Vunau ena Vunau

iKatini Kei na iSolisoli Tale Eso

O gadreva mo cakava e dua na ka vinaka ena vuravura oqo ia ko sega ni kila mo cakava vakacava? Na kena isau sa tu sara ga ena nomu waqanivola ni ikatini. Me da vakadeuca mada na ilavo o ni dau biuta ki na waqanivola lailai ka sa vukea cake na kena tara na matanitu ni Turaga e vuravura taucoko—ka wili sara ga kina na nomu tabanalevu se tabana.

Yacamu

Ena rairai rawarawa toka, ia mo qarauna mo vakalewena vakadodonu ena veigauna na tikina oqo. Oqo me na kakua ni veilecayaki kina o vunivola ki na yaca K. Anderson se o Kim Anderson e dua tikoga na tamata.

iKatini

Na nomu tini na pasede ena vakau ki na itikotiko liu ni Lotu e Salt Lake City mai Utah, na vanua era na laki vakatulewataka kina vakadodonu na iliuliu ni Lotu na veivanua e bibi cake me laki vakayagataki kina—me vakataka beka na kena laki tara e dua na valenilotu vou ena dua na yasai vuravura.

iSolisoli ni Lolo

Ena Sigatabu ni lolo, sa dua dina na madigi vei ira na Yalododonu Edaidai me ra cau ki na isolisoli ni lolo. iMatai, ena vakayagataka o bisopi se peresitedi ni tabana na ilavo oqo me na vukei ira na lewenilotu ena nomuni tabanalevu se tabana era gadreva dina na ilavo me voli kina na kakana se saumi kina na rede ni vale. Kevaka e vo na ilavo, ena wasei yani na isolisoli ni lolo me ra qaravi kina na tamata ena veivuke tale eso.

Daukaulotu ni Tabanalevu

Mo ni solia eke na ilavo me ra vukei kina na daukaulotu mai na nomuni tabanalevu se tabana.

Daukaulotu raraba

Mo ni solia eke na ilavo me ra vukei kina na daukaulotu kei na cakacaka ni kaulotu ena veivanua kece vaka-Lotu.

iVola i Momani

Kevaka o gadreva mo vukea na kena voli na iVola i Momani, ena kena vukei na nodra saumaki mai na tamata ena veiyasai vuravura, mo na cau eke.

Vukei ni Kawatamata Raraba

Ena gauna e dau yaco kina e dua na tavuki ni vanua veivakarusai e vuravura, sa tu vakarau kina na Lotu, ena kena lolomataki na iyaya ni vakacoko. Ena dau vakauta talega na Tabana ni Vukei ni Kawatamata Raraba na kakana kivei ira na tamata era vakalolomataki tu ena walokai kei na viakana kei na nodra iyaya ni vuli na gone era vakaleqai tu. Kena ivakaraitaki, ena dua na gauna lekaleka sa oti e a veivuke yani na Tabana ni Vukei ni Kawatamata Raraba ki na nodra culai ena itatarovi e milioni na gone mai Aferika ena vuku ni mate na misila.

Tara ni Valetabu

Mo na cau eke, kevaka o gadreva mo vukea na kena tara na veivaletabu ena veiyasai vuravura.

iLavo Vure ni Vuli

Ena vuqa na veivanua e vuravura, era sega ni dau yacova sara na vuli torocake e vuqa na itabagone qase cake Yalododonu Edaidai. Sa solia tiko kina na iLavo Vure ni Vuli na dinau ni vuli me ra rawa ni vuli toro cake kina o ira na gonevuli mai na vuqa na veimatanitu.

Veika Tale Eso

Ke o gadreva mo sauma e dua na icurucuru ni keba ni Sikauti, keba ni Goneyalewa, se so tale na itavi qaravi ena loma ni Lotu? Mo vola na ilavo oqo ena kolomu ni “Veika Tale Eso”. E dina ga ni ilavo oqo e sega ni okati me dua na cau, ena kolomu oqo sa gadrevi talega kina me ratou na solia na iliuliu ena tabanalevu kei na tabana e dua na risiti ni ilavo o sa solia oqo.

“E dua na ilawalawa tagane era a veivosaki vata tiko kei Parofita Josefa Simici ena dua na siga ena gauna sa rogovaki mai kina ni sa … kama yavu na nona vale e dua na turaga lewenilotu vakaloloma. Era sa rarawataka taucoko na ka sa mai yaco oqo. E a vakarorogo vagumatua sara na Parofita, ka qai ‘tara mai ena nona taga, e lima na dola ka kaya, “Au sa rarawa dina ena vukui koya na tacida oqo kau sa solia kina e lima na dola; ena vica beka ko ni na solia ena vuku ni nomuni rarawa oqo?”’ … Ena yabaki sa oti e milioni vei kemuni ko ni dodoliga yani ki na nodra rarawa na tamata eso ena nomuni isolisoli, lomasoli, kei na cakacaka ni veivukei. Vinaka vakalevu na ivakarau totoka ni nomuni veivuke.”

Bisopi H. David Burton, Bisopi Vakatulewa, “Yalololoma Ka Liga Dauveivukei,” Liaona, Me 2006, 8.