Gauna ni Veiwasei

E Bula Tiko o Koya!

Mai vei Elizabeth Ricks

“Ni sa lomani ira na kai vuravura vakaoqo na Kalou, me solia kina na Luvena e duabau ga, sa vakatubura me kakua ni rusa ko ira yadua sa vakabauti koya, me ra rawata ga na bula tawamudu” (Joni 3:16).

E a veivakavulici tiko o Sisita Nielson ena kalasi ni iSususu. E a taura tiko e dua na iyaloyalo kei Jisu ni vakaraitaka tiko na Ligana a lauvako ni sa tucaketale.

“E kena ibalebale ni sa bula tale o Koya ni sa mate oti?” a taroga o Heather.

E kaya cake mai o Jeke, “Io, e dina! Eda na bula tale vakakina o keda!”

E a kila vakacava o Jeke ni sa bula tale o Jisu? E a kila vakacava ni na bula tale vakakina o koya?

Ena veimacawa e dau laki vakarorogo o Jeke ki na caka lesoni nei Sisita Nielson. E vakavulica na veika baleti Jisu ka dau wasea na nona ivakadinadina. E dau vakarorogo talega o Jeke vei rau na nona itubutubu ena gauna ni lotu vakamatavuvale kei na gauna tale eso. Eratou dau veivosakitaki Jisu ka vakadinadinataki Koya. Sa vakadeitaka e yalona o Jeke me vakabauta na veivakavulici nei nona qasenivuli kei rau na nona itubutubu.

Ni sa tucaketale o Jisu, a laki vakaraitaki Koya kivei ira na Nona tisaipeli. A sega ni tiko kina o Tomasi. Era a laki tukuna na tisaipeli vei Tomasi ni ra sa raici Jisu. Ia a qai kaya o Tomasi, “Kevaka kau na sega ni raica na we ni vako ena ligana, ka daramaka na ligaqu ki na sarisarina, au na sega ni vakadinata” (Joni 20:25).

Ni oti e walu na siga a qai vakaraitaki Koya o Jisu kivei Tomasi. E a vakatara o Jisu vei Tomasi me tara na we ni vako e ligai Jisu ka tara na sarisarina. A qai kaya o Jisu, “Ni ko sa raici au Tomasi, ko sa vakadinata, sa kalougata ko ira sa sega ni raica, ka ra sa vakadinata” (Joni 20:29).

Me vakataki Jeke, eda rawa ni vakabauti Jisu ni da sega mada ni se bau raici Koya. Ena qaqaco cake na noda vakabauta ni da sa kila, ka da sega ni raica, ni ko Jisu sa noda iVakabula.

iTaviqaravi

Vakabira na draunipepa T4 ena dua na pepa vavaku, ka kotiva laivi mai na iyaloyalo kei Jisu, Meri Makitala, o iratou na iApositolo, kei Tomasi. Lobika na pepa ena laini tavutonotono me rawa kina ni duri na iyaloyalo. Talanoataka vei iratou na nomu matavuvale na italanoa ena Joni 20 me baleti ira na tamata yadua era a raica na iVakabula ni sa Tucaketale.

Vakasama ni Gauna ni Veiwasei

1. Vakaraitaka e tolu na kato ivava. Taura yadudua mai na kato oqo, e yadua na pea ivava. (Sa rawa talega mo vakaraitaka na droini se iyaloyalo ni ivava.) Vakaraitaka e dua na pea ivava me vakatakarakarataki ira na sotia era a yadrava tiko na ibulubulu i Jisu. Mo talanoataka na italanoa ena kena iwalewale me ra raitayaloyalotaka na gone ni ra sa tiko dina sara ga ena gauna sa vakotori kina na yagoi Jisu ena ibulubulu. Tarava, mo vakaraitaka e dua na pea ivava sedali me vakatakarakarataki Meri Makitala. Tarogi ira na gone ena nodra nanuma kevaka era a tu dina ena were ni ibulubulu ka sa rairai mai na iVakabula sa tucaketale. Kena iotioti, vakaraitaka e dua na pea ivava era dau dara vakalevu o ira na gone. Taroga na nodra nanuma ni ra sa mai lewena tu oqo na Lotu ka ra sa kila tu ni ra na tucaketale ena vuku ga ni Veisorovaki kei na Tucaketale i Jisu Karisito. Wasea na nomu ivakadinadina ni a mate o Jisu Karisito ka sa tucaketale.
2. Tukuna vei ira na gone ni ko sa na vakarau taroga vei ira e dua na taro dredre. Taroga, “E vica tiko beka na noda parofita era tiko e vuravura edaidai?” Vakamacalataka ni lewe yadudua ni Mataveiliutaki Taumada kei na Kuoramu ni iApositolo ni Le Tinikarua era sa tokoni me ra parofita, daurairai, ka daunivakatakila. Sa kena ibalebale o ya ni 15 tiko na parofita era tiko e vuravura oqo! Vakamacalataka, ni o koya na Peresitedi ni Lotu duadua ga ena ciqoma na ivakatakila me baleta na Lotu. Ni vo toka e dua na macawa ni bera na koniferedi raraba, kerea eso na gone qase cake me ra na mai tukuna ena macawa rua ka tarava e dua na vosa ni dua na iApositolo a cauraka ena koniferedi raraba. Kevaka e rawa mo vakaraitaka na iyaloyalo ni iApositolo o ya ena gauna e tukuna tiko kina o gone na nona vosa.