Su Man Kla pa Yuda Nos
Ora nos ta ekstendé nos man na JesuCristo den fe, E semper lo tei einan.
Ora mi tabata mucha, komo famia nos a bai ku fakansi na un playa na e kosta di mi pais natal, Chile. Mi tabata ansioso pa pasa algun dia disfrutando di e verano huntu ku mi famia. Mi tabata kontentu tambe pasobra mi tabata kere ku porfin mi por a partisipá i hasi loke mi dos ruman hòmbernan mas grandi tabata hasi pa divertí nan mes riba awa.
Un dia mi rumannan a bai hunga kaminda e ola tabata kibra, i mi a sinti mi grandi i madurá sufisiente pa sigui nan. Ora mi a move bai na e área ei, mi a realisá ku e ola tabata mas grandi ku loke tabata parse for di kosta. Diripente, un ola a yega serka mi i a sorprendé mi. Mi a sinti manera e poder di naturalesa a tuma poseshon riba mi, i mi a wòrdu tresé den e profundidatnan di laman. Mi no por a mira ni sinti ningun punto di referensia ora mi tabata wòrdu tira rònt. Mesora ora mi a pensa ku mi aventura riba tera por ta yegando na su fin, mi a sinti un man halando mi na superfisie. Finalmente, mi por a mira solo i haña rosea.
Mi ruman hòmber Claudio a mira mi intentonan di aktua manera un adulto i el a bai reskata mi. Mi no tabata leu for di e kosta. Ounke e awa no tabata hundu, mi tabata desorientá i no a realisá ku mi por a yuda mi mes. Claudio a bisa mi ku mi mester ta kuidadoso, i si mi ke, e por siña mi. A pesar di e galònnan di awa ku mi a guli, mi orguyo i deseo di ta un mucha hòmber grandi tabata mas fuerte, i mi a bisa, “Sigur.”
Claudio a bisa mi ku mi mester a ataká e olanan. Mi a bisa mi mes ku ami sigur lo pèrdè e bataya kontra loke ta parse di ta un muraya grandi di awa.
Ora un ola grandi nobo a yega serka, Claudio a bisa lihé: “Wak mi; asinaki bo ta hasié.” Claudio a kore bai dilanti di e ola i a baha den dje promé ku e ola a kibra. Mi a keda asina impresioná ku e manera ku el a baha, ku mi a pèrdè bista riba e siguiente ola ku tabata bini. Asina, atrobe mi a wòrdu mandá na e profundidatnan di laman i tirá dor di e forsanan di naturalesa. Un par di sekònde despues, un man a gara esun di mi, i un biaha mas mi a wòrdu hibá na e superfisie i airu. E kandela di mi orguyo a disparsé.
E biaha aki mi ruman hòmber a invitá mi pa bai sambuyá huntu kuné. Segun su invitashon, mi a siguié, i nos a sambuyá huntu. Mi tabata sinti manera mi tabata konkistando e reto di mas kompliká. Sigur, no tabata fásil, pero mi a logra danki na e yudansa i ehèmpel ku mi ruman hòmber a mustra. Su man a salba mi dos biaha; su ehèmpel a mustra mi kon mi por a enfrentá mi desafio i bira viktorioso e dia ei.
Presidente Russell M. Nelson a invitá nos pa pensa selestial, i mi ke sigui su konseho i aplik’é na mi relato di verano.
E Poder di e Salbador Riba e Atversario
Si nos ta pensa selestial, nos lo komprondé ku nos bida lo enfrentá desafionan ku ta parse mas grandi ku nos kapasidat pa vense nan. Durante nos bida mortal, nos ta suheto na e atakenan di e atversario. Meskos ku e ola ku tabatin poder riba mi e dia ei di verano, nos por sinti nos impotente i ke entregá nos na un destino mas fuerte. E “olanan maligno” ei lo por pusha nos di un banda pa otro. Pero no lubidá ken tin poder riba e ola ei, i en realidat, riba tur kos. Esei ta nos Salbador, JesuCristo. E tin e poder pa yuda nos sali for di tur kondishon miserabel òf situashon atverso. No ta importá si nos ta sinti nos serka di djE, E por yega na nos unda ku nos ta manera nos ta.
Ora nos yega serka djE den fe, E lo ta semper ei, i na Su tempu, E lo ta kla i dispuesto pa kue nos man i trese nos na un lugá sigur.
E Salbador i Su Ehèmpel di Ministerio.
Si nos ta pensa selestial, nos lo rekonosé JesuCristo komo un ehèmpel perfekto di ministerio. Tin un ehèmpel den e Skrituranan pa nos ora ku E òf Su disípulonan ta yega serka un hende ku mester di yudansa, salbashon, òf un bendishon, dor di tene nan man. Manera den mi historia, mi tabata sa ku mi ruman tabata einan, pero ta einan p’ami no tabata sufisiente. Claudio tabata sa ku mi tabata den problema, i el a bai pa yuda lanta mi for di e awa.
Tin biaha, nos ta pensa ku nos mester djis yuda un hende ku tin mester, i hopi bia tin mas ku nos por hasi. Si nos tin un perspektiva eterno, e por yuda nos risibí revelashon pa duna yudansa oportuno na otronan den nesesidat. Nos por konfia riba guia i inspirashon di Spiritu Santu pa diserní ki sorto di yudansa ta nesesario, sea e ta un yudansa temporal manera konsuelo emoshonal, kuminda, yudansa den tareanan diario, òf guia spiritual pa yuda otronan den nan biahe pa prepará, hasi i honra kombenionan sagrado.
E Salbador Ta Prepará pa Salba Nos
Ora Pedro, e apòstel di mas antigwedat, a “kana riba awa pa bai serka Jesus, … el a haña miedu i a kuminsá senk,” e ora ei “el a grita, bisando, Señor, salba mi.” Jesus tabata sa ku Pedro a demostrá fe ora el a kana riba awa bai serka djE. E tabata sa tambe ku Pedro tabatin miedu. Segun e relato, Jesus “inmediatamente … a hala su man, i a kue Pedro,” bisando e siguiente palabranan: “abo di poko fe, pakiko bo a duda?” Su palabranan no tabata pa reprendé Pedro, sino pa rekòrd’é ku E mes, e Mesias, tabata huntu ku Pedro i e disípulonan.
Si nos ta pensa selestial, nos lo risibí e konfirmashon den nos kurason ku JesuCristo ta nos Salbador, nos Abogado serka e Tata, i nos Redentor. Ora nos pone fe den djE, E lo salba nos for di nos estado di pekador, mas leu di nos retonan, debilidatnan i nesesidatnan den e bida temporal aki, i duna nos e regalo di mas grandi di tur, ku ta bida eterno.
E Salbador No Ta Desistí di Nos
Mi ruman hòmber no a desistí di mi e dia ei, pero el a persistí pa mi por a siña kon pa hasi esaki riba mi mes. El a persistí, asta si esei tabata rekerí ku e mester a salba midos biaha. E tabata persistí, asta si na promé instante mi no por a komprondé. El a persistí pa mi por a surpasá e reto ei i logra. Si nos ta pensa selestial, nos lo realisá ku nos Salbador lo ta presente tantu biaha ku ta nesesario pa duna nos yudansa si nos ke siña, kambia, vense, afrontá òf logra den kualke kos ku lo trese felisidat berdadero i eterno na nos bida.
E Mannan di e Salbador
E Skritura ta inmortalisá e símbolo i e nifikashon di e mannan di e Salbador. Den Su sakrifisio ekspiatorio, nan a perforá Su mannan ku want’E na e krus. Despues di Su resurekshon, El a aparesé na Su disípulonan den un kurpa perfekto, pero e markanan den Su mannan a keda komo un rekordatorio di Su sakrifisio infinito. Su man lo ta semper presente pa nos, asta si nos no por mir’é ni sintié na promé instante, pasobra nos Tata Selestial a skohe Jesus pa ta nos Salbador, e Redentor di henter humanidat.
Den nos gara, pa Jay Bryant Ward
E Man di Dios, pa Yongsung Kim
Si mi ta pensa selestial, mi sa ku nos no ta keda nos so den e bida aki. Ounke nos mester enfrentá reto i pruebanan, nos Tata Selestial sa nos kapasidatnan i sa ku nos por soportá òf vense nos difikultatnan. Nos mester hasi nos parti i bira na djE den fe. Su Yu stimá, JesuCristo, ta nos reskatadó i semper lo e ta presente. Den Su nòmber, e nòmber sagrado di JesuCristo, amèn.