Señor JesuCristo Lo Bini Atrobe

Pa Presidente Russell M. Nelson

Presidente di E Iglesia di JesuCristo di e Santunan di e Delaster Dianan

Awor ta e tempu p’abo, i ami, pa prepará pa e Segunda Binida di nos Señor i Salbador, Jesus e Cristo.

Mi kerido rumannan, mi ta agradesido ku Señor a bendishoná mi pa papia ku boso.

Den e konferensia aki, Señor a papia ku nos pa medio di Su sirbidónan. Mi ta urgi boso pa studia nan mensahenan. Usa nan komo e tèst máksimo di loke ta bèrdat, i loke no ta, durante e siguiente seis lunanan.

E preservashon i renobashon di e Tèmpel di Salt Lake, i otro áreanan di e plasa di Tèmpel, ta andando pa kasi sinku aña. Proyektonan aktual ta indiká ku e trabou aki lo wòrdu kompletá na final di 2026. Nos ta agradesido pa tur ku ta trahando riba e proyekto masal aki.

Durante e último seis lunanan, nos a dediká òf redediká nuebe tèmpel den sinku pais. Entre awor i final di aña, nos lo dediká sinku mas.

Awe, nos ta komplasí pa anunsiá plannan pa konstruí 17 tèmpel mas. Por fabor skucha reverentemente segun mi ta anunsiá e luganan.

Juchitán de Zaragoza, Mexico
Santa Ana, El Salvador
Medellín, Colombia
Santiago, Dominican Republic
Puerto Montt, Chile
Dublin, Ireland
Milan, Italy
Abuja, Nigeria
Kampala, Uganda
Maputo, Mozambique
Coeur d’Alene, Idaho
Queen Creek, Arizona
El Paso, Texas
Huntsville, Alabama
Milwaukee, Wisconsin
Summit, New Jersey
Price, Utah

Mi kerido rumannan, boso ta mira kiko ta pasando djis dilanti di nos wowonan? Mi ta hasi orashon ku nos lo no pèrdè e mahestat di e momentu aki! Señor enbèrdat ta purando Su obra.

Dikon nos ta konstruyendo tèmpelnan di un manera nunka bisto promé? Dikon? Pasobra Señor a instruí nos pa hasi asina. E bendishonnan di tèmpel ta yuda rekohé Israel na ámbos banda di e velo. E bendishonnan aki ta yuda tambe pa prepará un pueblo ku lo yuda prepará e mundu pa e di dos Binida di Señor!

Manera e profeta Isaias a profetisá, i manera konmemorá den Handels su, Mesias, ora ku JesuCristo regresá, e gloria di Señor lo wòrdu revelá, i tur karni lo wak e huntu.”21

Riba e dia ei, “e gobièrnu lo ta riba su skouder; i el lo wòrdu yamá Maravioso, Konsehero, E Dios poderoso, E Tata eterno, E Prínsipe di Pas.”

JesuCristo lo goberná for di tantu Herusalèm bieu i e Yerusalèm Jerusalem nobo “konstruí riba e kontinente Merikano.” For di e dos sentronan aki, El lo dirigi e asuntunan di Su Iglesia.

Riba e dia ei, Señor lo ta konosí komo “Rei di Reinan, i Señor di Señornan.” Esnan ku ta huntu kuné lo wòrdu “yamá, i skohé, i lo fiel.”

Rumannan, awor ta e tempu p’abo, i ami, pa prepará pa e Segunda Binida di nos Señor i Salbador, Jesus e Cristo. Awor ta e tempu pa nos hasi nos disípulado nos prioridat di mas haltu. Den un mundu yená ku distraishonnan loko, kon nos por hasi esaki?

Adorashon regular den tèmpel lo yuda nos. Den e kas di Señor, nos ta enfoká riba JesuCristo. Nos a siña di dje. Nos ta sera kombenionan pa siguiÉ. Nos lo yega na konosé. Segun nos ta warda nos kombenionan di tèmpel, nos ta optené mayor akseso na Dios su poder ku ta fortalesé. Den tèmpel, nos ta risibí protekshon for di e bòftanan di mundu. Nos ta eksperensiá e amor puru di JesuCristo i nos Tata Selestial den gran abundansia! Nos ta sinti pas i restorashon di konfiansa spiritual, kontrario di e turbulensianan di mundu.

Ata mi promesa pa bo aki: tur buskadó sinsero di JesuCristo lo hañ’E den tèmpel. Bo lo sinti Su miserikòrdia. Lo bo haña kontestanan riba bo preguntanan di preguntanan mas pisá. Lo bo komprondé e goso di Su evangelio mihó.

Mi a siña ku e pregunta di mas krusial ku nos mester kontesta ta esaki: Na ken òf na kiko lo mi entrega mi bida?

Mi desishon pa sigui JesuCristo ta e desishon di mas importante ku mi a tuma. Durante skol médiko mi a gana un testimonio di e divinidat di Dios e Tata i Su Yu, JesuCristo. For di e tempu ei, nos Salbador tabata e baranka riba kual mi a konstruí mi bida. E eskoho a hasi tur e diferensia! E desishon ei a hasi asina tantu otro desishonnan fasil. E desishon ei a duna mi propósito i direkshon. El a yuda mi tambe sobrebibí e tormentonan di mi bida. Laga mi kompartí dos ehèmpel.

Promé, ora mi kasá Dantzel a muri inesperadamente, mi no por a yega na ningun di nos yunan. Ata mi, mi so, ruiná, i yorando pa yudansa. Agradesido, pa medio di Su Spiritu, Señor a siña mi dikon mi kasá stima Dantzel a wordu hiba kas. Ku e komprondementu ei, mi a wòrdu konsolá. Ku tempu, mi por a atendé mihó ku mi doló. Despues, mi a kasa ku mi kasá stimá Wendy. E tabata un parti sentral di mi di dos ehèmpel.

Ora ami ku Wendy tabata riba asignashon den un pais lehano, atrakadornan armá a pone pistol na mi kabes i a tira. Pero e arma no a tira. Durante di e eksperensia ei, nos tur dos su bida tabata bou di menasa. Sinembargo, ami i Wendy a sinti un pas enorme. Tabata e pas “ku a surpasá tur entendimentu.”

Rumannan, Señor lo konsolá bosnan, tambe! E lo fortalesé boso. El lo bendishoná boso ku pas, asta mei mei di káos

Por fabor skucha e promesa di JesuCristo na bo: Lo mi ta na bo man drechi i esun robes, i mi Spiritu lo ta den bo kurason, i mi angelnan rondó di bo, pa skucha bo.”

No tin límite na e Salbador su kapasidat pa yuda bo. Su sufrimentu inkomprendibel den Getsemani i riba kalvario tabata pa bo. Su Ekspiashon infinito ta pa bo!

Mi ta urgi boso pa dediká tempu tur siman—pa e restu di bo bida—pa oumentá bo komprondementu di e Ekspiashon di JesuCristo. Mi kurashon ta hasi doló pa esnan ku ta pegá den pika i no sa kon pa sali. Mi ta yora pa esnan ku ta lucha spiritualmente of tin karganan pisa, nan so paso nan no ta kompronde loke JesuCristo a hasi pa nan.

JesuCristo a tuma riba Su mes boso pikánan, boso angustianan, boso dolornan di kabes, i boso enfermedatnan. Bo no mester karga nan bo so! El lo pordoná bo si bo arepentí. El lo bendishoná bo ku loke bo mester. El lo sana bo alma herida. Segun bo uni bo mes na djÉ, bo karganan lo sinti mas lihero. Si bo hasi i warda kombenionan di sigui Cristo, lo bo sa ku momentunan doloroso di bo bida ta temporario. Bo aflikshonnan lo wòrdu “gulí den e goso di Cristo.”

E no ta ni muchu tempran ni muchu lat pa bo bira un disípulo dediká di JesuCristo. E ora ei lo bo eksperensiá kompletamente e bendishonnan di Su Ekspiashon. Lo bo ta mas efektivo tambe den yuda rekohé Israel.

Mi kerido rumannan, riba un dia binidero, JesuCristo lo regresá na tera komo e Mesias di e milenio. Pues awe, mi ta hasi un yamada na boso pa redediká boso bida na JesuCristo. Mi ta hasi un yamada na boso pa rekohé Israel plamá i pa prepará e mundu pa nos por tin Segundo Binida di Señor. Mi ta hasi un yamada na bo pa papia di Cristo, testifiká di Cristo, tin fe den Cristo, i regosihá den Cristo.

Bini na Cristo i “ofresé bo [alma]” na djE. Esaki ta e sekreto pa un bida di goso!

E mihó ta na kaminda, mi kerido rumannan, pasobra e Salbador ta biniendo atrobe! E mihó ta na kaminda pasobra Señor ta purando Su obra. E parti mihó ainda ta na kaminda ora nos bira nos kurason i nos bida kompletu na JesuCristo.

Mi ta duna mi solemne testimonio ku JesuCristo ta e Yu di Dios. Mi ta Su disípulo. Mi ta honrá pa ta Su sirbidó. Na Su Segunda Binida, e gloria di Señor lo wòrdu revelá, i tur karni lo mir’é huntu.” E dia ei lo wòrdu yená ku goso pa e rekto!

Pa medio di e poder di e yabinan sagrado di saserdosio ku mi ta poseé, mi ta deklará e bèrdat aki na boso i na mundu kompletu. Den e nòmber di JesuCristo, amèn.