទានទាំងនោះដែលបានទទួល និងមិនទាន់បានទទួលក្តីក៏ជាញឹកញាប់មាននូវភាសាព្រឺព្រួចមួយថា « តម្រូវឲ្យមានការដុសខាត់ជាមុនសិន » ។

ដូចគ្នានេះដែរ ខ្ញុំបានសង្កេតឃើញការលំបាកនៃការចាប់ផ្ដើមរៀនសូត្រដែលទាក់ទងនឹងអំណោយខាងវិញ្ញាណ ។ ការអនុវត្តអំណោយទានខាងវិញ្ញាណតម្រូវឲ្យមានលំហាត់ខាងវិញ្ញាណ ។ « ដើម្បីទទួលបានព្រះវិញ្ញាណបរិសុទ្ធដឹកនាំនៅក្នុងជីវិត អ្នកតម្រូវឲ្យមានកិច្ចការខាងវិញ្ញាណ ។ ការងារនេះរួមមានការអធិស្ឋានដ៏ក្លៀវក្លា និងការសិក្សាព្រះគម្ពីរឲ្យបានជាប់លាប់ ។ វាក៏រួមមាននូវការរក្សាសេចក្តីសញ្ញា និងព្រះបញ្ញត្តិរបស់ព្រះផងដែរ ។… វារួមមាននូវការទទួលទានសាក្រាម៉ង់ដោយភាពស័ក្តិសមជារៀងរាល់សប្តាហ៍ » ។^៣

តើអ្វីជាផលផ្លែនៃការអនុវត្តអំណោយទានខាងវិញ្ញាណ ? វារួមមានទាំងការបំផុសគំនិតមកពីព្រះវិញ្ញាណ ដើម្បីជួយយើងប្រឈមនឹងតម្រូវការប្រចាំថ្ងៃរបស់យើង ហើយបង្ហាញយើងនូវអ្វីដែលត្រូវធ្វើ និងនិយាយ និងពរជ័យនៃភាពសុខសាន្ដ និងការលួងលោមចិត្ត ។ នៅពេលយើងស្តាប់ ហើយធ្វើតាមការបំផុសគំនិតខាងវិញ្ញាណ នោះព្រះវិញ្ញាណបរិសុទ្ធលើកតម្កើងសមត្ថភាព និងលទ្ធភាពយើងឲ្យលើសពីអ្វីដែលយើងអាចធ្វើដោយខ្លួនឯង ។ អំណោយទានខាងវិញ្ញាណដ៏មានតម្លៃទាំងនេះនឹងជួយយើងក្នុងគ្រប់សណ្ឋាននៃជីវិតរបស់យើង ។^៤

តើអំណោយទាននេះមានសារៈសំខាន់យ៉ាងណា ? ប្រធាន រ័សុល អិម ណិលសុន បានឆ្លើយថា « នៅគ្រាខាងមុខ នឹងមិនអាចរស់រានខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ » ។^៥

របៀបដើម្បីអញ្ជើញ និងស្គាល់ការបំផុសគំនិតនៃព្រះវិញ្ញាណ

ក្នុងអំឡុងនៃការងារបម្រើរបស់ខ្ញុំ ខ្ញុំបានឃើញមនុស្សជាសាកលចង់ ដើម្បីដឹងពីរបៀបអញ្ជើញ និងស្គាល់ការបំផុសគំនិតនៃព្រះវិញ្ញាណបរិសុទ្ធ ។ ការបំផុសគំនិតពីព្រះវិញ្ញាណមានលក្ខណៈផ្ទាល់ខ្លួន ហើយមកតាមរបៀបផ្សេងៗគ្នា ។ ទោះយ៉ាងណា យើងមានពរណាស់ដែលមានប្រសាសន៍របស់ព្យាការី ទាំងពីសម័យបុរាណ និងសម័យទំនើប ផ្តល់ឲ្យយើងនូវការយល់ដឹងដ៏មានតម្លៃអំពីរបៀបទទួលការណែនាំពីព្រះវិញ្ញាណ ។

ខ្ញុំសូមផ្តល់ជូននូវគោលការណ៍ណែនាំចំនួនបួន ដែលអាចជាជំនួយដល់បងប្អូនក្នុងការអញ្ជើញ និងស្គាល់ការបំផុសគំនិតនៃព្រះវិញ្ញាណ ។

ឈរនៅក្នុងទីបរិសុទ្ធ

ទីមួយគឺត្រូវឈរនៅកន្លែងបរិសុទ្ធ ។^៦ ថ្មីៗនេះ ខ្ញុំបានចូលរួមការសម្ភោធព្រះវិហារបរិសុទ្ធតូក្យូប្រទេសជប៉ុន ។ ការឆ្លើយតបចំពោះការអញ្ជើញជាផ្លូវការត្រូវបានផ្ញើទៅកាន់ទាំងភ្ញៀវសារព័ត៌មាន និងភ្ញៀវកិត្តិយស គឺទទួលបានហួសពីការរំពឹងទុក ។ មនុស្សរាប់រយនាក់បានចូលរួមក្នុងដំណើរទស្សនាព្រះវិហារបរិសុទ្ធទាំងនេះ ។ ភ្ញៀវកិត្តិយសទាំងឡាយចាប់អារម្មណ៍ខ្លាំងចំពោះភាពស្រស់ស្អាតនៃព្រះវិហារបរិសុទ្ធ រួមទាំងគំរូ និងការតុបតែងដែលផ្សារភ្ជាប់ប្រពៃណីជប៉ុនយ៉ាងជ្រាលជ្រៅ ។ អ្វីដែលកាន់តែសំខាន់នោះ គឺគារវភាព និងការគោរព ដែលភ្ញៀវមាន ខណៈពិធីបរិសុទ្ធសម្រាប់បុព្វការីជនត្រូវបានពិពណ៌នានៅក្នុងបន្ទប់ដែលពិធីបរិសុទ្ធទាំងនេះនឹងធ្វើឡើង ។ ប៉ុន្តែដែលកក់ក្ដៅបំផុតនោះគឺជាការបំផុសពីព្រះវិញ្ញាណ ។

គ្រានៅជាមួយមន្ត្រីរដ្ឋាភិបាលម្នាក់ នៅតែដក់ជាប់ក្នុងចិត្តខ្ញុំ ។ បន្ទាប់ពីស្មឹងស្មាធដោយស្ងប់ស្ងាត់មួយសន្ទុះនៅក្នុងបន្ទប់សេឡេស្ទាល គាត់បានខ្សឹបដាក់ត្រចៀកខ្ញុំ ដោយរំជួលចិត្ត និងប៉ះពាល់ដួងចិត្តខ្លាំងថា « សូម្បីតែខ្យល់ដែលខ្ញុំដកដង្ហើមក្នុងបន្ទប់នេះក៏មានអារម្មណ៍ខុសគ្នាដែរ » ។ ខ្ញុំដឹងថាគាត់កំពុងព្យាយាមពិពណ៌នាអំពីវត្តមាននៃព្រះវិញ្ញាណបរិសុទ្ធ ដែលពិតជាគង់នៅក្នុងកន្លែងពិសិដ្ឋ ។ បើបងប្អូនសង្ឃឹមទទួលអារម្មណ៍ពីព្រះវិញ្ញាណ សូមនៅកន្លែងដែលព្រះវិញ្ញាណអាចគង់នៅយ៉ាងងាយ ។

ព្រះវិហារបរិសុទ្ធ និងផ្ទះរបស់យើង គឺជាកន្លែងពិសិដ្ឋបំផុតនៃកន្លែងឧទ្ទិសឆ្លងទាំងនេះ ។ នៅក្នុងកន្លែងទាំងនេះ យើងងាយយាងអញ្ជើញ និងទទួលស្គាល់ព្រះវិញ្ញាណបរិសុទ្ធ ។ កន្លែងបរិសុទ្ធផ្សេងទៀតរួមមានសាលប្រជុំ អគារសិក្ខាសាលា និងវិទ្យាស្ថាន និងទីកន្លែងប្រវត្តិសាស្ត្រសាសនាចក្រ និងមជ្ឈមណ្ឌលអ្នកទស្សនាទាំងឡាយ ។ ឈរនៅទីបរិសុទ្ធ

ឈរជាមួយបុគ្គលបរិសុទ្ធ

ទីពីរ ឈរជាមួយបុគ្គលបរិសុទ្ធ ។ ខ្ញុំនឹងរៀបរាប់អំពីគោលការណ៍ណែនាំទីពីរចេញពីការចងចាំមួយទៀត ។

ខ្ញុំមិនដែលភ្លេចការចូលរួមការប្រជុំធម្មនិដ្ឋានមួយដែលប្រារព្ធឡើងនៅទីលានប្រកួតកីឡាដ៏ល្បីមួយទេ ។ ជាធម្មតាទីលាននេះពោរពេញទៅដោយអ្នកគាំទ្រហ៊ោកញ្ជ្រៀវអបអរក្រុមម្ចាស់ផ្ទះ ហើយសើចចំអកដល់គូប្រកួតរបស់ពួកគេ ។ ប៉ុន្តែនៅយប់នេះ បរិយាកាសខុសប្លែកបន្តិច ។ ទីលាននោះមានសុទ្ធតែមនុស្សវ័យក្មេងរាប់ពាន់នាក់ដែលប្រមូលផ្ដុំគ្នាគោរព និងរំឭកដល់ជីវិតរបស់ព្យាការី យ៉ូសែប ស្ម៊ីធ ។ គាវរភាព សំឡេងស្ងប់ស្ងាត់ អំណរគុណ និងដួងចិត្តដែលពោរពេញដោយការអធិស្ឋានរបស់ពួកគេបានបំពេញទីលាននេះដោយវត្តមាននៃព្រះវិញ្ញាណបរិសុទ្ធ ។ ខ្ញុំអាចមើលឃើញព្រះវិញ្ញាណនៅលើផ្ទៃមុខពួកគេយ៉ាងច្បាស់ ។ វាគឺជាអំណោយទាននៃព្រះវិញ្ញាណបរិសុទ្ធស្ដែងចេញជាសកម្មភាពទីបន្ទាល់អះអាងថ្លែងពី យ៉ូសែប ស្ម៊ីធ និងការស្ដារឡើងវិញនៃដំណឹងល្អ ។

គ្មានអ្វីអាចឃាត់ព្រះវិញ្ញាណមិនឲ្យគង់នៅក្នុងចំណោមការប្រមូលផ្ដុំនៃជនបរិសុទ្ធឡើយ ។ បើបងប្អូនសង្ឃឹមទទួលអារម្មណ៍ពីព្រះវិញ្ញាណ សូមនៅជាមួយបុគ្គលដែលព្រះវិញ្ញាណអាចគង់នៅយ៉ាងងាយនោះ ។ ព្រះអង្គសង្រ្គោះបានមានព្រះបន្ទូលថា « ដ្បិតកន្លែងណាដែលមាន ២ ឬ ៣ នាក់ប្រជុំជាមួយគ្នា ដោយនូវឈ្មោះខ្ញុំ នោះខ្ញុំក៏នៅកណ្តាលចំណោមអ្នកទាំងនោះដែរ » ។^៧ សម្រាប់យុវវ័យ សូមពិចារណាអំពីការប្រមូលផ្តុំបុគ្គលបរិសុទ្ធរបស់ក្មួយៗ មានកូរ៉ុម និងថ្នាក់របស់ក្មួយៗ FSY និងថ្នាក់សិក្ខាសាលា វួដ និងសកម្មភាពស្តេក —ក្រុមចម្រៀងវួដ ។ សូមជ្រើសរើសនៅជាមួយបុគ្គលសុចរិត ហើយទៅកន្លែងដែលមានសេចក្តីសុចរិត ។ ស្វែងរកកម្លាំងរបស់បងប្អូននៅក្នុងចំណោមមនុស្សដទៃ ។ ស្វែងរកមិត្តល្អ ។ ធ្វើជាមិត្តល្អ ។ គាំទ្រគ្នានៅគ្រប់កន្លែងដែលបងប្អូននៅ ។ ឈរជាមួយបុគ្គលបរិសុទ្ធ ។

ថ្លែងទីបន្ទាល់អំពីសេចក្តីពិតដ៏បរិសុទ្ធ

ទីបី ថ្លែងទីបន្ទាល់អំពីសេចក្ដីពិតដ៏បរិសុទ្ធឲ្យបានញឹកញាប់តាមដែលបងប្អូនអាចធ្វើបាន ។ ជានិច្ចកាលព្រះដ៏ជាជំនួយចែកចាយសំឡេងទ្រង់ ពេលយើងថ្លែងទីបន្ទាល់ដោយសំឡេងរបស់យើង ។ ព្រះវិញ្ញាណថ្លែងទីបន្ទាល់ទៅកាន់អ្នកនិយាយ និងអ្នកស្តាប់ដូចគ្នា ។

ខ្ញុំចាំបានថា ខ្ញុំធ្លាប់ជិះតាក់ស៊ីរយៈ ៤៥ នាទីនៅទីក្រុងញូវយ៉ក ។ នៅក្នុងការសន្ទនាដ៏កក់ក្តៅអំពីដំណឹងល្អជាមួយអ្នកបើកបរក្នុងអំឡុងដែលខ្ញុំធ្វើដំណើរទៅអាកាសយានដ្ឋាន ខ្ញុំបានបង់ប្រាក់ឲ្យគាត់ ហើយរៀបចំខ្លួនចេញពីតាក់ស៊ី ។ រួចខ្ញុំភ្ញាក់ខ្លួនថា ខ្ញុំមិនបានថ្លែងទីបន្ទាល់អំពីអ្វីដែលខ្ញុំបានចែកចាយនោះទេ ។ ឈប់សិន ខ្ញុំបានចែកចាយទីបន្ទាល់សាមញ្ញខ្លីមួយ ដែលយាងអញ្ជើញព្រះវិញ្ញាណមក ធ្វើឲ្យយើងទាំងពីរនាក់ទឹកភ្នែករលីងលោង ។

នៅពេលបងប្អូនស្វែងរក និងឆ្លៀតឱកាសចែកចាយទីបន្ទាល់បងប្អូននឹងអ្នកដទៃ នោះបងប្អូននឹងបង្កើតពេលវេលាដើម្បីស្គាល់ព្រះវិញ្ញាណផ្ទាល់ខ្លួន ។

សូមស្តាប់ព្រះវិញ្ញាណបរិសុទ្ធ

គោលការណ៍ចុងក្រោយគឺការស្តាប់ព្រះវិញ្ញាណបរិសុទ្ធ ។ ទ្រង់អាចធ្វើជាគូកនយើងជានិច្ច ប៉ុន្តែទ្រង់មានបន្ទូលដោយទន់ភ្លន់ និងស្ងប់ស្ងាត់ ។ ព្យាការី អេលីយ៉ា បានរកឃើញថា ព្រះសូរសៀងរបស់ព្រះអម្ចាស់មិននៅក្នុងខ្យល់ ការរញ្ជួយដី ឬភ្លើងឡើយ ប៉ុន្តែជា « សំឡេងតូចរហៀងៗ » ។^៨ ព្រះសូរសៀង « ពុំមែនជាសូរផ្គរលាន់ទេ » ប៉ុន្តែជា « សំឡេងរហៀងៗនៃភាពស្រទន់ឥតខ្ចោះ ហាក់បីដូចជាពាក្យខ្សឹប » ប៉ុន្តែព្រះសូរសៀងនេះអាច « ចាក់ទំលុះទៅដល់ទាំងព្រលឹង » ។^៩

ប្រធាន ប៊យដ៍ ឃេ ផាកកឺ បានថ្លែងថា ៖ « ព្រះវិញ្ញាណពុំទាញការយកចិត្តទុកដាក់របស់យើងដោយការស្រែក ឬចាប់រលាក់ដៃយើងខ្លាំងៗនោះទេ ។ តែផ្ទុយទៅវិញព្រះវិញ្ញាណខ្សឹប ។ ព្រះវិញ្ញាណមានលក្ខណៈទន់ភ្លន់ខ្លាំង បើយើងវីវក់ នោះយើងប្រហែលជាមិនទទួលអារម្មណ៍ដឹងពីទ្រង់ទាល់តែសោះ » ។^១០ ខ្ញុំបានសង្កេតឃើញថា ពេលខ្លះព្រះសូរសៀងទ្រង់ស្រទន់ណាស់ ឬខ្ញុំរវល់ពេកដែលមនុស្សជាទីស្រឡាញ់ម្នាក់បានឮសូរសៀងនេះជំនួសខ្ញុំ ។ ការបំផុសគំនិតពីព្រះវិញ្ញាណបរិសុទ្ធមកកាន់ខ្ញុំបានកើតមានឡើងជាច្រើនដងតាមរយៈភរិយាខ្ញុំ លីសា ។ ឪពុកម្តាយ ឬថ្នាក់ដឹកនាំដ៏សុចរិតអាចទទួលបានការណែនាំដ៏បំផុសគំនិតសម្រាប់បងប្អូនផងដែរ ។

សំឡេងស្រែកហ៊ោ និងការឈ្លោះប្រកែកគ្នាដែលមាននៅក្នុងពិភពលោកអាចនឹងមានឥទ្ធិពលគ្របលើការបំផុសគំនិតនៃព្រះវិញ្ញាណបរិសុទ្ធដ៏ស្ងប់ស្ងាត់ ហើយតូចរហៀងនោះ ។ សូមស្វែងរកកន្លែងស្ងាត់មួយ កន្លែងបរិសុទ្ធមួយ ដែលបងប្អូនអាចព្យាយាមដើម្បីទទួលបានការដឹកនាំពីព្រះវិញ្ញាណ ។

ពាក្យណែនាំមួយចំនួន

នៅពេលបងប្អូនពិចារណាអំពីគោលការណ៍ទាំងនេះដើម្បីយាងអញ្ជើញ និងស្គាល់ព្រះវិញ្ញាណ សូមពិចារណាពាក្យណែនាំខាងក្រោមនេះដោយយកចិត្តទុកដាក់ ។^១១

បញ្ជាក់ពីការបំផុសគំនិតខាងវិញ្ញាណរបស់បងប្អូន ។ ឧទាហរណ៍ ការបំផុសពីព្រះវិញ្ញាណនឹងស្របទៅនឹងបទគម្ពីរ និងការបង្រៀនរបស់ព្យាការីដែលនៅរស់ ។

ត្រូវប្រាកដថាអារម្មណ៍ដែលបងប្អូនទទួលបានគឺស្របនឹងការចាត់តាំងរបស់បងប្អូន ។ លុះត្រាតែបងប្អូនត្រូវបានហៅដោយសិទ្ធិអំណាចត្រឹមត្រូវ នោះការបំផុសគំនិតពីព្រះវិញ្ញាណមិនត្រូវបានប្រទានឲ្យបងប្អូនដើម្បីប្រឹក្សា ឬកែតម្រូវអ្នកដទៃឡើយ ។

រឿងខាងវិញ្ញាណមិនអាចបង្ខំបានទេ ។ បងប្អូនអាចបណ្ដុះអាកប្បកិរិយា និងបរិយាកាសដែលអញ្ជើញព្រះវិញ្ញាណ ហើយបងប្អូនអាចរៀបចំខ្លួន ប៉ុន្តែបងប្អូនមិនអាចកំណត់ពីរបៀប ឬពេលដែលការបំផុសគំនិតមកដល់ឡើយ ។ ចូរអត់ធ្មត់ និងទុកចិត្តថា បងប្អូននឹងទទួលអ្វីដែលបងប្អូនត្រូវការ កាលពេលវេលាមកដល់ ។

ប្រើការវិនិច្ឆ័យដ៏ល្អបំផុតរបស់បងប្អូន ។ ពេលខ្លះ យើងចង់ទទួលបានការដឹកនាំពីព្រះវិញ្ញាណនៅគ្រប់កិច្ចការ ។ ប៉ុន្តែជារឿយៗព្រះអម្ចាស់សព្វព្រះទ័យចង់ឲ្យយើងប្រើបញ្ញាដែលព្រះប្រទានឲ្យ ហើយធ្វើសកម្មភាពតាមរបៀបដែលស្របទៅនឹងការយល់ដឹងដ៏ល្អបំផុតរបស់យើង ។ ប្រធាន ដាល្លិន អេក អូក បានបង្រៀន ៖

« បំណងដើម្បីត្រូវបានដឹកនាំដោយព្រះអម្ចាស់ គឺជាកម្លាំងមួយ ប៉ុន្តែ វាចាំបាច់ត្រូវអមដោយការយល់ដឹងមួយថា ព្រះវរបិតាសួគ៌យើង បានទុកឲ្យយើងជ្រើសរើសផ្ទាល់ខ្លួន ចំពោះការសម្រេចចិត្តជាច្រើន ។… មនុស្សដែលព្យាយាមដាក់ការសម្រេចចិត្តទាំងអស់ទៅឲ្យព្រះអម្ចាស់ ហើយទូលអង្វរសូមវិវរណៈនៅគ្រប់ជម្រើសមិនយូរមិនឆាប់នឹងស្ថិតក្នុងស្ថានភាពដែលពួកគេអធិស្ឋានសូមការណែនាំ តែមិនបានទទួលវាឡើយ ។…

« យើងគួរសិក្សារឿងទាំងឡាយក្នុងគំនិតរបស់យើង ។ … បន្ទាប់មក យើងគួរតែអធិស្ឋានសម្រាប់ការណែនាំ ហើយធ្វើតាម ។ … បើយើងមិនទទួលបានការដឹកនាំ យើងគួរធ្វើតាមការវិនិច្ឆ័យដ៏ល្អបំផុតរបស់យើង » ។^១២

សេចក្ដីបញ្ចប់ជាមួយនឹងការអញ្ជើញ

សរុបសេចក្តីមក ពួកបរិសុទ្ធថ្ងៃចុងក្រោយគួរតែជាមនុស្សដែលមានអំណោយទានក្នុងការរក្សាសេចក្តីសញ្ញា ។ យ៉ាងណាក៏ដោយ យើងម្នាក់ៗនៅតែតម្រូវឲ្យខិតខំអនុវត្តអំណោយទានខាងវិញ្ញាណ បន្ទាប់មកយាងអញ្ជើញ ហើយរៀនស្គាល់ការបំផុសគំនិតនៃព្រះវិញ្ញាណ ។ គោលការណ៍ណែនាំចំនួនបួនដើម្បីជួយយើងក្នុងការខិតខំខាងវិញ្ញាណដ៏សំខាន់នេះគឺ ៖

ឈរនៅទីបរិសុទ្ធ ។
ឈរជាមួយបុគ្គលបរិសុទ្ធ ។
ថ្លែងទីបន្ទាល់អំពីសេចក្ដីពិតដ៏បរិសុទ្ធ ។
សូមស្តាប់ព្រះវិញ្ញាណបរិសុទ្ធ ។

សមត្ថភាពរបស់បងប្អូនក្នុងការយាងអញ្ជើញ និងទទួលស្គាល់ការបំផុសគំនិតនៃព្រះវិញ្ញាណនឹងអភិវឌ្ឍមួយជំហានម្តងៗ ។ « ការកាន់តែស្គាល់ភាសានៃព្រះវិញ្ញាណ គឺដូចជាការរៀនភាសាផ្សេងមួយទៀតដែរ ។ វាគឺជាដំណើរការសន្សឹមៗមួយដែលតម្រូវឲ្យមានការខិតខំយ៉ាងឧស្សាហ៍ » ។^១៣

ជាថ្មីម្ដងទៀត សូមចងចាំថា ក្នុងនាមជាពួកបរិសុទ្ធថ្ងៃចុងក្រោយ អ្នកមានអំណោយទាន ។ សូមស្រមៃពីទិដ្ឋភាពថ្ងៃអាទិត្យតមអាហារស្រដៀងគ្នានេះ ដែលរៀបរាប់ប្រាប់ខ្ញុំកាលថ្មីៗនេះ ។ មានក្មេងម្នាក់ឈរលើឈើកំណល់ជើងដែលមើលស្ទើរតែមិនឃើញនៅលើវេទិកា ។ ឪពុកនាងបានឈរក្បែរនាងដើម្បីផ្តល់កម្លាំងចិត្ត និងជួយដោយខ្សឹបដាក់ត្រចៀកនាង ខណៈនាងបានចែកចាយដោយមោទនភាពថា « ខ្ញុំជាកូនរបស់ព្រះ » ។

ទីបន្ទាល់មួយទៀតគឺមកពីយុវមជ្ឈិមវ័យម្នាក់ដែលបានចាប់ផ្តើមនិយាយដោយការភ័យខ្លាចថា « ខ្ញុំចង់មានអ្នកខ្សឹបដាក់ត្រចៀកផងដែរ » ។ បន្ទាប់មក នាងមានការបំផុសគំនិត ហើយបានថ្លែងទីបន្ទាល់ថា « ខ្ញុំមាននរណាម្នាក់ខ្សឹបដាក់ត្រចៀកខ្ញុំបែបនោះគឺ— ព្រះវិញ្ញាណបរិសុទ្ធ ! »

ខ្ញុំសូមបញ្ចប់ដោយការអញ្ជើញមួយ ជាពិសេសចំពោះយុវវ័យ ។ បងប្អូនជាច្រើនចាប់ផ្តើមថ្ងៃរបស់ខ្លួនដោយឈរនៅមុខកញ្ចក់ ។ ថ្ងៃស្អែក សប្តាហ៍នេះ ឆ្នាំនេះ ជានិច្ចកាល ចូរឈរមួយភ្លែត ដូចចាំមើលខ្លួនឯងក្នុងកញ្ចក់ដែរ ។ ចូរគិតក្នុងចិត្ត ឬបើប្អូនៗចូលចិត្ត ចូរនិយាយខ្លាំងៗថា ៖ « មើលខ្ញុំចុះ ! ខ្ញុំអស្ចារ្យណាស់ ! ខ្ញុំជាកូនរបស់ព្រះ ! ទ្រង់ស្គាល់ខ្ញុំ ! ទ្រង់ស្រឡាញ់ខ្ញុំ ! ខ្ញុំមានអំណោយទាន—អំណោយទានដោយមានព្រះវិញ្ញាណបរិសុទ្ធ ជាដៃគូដ៏ខ្ជាប់ខ្ជួនរបស់ខ្ញុំ ! »

ខ្ញុំសូមបន្ថែមទីបន្ទាល់របស់ខ្ញុំទៅកាន់បងប្អូន ដែលជាពួកបរិសុទ្ធថ្ងៃចុងក្រោយ ជាអ្នកមានអំណោយទាន អំពីព្រះជាព្រះវរបិតា ព្រះយេស៊ូវគ្រីស្ទ និងព្រះវិញ្ញាណបរិសុទ្ធ ដែលថ្លែងទីបន្ទាល់អំពីទ្រង់ ។ នៅក្នុងព្រះនាមនៃព្រះយេស៊ូវគ្រីស្ទអាម៉ែន ៕