Dios Stima Tur Su Yunan
JesuCristo semper ta yama nos, i E ta husa nos, Su sierbonan ordinario, pa yuda trese Su yunan bèk na djE.
Kiko nos Tata Selestial ta deseá di bo? Boso ta komprondé ku ora boso tabata den boso eksistensia premortal, Tata Selestial tabata preparando boso pa boso bida riba tera? Papiando spesífikamente ku e hubentut, Presidente Russell M. Nelson a bisa, “Nos Tata Selestial a reservá hopi di Su spiritunan mas nobel—kisas… Su mihó tim—pa e fase final aki.” Pasó nos a wòrdu reservá pa e delaster dianan aki, e ta krusial pa nos siña pa ta disípulonan di Jesucristo.
E Señor JesuCristo ta e Bon Pastor, i ta konosé Su grupo, i e grupo ta konosé su Pastor pasobra “e ta yama su propio karnenan pa nan nòmber.” Semper E ta yama nos, i E ta husa nos, Su sierbonan ordinario, pa yuda trese Su yunan bèk na Dje.
Un tempu pasá, un presidente di estaka i ami tabata bishitando miembronan di e Iglesia den un besindario lokal. Despues ku nos a kaba nos bishitanan programá, e presidente di estaka a puntra mi si nos por a bai wak un famia mas. El a sinti su mes sorprendí ku nos mester a papia ku nan.
Nos a bati na e porta, i e hermana a habrié. El a wak mi, pero e no tabata sa ke mi tabata, i e no a ekspresá hopi. Mi a mustra ku mi man na e presidente di estaka, ku a kumindé na su nòmber. Manera el a tend’é i a wak e, el a regosihá. Pará einan na e porta, nan dos a brasa otro i a yora huntu. Esaki a buta e tono na nos bishita. Nos no tabata sa ku e hermana a risibí kimoterapia e dia promé. E tabata sinti su mes hopi debil pa kuida su yu hòmber adulto. Asina mi a yuda e presidente di estaka bisti su yu hòmber, i nos a pon’é den su ròlstul. Nos a dun’é e kuminda ku otro dushi hermana di e bario a trese mas trempan, i nos a yuda ku otro tareanan. Promé ku nos a bai for di nan hogar, nos tabatin e oportunidat di bendishoná nan.
Tur loke tabata pasa den mi mente durante e bishita aki tabata e konfirmashon ku JesuCristo ta stima nan profundamente. E ta komprondé nan i sa personalmente e doló di nan situashon úniko. Kasi hinter e bishita tabata den silensio. E biaha aki nos no a duna un sermon grandi òf a kompartí nos skritura faborito, pero Señor a bendishoná nos ku Su Spiritu abundantemente.
Un di e propositonan di mas grandi ku bo Tata Selestial a trese bo akinan na e tempu aki ta pa bo realisá bo potensial kompletu. Predicad Mi Evangelio ta siña nos ku komo disípulonan di Cristo, nos mester evitá kompará nos mes ku otro. Boso abilidatnan spiritual ta úniko, personal, i di nasementu, i boso Tata Selestial ke yuda boso desaroyá nan. Semper lo tin algun hende ku bo lo por yuda sinti e amor di bo Tata Selestial. Boso potensial ta divino. Ounke ta siertamente importante pa prepará bo mes pa tin eksito den e mundu kompetitivo aki, un di bo mishonnan krusial durante bo bida ta pa bira un disípulo di Jesucristo i pa sigui e impreshonnan di e Spiritu. Ora boso hasi esaki, Dios lo bendishoná boso bida; E lo bendishoná boso famia aktual òf futuro; i E lo bendishoná e bida di Su yunan ku boso lo topa.
Nos ta biba den un tempu di un oportunidat. Ounke nos enfrentá hopi difikultat, mi sa ku nan tei den un parti pa permití nos yuda otronan sinti e amor di nos Tata Selestial. Presidente Nelson a siña: “Den e dianan benidero, nos lo mira e manifestashonnan mas grandi di e poder di e Salbador ku mundu no a yega di mira nunka.” Nos tin e privilegio pa kuida hendenan ku mester di un man, un brasa, un sentimentu di konsuelo, òf simpelmente pa nos ta ku nan den silensio. Si nos por yuda aliviá nan kárganan, maske ta pa un momentu so, e ora ei nos lo ta kapas di wak e manifestashonnan di e poder di e Salbador den nan bida.
Komo disipèlnan di JesuCristo, e Santunan di e Delaster Dianan por hasi un diferensia positivo na e mundu. Nos por proveé un sentido di alegria kual ta reflehá na nos kara—un alegria ku nos ta kompartí ku palabranan di amor i aktonan di kariño. Laga nos ta bon bisiñanan, bon empleadonan, i bon trahadonan. Laga nos esforsá nos mes pa ta bon Kristian na tur momentu.
Señor a restorá Su evangelio ku e ordenansanan nesesario pa e yunan di Tata Selestial por tin tur e promesanan ku ta uni nos na Dje. Pa yuda nos rumannan den nan desafionan diario, laga nos kòrda pa yuda nan hasi i warda e promesanan sagrado aki ku nan Tata Selestial pa asina E por primití nan e bendishonnan mas riku pa e bida aki i pa eternidat. E promesanan aki ta posibel solamente pa medio di e Restorashon di e evangelio di JesuCristo i Su yabinan di saserdosio.
Den otro palabranan, nos por yuda otronan keda riba e kaminda di kombenio. Algun di nos ta desviá for di e kaminda di tempu pa tempu, i p’esei nos mester kòrda ku pa nos Tata Selestial nos semper tin e posibilidat di bini bèk. Asta si nos kurso no ta esun di mas perfekto, e Salbador semper ta kòrda nos ku, “Mas cuantas veces [nos arrepintamos] y [pidamos] perdón, con verdadera intención, [se nos] perdonará.”
Un di e artenan di e atversario awendia ta pa buta nos pensa i kere ku no tin manera pa nos kambia òf ku nos no tin speransa mas. E pensamentu destruktivo aki ta kousa hopi di nos pa stòp di purba. I ta na e momentu aki ora nos amor, nos palabranan di enkurashamentu i sosten, nos tempu, i nos yudansa por duna otro hende e speransa sufisiente pa purba un biaha mas.
Por ta boso ta pensando, “Oke, pero ken ta ministrá ami?” Pa medio di bai i bendishoná e bidanan di nos rumannan, nos lo kolektá testimonionan ku lo yena nos bida ku fe den e Señor JesuCristo. E testimonionan aki lo revitalisá nos pa purba un biaha mas nos mes. E Spiritu Santu lo rebibá nos i yuda nos ku testimonionan renobá pa kontinuá ku nos mes difikultatnan i tribulashonnan personal. Ora nos ta buska pa bendishoná bida di otronan, Señor ta haña mas miserikòrdia di nos; E ta fortalesé nos i ta yuda nos den nos bida.
Por fabor kòrda ku Señor JesuCristo ta bo Salbador i ta kompronde bo personalmente. E sa kiko kemen tin ku kumpli ku un yamamentu i laga kosnan atras pa yuda e yunan di Dios. E tin e poder di bendishona bo den tur kos si bo kere den djE i no duda.
Mi kerido rumannan, riba e dia ei ora un lider di saserdosio a sinti su mes inspirá pa nos bishitá un mama i yu hòmber ku nos no tabatin riba nos agenda, mi ta proklamá ku Dios tabata sa ku nan tabatin mester di nos. I na final, mi tabata esun ku a wòrdu ministrá. Riba e dia ei, mi a risibí un di e lèsnan di mas grandi di e amor di e Salbador pa nos.
Mi ta testifiká ku Jesucristo ta e Salbador di e mundu, ku E ta bibu, ku El a biba i a muri pa abo i ami, i ku El a resusitá pa abo i ami pa nos por aspirá na reunionnan selestial yená ku alegria ku esnan ku ta na e otro banda di e velo kaba. Mi sa ku E ta komprondé abo i ami perfektamente. E ta komprondé kada un di nos momentunan difísil, i E tin e poder pa yuda nos den e momentunan ei kaminda nos ta sinti nos mes mas vulnerabel. Mi sa ku Señor JesuCristo i nos Tata Selestial a aparesé na José Smith pa restourá e evangelio den e dianan aki. Mi sa ku nos kerido profeta, Russell M. Nelson, ta un profeta di Dios, i mi ta testifiká esaki den e nòmber di JesuCristo, amen.