iVaqa ni Veisiko

Yaco Mo iYaya ni Cakacaka ena Liga ni Kalou ena Nodra Qaravi na Dravudravua kei na Vakaloloma

Masulaka ka digitaka qai wilika mai na itukutuku oqo na ivolanikalou kei na veivakavuvuli ka na sotava na nodra gagadre na marama o dau sikova. Wasea na veika o sotava kei na nomu ivakadinadina. Sureti ira o dau vakavulica me ra vakayacora vakakina.

Na Cava e Tukuna na Turaga me Baleta na Nodra Qaravi o ira Na Dravudravua kei na Vakaloloma?

Elder Russell M. Nelson ena Kuoramu ni iApositolo Le Tinikarua: “Na Tamada Vakalomalagi e kauwaitaki ira tikoga [na dravudravua kei na vakaloloma]. Era sa luvena kecega… . O ira na dravudravua—vakabibi o ira na yada, luveniyali, kei na vulagi—sa dau kauwai tikoga mai kina na Kalou kei ira na yalododonu… . Kivei ira sa dau lomani ira na dravudravua, ena yaco vei ira na veivakalougatataki” (“In the Lord’s Own Way,” Ensign, Me 1986, 25).

Maciu 25:37–40: “Ena qai vosa vua ko ira na yalododonu, ka kaya, na Turaga, keimami a raici kemuni mada ni naica ni kemuni a viakana, ka vakani kemuni, se viagunu, ka vagunuvi kemuni?

“Se keimami a raici kemuni ni naica ni kemuni a vulagi, ka kauti kemuni ki vale? se luvawale, ka vakasulumi kemuni?

“Se keimami a raici kemuni ni naica ni kemuni a tauvimate, se tiko ena vale ni veivesu, ka lako vei kemuni?

“Ena qai vosa na Tui, ka kaya vei ira, Au sa kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au.”

Ena Sala Cava Meu iYaya Kina ni Cakacaka ni Nodra Vukei na Tani?

Mosaia 4:26: “Mo ni vakacegui ira na dravudravua ena veika ko ni sa rawata, mo ni vakani ira sa viakana, vakasulumi ira sa luvawale, sikovi ira na tauvimate ka vukea na nodra leqa, vakayago ka vakayalo talega.”

Elder Henry B. Eyring ena Kuoramu ni iApositolo Le Tinikarua: “Au na sega tale ni vakatoka na veituberi ni matavuvale kei na dauveisiko me dua wale tu ga na parokaramu … na cakacaka oqo e okati me dua na madigi, e sega ni dua na oga… . Era sa veiyalayalatitaka na lewenilotu yadua me ra cakava na cakacaka ni loloma me vaka sa vakayacora na iVakabula. O koya gona ni veikacivi yadua ni kena vakaraitaki ka ra vukei na tani e sega ni dua na kerekere ni ikuri ni veiqaravi; ia e sa dua na veivakalougatataki e sa nakita mai na Tamada Vakalomalagi dauloloma kei na Luvena, o Jisu Karisito… . E sa dua na gauna donu me vakadinadinataki kina ni veivakalougatataki cava ga e yaco ki na tamata ni veiyalayalati, sa yaco me dua na madigi ko sa vakadonuya mo na soli itukutuku kina” (“Witnesses for God,” Ensign, Nove. 1996, 31).

Bisopi H. David Burton, Bisopi Vakatulewa: “E vakavulica o Parofita Josefa Simici ni sa noda itavi dina ‘me da vakani ira na viakana, vakasulumi ira na luvawale, vukei ira na yada, vakaceguya na rarawa nei koya e luveniyali, vakacegui ira na vakararawataki, ena loma ni lotu oqo se dua tani tale, se lotu cava ga, na vanua ga era kunei ira kina’ (Times and Seasons, 15 Mar. 1842, 732). Me da dau solia na noda gauna ka lomavinaka ena noda veiqaravi ena noda iyau me ra vukei kina o ira era vakaloloma tu” (“Go, and Do Thou Likewise,” Ensign, Me 1997, 77).

Bonnie D. Parkin, peresitedi raraba ni iSoqosoqo ni Veivukei: “Na Lololo ni Turaga—ka ‘sa rauta na ka me vakayagataki ka vo tu yani’—ka sa [ivakatakilakila] ni veika sa vakatikora vei keda yadua na Turaga (V&V 104:17). Sai koya e dua na marama e veisautaka tale e dua na marama. Sai koya e dua na marama e dau vakarorogo matua ka veiwasei vakalevu vua e dua na marama e galili na nona bula. Sai koya e dua na marama e tauyavutaka e dua na veimaliwai vinaka kei na dua na marama a laki sikova. Sai iko ga vata kei au ni daru sa yaloqaqa, ena nodaru kila ka, kei na taledi me ra laki vakalougatataki kina na tani” (“Welfare, the Crowning Principle of a Christian Life,” Koniferedi ni Marama ni BYU, 1 ni Me, 2003, 3).