E Doktrina di JesuCristo Ta Simpel
Mi ta duna mi testimonio di e obra sagrado di siña Tata Selestial su yunan e doktrina simpel di JesuCristo.
Nos tur tin miembronan di famia ku nos ta stima ku ta wòrdu tentá i di tèst dor di e forsanan aparentemente konstante di Satanas, e destruktor, ku ke hasi tur Dios Su yunan miserabel. Pa hopi di nos, tabatin nochinan sin soño. Nos a purba pa rondoná e hendenan ku ta na rísiko ku tur forsa pa bon. Nos a roga den orashon pa nan. Nos a stima nan. Nos a duna e mihó ehèmpel ku nos tabata por.
Alma, un profeta sabio di tempunan antiguo, a enfrentá pruebanan similar. E hendenan ku el a guia i stima tabata frekuentemente bou di atake di e enemigo feros, sinembargo nan tabata purba ketu bai pa lanta yunan hustu den un mundu di maldat. Alma a sinti ku su úniko speransa pa viktoria tabata un forsa ku tin bia nos ta balotá i hopi bia ta usa demasiado poko. El a roga pa yudansa di Dios.
Alma tabata sa ku pa Dios yuda, arepentimentu tabata nesesario pa esnan ku e tabata guia, i tambe pa su atversarionan. Pues, el a opta pa un aserkamentu diferente pa bataya.
E Buki di Mormon ta deskribié di e manera aki: “I awor, ya komo e predikashi di e palabra tin un gran tendensia di laga e pueblo hasi loke tabata rekto—si, e tabatin un efekto mas poderoso riba e mente di e pueblo ku loke e spada tabatin, òf kualke otro kos, ku a pasa nan —pesei Alma a pensa ku tabata esensial pa nan purba e virtut di e palabra di Dios.”
E palabra di Dios ta e doktrina siñá pa JesuCristo i pa Su profetanan. Alma tabata sa ku palabranan di e doktrina tabatin poder grandi.
Den e di 18 sekshon di Doctrina y Convenios, Señor ta revelá e fundeshi di Su doktrina:
“Pasó, ata ki, Mi ta manda tur hòmber tur kaminda pa arepentí. …
“Pasó, ata ki, e Señor nos Redentor a sufri morto den karni; p’esei El a sufri e dolónan di tur hende, ku tur hende por arepentí i bin na djE.”
“I El a lanta atrobe for di morto, pa E por trese tur hende na dje, ku kondishonnan di arepentimentu.”
“I boso lo kai abou i adorá e Tata den mi nòmber.
“… Boso mester arepentí i batisá, den e nòmber di JesuCristo.”
“Pidi na e Tata den mi nòmber ku fe, keriendo ku lo bo risibí, i lo bo tin e Spiritu Santu.”
I awor, despues … boso a risibí esaki, boso mester warda mi mandamentunan den tur kos.”
“Tuma riba boso e nòmber di Cristo, i deklará e bèrdat ku solemnidat.”
I kuantu ku arepentí i boutisá den mi nòmber kua ta JesuCristo, i perseverá te na fin, eseinan lo ta salbá.”
Den e poko pasashinan aki, e Salbador ta duna nos e ehèmpel perfekto di kon nos mester siña Su doktrina. E doktrina aki ta ku fe den Señor JesuCristo, arepentimentu, boutismo, risibí e don di e Spiritu Santu, i perseverá te na fin ta bendishoná tur Dios Su yunan.
Ora nos siña e prinsípionan aki na esnan ku nos stima, e Spiritu Santu lo yuda nos pa sa e bèrdat. Pasobra nos tin mester di e inspirashonnan di e Spiritu Santu, nos mester evitá spekulashon òf interpretashon personal ku ta bai mas leu ku siñamentu di e doktrina berdadero.
Esei por ta difísil pa hasi ora bo stima e persona ku bo ta purba na influensiá. E por a ignorá e doktrina ku a wòrdu siñá. Ta hopi tentativo pa purba algu nobo òf sensashonal. Pero e Spiritu Santu lo revelá e spiritu di bèrdat solamente ora nos ta kouteloso i tin kuidou pa no bai mas leu ku siña e doktrina berdadero. Un di e maneranan mas sigur pa evitá asta yega serka di doktrina falsu ta pa skohe pa ta simpel den nos siñansa. Siguridat ta ganá ku e simplesa, i poko ta pèrdí.
Enseñansa simpel ta permití nos pa kompartí e doktrina di salbashon for di trempan, miéntras muchanan ta keda sin wòrdu toká pa e tentashonnan di e gañadó ku mas despues lo konfrontá nan, hopi promé ku e bèrdatnan ku nan mester siña ta wòrdu hogá pa e zonido di medionan sosial, kompañeronan, i nan propio luchanan personal. Nos mester gara tur oportunidat pa kompartí e enseñansanan di JesuCristo ku muchanan. E momentunan di siñansa aki ta presioso i hopi ménos kompará ku e esfuersonan insesante di forsanan kontrario. Pa kada ora ku ta pasa pa instruí doktrina den bida di un mucha, tin un kantidat innumerabel di ora di oposishon yená ku mensahenan i imágennan ku ta desafiá òf ignorá e bèrdatnan salbadó akí.
Algun di boso por puntra si ta mihó pa simplemente yega serka bo yunan dor di pasa prèt, òf bo por puntra ku e yu por kuminsá sintié abrumá pa bo siñansanan. Enbes di esei, nos mester konsiderá, “Ku asina tiki tempu i asina poko oportunidat, kua palabranan di doktrina mi por kompartí ku lo fortalesé nan kontra di e desafionanan inevitabel pa nan fe?” E palabranan ku bo kompartí awe por ta esnan ku nan lo hiba ku nan, i awe lo pasa pronto.
Semper mi a atmirá mi bisa wela Mary Bommeli su deboshon pa kompartí e doktrina di JesuCristo. Su famia a wòrdu siñá pa e mishoneronan na Swisa tempu e tabatin 24 aña.
Despues di wòrdu batisá, Mary a deseá pa uni na e Santunan na Merka, asina ku el a sali for di Swisa pa Berlin i a haña trabou serka un muhé ku a duné trabou pa wef tela pa paña pa e famia. Mary a biba den un kamber di sirbiente i a pone su aparato pa wef den e sala di e kas.
Den e tempu ei, siña e doktrina di e Iglesia di JesuCristo di e Santunan di e Delaster Dianan tabata ilegal na Berlin. Pero Mary a pensa ku e no por a keda sin kompartí e kosnan ku el a siña. E muhénan di e kas i su amigunan tabata reuní rònt di e aparato di wef pa skucha Mary siña. El a papia di e aparishon di Tata Selestial i JesuCristo na José Smith, e bishita di angelnan, i e Buki di Mormon. Kòrdando e relatonan di Alma, el a siña tokante e doktrina di Resurekshon. El a testifiká ku famianan por ta huntu den reino selestial.
Mary su entusiasmo pa kompartí e doktrina di e evangelio restorá pronto a kousa problema. No a pasa hopi tempu promé ku polis a kue Mary hiba prizòn. Na kaminda, el a puntra e polis pa nòmber di e hues dilanti ken e mester a aparesé promé ku e siguiente mainta. El a puntra tambe tokante su famia i si e tabata un bon tata i kasá. E polis a deskribí e hues komo un hòmber di mundu.
Na prizòn, Mary a pidi un pòtlot i algun papel. El a pasa anochi skibiendo un karta na e hues, dunando su testimonio di e Resurekshon di JesuCristo manera deskribí den e Buki di Mormon, diskutiendo e mundu di spiritu, i splikando arepentimentu. El a sugerí ku e hues lo mester di tempu pa reflehá riba su bida promé e enfrentá huisio final. El a skibi ku e tabata sa ku e tabatin hopi pa arepentí di dje, hopi ku lo afligí su famia profundamente i duné masha tristesa. Mainta, ora el a kaba su karta, e a duné na e polis i a pidié pa entregué na e hues, i el a bai di akuerdo pa hasi asina.
Despues, e hues a manda yama e polis na su ofisina. E karta ku Mary a skibi tabata evidensia irefutabel ku e tabata siña doktrina di e evangelio restorá i, dor di hasi asina, el a kibra lei. Sinembargo, no a pasa masha tempu promé ku e polis a bolbe pa Mary su sèl. El a bisé ku tur kargo a wòrdu anulá i ku e tabata liber pa bai. Su enseñansa di e doktrina di e evangelio restorá di JesuCristo a kousa ku el a wòrdu hinká den prizòn. I su deklarashon di e doktrina di arepentimentu na e hues a saké for di prizòn.
Mary Bommeli su enseñansanan no a finalisá ku su liberashon. E registro di su palabranan a pasa doktrina berdadero pa generashonan ku ainda no a nase. Su kreensia ku asta un konverso nobo por siña e doktrina di JesuCristo a sigurá ku su desendientenan lo wòrdu fortalesé den nan propio batayanan.
Ora nos ta hasi nos bèst pa siña esnan ku nos ta stima tokante e doktrina di JesuCristo, ainda algun lo no respondé. Duda por gatia drenta bo mente. Bo por kuestioná si bo konosé e Salbador Su doktrina sufisientemente bon pa siñé efektivamente. I si bo a hasi intentonan pa siñé, bo por puntra bo mes dikon e efektonan positivo no ta mas visibel. No entregá na e dudanan aki. Bira na Dios pa yudansa.
“Si, i implorá na Dios pa tur bo sosten; … i laga e afekshonnan di bo kurason wòrdu poné riba Señor pa semper.”
“I awor mi ke pa boso ta humilde, sumiso i suave; fásil pa hasi suplikashon; yen di pasenshi i pasenshi den sufrimentu; ta moderá den tur kos; ta diligente pa kumpli ku e mandamentunan di Dios na tur momentu; pidi pa kualke kos ku boso tin mester, tantu spiritual komo temporal; semper gradisí Dios pa kualke kos ku boso ta risibí.”
Si bo hasi orashon, si bo papia ku Dios, i si bo roga pa Su yudansa pa bo ser kerí, i si bo gradisiE no solamente pa yudansa pero pa e pasenshi i amabilidat ku ta bin for di no risibí tur bo deseonan mes ora òf podisé nunka, e ora ei mi ta primintí bo ku lo bo yega mas serka di djE. Lo bo bira mas diligente i ku pasenshi den sufrimentu. I e ora ei bo por sa ku bo a hasi tur kos ku bo por pa yuda esnan ku bo ta stima i esnan ku bo ta hasi orashon pe pa nabegá dor di Satanas su intento pa desviá nan.
“Pero esnan ku ta warda riba Señor lo renobá nan forsa; nan lo bula altu manera águila; nan lo kore sin kansa; i nan lo kana, i lo no desmayá.”
Bo por haña speransa den registronan di skritura di famianan. Nos por lesa di esnan ku a bira bai for di loke nan a wòrdu siñá òf ku tabata lucha ku Dios pa pordon, manera Alma e Hóben, e yunan di Mosia, i Enos. Den nan momentunan di krisis, nan a kòrda e palabranan di nan mayornan, palabranan di e doktrina di JesuCristo. Kòrda a salba nan. Bo siñansanan di e doktrina sagrado aki lo ta kòrdá.
Mi ta duna testimonio di e obra sagrado di siña Tata Selestial su yunan e doktrina simpel di JesuCristo, kual ta permití nos pa ta spiritualmente limpi i finalmente sea yamá bon biní den Dios Su presensia, pa biba ku E i Su Yu den gloria pa semper. Den e nòmber di JesuCristo, amèn.