“Mira Ami Ta e Lus Ku Boso Lo Tene na Haltu”
Nos ta tene na laira e lus di Señor ora nos keda firme na nos kombenionan i ora nos ta sostené nos profeta bibu.
Na e hopi testimonio den e konferensia aki, mi ta añadí mi testimonio apostóliko ku JesuCristo ta e Yu di Dios, nos Señor i Salbador, e Redentor di tur e yunan di nos Tata. Pa medio di Su Ekspiashon, JesuCristo a hasi posibel pa nos, si nos ta digno, pa bolbe serka nos Tata den shelu i ta huntu ku nos famianan pa eternidat.
E Salbador no ta ousente for di nos biahenan mortal. Durante e último dos dianan nos a tende Jesus papia pa medio di Su lidernan skohé pa nos por yega mas serka di djE. Un i otro biaha, ku Su amor i mizerikòrdia puro, E ta sostené nos ora nos ta enfrentá e drama di bida. Nefi ta deskribí: “Mi Dios ta mi sosten; El a guia mi den mi aflikshonnan. … El a yena mi ku su amor.”
E amor ei ta evidente ora nos sostené otro den Su obra.
Nos ta sostené nos profeta bibu den konferensia general, i e Promé Presidensia, e Quorum di e Diesdos Apòstelnan, Outoridatnan General, i Ofisialnan di Iglesia. Sostené ta nifiká apoyá un otro persona, duna nan nos atenshon, ta fiel na nan konfiansa, aktua riba nan palabra. Nan ta papia pa medio di inspirashon di Señor; nan ta komprondé e asuntunan aktual, e dekadensia moral di e sosiedat, i e esfuersonan kresiente di e atversario pa frustra e plan di e Tata. Dor di lanta nos man, nos ta duna nos sosten, no solamente pa e momento ei, pero den nos bida diario.
E sosten ta inkluí apoyá nos presidente di estaka i obispunan, lidernan di quorum i organisashon, maestronan, i asta direktornan di kampo den nos barionan i estakanan. Mas serka di nos hogar, nos ta sostené nos kasá, yunan, mayornan, otro famianan i bisiñanan. Ora nos apoyáotro nos ta bisa: “Mi ta aki pa boso, no solamente pa sostené boso brasa i man ora nan ta ‘kai abou’sino pa ta un konsuelo i forsa na boso banda.”
E konsepto di apoyá ta basá riba skritura. Na e Awanan di Mormon, e miembronan di Iglesia resien boutisá a hasi kombenio “pa karga ku peso di otro, pa nan por ta mas liviano; … “pa yora ku esnan ku ta yora; … [pa]konsolá esnan ku ta den nesesidat di konsuelo, i para komo testigu di Dios na tur momento i den tur kos, i den tur lugá.”
Na e nefitanan Jesus a bisa: “tene na lairaboso lus pa e bria riba mundu. Mira Ami ta e lus ku boso mester tene na laira.” Nos ta tene na laira e lus di Señor ora nos keda firme na nos kombenionan i ora nos ta sostené nos profeta bibu ora e ta papia e palabranan di Dios.
Presidente Russell M. Nelson a bisa, ora e tabata sirbi den e Quorum di e Diesdos Apòstelnan, “Nos sostenementu di profetanan ta un kompromiso personal ku nos lo hasi nos máksimo pa sostené nan prioridatnan profétiko.”
Pa sostené e profeta ta un obra sagrado. Nos no ta sinta ketu sin hasi nada, pero nos ta defend’é aktivamente, sigui su konseho, siña su palabranan i hasi orashon p’e.
Rei Benjamin, den e Buki di Mormon, a bisa e pueblo, “Ami ta manera boso, suhetá na tur sorto di enfermedatnan den kurpa i mente; pero mi a wòrdu skohí …, i a wòrdu permití pa e man di Señor … i a wòrdu preservá i mantené pa su poder sin igual, pa sirbi boso ku henter e alma, mente i forsa ku Señor a duna mi.”
Meskos, na edat di 100 aña, Presidente Nelson a wòrdu protehá i preservá pa Señor. Presidente Harold B. Lee na e tempu ei un miembro di e Promé Presidensia, a menshoná e ehèmpel di Moises pará riba e seru na Refidim. “E mannan di [e Presidente di Iglesia] por kansa,” el a bisa. “Nan por tin tendensia pa baha na algun momentu pa motibu di su responsabilidatnan pisá; pero ora nos guia bou di su direkshon, banda di dje, e portanan di fièrnu lo no prevalesé kontra boso i kontra Israel. Boso siguridat i di nos ta dependé ku si nos ta òf no ta sigui esnan ku Señor a pone pa presidí riba Su Iglesia. E sa ken E ke pa presidí riba e Iglesia aki, i E lo no kometé ningun eror.”
Presidente Nelson ta reflehá riba añanan di servisio na Señor. Su madures, su eksperensia amplio, sabiduria, i resepshon konstante di revelashon ta spesífikamente apropiá pa nos tempu. El a bisa: “E Iglesia di JesuCristo di e Santunan di e Delaster Dianan ta preparando e mundu pa e dia ku ‘e tera lo ta yen di konosementu di Señor.’ (Isaias 11:9). … E obra aki ta wòrdu empoderá dor di un anunsio divino hasí dosshen aña pasá. E tabata konsistí di solamente shete palabra: ‘Esaki ta mi Yu stimá. Skuch‘E!’ (wak Joseph Smith—History 1:17).”
Presidente Nelson a bisa: “Nunka tabatin un tempu den historia di mundu kaminda e konosementu di e Salbador ta mas personalmente vital i relevante pa kada alma humano. Imaginá kon lihé e konfliktonan devastador rònt mundu—i esnan ku ta lanta den nos bidanan individual—lo wòrdu resolvé si nos tur skohe pa sigui JesuCristu i pone atenshon na Su enseñansanan.”
Rumannan, nos mester hasi mas pa elevá i murmurá ménos, mas pa halsa e palabra di Señor, Su kamindanan, i Su profeta, ku a bisa: “Un di nos desafionan mas grandi awe ta distinguí entre e bèrdatnan di Dios i e falsifikashonnan di Satanas. Ta p’esei Señor a atvertí nos pa ‘semper hasi orashon, … pa [nos] por vense Satanas, i … skapa di e mannan di e siervonan di Satanas ku ta alsa [e atversario] su obra.’ [Doctrina y Convenios 10:5; enfásis añadí].”
Aprel pasá, Hermana Rasband i ami tabatin e honor di uni ku nos profeta stimá i Hermana Nelson pa e rededikashon di e tèmpel di Manti Utah.
Presidente Nelson a sorprendé tur hende ora el a drenta e sala. Solamente un par di nos tabata sa ku e tabata biniendo. Den su presensia, inmediatamente mi a sinti e lus i mantel profétiko ku e ta karga. E ekspreshon di goso riba kara di e hendenan ku a mira e profeta personalmente lo keda ku mi pa semper.
Den e orashon di rededikashon, Presidente Nelson a pidi Señor ku Su kas santu lo sostené esensialmente tur ku a drenta e tèmpel, “pa nan por risibí bendishonnan sagrado i keda digno i fiel na nan kombenionan … pa esaki por ta un kas di pas, un kas di konsuelo, i un kas di revelashon personal pa tur ku ta drenta e portanan aki dignamente.”
Nos tur mester wòrdu elevá dor di Señor ku pas, ku konsuelo, i mas importante ku tur ku revelashon personal pa kombatí e miedu, skuridat, i kontenshon ku ta rondoná e mundu.
Promé ku e servisio, nos a para pafó den solo huntu ku Presidente i Hermana Nelson pa mira e bunita ambiente. E lasonan di antepasadonan di Presidente Nelson den e aria aki ta profundo. Su ocho bisatawela a establesé nan mes den e vayenan ku ta rondoná e tèmpel, meskos ku algun di esnan mi. Mi bisa tawela Andrew Anderson a sirbi den e grupo di konstrukshon di e promé pioneronan ku a traha 11 aña pa kompletá e tèmpel di Manti, e di tres den e Rocky Mountains.
Miéntras nos tabata pará huntu ku Presidente Nelson, nos tabatin e oportunidat pa sostené i apoyá e profeta di Dios den selebrashon di e rededikashon di e kas santu di Señor. E tabata un dia ku nunka lo mi lubidá.
“Nos ta konstruí tèmpelnan pa honra Señor,” Presidente Nelson a bisa riba e dia sagrado ei. “Nan ta konstruí pa adorashon i no pa show. Nos ta hasi kombenionan sagrado di signifikansia eterno den e murayanan sagrado aki.” Nos ta reuniendo Israel.
Presidente Nelson i e profetanan promé ku ne a karga e tèmpelnan santu den nan brasa. Awendia, rònt mundo, nos tin 350 kas sagrado di Señor ku ta funshonando, anunsiá òf bou di konstrukshon. Komo profeta, for di 2018, Presidente Nelson a anunsiá 168 tèmpel.
“Den nos tempu,” el a bisa, “un union hinté, kompleto i perfekto di tur dispensashon, yabinan, i poder lo wòrdu di las huntu (see Doctrine and Covenants 128:18). Pa e propósitonan sagrado aki, awor aki tin tèmpelnan santu rònt mundu. Mi ta enfatisá atrobe ku e konstrukshon di e tèmpelnan aki kisas no ta kambia bo bida, pero bo servisio den tèmpel sigur lo hasi esaki.
“E Salbador i Su doktrina ta e kurason di e tèmpel,” e Presidente ta bisa. “Tur kos ku wòrdu siñá den e tèmpel, pa medio di instrukshon i pa medio di e Espiritu, ta alsa nos entendimentu di JesuCristo. Su ordenansanan esensial ta uni nos na DjE pa medio di e kombenionan sagrado di e saserdosio. E ora ei, miéntras nos ta warda nos kombenionan, E ta investí nos ku Supoder di sanashon i fortalesa.”
“Tur ku adorá den e tèmpel,” Presidente Nelson a bisa, “lo tin e poder di Dios i angelnan ku tin ‘enkargo riba nan.’ [Doctrina y Convenios 109:22]. Kuantu e ta oumentá bo konfiansa di sa ku, komo un muhé òf hòmber investí [òf hóbennan asistiendo na e tèmpel] armá ku e poder di Dios, bo no mester enfrentá bida bo so? Ki kurashi e ta duna bo di sa ku angelnan realmente lo yuda bo?”
E angelnan ku ta ekstendé nan man pa alsa ta deskribí den e skrituranan ora ku Jesucristo humildemente a hinka su rudia den e Hardin di Getsémani. Pa medio di Su sufrimentu El a proveé un Ekspiashon infinito. “Einan,” Presidente Nelson a bisa, “e akto di amor mas grandi registrá den historia a tuma lugá… Einan na Getsémani, Señor ‘a sufri e doló di tur hende, pa tur hende … por a arepentí i bin serka dje.’ [Doctrine and Covenants 18:11].”
“Kita e kopa for di mi.” Jesus a pidi, “sinembargo no mi boluntat, sino bo boluntat, sea kumplí.
“E ora ei un angel a aparesé serka djE for di shelu i a fortalesE.”
Nos tin angelnan rondó di nos awe. Presidente Nelson a bisa: “[Den e tèmpel,] boso lo siña kon pa separá e velo entre shelu i tera, kon pa pidi Dios su angelnan pa asistí boso.”
Angelnan ta trese lus. Dios su lus. Na su Apòstelnan nefita, Jesus a bisa, “Mira Ami ta e lus ku boso lo tene na laira.” Miéntras nos ta sostené nos profeta, nos ta testifiká ku e ta yamá pa nos Salbador, kende ta e “lus … di e mundu.”
Presidente Nelson, na nòmber di e miembronan i amigunan di e Iglesia di Señor rònt mundu, nos ta sinti nos bendishoná pa sostené bo siñansanan, pa sostené bo ehèmpel di biba manera Cristo, i pa sostené bo testimonio ferviente di nos Señor i Salbador, e Redentor di nos tur.
Mi ta duna mi testimonio apostóliko ku JesuCristo ta “e lus … di e mundo.” Laga nos tur, komo Su disípulonan, “halsa” Su lus. Den e nòmber di JesuCristo, amèn.