Yunan Hòmber i Yunan Muhé di Dios
Nos ta kere di bèrdat ku nos tur ta literalmente yunan di Dios, i pa e motibu ei, nos tin e potensial pa bira manera E.
Awe, mi ke papia di un di e bèrdatnan di e evangelio mas alegre, glorioso i poderoso ku Dios a revelá. Na e mesun momentu, ta un ironia di kua nos a wòrdu kritiká. Un eksperensia ku mi tabatin algun aña pasá a hasi mi apresio pa e bèrdat akí di e evangelio mas profundo.
Komo representante di e Iglesia, un biaha nan a invitá mi na un konferensia religioso kaminda nan a anunsiá ku for di e momentu ei nan lo rekonosé komo válido tur boutismo ku kasi tur otro iglesia Cristian a hasi, basta e ordenansa a wòrdu hasi ku awa i den nòmber di Tata i Yu i Spiritu Santu. Despues a spliká ku e regla akí no tabata apliká na boutismo efektuá pa E Iglesia di JesuCristo di e Santunan di e Delaster Dianan.
Despues di e konferensia mi por a bai mas profundo den e motibonan pa e eksepshon ku e lider enkargá di e anunsio ei. Nos a tene un kombersashon maravioso i informativo.
En breve, el a splika mi ku e eksepshon tabata prinsipalmente relashoná ku nos kreensianan spesífiko tokante e Deidat, ku otro denominashonnan Kristian hopi biaha ta referí na dje komo e Trinidat. Mi a ekspresá mi apresio pa e tempu ku el a tuma pa splika mi su kreensianan i e polítika di su iglesia. Na final di nos kombersashon, nos a brasa otro i despues yama ayó.
Mas despues ora mi a kontemplá riba nos kombersashon, loke e lider aki a bisa tokante Santunan di e Delaster Dianan no tabata komprondé loke e tabata yama e ‘misterio di Trinidat’ a keda den mi mente. Kiko el a referí na dje? Pues, e tabatin di ber ku nos komprondementu di e naturalesa di Dios. Nos ta kere ku Dios e Tata “ta un Hòmber eksaltá” ku un kurpa glorifiká “di karni i wesu, tangibel meskos ku hende; [i] e Yu tambe.” Pues, kada biaha ku nos papia di e naturalesa di Dios, den algun manera, nos ta papiando tambe di nos propio naturalesa.
I esaki ta bèrdat no solamente pasobra nos tur a ser kreá na su imágen, segun [Su] semehansa,“ pero tambe pasobra, manera e salmista a skirbi, Dios a bisa: “Boso ta diosnan, i boso tur ta yu di e mas haltu.” Esaki ta pa nos un doktrina precioso ku a rekuperá awor ku e binida di e Restorashon. Den resúmen, no ta ni mas ni menos ku loke nos mishoneronan ta siña komo e promé lès, promé paragraf, promé liña: “Dios ta nos Tata Selestial, i nos ta Su yunan.”
Awor, bo por bisa, “Pero hopi hende ta kere ku nos ta yunan di Dios.” Si, esei ta bèrdat, pero nan entendimentu por ta un tiki diferente for di e implikashon di e nifikashon mas produndo ku nos ta afirmá. Pa e Santunan di e Delaster Dianan, e enseñansa aki no ta metafóriko. Mas bien, nos ta kere di bèrdat ku nos tur ta literalmente yunan di Dios. E ta “e Tata di [nos] spiritunan,” i pa e motibu ei nos tin e posibilidat pa bira manera E, loke ta parse inkonsebibel pa algun hende.
Ya a pasa mas ku 200 aña for di e Promé Vishon ku a habri e portanan pa e Restorashon. Na e tempu ei, e hóben Jose Smith a buska guia for di shelu pa sa na kua iglesia e mester a uni. Pa medio di e revelashon ku el a risibí e dia ei, i den revelashonnan ku el a risibí despues, e Profeta Jose a haña konosementu tokante e naturalesa di Dios i nos relashon kunE komo Su yunan.
Pa e motibu ei nos ta siña mas kla ku nos Tata Selestial a siña e doktrina presioso akí for di kuminsamentu. Laga mi menshoná por lo ménos dos eksperensia for di Skritura pa ilustrá esaki.
Kisas bo ta kòrda e instrukshonnan ku Dios a duna Moises, manera ta pará den e Perla di Gran Presio.
Nos ta lesa ku “Dios a papia ku Moises, bisando: Mira, Ami ta Señor Dios Todopoderoso, i mi nòmber ta eterno.” Den otro palabra, Moises, mi ke pa bo sa ken mi ta. E ora ei El a añadí, “I mira, bo ta mi yu.” Despues El a bisa: “Mi tin un trabou pa bo, Moises, mi yu, pasobra bo ta manera mi Ui Únigenito.” I finalmente, El a terminá ku, “I awor, mira, esaki ta ún kos ku Mi ta mustra bo, Moises, mi yu.”
Ta parse ku Dios tabata determiná pa siña Moises por lo ménos un bèrdat akí: “Bo ta mi yu”, loke El a ripití por lo ménos tres biaha. E no por a menshoná ni e nòmber di Moises sin agregá inmediatamente ku e tabata Su yu.
Sinembargo, despues ku Moises a keda su so, el a sinti su mes débil pasobra e no tabata den e presensia di Dios mas. Esei tabata ora ku Satanas a bini pa tent’é. Bo por mira e patronchi aki? E promé kos ku el a bisa ta, “Moises, yu di hende, adorá mi”.
Den e konteksto akí, e petishon di Satanas pa ador’é por tabata solamente un distraishon. Un tentashon importante pa Moises den e momentu di debilidat ei tabata pa bira konfundí i kere ku e tabata solamente un “yu di hende”, en bes di un yu di Dios.
“I a sosodé ku Moises a wak Satanan i a bisa: Ken bo ta? Pasó mira, mi ta un yu di Dios, den e imágen di Su Yu Únigenito.” Afortunadamente, Moises no a wòrdu konfundí i no a pèrmití ku su atenshon a keda distraí. El a siña e lès di ken e ta realmente.
E siguiente relato ta den Mateo 4. Estudiantenan a yama esaki “e tres tentashonnan di Jesus”, manera si Señor a ser tentá solamente tres biaha, loke naturalmente no ta e kaso.
A usa sentenarnan di galòn di enk pa splika e nifikashon i kontenido di e tentashonnan aki. Manera nos sa, e kapítulo ta kuminsá ku splikando ku Jesus a bai den desierto, “I despues ku El a ayuná kuarenta dia i kuarenta anochi, despues El a sinti hamber.”
Satanas su promé tentashon aparentemente lo ta tin solamente di haber ku satisfasé Señor su nesesidat físiko. “Duna òrdu pa e piedranan aki bira pan,” el a desafiá e Salbador.
E di dos tentashon por tabatin di haver ku tenta Dios: “Buta bo mes abou, pasobra ta skirbí, E lo duna su angelnan òrdu pa bo.”
Finalmente, e di tres tentashon di Satanas a referí na e aspirashonnan i gloria di e mundu. Despues ku Jesus a wòrdu mustrá “tur e reinonan di e mundu, … [Satanas] a bis’é, Tur e kosnan aki lo mi duná bo, si bo kai na rudia i adorá ami.”
Den bèrdat, e tentashon final di Satanas kisas tabatin ménos di ber ku e tres provokashonnan spesífiko ei i mas di haber ku tentashon di JesuCristo pa kuestioná Su naturalesa divino. Por lo ménos dos biaha, e tentashon a ser presedé pa e akusashon desafiante di Satanas: “Si bo ta Yu di Dios”—si bo ta kere esaki, hasi esaki òf esei.
Por fabor nota kiko a sosodé inmediatamente promé ku Jesus a bai den e desierto pa ayuná i hasi orashon: nos ta haña e relato di Cristo Su boutismo. I ora El a sali for di awa, “un stèm for di shelu, a bisa, Esaki ta mi Yu stimá, den ken mi ta hopi komplasí.”
Nos ta mira e konekshon? Nos por rekonosé un patronchi akinan?
No ta nada straño ku kada bia ku nos siña tokante nos naturalesa i destino divino, e atversario di tur hustisia ta tenta nos pa pone nan den duda.
Kon diferente nos desishonnan lo ta si nos sa realmente ken nos ta.
Nos ta biba den un mundu ku hopi desafio, un mundu di kommoshon kresiente, unda hende honorabel ta lucha pa enfatisá nos dignidat humano, mientras nos ta pertenesé na un Iglesia i ta brasa un evangelio ku ta elevá nos vishon i invitá nos den e divino.
E mandamentu di Jesus pa ta “perfekto meskos ku [nos] Tata ku ta den shelu ta perfekto”ta u n refleho kla di Su ekspektativanan haltu i nos posibilidatnan eterno. Awor, nada di esaki lo sosodé di un dia pa otro. Den e palabranan di Presidente Jeffrey R. Holland, e lo sosodé “eventualmente.” Pero e promesa ta ku si nos “bini na Cristo”, nos lo wòrdu “perfekshoná den djE.” Esei ta rekerí hopi trabou—no solamente kualke trabou, pero un trabou divino. Su obra!
Awor, e bon notisia ta ku ta presisamente nos Tata den Shelu kende a deklará, “Pasobra mira, esaki ta mi obrai mi gloria—pa trese inmortalidat i bida eterno di hende.”
E invitashon di Presidente Russell M. Nelson pa “pensa selestial”ta impliká un rekordatorio maravioso di nos naturalesa divino, origen i potensial destinashon. Nos por haña e selestial solamente pa medio di e sakrifisio ekspiatorio di JesuCristo.
Kisas ta p’esei Satanas a tenta Jesus ku e mesun tentashon for di kuminsamentu te na final di Su ministerio na tera. Mateo a skirbi ku ora Jesus tabata na e krus, esnan “ku tabata pasa tabata insult’é, … bisando,… {Si bo ta Yu di Dios, baha for di e krus.” Gloria na Dios ku E no a skucha, pero enbes di esei a proveé e kaminda pa nos risibí tur bendishon selestial.
Laga nos kòrda semper, ku a paga un preis grandi pa nos felisidat.
Mi ta testifiká manera e apòstel Pablo ku “e Spiritu mes ta testifiká ku nos spiritu, ku nos ta yunan di Dios: i si nos ta yunan, nos ta heredero; heredero di Dios, i koherederonan di Cristo; si asina ta ku nos ta sufri huntu kunÉ, pa nos tambe por ser glorifiká huntu kunÉ.” Den e nòmber di JesuCristo, amèn.