Santidat na Señor den Bida Diario

Pa Elder Gerrit W. Gong

Di e Quorum di e Diesdos Apòstelnan

Santidat na Señor den Bida Diario E ta hiba nos mas serka i mas felis na Señor i na un i otro.

Nos reunion resiente di famia a inkluí un show di talento grasioso, kompletu ku un kompetensia di chistenan di tata.

Pero e kompetensia aki tabata inusual. Den un grupo tabatin Tawela (ami) i dos di e nietunan, di 12 i 11 aña. Den e otro grupo tabatin un programa di inteligensia artifisial (AI) impulsá dor di un primu pa konta chistenan di tata estilo di Gerrit W. Gong. Tawela Gerrit Gong kontra AI Gerrit Gong.

E ñetunan i ami a bai promé.

Kiko bo ta yama un dinosourio ku ta dal su outo? Tyrannosaurus Wrecks.

AI Gerrit Gong a wòrdu instruí pa—pensa manera Gerrit W. Gong. Papia meskos kuné.

AI Gerrit Gong—“Aki tin un chiste di tata manera bisá pa Gerrit W. Gong, brasando su estilo, kaluroso, pensativo, i animadó: Dikon e palu humilde ta pone hende hari? Pasó su raisnan ta ankrá den amor i e tabata ekstendé ku takinan di kariño. Meskos ku e palu ei, nos tambe por haña forsa den nos raisnan i goso den ekstendé kariño na otronan.”

Wel, kiko bo ta pensa? P‘esei nan yama chistenan di tata.

Tur rònt di nos tin oportunidatnan pa hari, disfrutá, wak ku wowonan gradesido. Nos evangelio ta un di goso i santidat den bida diario. Santidat ta pone kosnan un banda pa propósitonan sagrado. Pero santidat ta invitá nos tambe pa hinka e sagrado den bida diario—pa regosihá den pan di kada dia entre e sumpiñanan i yerbanan malu di e mundu aki. Pa kana ku Señor, nos mester bira sagrado, pasó E ta sagrado, i pa yuda nos bira sagrado, Señor ta invitá nos pa kana ku n‘E.

Nos tur tin un historia. Ora hermana Gong i ami topa ku boso—miembronan di Iglesia i amigunan den hopi lugá i sirkunstansia—boso historianan di santidat na Señor den bida diario ta inspirá nos. Bo ta biba shete C[na spañó]: comunion con Dios, comunidad y compasión con cada uno, compromiso y convenio con Dios, familia, y amigos—centrado en JesuCristo.

Evidensia kresiente ta suprayá e echo sobresaliente aki: kreyentenan religioso generalmente ta mas felis, salú, i mas satisfecho ku esnan sin kompromiso òf konekshon spiritual. Felisidat i satisfakshon di bida, salú mentaI i físiko, nifikashon i propósito, karakter i birtut, relashonnan sosial será, stabilidat finansierio i material—den kada midí, práktikadonan religioso ta floresé.

Nan ta disfrutá di mihó salú físiko i mental i mas satisfakshon den bida den tur edat i gruponan demográfiko.

Loke analisadónan ta yama “stabilidat struktural religioso” ta ofresé klaridat, propósito, i inspirashon den kambionan inesperá di bida. E kas di fe i komunidat di Santunan ta kombatí isolashon i e grupo solitario. Santidat na Señor ta bisa no na e profanadó, no na rebahamanetu di otronan, no na algoritmonan ku ta gana sèn ku rabia i polarisashon. Santidat na Señor ta bisa si na e sagrado i reverente, si na nos biramentu mas liber, felis, mas outéntiko, e mihó di nos mes ora nos sigui E den fe.

Kiko santidat na Señor den bida diario ta parse?

Santidat na Señor den bida diario ta parse dos hóben adulto, kasá pa un aña, kompartiendo kombenionan di evangelio ku outentisidat i vulnerabilidat, sakrifisio, i servisio den nan bida den desaroyo.

E ta kuminsá, “Na skol sekundario, mi tabata den un lugá skur. Mi a sinti manera ku Dios no tabatei pa mi. Un anochi, un teksto di un amigu a bisa, ‘Hey bo a yega di lesa Alma 36 kaba?’

“Ora mi a kuminsá lesa,” el a bisa, “Mi a keda yená ku pas i amor. Mi a sinti manera mi tabata haña un brasa grandi. Ora mi a lesa Alma 36:12, mi tabata sa ku Tata Selestial a mira mi i tabata sa eksaktamente kon mi tabata sinti.”

E ta sigui, “Promé nos kasa, mi tabata honesto ku mi prometido ku mi no tabatin un gran testimonio di diesmo. Dikon Dios ke pa nos duna sèn ora otronan tin asina tantu pa duna? Mi prometido a yuda splika ku no ta tokante sèn pero di sigui un mandamentu ku ta pidi nos. El a reta mi pa kuminsá paga diesmo.

“Realmente mi a mira mi testimonio kuminsá krese,” el a bisa. Tin bia sèn ta pèrtá, pero nos a mira asina hopi bendishon i di un òf otro manera e salario tabata sufisiente.”

Tambe, “den mi klas di enfermera,“ el a bisa, “Mi tabata e úniko miembro di Iglesia i e úniko kasá. Hopi bia mi a sali klas frustrá òf yorando pasobra mi tabata sinti ku e kompañeronan tabata mustra dede riba ami i tabata hasi komentarionan negativo tokante mi kreensianan, mi bistimentu di garment, òf ku mi a kasa asina yòn.”

Pero e ta sigui, “E último semèster aki mi a siña kon pa ekspresá tokante mi kreensianan i ta un bon ehèmpel di evangelio. Mi konosementu i testimonio a krese pasobra mi a wòrdu di tèst den mi abilidat pa para mi so i ta fuerte den loke mi ta kere.”

E esposo yòn ta agregá, “Promé ku mi mishon mi tabatin ofertanan pa hunga basketbal pa univèrsidat. Tumando e desishon difísil, mi a pone e ofertanan aki un banda i a bai pa sirbi Señor. Lo mi no a kambia e dos añanan aki pa nada.

“Regresando kas,” el a bisa, “Mi a spera un transishon difísil pero mi a haña mi mes mas fuerte, mas lihé, i mas salú. Mi tabata tira mas duru ku ora mi a bai. Mi a hana mas oferta pa hunga ku ora mi a bai, inkluso e skol di mi soño. I, mas importante,” el a bisa “Mi a konfia riba Señor mas ku nunka.”

E ta konkluí, “Komo mishonero mi a siña ku Tata Selestial ta primintí nos poder den nos orashonnan, pero tin bia mi ta lubidá esei pa mi mes.”

Nos tesoro di santidat mishonal na Señor Su bendishonnan ta riku i yen. Finansa, tempu, i otro sirkunstansianan hopi bia no ta fásil. Pero ora mishoneronan di tur edat i orígen konsagrá santidat na Señor, kosnan por sali bon den tempu i manera di Señor.

Awor ku un perspektiva di 48 aña, un mishonerio di edat avansá ta kompartí, “Mi tata tabata ke pa mi haña un edukashon universitario, no pa bai ku mishon. Poko despues di esei, el a haña un ataka di kurason i a muri na edat di 47 aña. Mi a sinti kulpa. Kon mi por a hasi bon ku mi tata?

“Mas lat,” e ta sigui, “Despues ku mi a disidí pa sirbi un mishon, mi a mira mi tata den un soño. Na pas i kontentu, e tabata felis ku lo mi sirbi.”

E mishonero di edat avansá aki ta sigui, “Manera Doctrina y Convenios 138 ta siña, mi a kere mi tata por sirbi komo un mishonero den e mundu di spiritu. Mi ta imaginá mi tata ta yuda nos bisa tawela, ku a bandoná Alemania ku 17 aña i a keda pèrdí pa e famia, pa wòrdu hañá atrobe.”

Su kasá ta agregá, “Entre e sinku rumannan hòmber den famia di mi esposo, e kuaternan ku a sirbi mishonnan ta esnan ku gradonan avansá di universidat.”

Santidat na Señor den bida diario ta parse un mishonero yòn ku a regresá ku a siña pa laga Dios prevalesé den su bida. Promé, ora a pidié pa bendishoná un persona ku tabata hopi malu, e mishonero aki a bisa, “Mi tin fe; i lo mi bendishon’é pa e rekuperá. Sinembargo,” e mishonero regresá ta bisa, “Mi a siña den e momentu ei pa no hasi orashon pa loke ami tabata ke, pero pa loke Señor tabata sa ku e persona tin mester. Mi a bendishoná e hermano ku pas i konsuelo. Despues el a fayesé na pas.

Santidat na Señor den bida diario ta sinti manera rayo krusando e velo pa konektá, konsolá, fortalesé. Un atministradó, na un universidat grandi a bisa e ta sinti personanan ku e konosé solamente pa reputashon ta hasi orashon p‘e. E personanan aki a dediká nan bida na e universidat i ta sigui sòru pa su mishon i studiantenan.

Un hermana ta hasi esfuerso kada dia, despues ku su kasá infiel e i e yunan. Mi ta atmiré profundamente i otronan manera e. Un dia ora e tabata dobla paña, su man riba un monton di paña, el a suspirá pa su mes, “E tin sentido?” El a sinti un bos siguré, “Bo kombenionan ta ku mi.”

Pa 50 aña, un otro hermana a anhelá pa un relashon ku su tata. “Kresiendo,” el a bisa, “tabatin mi rumannan hómber i mi tata, i despues tabatin ami—e úniko yu muhé. Tur loke mi tabata ke tabata pa ta ‘bon sufisiente’ pa mi tata.

“Despues mi mama a fayesé! E tabata mi úniko konekshon entre mi tata i ami.

“Un dia” e hermana a bisa, “Mi a tende un bos bisa mi, ‘Invitá bo tata i hibe tèmpel huntu ku bo.’ Esei tabata e kuminsamentu di un sita di dos bia pa luna ku mi tata na e kas di Señor. Mi a bisa mi tata ku mi ta stimé. El a bisa mi ku e tambe stima mi.

“Pasando tempu den kas di Señor a sana nos. Mi mama no por a yuda nos na tera. A tumé pa ta na otro banda di e velo pa yuda drecha loke tabata kibrá. E tèmpel a kompletá nos biahe pa ta kompletu komo un famia eterno.”

E tata ta bisa, “E dedikashon di e tèmpel tabata un gran eksperensia spiritual pa mi i mi úniko yu muhé. Awor nos ta bishitá huntu i ta sinti nos amor fortalesé.”

Santidat na Señor den bida diario ta inkluí e momentunan tièrno ora un ser kerí fayesé. Na kuminsamentu di e aña aki, mi mama stimá, Jean Gong, a pasa pa inmortalidat algun dia promé ku su di 98 kumpliaño.

Si bo a puntra mi mama, “Lo bo gusta un eiskrim di chukulati i nechi, chukulati blanku ku ehèmber, òf eiskrim di fresa?” Mama lo bisa, “Si, por fabor, mi por purba kada un?” Ken por bisa no na su mama, spesialmente si e ta gusta tur sabor?

Un bia mi a puntra Mama kua desishonnan a forma su bida mas tantu.

El a bisa,“Siendo batisá komo miembro di E Iglesia di JesuCristo di e Santunan di e Delaster Dianan i muda for di Hawaii pa kontinente, kaminda mi a konosé bo tata.

Batisá ku 15 aña, e úniko miembro di su famia grandi pa uni na nos Iglesia, mi mama tabtatin fe di kombenio i konfiansa den Señor ku a bendishoná su bida i tur generashon di nos famia. Mi ta sinti falta di mi mama, manera boso ta sinti falta di miembronan di boso famia. Pero mi sa ku mi mama no a bai. Solamente e no ta aki awor aki. Mi ta honr’e i tur ku a muri komo ehèmpelnan balente di santidat diario na Señor.

Klaro, santidat na Señor den bida diario ta inkluí bini mas tantu na Señor den Su kas Santu. Esaki ta bèrdat sea nos ta miembronan di Iglesia òf amigunan.

Tres amigu a bin kas habrí di Tèmpel di Bangkok Thailand.

Esaki ta un lugá di sanashon ekselente,“ un a bisa.

Den boutisterio, un otro a bisa, “ora mi t’akinan, mi ke wórdu labá limpi i no hasi piká nunka mas.”

E di tres a bisa, “Bo por sinti e poder spiritual?”

Ku shete palabra sagrado, nos tèmpelnan ta invitá i proklamá:

“Santidat na Señor.

“E kas di Señor.”

Santidat na Señor ta hasi bibamentu diario sagrado. E ta hiba nos mas serka i mas felis na Señor i otro i ta prepará nos pa biba ku Dios nos Tata, JesuCristo, i nos sernan kerí.

Manera mi amigu a hasi, bo ta puntra bo mes si bo Tata Selestial ta stima bo. E kontesta ta un si kontundente, apsolutamente si! Nos por sinti Su amor ora nos hasi santidat na Señor parti di nos tur dia, felis i pa semper. Ku nos por hasi esaki mi ta pidi den orashon den e nòmber sagrado di JesuCristo, amèn.

Notanan

1. For di tempu di Tèstamènt Bieu, nos ta siña, “Santifiká nos mes, i boso lo ta Santu; pasó Ami ta santu”(Levítiko 11:44). Nos tin ku kana den santidat dilanti Señor( wak Doctrina y Convenios 20:69), para na lugánan sagrado (wakDoctrina y Convenios 45:32), tene e dia di Sabat sagrado (wak Eksodo 20:8), bisti garments sagrado (wak Eksodo 29:29), uza zeta di unshon sagrado (wak Eksodo 30:25), sea bendishoná pa profetanan sagrado (wak Doctrina y Convenios 10:46), i konfia riba e skrituranan santu wak Doctrina y Convenios 20:11), leinan sagrado (wak Doctrina y Convenios 20:20), i angelnan sagrado (wak Doctrina y Convenios 20:6). Santidat na Señor ta intenshoná pa bendishoná tur aspekto di nos bida diario.

2. Wak Moises 6:34.

3. Wak “Religion and Spirituality: Tools for Better Wellbeing?,” Gallup Blog, Oct. 10, 2023, news.gallup.com. “Worldwide, people with a greater commitment to spirituality or religion have better wellbeing in many respects”—including positive emotions, sense of purpose, community engagement, and social connections (Faith and Wellness: The Worldwide Connection between Spirituality and Wellbeing [2023], 4, faithandmedia.com/research/gallup).

4. Kada eksperensia sitá ta kompartí—ku mi atmirashon i apresio—den e palabranan di e personanan enbolbí i ku nan pèrmit.

5. Awe den Iglesia, hóbennan adulto di 18–35 aña (inkluyendo tantu hóben soltero komo hóben soltero kasá) i adulto soltero (di 36–45 aña) ta konsistí di un terser parti (32.5 porshento) di e total di miembronan di Iglesia. Di e 5.623 miyon miembronan di Iglesia, hobennan adulto di 18 pa 35 aña ta 3.625 miyon (di kual 694,000 ta kasá), i adultonan soltero di 36 pa 45 aña ta 1.998 miyon. Nos hóbennan i nos adultonan soltero ta sobresaliente; kada un di nan ta presioso. Kada un tin un hisotria individual di fe, buskamentu, resistensia, i kompashon. E ehèmpel ku mi ta kompartí aki ta representativo di e variedat di historia i eksperensia ku hóbennan i adultonan soltero ta kompartí ora mi ta topa boso den hopi ambiente i sirkunstansia rònt di e Iglesia.

6. Aktualmente tin mas o ménos 77.500 mishonero ku ta sirbi den 450 mishon mundialmente. Esaki ta inkluí mishoneronan hóben ku ta siña, mishoneronan hóben di servisio i parehanan di mishoneronan, pero no parehanan mishonero di servisio i boluntarionan di largu plaso. Kada historia mishonal, for di preparashon te ku servisio i regreso, ta individual i yen di santidat pa Señor den eksperensia personal.

   Hopi eksperensianan mishonal ta reflehá un patronchi spiritual. Esaki ta inkluí testimonio individual di invitashon desinteresá i di yuda otronan pa bini na JesuCristo i di e mishonero birando un disípulo di JesuCristo i mishonero di Predica Mi Evangelio. Mishoneronan di Predicad Mi Evangelio ta kambiá, hasta transformá, pa nan eksperensianan di testimonio. Nan ta siña pa stima personanan, lugánan, idiomanan, i kulturanan. Nan ta kumpli ku e profesia dor di trese e bon notisianan di e kumplimentu di e evangelio restorá di JesuCristo na nashonnan, famianan, i hendenan. Nan ta haña e bon den i di siña pa biba ku tur kompañero. Nan ta traha ku miembronan, i amigunan den hopi sirkunstansia i antesedente, i hopi mas.

   Mishoneronan di Predicad Mi Evangelio ta nutri fe i konfiansa. Nan ta edifiká kompañerismo konsagrá. Nan ta siña ku obedensia ta trese bendishonnan i milagernan. Den hopi otro forma personalisá, nan ta bira di bèrdat i sa pa kombenio: “Mi ta un disípulo di JesuCristo, e Yu di Dios” (3 Nefi 5:13).

7. Algun di nos miembronan di Iglesia mas fiel i ku kurashi, hermananan i hermanonan, ta haña nan mes enfrentando situashonnan ku nunka nan a spera i nunka lo a skohe. E Santunan berdadero aki ta sigui dilanti, dia den dia afó, hopi bia sperando riba Señor. Señor sa di kada un, i manera e ehèmpel aki ta mustra ku ternura, deseonan pa kurashá i fortalesé kada un di nos den Su tempu i manera.

8. Tin hopi anhelo pa relashonnan ku mayornan i yunan. Mi ta profundamente gradesido pa kada situashon den kua, hasta despues di hopi aña, rekonsiliashon, pordonamentu, i pertenesé na kombenio ta kreá òf restorá. E bon hermana aki no ke pa ningun hende pensa malu di su tata. E ta bisa, “E ta un lider bon i fiel i un bon tata.”

9. Un paradoho di lanta yu ta ku nan ta profundamente formá pa e manera ku nan a nutrí, ku usualmente nan ta kòrda poko di e promé añanan tempu nan mamanan tabata mamanan ku no ta kansa i ta sin egoismo. Palabranan no ta sufisiente pa ekspresá e bèrdat ku mi komprenshon, amor, i apresio pa mi tata i mama ta ekspandé i profundisá ora mi a bira un esposo, mayor, i tawela. Reflehando e naturalesa generashonal di plan di felisidat, nos por , mira nos mes, den e spilnan di eternidat di tèmpel komo un mama, wela, bisawela den un direkshon i komo yu muhé, nietu, i bisa nietu den e otro direkshon.

10. Awe, aproksimadamente 60 porshento di miembronan di Iglesia mundialmente ta biba denter di 50 miya (80 km, òf banda di un ora di biahe den mayoria lugá) for di un kas di Señor. Den añanan benidero, manera tèmpelnan anunsiá ta kompletá, apróksimadamente tres kwart parti di miembronan di Iglesia lo biba denter di un ora for di un kas di Señor. Dependé na sirkunstansianan, ta spera ku esei ta sufisiente serka pa bini hopi bia na Señor den Su kas sagrado, asina bendishoná generashonnan di famianan presioso i nos mes i nos posteridat.

11. Riba nos tèmpelnan, e inskripshon standarisá ta “Santidat na Señor, e Kas di Señor.” Algun tèmpel ta inkluí mas ku e inskripshon aki, manera agregá e nòmber di e Iglesia. Algun tèmpel tin e inskripshon reverso: “E Kas di Señor, Santidat na Señor” (na Atlanta, Los Angeles, i San Diego na Merka). ”E inskripshon di Logan tèmplel ta bisa simplemente, “Santidat na Señor.”