Uní ku JesuCristo: Birando e Salu pa e Mundu

Pa Elder José A. Teixeira

Di e Presidensia di e Setenta

Segun nos keda uní na Señor, nos bida lo reflehá Su lus di un forma natural, i nos lo bira e salu pa e mundu.

Señor a siña ku ora nos wòrdu “yamá den [Su] evangelio sempiterno, i hasi kombenio ku un kombenio sempiterno, [nos] ta wòrdu konsiderá e salu pa e mundu.” Salu ta konsistí di dos elemento ku ta uni huntu. Nos no por ta salu riba nos mes, si nos ke ta salu pa e mundu, nos mester ta uní ku Señor, i esei ta loke mi ta mira ora mi ta meskla huntu ku e miembronan di e Iglesia rònt mundu—mi ta wak miembronan fiel di e Iglesia uní ku Señor, komprometé den nan esfuerso pa sirbi otro i [pa nan] ta e salu pa e mundu.

Bo dedikashon firme ta un ehèmpel ku ta bria. Bo servisio ta apresiá i balorá.

Nos hubentut a demostrá kurashi i deboshon remarkable. Ku entusiasmo nan a brasa e obra di historia familiar, i nan bishitanan frekuente na e kas di Señor ta un testigu di nan dedikashon. Nan disponibilidat pa dediká tempu i energia pa sirbi mishonnan rònt mundu ta reflehá un fe profundo i duradero. Nan no ta solamente partisipá pero nan ta bai dilanti den bira disípulo uní na JesuCristo. Nan servisio ta radia lus i speransa, ku ta konmové numeroso bidanan. Na boso, e hubentut di e Iglesia, nos ta ekspresá nos gratitut profundo pa boso servisio inspirá. No solamente boso ta e Iglesia su futuro pero su presente. I di bèrdat boso ta e salu pa e mundu!

Mi ta stima JesuCristo i ta sinti mi bendishoná pa e oportunidat pa sirbi huntu ku boso den Señor Su Iglesia. Nos union i fortalesa, fundá den nos fe kompartí ta duna un siguransa na nos ku nunka nos no ta nos so den e hornada. Huntu, nos por sigui konstruí e reino di Dios, fundá riba servisio, amor, i fe inmutabel.

Ora JesuCristo a siña na e laman di Galilea, hopi biaha E tabata usa elementonan di tur dia ku ta konosí pa Su oudiensia pa e por splika bèrdatnan spiritualmente profundo. Un di e elementonan ei tabata salu. Jesus a deklará, “boso ta e salu pa mundu,”un deklarashon riku na nifikashon i signifikashon, espesialmente pa e pueblo i su tempu ku a komprondé e balor multifasétiko di salu.

E arte antiguo pa kosechá salu den e Algarve, e region sùit di mi pais natal Portugal, ta data for di miles di añanan bèk te na e era di e Imperio Romano. Remarkabel, e método usá pa e obreronan di salu, konosi komo marnotos, a kambia poko for di e tempu aya. E artesanonan dediká aki ta hasi uzo di téknikanan tradishonal, hasiendo nan trabou kompletamente manual, manteniendo un legado ku a keda eksistí durante e siglonan.

E métodonan antiguo aki di kosechá loke ta wòrdu yamá “flor di salu.” Pa apresiá kompletamente e proseso kompliká di kosechá e flor di salu, ta esensial pa komprondé e sirkunstansia den kua e ta wòrdu produsí. E Pantano di e salu na e kosta di Algarve ta proveé un kondishon ideal pa e produkshon di salu. Awa di laman ta wòrdu kanalisá via plasnan di awa chikitu, konosí komo saliña kaminda e ta wòrdu lagá pa evaporá bou di solo intenso. Ora e awa evaporá , e flor di salu ta forma kristalnan delikado riba e superfisie di e saliñanan. E kristalnan aki ta inkreibelmente puru i tin un tekstura úniko. E marnotos ta rosa e kristalnan di e superfisie di awa uzando un hèrmènt spesialisá, un proseso ku ta rekerí gran abilidat i presishon. Na Portugal, e salu di gran kalidat haltu aki ta wòrdu yamá “krema di salu” pasó e por kita meskos ku krema di lechi ku ta skuma bai ariba di e parti di lechi. E salu delikado ta wòrdu balorá pa su puresa i sabor eksepshonal, hasiendo e un ingrediente balorá den e arte kulinario,

Meskos ku e marnotosta hasi hopi esfuerso pa sigurá ku nan ta kosechá e kalidat di mas haltu di salu, asina nos tambe mester hasi, komo Señor Su pueblo di kombenio, semper hasi nos máksimo esfuerso p’asina nos amor i ehèmpel ta mas tantu posibel, un reflekshon di nos Salbador, JesuCristo.

Den e mundu antiguo, salu tabata mas ku simplemente un sason—e tabata un preservativo vital i un simbulo di puresa i kombenio. Hendenan tabata sa ku salu tabata esensial pa preservá kuminda i enrikesé sabor. Tambe nan tabata komprondé e implikashon grave di salu ora e pèrdè su forsa i òf sabor, ora e wòrdu kontaminá.

Meskos ku salu por pèrdè su esensia, nos tambe por pèrdè e vitalidat spiritual ora nos fe den JesuCristo bira kasual. Nos por parse meskos na e parti eksterno, pero sin un fe fuerte interno nos ta pèrdè nos abilidat pa hasi un diferensia den e mundu i saka e mihó di esnan rondó di nos.

Awor kon nos por kanalisá nos energia i esfuerso pa hasi un diferensia i ta e kambio ku e mundu mester awendia? Kon nos por preservá disipulado i sigui ta un influensia positivo?

E palabranan di nos kerido profeta te ainda ta zona den mi mente: “Dios ke pa nos obra huntu i yuda otro. Ta p‘esei el a manda nos na mundu den famia i a organisá nos den barionan i estakanan. Ta p‘esei El a pidi nos pa sirbi i ministrá na otro Ta p‘esei El a pidi nos pa biba dene mundu pero pa no ta di e mundu.

Ora nos bida ta yená ku propósito i servisio, nos ta evitá apatia spiritual; di otro banda, ora nos bida ta privá di un propósito divino, servisio signifikativo na otronan, i oportunidat sagrado pa eskrudiñá i reflehá, gradualmente nos ta bira sofoká pa nos propio aktividat i interes propio, riskando pa pèrdè nos sabor. E antídoto pa esaki ta sigui ta envolvi den servisio—ta ansiosamente envolvi den bon obra i pa mehorá nos mes i e sosiedat den kual nos ta biba.

Mi kerido rumannan, ki bendishon ku nos tur tin awe pa pertenesé na e Iglesia di JesuCristo i tin e oportunidat pa sirbi den Su Iglesia. Nos sirkunstansianan por varia, pero nos tur por hasi diferensia.

Kòrda riba e marnotos, e obreronan di salu; nan ta uza hèrmèntnan simpel pa kosechá e mihó kristalnan, e mihó salu! Nos tambe por hasi kosnan simpel kual, ku esfuerso konstante den akshonnan chikitu pero signifikativo, por profundisá nos disipulado i kompromiso den JesuCristo. Aki tin kuater manera simpel pero profundo ku nos por esforsá nos mes pa ta e salu pa mundu:

Mantené e kas di Señor komo e sentro di nos deboshon. Awor ku e tèmpelnan ta mas serka ku nunka promé, poniendo komo prioridat adorashon regular den e kas di Señor lo yuda nos enfoká riba loke ta mas importante i mantené nos bida sentralisá den Cristo. Den e tèmpelnan, nos ta haña e kurason di nos fe den JesuCristo i e alma di nos deboshon na djE.
Ta deliberá den nos esfuerso pa fortalesé otronan dor di biba e evangelio huntu. Nos por fortalesé nos famia dor di esfuerso konsistente i intenshonal pa trese e prinsipionan di evangelio den nos bida i pa nos hogarnan.
Ta dispuesto pa aseptá un yamamentu i duna servisio den Iglesia. Sirbi den nos kongregashon lokal ta permití nos pa sostené otro i krese huntu. Maske sirbi no ta semper konbiniente, semper e ta gratifikante.
I finalmente, usa medionan di komunikashon digital ku propósito. Awendia, medionan di komunikashon digital ta permití nos pa konektá manera nunka promé. Meskos ku mayoria di boso, mi ta uza e medionan aki pa konektá ku mi rumannan den Iglesia i mi famia i mi amigunan. Ora mi konektá ku nan, mi ta sinti mi mas serka di nan; nos por ministrá na otro den tempunan di nesesidat ora nos no por ta físikamente presente. E hèrmèntnan aki sin duda ta un bendishon, tòg e mesun hèrmèntnan aki por hala nos for di e profundidat di interakshon ku ta nifiká algu i eventualmente ta kousá nos pa wòrdu halá den kustumbernan ku ta laga nos pèrdè nos tempu ku aktividatnan ménos [bon] propósito. Luchando pa ta e salu di mundu ta inklui asina tantu mas ku un skròl sin fin di videonan kòrtiku riba un pantaya di seis inch.

Miéntras nos ta mantené e kas di Señor sentral den nos bida, intenshonalmente fortalesé otronan dor di biba e evangelio, aseptá e yamamentonan pa sirbi, i uza e medionan digital ku propósito, nos por preservá nos vitalidat spiritual. Meskos ku salu den su forma puru tin e poder pa enrikesé i preservá, asina tambe nos fe den JesuCristo, ora e wórdu nutrí i protehá dor di nos dedikashon na servisio manera Cristo i amor ta hasi.

Segun nos keda uní na Señor, nos bida lo reflehá Su lus di un forma natural, i nos lo bira e salu pa e mundu. Den e esfuerso aki, no solamente nos ta enrikesé nos bida pero tambe nos ta fortalesé nos famia i nos komunidat. Laga nos lucha pa mantené e unidat ku Señor i nunka pèrdè nos sabor, o ta e kristalnan chikitu di salu ku Señor ke pa nos ta. Den e nòmber di JesuCristo, amèn.