Skrituranan Sagrado—e Fundeshi di Fe
Nos no por subestimá e importansia di e skrituran sagrado tantu pa e kombershonnan komo pa esnan ku a keda fiel na e evangelio.
Resientemente mi kasá, Mary, i ami a mira un T-shirt ku e imágen di un buki i un mensahe riba e parti dilanti ku ta bisa, “Bukinan: E Aparato Portátil Original.”
Mi a pensa riba e mensahe interesante aki i kon importante tur sorto di aparatonan portátil a bira. Depues di a pensa mas, mi a realisá ku niun aparato òf asta un aparato ekipá ku inteligensia artifisial lo no ta asina importante òf signifikante manera e guia spiritual ku ta bini for di e revelashon divino.
Sea portátil òf digital, e Beibel Santu i e Buki di Mormon: Un Otro Tèstamènt di JesuCristu ta duna guia spiritual i siñansa for di JesuCristu, e Salbador di mundu. Nos ta tesorá e bukinan aki pa nan ròl importante den dokumentá e instrukshonnan ku Dios a duna e profetanan i hendenan di antigwedat i e guia ku nan ta duna pa nos propio bida personal.
Kombiná ku e siñansanan di e profetanan bibu, e skrituranan sagrado aki ta duna nos guia doktrinal den e mundu di awe. E skrituranan aki ta mas poderoso ora nan ta duna instrukshon, korekshon, konsuelo i konsolashon na personanan i famianan ku ta buska guia di Señor.
E skrituranan, kombiná ku e inspirashon spiritual di e Spiritu Santu, ta keda e fuente primario ku ta fasilitá e kombershon di esnan ku tin kurason kibrá i spiritu kontrito i ku ta deseá di sigui JesuCristu. E skrituranan ta yuda konstruí un fundeshi ku por resistí e esfuersonan kontinuo di e atversario pa debilitá fe.
Konversonan nobo di Iglesia, a bendishoná i a bira e forsa vital durante historia di e Iglesia. Un ehèmpel ta partikularmente presioso pa mi. Tempu mi tabata un obispu hóben, dos hermana misionero tabata siñando famia William Edward Mussman. E tata, un abogado hopi kapas, tabata konsehero general di un kompania grandi. Su kasá deboto, Janet, tabata yuda e famia hasi esfuerso pa biba un bida mas manera di Cristo.
Nan yu hòmber i yu muhé eksepshonal, tur dos den nan 20 aña, tambe tabata wòrdu siñá. Tur kuater a risibí e lèsnan i tabata asistí na iglesia. E hermananan misionero a enfatisá riba lesa e Buki di Mormon i hasi orashon pa un testimonio di e skritura sagrado ei. Ta remarkabel ku, e famia a lesa e Buki di Mormon kompletamente den un tempu kòrtiku.
E mishoneronan di estaka, kende tur dos tabata anteriormente presidente di Sosiedat di Sokoro di bario, a kompañá nan na e reunionnan sakramental.
Ora e famia tabata serka di batisá, nan a risibí un bòshi di literatura ku tabata kritiká e Iglesia. Esaki tabata promé ku e tempu di internet, pero e material tabata yena un kaha di karton grandi.
E hermananan misionero invitá mi komo un obipu resientemente yamá na edat di 34 aña pa yuda kontestá e preguntanan ku a wòrdu hasí. Ora nos a reuní den nan sala, e kaha di karton grandi ku tabatin pamfleta ku tabata kritiká e Iglesia tabata mei mei di e sala. Mi a hasi orashon pa e asignashon akí. Durante e orashon di apertura, e Spiritu a susurá na mi, E sa kaba ku e ta bèrdat.” Esaki tabata importante. E hermananan a kere ku e restu di e famia ya tabatin un testimonio. Nan no tabata sigur di e tata.
Mesora mi a inform’é ku e Spiritu a inspirá mi pa bisa ku el a haña un testimonio kaba. “Esei tabata bèrdat?” El a wak mi atentamente i a bisa ku e Spiritu Santu a konfirmá e bèrdat di e Buki di Mormon i di e Iglesia na dje.
E ora ei mi a puntra si lo ta nesesario pa revisá e pamfletnan, si nan ya tabatin un konfirmashon spiritual.
E tata a kontest’é ku esei no ta nesesario. E resto di famia a bai di akuerdo ku su kontesta.
El a bisa ku e tabatin un pregunta importante: Un motibu ku nan a risibí asina tantu literatura kontra e Iglesia tabata ku nan tabata miembro di un otro religion. Ademas, el a hasi un promesa grandi pa yuda konstruí un kapiya nobo pa e religion ei. El a bisa mi ku e hermananan misonero a siñé tokante e importansia di paga diesmo, loke el a aseptá ku gratitut, pero e tabata puntra su mes si lo tabata robes tambe pa kumpli ku e promesa ku el a hasi anteriormente. Mi a asegur’é ku e pago di e promesa lo ta honrabel i apropiá.
Famia Mussman ku nan yu hòmber, nuera, i yu muhé.
E famia henter a batisá. Un aña despues nan a wòrdu seyá komo un famia den e Tèmpel di Oakland California. Mi tabatin e privilegio di tabata presente. E yu hòmber a finalisá su estudio di lei, a pasa e eksámen di abogado di California, i imediatamente a sirbi fielmente komo mishonero na Hapon. Durante e añanan ku a pasa, mi a mira ku e generashonnan ku a sigui nan a keda fiel na e evangelio. Mi tabatin e privilegio di a ofisiá e seyamentu di un di e ñetunan.
E kombershonnan ku ta tuma lugá den nos tempu ta igualmente remarkabel. Yüni pasá, Entrenador Andy Reid, entrenador prinsipal di futbòl di e Kansas City Chiefs, i ami, huntu ku otro representantenan di nos religion i di otro religion, a papia den un evento multi-religioso na Riverside Church na New York City. Entrenador Reid a enfatisá riba di dos chèns i reakshonando riba invitashonnan i oportunidatnan, kual ta e propósito di e evangelio di JesuCristu. E siguiente mainta, huntu ku nos kasá, Tammy Reid i Mary, a asistí na e reunion sakramental na Manhattan Second Ward. E tabata un servisio spiritual. Den e kongregashon tabatin hopi konverso nobo. Sinku miembro ku a batisá resientemente, kuater hòmber i un hòmber hóben, tabata entre e miembronan di e Saserdosio Aaróniko ku tabata parti e Santa Sena. Mi ta kontentu di bisa ku un fluho similar di miembronan nobo ta tumando lugá den henter e Iglesia.
Nos ta gradesido pa e oumento notabel di esnan ku ta reakshoná riba e invitashonnan sagrado, kambia nan bida i aseptá e oportunidat pa sigui JesuCristu. Nan ta drenta e kaminda di e kombenio dor di fe, arepentimentu, boutismo, i konfirmashon manera siñá den e Beibel Santu i e Buki di Mormon.
Nos no por subestimá e importansia di e skrituran sagrado tantu pa e kombershonnan komo pa esnan ku a keda fiel na e evangelio. E profetanan di antigwedat deskribí den e Buki di Mormon tabata konosé e mishon di JesuCristu i a siña tokante Su evangelio. E Buki di Mormon ta yuda nos yega mas serka Dios ora nos siña, komprondé i apliká su siñansanan. E Profeta José Smith a siña, “Un hòmber [òf muhé] lo yega mas serka Dios dor di sigui e preseptonan di [e buki] ku di kualke otro buki.”
Pa sa ku e Buki di Mormon ta e palabra di Dios, nos mester lesa, meditá, i hasi orashon tokante dje i despues aktua di akuerdo ku su preseptonan. E profeta Moroni a primintí ku Dios lo revelá e bèrdat di e buki na nos si nos hasi orashon ku un kurason sinsero, ku intenshon real, i ku fe den Cristo. Studiando e buki di Mormon ta esensial pa un konvershon duradero.
Ora nos ta konsiderá e relashon entre e Beibel i e Buki di Mormon komo aparatonan portátil un hende por hasi un pregunta. Kon útil i komplementario bo ta kere ku dos buki lo tabata si Señor a deklará ku nan lo wòrdu uní i “bira un den boso man”? Esaki ta loke Señor a deklará tokante e “palu di Juda”, e Beibel, i e “palu di José,” e Buki di Mormon.
Den hopi aspekto importante, e Buki di Mormon ta duna un doktrina fundamental ku ta enrikesé i ta edifiká riba e Beibel. E doktrina di e Ekspiashon di JesuCristu ta un ehèmpel profundo.
Beibel ta duna un relato eksakto di e ministerio mortal di JesuCristu inkluyendo Su morto i Resurekshon. E Buki di Mormon ta mas eksplísito tokante e Ekspiashon di JesuCristo, algu ku profetanan a splika den detaye promé ku Su morto.
E título di Alma kapítulo 42 ta reflehá e nifikashon doktrinal di e Ekspiashon di JesuCristu.
E ta bisa:“Mortalidat ta un tempu probatorio pa permití hende pa arepentí i sirbi Dios—E Kaída a trese morto temporal i spiritual riba tur humanidat—Redenshon ta bini pa medio di arepentimentu—Dios Mes ta ekspiá pa e pikánan di mundu—Miserikòrdia ta pa esun ku arepenti—Tur otro ta suhetá na e hustisia di Dios— Miserikordia ta bini pa motibu di e Ekspiashon—Unikamente esnan bèrdaderamente penitente por haña salbashon.”
Presidente Russell M. Nelson a bisa, “Mi ta primintí ku miéntras bo ta studia e Buki Mormon den orashon tur dia, lo bo tuma mihó desishonnan—tur dia.” El a primintí tambe ku si “bo sumergí bo mes diariamente den e Buki di Mormon, bo por ta inmunisá kontra di e maldatnan di e dia.”
Manera mi a menshoná, mi a keda impreshoná ku e konsepto di e aparato original portátil—un buki. Sinembargo, mi ta rekonosé e importansia inkreibel di internèt den e mundu awendia. Un aparato moderno portátil por duna e informashon ku historkamente a yena un biblioteka grandi. Nos ta agradesido di ta biba den un tempu manera esaki. Mi ta sumamente agradesido ku e ta pèrmití bukinan sagrado i materialnan di Iglesia ta optenibel digitalmente. E internet ta un instrumento poderoso pa studia e evangelio. Awendia hopi hende ta uza teknologia pa kompartí teksto ku nan amigunan. E aplikashon Book of Mormon ta un manera maravioso pa introdusí e Buki di Mormon na amigunan i bo por kompartí esaki na un manera normal i natural unda ku bo ta.
Ounke e internet ta ofresé hopi bendishon, desafortunadamente, meskos ku e pamfletanan skirbí ku ta kritiká e Iglesia ku mi a deskribí anteriormente, e tambe a wòrdu usá pa krea duda i debilitá fe den e prinsipionan balioso di e evangelio. E por ta parti di e “maldatnan di e dia” ku Presidente Nelson a menshoná.
E atversario i esnan ku ta yudé, sea ku nan sa òf no sa, a krea riba internet e ekivalente di e kaha yen di material skirbí ku ta kritiká e Iglesia ku mi a deskribí anteriormente, ku e intenshon di desviá bo for di e bèrdat di Dios.
E asuntunan ku a lanta pa krea duda durante añanan tabata remarkablemente similar. Esaki ta partikularmente bèrdat ora bo kompará nos tempu ku e añanan di 1960, ora mi tabatin mas o ménos 20 aña
E skritura ta siña nos pa usa desishon i ta sabio den tur kos. E internèt por wòrdu usá na un manera positivo òf na un manera destruktivo.
Tantu e miembronan di hopi tempu komo esnan nobo ku ta studia e evangelio mester ta intenshonal tokante loke nan ta mira. No pasa tempu ku material inmoral, deshonesto òf inhustu. Si bo hasi esei, algoritmo por hiba bo riba un kaminda ku ta destruí bo fe i ta perhudiká bo progreso eterno. E por influensiá bo na un manera positivo òf negativo. Buska hustisia i evitá e lugánan skur di internèt i e sitionan straño, ku ta apsorbé tempu ku ta kondená i ku tin kontenido negativo ku por laga bo sinti depresivo. Yena bo bida ku ideanan positivo, hustu, sea alegre; gosa; pero evitá bobedat. Tin un diferensia. E di diestres artíkulo di fe ta un guia maravioso. Mas ku tur kos, sumergí bo den studia regularmente e Buki di Mormon, ku lo trese e Spiritu den bo bida i yuda bo distinguí bèrdat for di eror.
Mi konseho pa esnan ku di un manera òf otro a desviá di e kaminda di e kombenio ta pa bolbe na e skrituranan sagrado, guia profétiko, observashon religioso na kas, i e músika di fe. Tur alma tin balor pa Señor. Nos tin mester di boso! Señor tin mester di boso, i boso tin mester di djE! Semper bo ta bon biní. Durante mi hopi aña di servisio den Iglesia, mi a stima e hendenan maravioso ku a regresá na e kaminda di e kombenio i despues a sirbi i bendishoná tur hende ku nan tabata stima òf ku nan a bin den kontakto kuné.
E skrituranan sagrado i e profetanan bibu ta un manera prinsipal ku un Tata Selestial amoroso ta hasi Su plan di felisidat disponibel pa tur Su yunan.
Mi ta duna mi testimonio sigur di e divinidat di JesuCristu i e realidat di Su Ekspiashon, den nòmber di JesuCristu, amèn.