គូកនយើងជានិច្ច
បងប្អូន និងខ្ញុំ មានឱកាសដើម្បីមានព្រះវិញ្ញាណបរិសុទ្ធជាគូកនដ៏ខ្ជាប់ខ្ជួនរបស់យើង ។
បងប្អូនប្រុសស្រីជាទីស្រឡាញ់ នៅក្នុងសន្និសីទនេះ យើងបានទទួលពរជ័យដោយការទទួលបានវិវរណៈយ៉ាងច្រើនសន្ធឹកសន្ធាប់ ។ ពួកអ្នកបម្រើរបស់ព្រះអម្ចាស់យេស៊ូវគ្រីស្ទបានថ្លែង ហើយនឹងថ្លែងនូវពាក្យពិត ការលើកទឹកចិត្ត និងការណែនាំ ។
ខ្ញុំទទួលអារម្មណ៍ខ្លាំងមកពីទីបន្ទាល់នានាដែលបានថ្លែងនៅក្នុងសន្និសីទនេះថា ព្រះអម្ចាស់មានព្រះបន្ទូលមកកាន់យើងដោយផ្ទាល់តាមរយៈព្រះវិញ្ញាណបរិសុទ្ធ ។ នៅពេលយើងអធិស្ឋាន ហើយផ្ទៀងស្ដាប់ការបំផុសគំនិតពីព្រះវិញ្ញាណ នោះយើងទទួលបានគំនិត និងពរជ័យកាន់តែអស្ចារ្យដើម្បីដឹកនាំយើងឆ្លងកាត់គ្រាលំបាកៗនៅពេលខាងមុខ ។
យើងបានស្ដាប់ឮការព្រមានរបស់ប្រធាន រ័សុល អិម ណិលសុន ម្ដងទៀតថា « នៅគ្រាខាងមុខ វានឹងមិនអាចរស់រានខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ » ។១
ការព្រមានរបស់ព្យាការីនោះបានដឹកនាំខ្ញុំឲ្យពិចារណាអំពីអ្វីដែលខ្ញុំអាចបង្រៀនកូនៗ ចៅៗ និងចៅទួតរបស់ខ្ញុំអំពីរបៀបដើម្បីមានការដឹកនាំដ៏សំខាន់នោះនៅក្នុងគ្រាលំបាកដែលនឹងមាននៅពេលខាងមុខចំពោះពួកគេ ។
ដូច្នេះ សារលិខិតនេះគឺជាសំបុត្រខ្លីមួយផ្ញើរទៅកាន់កូនចៅរបស់ខ្ញុំ ដើម្បីអាចជួយពួកគេ នៅពេលខ្ញុំពុំនៅនឹងពួកគេក្នុងគ្រាដ៏រំភើបនៅពេលខាងមុខនោះ ។ ខ្ញុំចង់ឲ្យពួកគេដឹងនូវអ្វីដែលខ្ញុំបានរៀនដឹង ដែលអាចជួយដល់ពួកគេ ។
ខ្ញុំបានយល់កាន់តែច្បាស់អំពីអ្វីដែលពួកគេត្រូវធ្វើ ដើម្បីមានព្រះចេស្ដានៃព្រះវិញ្ញាណបរិសុទ្ធគង់នៅឋិតថេរក្នុងគ្រាដែលពួកគេនឹងរស់នៅ ។ ខ្ញុំមានអារម្មណ៍ឲ្យនិយាយនៅថ្ងៃនេះចេញពីបទពិសោធន៍ផ្ទាល់ខ្លួនខ្ញុំក្នុងការយាងអញ្ជើញព្រះវិញ្ញាណបរិសុទ្ធឲ្យធ្វើជាគូកនជានិច្ចតាមដែលខ្ញុំអាចផ្ដល់ឲ្យ ។ ខ្ញុំសូមអធិស្ឋានឲ្យខ្ញុំអាចលើកទឹកចិត្តដល់ពួកគេ ។
ខ្ញុំនឹងចាប់ផ្ដើមឲ្យពួកគេគិត និងអធិស្ឋានអំពីបុត្រារបស់ហេលេមិន នីហ្វៃ និងលីហៃ ព្រមទាំងពួកអ្នកបម្រើដទៃទៀតរបស់ព្រះអម្ចាស់ ដែលកំពុងធ្វើការជាមួយពួកគេ ។ ពួកគេប្រឈមនឹងការប្រឆាំងយ៉ាងខ្លាំងក្លា ។ ពួកគេបានបម្រើនៅកន្លែងទុច្ចរិតមួយ ហើយត្រូវប្រឈមមុខនឹងការបោកបញ្ឆោតដ៏អាក្រក់ ។ ខ្ញុំទទួលភាពក្លាហាន ហើយបងប្អូនក៏អាចទទួលបាន ចេញពីខគម្ពីរមួយនេះក្នុងកំណត់ត្រារបស់ហេលេមិន ៖
« ហើយក្នុងឆ្នាំទីចិតសិបប្រាំបួន ក៏ចាប់ផ្តើមមានការវិវាទជាខ្លាំង ។ ប៉ុន្តែហេតុការណ៍បានកើតឡើងថា នីហ្វៃ និងលីហៃ និងបងប្អូនរបស់គេជាច្រើន ដែលដឹងចំណុចពិតនៃលិទ្ធិដោយមានវិវរណៈជាច្រើនរាល់ថ្ងៃ ហេតុដូច្នេះហើយទើបពួកគេបានផ្សាយដល់ប្រជាជន ដរាបដល់គេបានបញ្ចប់ការវិវាទរបស់គេនៅក្នុងឆ្នាំដដែលនោះ » ។២
ដំណើររឿងនេះបានលើកទឹកចិត្តខ្ញុំ ហើយវាក៏អាចលើកទឹកចិត្តបងប្អូន ។ កូនប្រុសរបស់ហេលេមិនត្រូវបានបង្រៀន និងដឹកនាំដោយបទពិសោធន៍មួយចំនួនជាមួយព្រះវិញ្ញាណបរិសុទ្ធ ។ ការណ៍នេះអះអាងដល់ខ្ញុំថា ព្រះវិញ្ញាណអាចបង្រៀនយើង ហើយយើងអាចរៀនពីព្រះវិញ្ញាណមួយបន្ទាត់ម្តងៗ ទទួលនូវអ្វីដែលយើងត្រូវការ ហើយបន្ទាប់មកនៅពេលយើងត្រៀមខ្លួនរួចរាល់ នោះយើងនឹងទទួលបានកាន់តែច្រើន ។
ខ្ញុំត្រូវបានលើកទឹកចិត្តតាមរបៀបដូចគ្នាដោយដំណើររឿងរបស់នីហ្វៃ ដែលត្រូវបានបង្គាប់ឲ្យត្រឡប់ទៅក្រុងយេរូសាឡិមវិញដើម្បីយកផ្ទាំងចំណាររបស់ឡាបាន់ ។ បងប្អូនចាំនូវជម្រើសដែលលោកបានធ្វើ ។ លោកថ្លែងថា « ខ្ញុំនឹងទៅ ហើយធ្វើនូវអ្វីៗដែលព្រះអម្ចាស់ទ្រង់បានបញ្ជា » ។៣
បទពិសោធន៍របស់នីហ្វៃជាមួយនឹងព្រះវិញ្ញាណបរិសុទ្ធពេលធ្វើកិច្ចការនោះ បានផ្តល់ភាពក្លាហានដល់ខ្ញុំជាច្រើនដង នៅពេលខ្ញុំបានចាប់ផ្ដើមធ្វើកិច្ចការដែលខ្ញុំដឹងថាជាកិច្ចការមកពីព្រះអម្ចាស់ ប៉ុន្តែកិច្ចការនោះហាក់ដូចជាហួសពីបទពិសោធន៍មុនៗរបស់ខ្ញុំ និងលើសពីអ្វីដែលខ្ញុំបានឃើញថាខ្ញុំមានសមត្ថភាព ។
បងប្អូននៅចាំពីអ្វីដែលនីហ្វៃបានមានប្រសាសន៍អំពីបទពិសោធន៍របស់លោកថា ៖ « ហើយពេលនោះជាវេលាយប់ ហើយខ្ញុំឲ្យ [ ពួកបងប្រុសខ្ញុំ ] ពួននៅខាងក្រៅកំផែង ។ ហើយបន្ទាប់ពីគេបានពួនរួចហើយ នោះខ្ញុំ នីហ្វៃ បានលួចចូលទៅក្នុងទីក្រុង ហើយដើរសំដៅទៅផ្ទះឡាបាន់ » ។
គាត់បន្តនិយាយថា « ហើយខ្ញុំត្រូវបាននាំទៅដោយព្រះវិញ្ញាណ ដោយមិនដឹងជាមុនសោះឡើយថា តើខ្ញុំនឹងត្រូវធ្វើអ្វីខ្លះ » ។៤
ខ្ញុំទទួលបានការលើកទឹកចិត្តពេលដឹងថា ព្រះវិញ្ញាណបានដឹកនាំនីហ្វៃ ពីមួយនាទីទៅមួយនាទីពេញមួយយប់នោះឲ្យធ្វើកិច្ចការរបស់ព្រះអម្ចាស់ ។
យើងត្រូវការ ហើយបងប្អូនក៏នឹងត្រូវការ ភាពជាគូកនជានិច្ចរបស់ព្រះវិញ្ញាណបរិសុទ្ធ ។ ឥឡូវនេះ យើងមានបំណងចង់បាន ប៉ុន្តែបើតាមបទពិសោធន៍គឺវាពុំងាយសម្រេចបាននោះទេ ។ យើងម្នាក់ៗគិត ហើយនិយាយ ហើយនិងធ្វើរឿងផ្សេងៗក្នុងជីវិតប្រចាំថ្ងៃដែលអាចប៉ះពាល់ដល់ព្រះវិញ្ញាណ ។
ពេលរឿងកើតឡើង យើងអាចមានអារម្មណ៍ថាព្រះអម្ចាស់មិនយល់ស្រប ។ ប្រហែលជាយើងត្រូវបានល្បួងឲ្យមានអារម្មណ៍ឯកោ ។ ពេលនោះវាជាការសំខាន់ដើម្បីចងចាំការសន្យាដ៏ប្រាកដមួយដែលយើងទទួលរាល់សប្តាហ៍ នៅពេលយើងប្រែចិត្ត ហើយទទួលទានសាក្រាម៉ង់ « ប្រយោជន៍ឲ្យពួកគេអាចបានព្រះវិញ្ញាណរបស់ទ្រង់ គង់នៅជាមួយនឹងពួកគេជាដរាប » ។៥
បើបងប្អូនទទួលអារម្មណ៍ពីព្រះចេស្ដានៃព្រះវិញ្ញាណបរិសុទ្ធថ្ងៃនេះ បងប្អូនអាចយកវាធ្វើជាភស្ដុតាងដ៏មានអត្ថន័យថា ដង្វាយធួនកំពុងដំណើរការនៅក្នុងជីវិតបងប្អូនហើយ ។
ដូចជាអែលឌើរ ជែហ្វ្រី អ័រ ហូឡិន បានមានប្រសាសន៍ថា ៖ « ពេលណាដែលគ្រាដ៏លំបាកបំផុតយើងមកដល់ យើងមិនត្រូវចុះចាញ់នឹងការភ័យខ្លាចថា ព្រះបានបោះបង់ចោលយើង ឬថាទ្រង់មិនស្តាប់ការអធិស្ឋានយើងឡើយ ។ ទ្រង់ ពិតជា ស្តាប់ឮយើង ។ ទ្រង់ ពិតជា មើលឃើញយើង ។ ទ្រង់ ពិតជា ស្រឡាញ់យើង » ។៦
ការអះអាងនោះបានជួយដល់ខ្ញុំ ។ នៅពេលខ្ញុំមានអារម្មណ៍ថានៅឆ្ងាយពីព្រះអម្ចាស់ ហើយចម្លើយចំពោះការអធិស្ឋានខ្ញុំហាក់បីដូចជាត្រូវពន្យាពេល ខ្ញុំបានរៀនធ្វើតាមដំបូន្មានរបស់ប្រធាន ណិលសុន ដើម្បីពិនិត្យមើលជីវិតខ្ញុំរកមើលឱកាសប្រែចិត្ត ។ លោកបានរំឭកយើងថា « ការប្រែចិត្តប្រចាំថ្ងៃគឺជាច្រកទ្វារទៅកាន់បរិសុទ្ធភាព ហើយបរិសុទ្ធភាពនាំមកនូវកម្លាំង » ។៧
បើបងប្អូនមានការលំបាកទទួលអារម្មណ៍ពីព្រះវិញ្ញាណបរិសុទ្ធ បងប្អូនអាចសញ្ជឹងគិតថាតើមានអ្វីខ្លះដែលបងប្អូនអាចប្រែចិត្ត និង ទទួលការអភ័យទោសដែរឬទេ ។៨ បងប្អូនអាចអធិស្ឋានដោយសេចក្ដីជំនឿដើម្បីដឹងពីអ្វីដែលត្រូវធ្វើ ដើម្បីបានស្អាតស្អំ ហើយស័ក្តិសមចំពោះភាពជាគូកននៃព្រះវិញ្ញាណបរិសុទ្ធនោះ ។
បើបងប្អូនចង់ទទួលបានភាពជាគូកននៃព្រះវិញ្ញាណបរិសុទ្ធ បងប្អូនត្រូវតែចង់បានដោយហេតុផលត្រឹមត្រូវ ។ គោលបំណងរបស់បងប្អូនត្រូវតែជាព្រះរាជបំណងព្រះអម្ចាស់ ។ បើបំណងបងប្អូនអាត្មានិយមពេក នោះបងប្អូននឹងពិបាកទទួលបាន និងយល់ពីការបំផុសគំនិតពីព្រះវិញ្ញាណណាស់ ។
គន្លឹះសម្រាប់ខ្ញុំ និងបងប្អូន គឺចង់បានអ្វីដែលព្រះអង្គសង្រ្កោះមានព្រះទ័យចង់បាន ។ គំនិតយើងត្រូវតែដឹកនាំដោយសេចក្តីស្រឡាញ់ដ៏សុទ្ធសាធរបស់ព្រះគ្រីស្ទ ។ ការអធិស្ឋានយើងត្រូវតែជា « អ្វីៗទាំងអស់ដែលខ្ញុំចង់បានគឺជាអ្វីដែលទ្រង់ចង់បាន ។ សូមព្រះទ័យទ្រង់បានសម្រេច » ។
ខ្ញុំព្យាយាមចងចាំការលះបង់របស់ព្រះអង្គសង្គ្រោះ និងសេចក្តីស្រឡាញ់របស់ទ្រង់ចំពោះខ្ញុំ ។ បន្ទាប់មក នៅពេលខ្ញុំអធិស្ឋានទៅកាន់ព្រះវរបិតាសួគ៌ដើម្បីថ្លែងអំណរគុណ ខ្ញុំមានអារម្មណ៍ថាទទួលបានក្តីស្រឡាញ់ និងការអះអាងថា ទ្រង់ឮការអធិស្ឋានខ្ញុំ ហើយថាខ្ញុំនឹងទទួលបានអ្វីដែលល្អបំផុតសម្រាប់ខ្ញុំ និងអស់អ្នកដែលខ្ញុំស្រលាញ់ ។ វាពង្រឹងដោយទីបន្ទាល់ខ្ញុំ ។
ក្នុងចំណោមអ្វីៗទាំងអស់ដែលព្រះវិញ្ញាណបរិសុទ្ធថ្លែងទីបន្ទាល់ អ្វីដែលមានតម្លៃបំផុតសម្រាប់យើងគឺថា ព្រះយេស៊ូវគឺជាព្រះគ្រីស្ទ ជាព្រះរាជបុត្រាដ៏មានព្រះជន្មរស់របស់ព្រះ ។ ព្រះអង្គសង្រ្គោះបានសន្យាថា ៖ « កាលណាព្រះដ៏ជាជំនួយទ្រង់យាងមក ដែលខ្ញុំនឹងចាត់មកពីព្រះវរបិតា គឺជាព្រះវិញ្ញាណនៃសេចក្តីពិតដែលចេញពីព្រះវរបិតាមក នោះព្រះអង្គទ្រង់នឹងធ្វើបន្ទាល់ពីខ្ញុំ » ។៩
កាលពីប៉ុន្មានឆ្នាំមុន ខ្ញុំបានទទួលទូរសព្ទម្តាយដែលខកចិត្តម្នាក់ ។ គាត់បានប្រាប់ខ្ញុំថា កូនស្រីគាត់បានចេញពីផ្ទះ ។ គាត់បានដឹងតិចតួចតាមដែលគាត់ទាក់ទងនឹងកូនស្រីថា មានអ្វីមួយខុសប្លែកខ្លាំង ។ គាត់បានសូមអង្វរឲ្យខ្ញុំជួយ ។
ខ្ញុំបានរកមើលថាតើនរណាជាគ្រូបង្រៀនតាមផ្ទះរបស់នាង ។ បងប្អូនអាចហៅតាមឈ្មោះនោះ ដែលនោះគឺថាវាជាយូរមកហើយ ។ ខ្ញុំបានទូរសព្ទទៅគាត់ ។ គាត់នៅក្មេង ។ ប៉ុន្តែគាត់បានប្រាប់ខ្ញុំថា គាត់និងដៃគូរបស់គាត់ ទាំងពីរនាក់បានភ្ញាក់ឡើងនៅពេលយប់ ដោយមិនត្រឹមតែមានការព្រួយបារម្ភចំពោះកូនស្រីនោះប៉ុណ្ណោះទេ ប៉ុន្តែថែមទាំងមានការបំផុសគំនិតថា នាងហៀបនឹងធ្វើការជ្រើសរើសដែលនឹងនាំមកនូវទុក្ខសោក និងទុក្ខវេទនា ។ តាមការបំផុសគំនិតពីព្រះវិញ្ញាណនោះ ពួកគេបានទៅជួបនាង ។
ដំបូងឡើយ នាងមិនចង់ប្រាប់ពួកគេអំពីស្ថានភាពនាងទេ ។ ក្រោមការបំផុសគំនិត ពួកគេបានអង្វរនាងឲ្យប្រែចិត្ត ហើយជ្រើសរើសផ្លូវដែលព្រះអម្ចាស់មានសម្រាប់នាង ។ ខ្ញុំជឿថា ដោយសារព្រះវិញ្ញាណ ពេលនោះ នាងបានដឹងថា ពួកគេដឹងអំពីជីវិតនាង គឺមានតែមកពីព្រះប៉ុណ្ណោះ ។ ម្ដាយរូបនេះបានបង្វែរកង្វល់ដែលពេញដោយក្តីស្រឡាញ់របស់គាត់ទៅកាន់ព្រះវរបិតាសួគ៌ និងព្រះអង្គសង្គ្រោះ ។ ព្រះវិញ្ញាណបរិសុទ្ធត្រូវបានបញ្ជូនទៅកាន់គ្រូបង្រៀនតាមផ្ទះទាំងនោះ ដោយសារពួកគេមានឆន្ទៈបម្រើព្រះអម្ចាស់ ។ ពួកគេបានធ្វើតាមដំបូន្មាន និងការសន្យាដែលមាននៅក្នុង គោលលទ្ធិ និង សេចក្តីសញ្ញា ៖
« សូមឲ្យចិត្តអ្នកពេញទៅដោយសេចក្ដីសប្បុរសដល់មនុស្សទាំងអស់ និងដល់ពួកអ្នកជឿផង ហើយសូមឲ្យគុណធម៌តុបតែងគំនិតអ្នក ដោយឥតឈប់ឈរឡើយ ខណៈនោះ អ្នកនឹងមានចិត្តក្លាហានឡើងនៅចំពោះវត្តមាននៃព្រះ ហើយគោលលទ្ធិអំពីបព្វជិតភាពនឹងចុះមកលើព្រលឹងរបស់អ្នក ដូចជាទឹកសន្សើមចុះពីលើមេឃ ។
« ព្រះវិញ្ញាណបរិសុទ្ធនឹងទៅជាគូកនអ្នកជានិច្ច ហើយដំបងពេជ្ររបស់អ្នក ជាដំបងពេជ្រនៃសេចក្ដីសុចរិត និងសេចក្ដីពិតដែលមិនចេះប្រែប្រួល ហើយអំណាចគ្រប់គ្រងរបស់អ្នក នឹងទៅជាអំណាចគ្រប់គ្រងដ៏នៅអស់កល្បអស់កាលជានិច្ច ហើយដោយឥតការបង្ខិតបង្ខំ នោះវានឹងហូរមកលើអ្នកជារៀងដរាបតទៅ » ។១០
ខ្ញុំសូមថ្លែងទីបន្ទាល់ថា ព្រះអម្ចាស់រក្សាសេចក្តីសន្យារបស់ទ្រង់ ។ ព្រះវិញ្ញាណបរិសុទ្ធកំពុងត្រូវបានបញ្ជូនទៅកាន់សមាជិកដែលស្មោះត្រង់នឹងសេចក្តីសញ្ញានៃសាសនាចក្រនៃព្រះយេស៊ូវគ្រីស្ទ ។ ឥឡូវនេះ បទពិសោធន៍បងប្អូននឹងមានលក្ខណៈពិសេស ហើយព្រះវិញ្ញាណនឹងដឹកនាំតាមរបៀបដែលសមស្របនឹងសេចក្តីជំនឿ និងសមត្ថភាពបងប្អូនក្នុងការទទួលវិវរណៈសម្រាប់ខ្លួន និងសម្រាប់អ្នកដែលបងប្អូនស្រឡាញ់ និងបម្រើ ។ ខ្ញុំអធិស្ឋានអស់ពីដួងចិត្តថា សូមឲ្យទំនុកចិត្តបងប្អូននឹងរីកចម្រើនឡើង ។
ខ្ញុំសូមថ្លែងទីបន្ទាល់ខ្ញុំថា ព្រះវរបិតាមានព្រះជន្មរស់ ។ ទ្រង់ស្រឡាញ់បងប្អូន ។ ទ្រង់ស្តាប់ឮរាល់ការអធិស្ឋានរបស់បងប្អូន ។ ព្រះយេស៊ូវគ្រីស្ទបានអធិស្ឋានទៅព្រះវរបិតាឲ្យបញ្ជូនព្រះវិញ្ញាណបរិសុទ្ធមកដឹកនាំ លួងលោម និងថ្លែងទីបន្ទាល់អំពីសេចក្ដីពិតដល់យើង ។ ព្រះវរបិតា និងព្រះរាជបុត្រាស្ងួនភ្ញារបស់ទ្រង់បានបង្ហាញព្រះកាយដល់ យ៉ូសែប ស្ម៊ីធ ក្នុងព្រៃពិសិដ្ឋ ។ ព្យាការី យ៉ូសែប ស្ម៊ីធ បានបកប្រែព្រះគម្ពីរមរមនដោយអំណោយទាន និងព្រះចេស្ដានៃព្រះ ។
សារទូតពីស្ថានសួគ៌បានស្តារឡើងវិញនូវកូនសោបព្វជិតភាព ។ ប្រធាន រ័សុល អិម ណិលសុន គឺជាព្យាការីនៅលើផែនដីនេះទាំងមូល ។
ក្នុងនាមជាសាក្សីនៃព្រះយេស៊ូវគ្រីស្ទ ខ្ញុំដឹងថាទ្រង់មានព្រះជន្មរស់ ហើយដឹកនាំសាសនាចក្ររបស់ទ្រង់ ។ បងប្អូន និងខ្ញុំមានឱកាសទទួលព្រះវិញ្ញាណបរិសុទ្ធជាគូកនយើងជានិច្ច ហើយដើម្បីបញ្ជាក់សេចក្តីពិតទាំងនោះ នៅពេលយើងចងចាំ និងស្រឡាញ់ព្រះអង្គសង្គ្រោះ ប្រែចិត្ត ហើយទូលសុំសេចក្តីស្រឡាញ់របស់ទ្រង់នៅក្នុងដួងចិត្តយើង ។ ខ្ញុំសូមអធិស្ឋានសូមឲ្យយើងមានពរជ័យនោះ និងភាពជាគូកនជានិច្ចនៃព្រះវិញ្ញាណបរិសិទ្ឋនៅថ្ងៃនេះ និងក្នុងជីវិតយើងរាល់ថ្ងៃ ។ ខ្ញុំស្រឡាញ់បងប្អូន ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕