Na Veitokani
Ni Bula! Oi Au o Clara Christensen. Au vakaitikotiko e Keewatin, Ontario mai Kenada
E dau sarava toka mai na daku ni nona vale o Clara Christensen, yabaki 11, na rairai totoka ni vanua ka rawa me laki tabaki ena ivola ni vula. E tara toka na nona vale ena tutu ni dua na delana ka raica sobu toka yani na Drano ni Veikaukau, oqo e dua na uciwai levu makare e tete yani kina na ceva ka yaco ki Amerika ki na ra kei Manitoba. E makualiliva na kena rairai ni cilava na siga ena vulaikatakata. Ena vulaibatabata e taliva na drano oqo mai na vavaku ni uca cevata.
Na drano kei na veikaukau oqo e vanua daudivi maivua e dua e maqusa me lako kina me vakataki Clara. E dau qalo o koya, siwa, taubale, ka laki keba ena vulaikatakata. Ena vulaibatabata e dau taleitaka o koya me dau sikeiti, draiva ena dela ni ucacevata, takosova na veiulunivanua, ka siki sobu ena baba uca cevata, ka vakasisisi sobu ena ibe kau. Ena bogi e dau yacova sara na -40˚C na kena batabata, ka dau va ki na vitu na fute (1–2 mita) na vavaku ni uca cevata. Ia e dau draki talei vei Clara na vulaikelikeli kei na vulaibatabata.
E tu talega na nona isakisaki talei e loma ni nona vale o koya na goneyalewa dauveilakoyaki oqo. E taleitaka na wilivola, talitali, kei na vakatagitaka na rekoda kei na taba piano. E a tuvanaka e dua na inakinaki me na vakatagitaka na serenilotu kei na sere ni Lalai kecega. E goneyalewa yalomalua o koya ka dau taleitaka na susugi ira na tamata kei na manumanu. E daumei ira na tatacina, kei na gauna e dua sega kina na gone e dau laki mei ira na nona matakau. E dau taleitaki ira talega na pusi. Ka ratou taleitaki koya ka moce vata kei koya ena loga o Lilo, Hero, kei Hope. Ena italanoa vakaivolanikalou talei vua na itukuni ni waqa nei Noa kei ira na manumanu kecega oya. E vinakata o Clara ni sa goneyalewa levu me na veiqaravi vei ira na gone se o ira na pusi.
Se cava ga ena vakayacora, ena cakava vakavinaka baleta ni na gumatuataka me cakava vakadodonu. E sa dau vukei koya vakalevu na caka dodonu vakaoqo me walia rawa kina e so na ibolebole dredre. E a dikevi vakavuniwai o Clara ni sa tauvi koya tiko na kaka. Sa kena ibalebale oqo ni sa kila vinaka tu na ka me na cavuta, ia e berabera na kena vakadewataki mai na nona mona ki na gusuna ka yaco me sega ni cavuta rawa vakavinaka. E vuqa na gauna e dauvakamoica kina o Clara na galegalena, tebenigusuna, kei na yamena me dodonu kina na irorogo e cavuta ka buli ira na irorogo oqo me vosa. Oqo e dua na cakacaka dredre, ia mai na nodrau veivuke na nona itubutubu, sa gugumatua cake sara na nona vakatovotovo ka sa tomana tikoga kina. Ena gauna oqo sa vinaka sara na vosa e cavuta, e dina ga ni so na vosa e vinakati me vakavinakataki cake.
Ena yabaki sa oti e a soli e dua na itavi vei ira na lewe ni kalasi va nei Clara me ra vosa ki na loma ni va ki na lima na miniti. A digitaki o Clara me vosa ena ulutaga na Veivakarusai Levu, ka a vakamacalataka me vaka ga ni o koya e dua na goneyalewa a tiko dina ena keba ni veivesu oya. Ena imatai ni gauna a vakatovotovotaka kina na nona vosa oqo, e a taura e walu na miniti ka 40 na sekodi, baleta ni levu na vosa a dredre me cavuta rawa. E a tomana tikoga na nona vakatovotovo. Sa lekaleka sara na gauna ni nona vosa ni sa tekivu me cavuta vakamatata na nona vosa. Sa laki yacova sara me sa va na miniti ka 40 walega na sekodi na gauna ni nona vosa, ka ratou sa digitaki koya na nona lewe ni kalasi me matataki iratou e matadra na lewe ni koronivuli taucoko. Ni sa vosa oti, era vakasausau na gonenivuli taucoko. E vuqa vei ira era kilai Clara ni se qai kalasi dua voli, ka veivakurabuitaki na veika sa mai rawata rawa o koya. “E a tuturu kina na wai ni matai qasenivuli liu,” e nanuma lesu o tinai Clara. “ A tagi kina na qasenivuli kalasi rua nei Clara. E a maqusa ena vosa ni vakacaucau o nona qasenivuli ni kalasi va. Oqo e dua na qaqa talei—sa qai dua na gauna talei ni noqu bula taucoko!”
Na veika cava beka sa vulica rawa o Clara mai na veika oqo? “Mo ni sasaga tikoga,” a vakasalataki ira na gone ni veivanua kecega. “Kakua ni soro.”
Io, e a ka bibi talega na masu ki na nona qaqa o Clara. E qaqaco vinaka tu na nona vakabauta na Tamada Vakalomalagi kei Jisu Karisito. Sa veivuke talega kina na ivakavuvuli mai na Lalai, mai na lotu vakamatavuvale, vulici ni ivolanikalou, kei na itubutubu. Rau sa vakaitavi talega mai kina o irau na tacina, mai na nodrau ivakaraitaki vinaka kei na veika ni wilivola. Ni rau a se qai dui yabaki 12 kina o Carly sa yabaki 18 oqo, kei Josie sa yabaki 15 oqo, rau a tekivu vakabira na Posita ni New Era ena nodrau iloilo. Sa wiligusutaka rawa kina o Clara na veitiki ni ivolanikalou vakarautaki ni semineri ka vulica talega vata keirau na tacina na ono na ivakavuvuli “B” nei Peresitedi Hinckley.
E peresitedi ni tabana o tamana, ka peresitedi ni Goneyalewa o tinana, ka sa maqusa tiko kina o Clara ena itavi qaravi ni tabana. E dau lailai na lewenilotu ena tabana o Kenora ni dau vulaikelikeli, vulaibatabata, kei na vulaitubutubu. E dau lewe duadua ga ni Lalai, ka kena qasenivuli o buna, na peresitedi ni Lalai. Ia ena vulai katakata, ni ra dau gole yani e udolu na dausara vanua me ra laki gade ki na Drano ni Veikaukau, e dau oso sara na tabana oqo maivei ira na vulagi ena Sigatabu. E dau maqusa sara kina o Clara me kunea e so na itokani vou. E ratou qaqaco tikoga na matavuvale ena Lotu ena loma ni yabaki ena nodratou dau laki vakaitavi ena veiqaravi ni iteki e Winnipeg mai Manitoba, oqo e rua veimama na auwa ki na ra. Ni ratou dau suka bogi yani ki vale, e ratou dau sarava kina e lomalagi na lewe ni lagi dui roka ni vualiku ni ra veiciriyaki voli.
E veimaliwai vakavoleka sara o Clara kei ira na wekana. Ena bogi ni bera na Kirisimasi era mai moce kece sara ena vale nei Bubu o ira na na tatacina kei ira na momo kei na nei. Era kana vata, lagasere, vakalili sitokini, drama ni siganisucu, vakarorogo ki na itukuni ni Kirisimasi, ka ra tekiduru vata ena masu. Sa qai dau vakarautaki mai ena mataka ni Kirisimasi na gunu jokoliti katakata, na korosi bani, kei na soli iloloma. Ena bogi ni Kirisimasi era laki sota vata tale na veimatavuvale oqo ki na vale nei Clara me ra laki vakayakavi vata kina. Ena siga ka tarava na Kirisimasi (Boxing Day) e tomani tale na kana vata ena veimataqali kakana me na vakayacori ena veivale yadua.
Sa goneyalewa levu sara o Clara ena nona vakauqeti vakalevu ena veika totoka ni bula, na veivakacegui ni loloma ni matavuvale, kei na rarama ni kosipeli i Jisu Karisito. E laurai levu vua na veivakauqeti oqo ena kena rairai kei na ivakarau ni yalona. Ena gauna liliwa sara mada ga ni vulaibatabata e dau vakatakatai ira era veikilai vakavinaka tu. Me vaka ga e kaya o tinana, “Sa neitou kalougata ni tiko o Clara.”