ព្រះស្គាល់ ហើយស្រឡាញ់បងប្អូន

ដោយ អែលឌើរ អេឡាន ធី ហ្វីលីប

ក្នុងពួកចិតសិបនាក់

ផែនការនៃសុភមង្គលរបស់ព្រះ គឺសម្រាប់បងប្អូនទាំងអស់គ្នា ។ បងប្អូនគឺជាបុត្រដ៏មានតម្លៃរបស់ទ្រង់ ហើយមានតម្លៃមហិមា ។

ប្រាំមួយឆ្នាំកន្លងទៅគ្រួសារយើងបានធ្វើដំណើរនាពេលយប់ នៅក្រៅក្រុងOxford បន្ដិច ។ ជាញឹកញាប់ ពេលមានកុមារតូចៗ យើងត្រូវរកកន្លែងឈប់ ដើម្បីរកកន្លែងដែលមានហាង និងភោជនីយដ្ឋានផ្សេងៗ ។ ច្បាស់ណាស់ យើងបានចូលឡាន ទៅមើលកន្លែងនោះ ហើយក៏ចេញឡានមកវិញ បន្ដដំណើររបស់យើងទៅទៀត ។

ដប់ប្រាំនាទីក្រោយមក កូនប្រុសច្បងរបស់យើងបានសួរសំណួរសំខាន់មួយថា ៖ « ចាសស្ពើរ នៅឯណា ? » ចាសស្ពើរ អង្គុយម្នាក់ឯងនៅកៅអីក្រោយគេ ។ យើងស្មានថាគាត់បានដេកលក់ ឬពួន ឬលេងល្បិចអីដាក់យើង ។

នៅពេលបងប្រុសគាត់រកមើលនៅកៅអីខាងក្រោយឲ្យច្បាស់ យើងដឹងថាកូនប្រុសអាយុប្រាំឆ្នាំរបស់យើង មិននៅក្នុងឡានទេ ។ ពួកយើងធ្លាក់ថ្លើមក្ដុក ។ នៅពេលយើងបកទៅកន្លែងសេវាកម្មនោះវិញ ពួកយើងសូមអង្វរដល់ព្រះវរបិតាឲ្យថែរក្សា ចាសស្ពើរ ឲ្យមានសុវត្ថិភាព ។ ពួកយើងបានទូរសព្ទទៅប៉ូលីស ហើយបានផ្ដល់ដំណឹងដល់ពួកគេអំពីហេតុការណ៍ ។

នៅពេលពួកយើងបានទៅដល់ទាំងអន្ទះសារ រយៈពេល ៤០ នាទីក្រោយមក យើងបានឃើញឡានប៉ូលីសពីរគ្រឿងចតនៅ សួន បើកភ្លើងស៊ីញ៉ូ ។ ចាសស្ពើរ ជិះនៅក្នុងឡាន កំពុងលេងប៊ូតុង ។ ខ្ញុំចាំមិនភ្លេចពីអារម្មណ៍អំណរ ដែលពួកយើងបានទៅជួបជុំនឹងគាត់វិញ ។

ការបង្រៀនប្រៀបធៀបជាច្រើនរបស់ព្រះអង្គសង្គ្រោះ ផ្ដោតទៅលើការប្រមូលផ្ដុំ ការស្ដារឡើងវិញ ឬការព្យាយាមស្វែងរកអ្វីដែលបានខ្ចាត់ព្រាត់ ឬបាត់បង់ ។ ព្រះអង្គសង្គ្រោះបានបង្រៀនពាក្យប្រៀបប្រដូចអំពីចៀមដែលវង្វេងបាត់ កាក់ដែលបាត់ និងកូនដែលខ្ជះខ្ជាយ ។.^១

ដូចដែលហេតុការណ៍ជាមួយនឹង ចាសស្ពើរ នេះបានដក់ជាប់ក្នុងចិត្តខ្ញុំជាច្រើនឆ្នាំ ខ្ញុំបាននឹកគិតអំពីអត្តសញ្ញាណដ៏ទេវភាព និងសារៈសំខាន់នៃកូនចៅរបស់ព្រះ ព្រះចេស្ដាដ៏ប្រោសលោះនៃព្រះយេស៊ូវគ្រីស្ទ និងសេចក្ដីស្រឡាញ់ដ៏ឥតខ្ចោះរបស់ព្រះវរបិតាសួគ៌ ដែលទ្រង់ស្គាល់បងប្អូន និងខ្ញុំ ។ ខ្ញុំសង្ឃឹមចង់ថ្លែងជាសាក្សីអំពីសេចក្ដីពិតទាំងនេះ នាថ្ងៃនេះ ។

I. បុត្រនៃព្រះ

ជីវិតតែងមានឧបសគ្គ ។ មនុស្សជាច្រើនមានអារម្មណ៍លើសលប់ ឯកា ឯកោ ឬនឿយហត់ ។ នៅពេលរឿងរ៉ាវមានការលំបាក យើងអាចមានអារម្មណ៍ថា យើងដើរវង្វេង ឬធ្លាក់ចុះ ។ ដោយដឹងថា យើងទាំងអស់គ្នាគឺជាកូនរបស់ព្រះ និងជាសមាជិកនៃគ្រួសារអស់កល្បរបស់ទ្រង់ វានឹងជួយស្ដារអារម្មណ៍នៃភាពមានចំណែក និងគោលបំណងឡើងវិញ ។^២

ប្រធាន អិម. រ័សុល បាឡឺត បានចែកចាយថា ៖ « មានអត្តសញ្ញាណដ៏សំខាន់មួយ ដែលយើងទាំងអស់គ្នាមានក្នុងពេលនេះ និងជារៀងរហូត ។… នោះគឺថា បងប្អូន គឺជា ហើយនឹងជាបុត្រា ឬបុត្រីរបស់ព្រះជានិច្ច ។ ការយល់ដឹងពីសេចក្ដីពិតនេះ —— ពេលយល់ដឹងពិត ហើយឱបក្រសោបយកវា — នោះវាគឺជាការផ្លាស់ប្តូរជីវិត ។ ^៣

សូមកុំយល់ខុស ឬគិតថាបងប្អូនពុំសំខាន់ចំពោះព្រះវរបិតាសួគ៌នោះឡើយ ។ បងប្អូនពុំមែនជាផលពីធម្មជាតិដែលកើតមកដោយចៃដន្យ ឬជប់ចេញមក ឬកើតមកពីពេលវេលារួមផ្សំនឹងឱកាសនោះទេ ។ កន្លែងណាមានការតុបតែង ទីនោះមានអ្នកតុបតែង ។

ជីវិតរបស់បងប្អូន មានអត្ថន័យ និងគោលបំណង ។ ការស្ដារឡើងវិញជាបន្ដបន្ទាប់នៃដំណឹងល្អរបស់ព្រះយេស៊ូវគ្រីស្ទ នាំពន្លឺ និងការយល់ដឹងទាក់ទងទៅនឹងអត្តសញ្ញាណដ៏ទេវភាព របស់បងប្អូន ។ បងប្អូន គឺ ជាបុត្រ សំណព្វ របស់ព្រះវរបិតាសួគ៌ ។ បងប្អូនគឺជាប្រធានបទដ៏សំខាន់នៃដំណើរឿងប្រៀបធៀប និងការបង្រៀនទាំងអស់នោះ ។ ព្រះស្រឡាញ់បងប្អូនយ៉ាងខ្លាំង ដែលទ្រង់បានបញ្ជូនព្រះរាជបុត្រារបស់ទ្រង់មកព្យាបាល សង្គ្រោះ និងប្រោសលោះបងប្អូន ។^៤

ព្រះយេស៊ូវគ្រីស្ទ បានទទួលស្គាល់ធម្មជាតិដ៏ទេវភាព និងតម្លៃដ៏អស់កល្បនៃមនុស្សម្នាក់ៗ ។ ^៥ ទ្រង់បានពន្យល់អំពីរបៀបដែលបទបញ្ញត្តិធំពីរ ឲ្យស្រឡាញ់ព្រះ និងស្រឡាញ់អ្នកជិតខាង គឺជាគ្រឹះនៃបទបញ្ញត្តិទាំងអស់របស់ព្រះ ។ ^៦ ទំនួលខុសត្រូវដ៏ទេវភាព មួយរបស់យើង គឺមើលថែដល់អ្នកខ្វះខាត ។ ^៧ នេះជាមូលហេតុដែលក្នុងនាមជាសិស្សរបស់ព្រះយេស៊ូវគ្រីស្ទ ពួកយើង « រែកបន្ទុកគ្នាទៅវិញទៅមក … ទួញយំជាមួយអស់អ្នកណាដែលទួញយំ… ហើយលួងលោមចិត្តដល់អស់អ្នកណាដែលត្រូវការការលួងលោមចិត្ត » ។ ^៨

សាសនា គឺពុំមែនគ្រាន់តែអំពីទំនាក់ទំនងរបស់យើងនឹងព្រះប៉ុណ្ណោះទេ វាក៏ជាទំនាក់ទំនងរបស់យើងជាមួយគ្នានឹងគ្នាផងដែរ ។ អែលឌើរ ជែហ្វ្រី អរ ហូឡិន បានពន្យល់ថា ភាសាអង់គ្លេស ពាក្យថា សាសនាកើតចេញមកពីភាសាឡាតាំង religareដែលមានន័យថា « ឲ្យចង » ឬ ពាក្យកាន់តែចំគឺថា « ឲ្យចងជាថ្មី » ។ ដូច្នេះ « សាសនាពិត [ គឺជា ]ចំណងដែលចងយើងទៅនឹងព្រះ និងចំពោះគ្នាទៅវិញទៅមក » ។^៩

របៀបដែលយើងប្រព្រឹត្តនឹងគ្នា គឺពិតជាសំខាន់ណាស់ ។ ប្រធាន រ័សុល អិម ណិលសុន បង្រៀនថា « សាររបស់ព្រះអង្គសង្គ្រោះច្បាស់លាស់ ៖ ពួកសិស្សរបស់ទ្រង់[ ពិត ] ជួយស្ថាបនា លើកស្ទួយ លើកទឹកចិត្ត បញ្ចុះបញ្ចូល និងបំផុសគំនិត » ។^១០ ការណ៍នេះគឺកាន់តែសំខាន់ នៅពេលអ្នកធ្វើដំណើរដែលជាបងប្អូនយើង មានអារម្មណ៍ថាពួកគាត់វង្វេង ឯកោ បំភ្លេច ឬដកខ្លួនចេញ ។

យើងពុំចាំបាច់ត្រូវមើលឆ្ងាយដើម្បីស្វែងរកអ្នកដែលមានបញ្ហានោះទេ ។ យើងអាចចាប់ផ្ដើមដោយការជួយនរណាម្នាក់នៅក្នុងគ្រួសារ ក្រុមជំនុំ ឬសហគមន៍មូលដ្ឋានរបស់យើងផ្ទាល់ ។ យើងក៏អាចព្យាយាមជួយសង្គ្រោះដល់ការរងទុក្ខរបស់មនុស្ស ៧០០ លាននាក់ដែលកំពុងរស់នៅយ៉ាងក្រីក្រ ហើយ ^១១ឬ ១០០ លាននាក់ ដែលត្រូវបង្ខំឲ្យចំណាកស្រុក ដោយសារតែ ការបៀតបៀន ជម្លោះ និងអំពើហឹង្សា លើអត្ថសញ្ញាណ ។^១២ ព្រះយេស៊ូវគ្រីស្ទ គឺជាគំរូដ៏ឥតខ្ចោះនៃការមើលថែដល់អ្នកទាំងឡាយដែលខ្វះខាត — អ្នកស្រេកឃ្លាន មនុស្សចម្លែក អ្នកឈឺ អ្នកក្រីក្រ និងអ្នកជាប់ឃុំឃាំង ។ កិច្ចការរបស់ទ្រង់ គឺជាកិច្ចការរបស់យើង ។

អែលឌើរ ហ្គែរីត ដបុលយូ ហ្គង បង្រៀនថា « ជាញឹកញាប់ ដំណើរត្រឡប់ទៅព្រះវិញរបស់យើងគឺស្ថិតនៅលើសាមគ្គីភាព » ។ ^១៣ ដូច្នោះ វួដរបស់យើង គួរតែជាជម្រកមួយសម្រាប់កូនចៅរបស់ព្រះទាំងអស់ ។ តើយើងចូលរួមព្រះវិហារដោយអកម្ម ឬទៅចូលរួមបង្កើតជាសហគមន៍ដែលមានគោលបំណងថ្វាយបង្គំ ចងចាំព្រះគ្រីស្ទ និងបម្រើគ្នាទៅវិញទៅមកយ៉ាងសកម្ម ? ^១៤ យើងអាចប្រុងស្ដាប់តាមដំបូន្មានរបស់ប្រធាន ណិលសុន ថា ឲ្យវិនិច្ឆ័យតិច ស្រឡាញ់ច្រើន ហើយផ្ដល់ក្ដីស្រឡាញ់ដ៏សុទ្ធសាធនៃព្រះយេស៊ូវគ្រីស្ទតាមរយៈពាក្យសម្ដី និងទង្វើរបស់យើង ។ ^១៥

II. អំណាចនៃការប្រោសលោះរបស់ព្រះយេស៊ូវគ្រីស្ទ

ដង្វាយធួនរបស់ព្រះយេស៊ូវគ្រីស្ទ គឺជាការបង្ហាញក្ដីស្រឡាញ់ដ៏ឧត្ដុង្គឧត្តមរបស់ព្រះវរបិតាសួគ៌យើងចំពោះកូនចៅ របស់ទ្រង់ ។ ^១៦ ពាក្យ ដង្វាយធួន ពិពណ៌នាអំពីការនាំ « មកជាតែមួយ » នៃអ្នកដែលបានឃ្លាតចេញ ឬបែកខ្ញែក ។

បេសកកម្មរបស់ព្រះអង្គសង្គ្រោះយើង គឺដើម្បីផ្ដល់ជាផ្លូវត្រឡប់ទៅកាន់ព្រះវរបិតាសួគ៌ និងការសង្គ្រោះនៅក្នុងការធ្វើដំណើរនោះ ។ ព្រះអង្គសង្គ្រោះស្គាល់តាមបទពិសោធន៍ទ្រង់ផ្ទាល់អំពីរបៀបដើម្បីគាំទ្រយើងឆ្លងកាត់ឧបសគ្គនានាក្នុងជីវិត ។^១៧ ច្បាស់ណាស់ ព្រះគ្រីស្ទគឺជាអង្គសង្គ្រោះ និងជាអង្គព្យាបាលព្រលឹងយើង ។

នៅពេលយើងអនុវត្តសេចក្ដីជំនឿ ទ្រង់ជួយយើងបន្ដឆ្ពោះទៅមុខឆ្លងកាត់ការលំបាក ។ ទ្រង់បន្ដផ្ដល់សេចក្ដីស្រឡាញ់ និងការអញ្ជើញប្រកបដោយក្ដីមេត្តាករុណារបស់ទ្រង់ ៖

« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។

« ចូរទទួលនឹមខ្ញុំ ហើយរៀននឹងខ្ញុំចុះ … នោះអ្នករាល់គ្នានឹងបានសេចក្តីសម្រាកដល់ព្រលឹង » ។ ^១៨

ពាក្យប្រៀបធៀបនៃពាក្យនឹម គឺមានអនុភាព ណាស់ ។ ដូច ប្រធាន ហាវើដ ដបុលយូ ហឹនធើរ បាន ពន្យល់ ថា ៖ « នឹម គឺជាឧបករណ៍មួយ ដែលអនុញ្ញាតឲ្យ ‘ កម្លាំង ’ នៃសត្វទីពីរត្រូវបានភ្ជាប់ ហើយ ផ្គួប កម្លាំងគ្នានឹងសត្វមួយទៀតដោយចែករំលែក និងសម្រាលបន្ទុកធ្ងន់ដែលមានក្នុងដៃ ។ បន្ទុកមួយដែលមនុស្សម្នាក់ថាលើសលប់ ឬមិនអាចរែកពន់បាន វានឹងអាចរែក ហើយសម្រាលទៅបាន នៅពេលដែលមនុស្សពីរនាក់ចូលនឹមរែករួមគ្នានោះ ។ ^១៩

ប្រធាន ណិលសុន បានបង្រៀន ៖ « បងប្អូនមករកព្រះគ្រីស្ទដើម្បីបានទឹមជាមួយនឹងទ្រង់ និងជាមួយព្រះចេស្ដារបស់ទ្រង់ ដើម្បីកុំឲ្យបងប្អូនទាញបន្ទុកជីវិតតែម្នាក់ឯង ។ បងប្អូនកំពុងអូសទាញបន្ទុកជីវិតដោយទឹមនឹងជាមួយព្រះអង្គសង្គ្រោះ និងជាព្រះប្រោសលោះនៃពិភពលោក » ។^២០

តើយើងទឹម ឬចងខ្លួនយើងភ្ជាប់ទៅនឹងព្រះអង្គសង្គ្រោះយ៉ាងដូចម្ដេច ? អែលឌើរ ដេវីឌ អេ បែដណា បានពន្យល់ ៖

« ការចុះ និងការរក្សាសេចក្តីសញ្ញាពិសិដ្ឋ គឺជាការទឹមយើងជាមួយនឹងព្រះអម្ចាស់ព្រះយេស៊ូវគ្រីស្ទ ។ ជាការពិត ព្រះអង្គសង្គ្រោះកំពុងដាស់តឿនយើងឲ្យពឹងផ្អែក និងទាញរួមគ្នាជាមួយនឹងទ្រង់ » ។ …

« យើងពុំនៅ ហើយនឹងពុំដែលនៅឯកោឡើយ » ។ ^២១

ចំពោះអ្នកណាដែលមានបន្ទុក វង្វេង ភាន់ច្រឡំ ៖ បងប្អូនពុំចាំបាច់ធ្វើវាតែឯងឡើយ ។^២២ តាមរយៈដង្វាយធួននៃព្រះគ្រីស្ទ និងពិធីបរិសុទ្ធរបស់ទ្រង់ បងប្អូនអាចទឹម ឬចងភ្ជាប់ខ្លួនទៅនឹងទ្រង់ ។ ទ្រង់នឹងប្រទានកម្លាំង និងការព្យាបាលដោយសេចក្ដីស្រឡាញ់ ដែលបងប្អូនត្រូវការ ដើម្បីប្រឈមមុខនឹងការធ្វើដំណើរនៅខាងមុខ ។ ទ្រង់គឺនៅតែជាជម្រកពីព្យុះភ្លៀងរបស់យើង ។^២៣

III. សេចក្ដីស្រឡាញ់របស់ព្រះវរបិតាសួគ៌

សម្រាប់កំណត់ត្រា ចាសស្ពើរ គឺជាមនុស្សឆ្លាត គួរឲ្យស្រឡាញ់ មានបញ្ញា និង មិនរញ៉ាំរញ៉ូវ ។ ប៉ុន្តែគន្លឹះនៃរឿងនេះ គឺគាត់ជាកូនរបស់ខ្ញុំ ។ គាត់ជាកូនប្រុសខ្ញុំ ហើយខ្ញុំស្រឡាញ់គាត់ច្រើនជាងដែលគាត់ដឹង ។ បើឪពុកដែលមិនល្អឥតខ្ចោះខាងសាច់ឈាមមានអារម្មណ៍បែបនេះអំពីកូនរបស់គាត់ តើបងប្អូនអាចស្រម៉ៃឃើញថាតើព្រះវរបិតាសួគ៌ដែលល្អឥតខ្ចោះ ដ៏រុងរឿង និងជាទីស្រឡាញ់មានព្រះទ័យយ៉ាងណាអំពី បងប្អូន ?

ចំពោះមិត្តជាទីស្រឡាញ់នៃជំនាន់កំពុងពេញវ័យ ដែលកើតជំនាន់ កៅសិប និងពីរពាន់ សូមដឹងថា សេចក្ដីជំនឿតម្រូវឲ្យមានសកម្មភាព ។^២៤ យើងរស់នៅក្នុងគ្រាមួយដែលមនុស្សជាច្រើនទាល់តែ « មើលឃើញទើបជឿ » ។ សេចក្ដីជំនឿអាចនឹងជាឧបសគ្គ ហើយវាតម្រូវឲ្យធ្វើការជ្រើសរើស ។ ប៉ុន្តែការអធិស្ឋានទទួលបានចម្លើយ ។^២៥ ហើយចម្លើយនានាអាចដឹងក្នុងអារម្មណ៍ ។^២៦ រឿងពិតបំផុតមួយចំនួននៅក្នុងជីវិត គឺមើលមិនឃើញទេ តែអាចទទួលអារម្មណ៍ អាចដឹង និងមានបទពិសោធន៍ ។ វាគឺជាការពិតផងដែរ ។

ព្រះយេស៊ូវគ្រីស្ទមានព្រះទ័យចង់ឲ្យបងប្អូនដឹង ហើយមានទំនាក់ទំនងជាមួយព្រះវរបិតាសួគ៌របស់បងប្អូន ។^២៧ ទ្រង់បង្រៀនថា « បើមានមនុស្សម្នាក់ មានកូនប្រុសមួយ ហើយវាឈរនៅក្រៅ រួចនិយាយថា លោកឪពុកអើយ សូមបើកទ្វារផ្ទះឲ្យខ្ញុំចូលទទួលទានអាហារជាមួយលោកផង ហើយតើឪពុកនឹងមិននិយាយថា ចូលមកកូនប្រុស ដ្បិតអ្វីដែលជារបស់យើងក៏ជារបស់ឯង ហើយអ្វីដែលជារបស់ឯងក៏ជារបស់យើងទេឬអី ?^២៨ តើអ្នកអាចគិតកាន់តែផ្ទាល់ខ្លួនអំពីរូបភាពនៃសេចក្ដីស្រឡាញ់របស់ព្រះជាព្រះបិតាដ៏អស់កល្បជានិច្ចបានឬទេ ?

អ្នកជាបុត្ររបស់ទ្រង់ ។ បើបងប្អូនមានអារម្មណ៍ថាវង្វេង បើបងប្អូនមានសំណួរ ឬខ្វះប្រាជ្ញា បើបងប្អូនមានបញ្ហានឹងស្ថានភាព ឬកំពុងតែពុះពារនឹងបញ្ហាខាងវិញ្ញាណ សូមងាកទៅរកទ្រង់ ។ សូមអធិស្ឋានទៅកាន់ទ្រង់សូមការលួងលោមចិត្ត ក្ដីស្រឡាញ់ ចម្លើយ និងការដឹកនាំ ។ មិនថាបងប្អូនត្រូវការអ្វី ហើយមិនថាបងប្អូននៅ កន្លែងណាទេ សូមបើកដួងចិត្តរបស់បងប្អូនទៅកាន់ព្រះវរបិតាសួគ៌យើង ។ ព្រោះមនុស្សមួយចំនួន បងប្អូនអាចនឹងចង់ធ្វើតាមការអញ្ជើញរបស់ប្រធានណិលសុន ហើយសួរថា « តើទ្រង់ពិតជាគង់នៅទីនោះឬ— តើទ្រង់ស្គាល់បងប្អូនឬទេ ។ ទូលសួរទ្រង់ថាទ្រង់មានព្រះទ័យយ៉ាងណាចំពោះបងប្អូន ។ បន្ទាប់មកស្តាប់ » ។^២៩

បងប្អូនប្រុសស្រីទាំងឡាយ ៖

សូមស្គាល់ព្រះវរបិតាសួគ៌របស់បងប្អូន ។ ទ្រង់ល្អឥតខ្ចោះ ហើយប្រកបដោយសេចក្ដីស្រឡាញ់ ។
សូមស្គាល់ថាព្រះយេស៊ូវគ្រីស្ទជានរណា ។^៣០ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ សូមចងភ្ជាប់ខ្លួនបងប្អូន និងអ្នកទាំងឡាយដែលបងប្អូនស្រឡាញ់ទៅនឹងទ្រង់ ។
ហើយសូមស្គាល់ថា បងប្អូនជានរណា ។ សូមស្គាល់អត្តសញ្ញាណដ៏ទេវភាពពិតរបស់បងប្អូន ។ ផែនការនៃសុភមង្គលរបស់ព្រះ គឺសម្រាប់បងប្អូនទាំងអស់គ្នា ។ បងប្អូនគឺជាបុត្រដ៏មានតម្លៃរបស់ទ្រង់ ហើយមានតម្លៃមហិមា ។ ទ្រង់ស្គាល់ ហើយស្រឡាញ់បងប្អូន ។

អំពីសេចក្ដីពិតដ៏សាមញ្ញជាគ្រឹះទាំងនេះ ខ្ញុំសូមថ្លែងទីបន្ទាល់នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕