Ena Solia Vei Iko O Koya na Vakacegu
Au a vakila na rarawa vata ga a sotava tiko o koya. Sa dua na ka na noqu vinakata meu vukei koya baleta niu vakila ni sa ka vakaidina na nona rarawa kei na nona gagadre me caka dodonu ka me papitaiso.
Au kaulotu tiko ena gauna au a sotavi Susie kina (sa veisau na yacana). E a vakavulici ena kosipeli o koya kei na nona matavuvale mai vua e rua na daukaulotu ka rau cakacaka vata kei au ena valenivolavola ni kaulotu. E a soli taucoko vei iratou na lesoni ka ratou sa vakadonuya na veisureti me ratou papitaiso ka vakadeitaki. E a noqu madigi meu veivakatarogitaka na matavuvale ni va na tamata vinaka oqo: tinadratou, tamadratou, o cauravou lailai, vata kei Susie.
Au sa vakayacora oti na nodratou veivakatarogi ni papitaiso na lewe tolu ena matavuvale ka raica na nodratou sa vakavakarau sara kina vakavinaka ka maqusa sara me ratou sa na lewe ni matanitu ni Turaga. Ia ni sa curu mai loma ni rumu o Susie, e vaka me sega ni via vosa ka laurai ni sega ni vinakata me keirau veivosaki.
Au sa tekivu sara meu taroga lesu na veika a vakavulici vua. A tukuna rawa o koya na italanoa kei Parofita Josefa Simici ka sa vakabauta; sa wilika o koya na iVola i Momani ka sa kila ni dina; ka sa ciqoma o koya ni Lotu dina duadua ga e vuravura ka sa gadreva me lewena. Au a tarogi Susie me baleta na nona muria na ivakaro ni ikatini, na Vosa ni Vuku, kei na ivakaro tale eso. E a kaya o koya ni sa kila vakavinaka sara na veika kece oqo ka sa tu vakarau me na bulataka ena nona bula taucoko. Sa dina sara, e a vaka talega na veivakatarogi au a vakayacora vei iratou na vo ni nona lewe ni matavuvale.
Au a qai taroga, “E rawa ni o tukuna vei au na cava na lawa ni bula savasava?” E a tavuki sara na irairai ni matana. Au a siqema rawa sara kina ni sai koya beka oqo na vuna e sega kina ni vinakata me keirau veivosaki. Niu se bera ni cavuta e dua na ka, e a tabonaka na matana e ligana ruarua, ka lolou sobu, ka tekivu me tagi.
Keirau a mai dabe toka ka sega ni veivosaki me vica na miniti. Au a sega ni kila na cava meu tukuna, ka sa sega ni tarova rawa na nona tagi o Susie. Au a masuta na veivuke ni Turaga ka tarogi Susie se cava na leqa. A qai rai cake mai ka tukuna vei au ni vo toka e vica na macawa me sotavi rau na daukaulotu erau a cakava kei nona itau cauravou eso na ka tawa kilikili ka rau a vakavulica na daukaulotu ni sa veika cala ka sa tukuna tiko na lawa ni Turaga. E sa tukuna oti vei nona itau o ya me baleta na veika sa vulica ka sa tukuna vua ni sa sega tale ni via oka ki na veimaliwai vaka o ya. E a vakatura talega vua me veivosaki kei rau na daukaulotu ka me rogoca talega na veika dina sa mai kila o koya. Ia, e se vakararawataki tikoga vakabibi na yalona ena veika a vakayacora o ya.
Au a vakila na rarawa vata ga e sotava tiko o koya. Sa dua na ka na noqu vinakata meu vukei koya baleta niu vakila ni sa ka vakaidina na nona rarawa kei na nona gadreva me caka dodonu ka me papitaiso. Ena gauna o ya, sa vakatakilaitaki mai vei au na isau ni noqu masu. Au a tarogi koya, “Susie, o vinakata mo vagalalataki mai na cala kei na rarawa ni ivalavala ca oqo?” E a qai cuvaki sobu tale ka tabonaka na matana. E a cavuta ga mai e dua na vosa: “Io.” Sa qai vaka e tadola mai na nona tagi, kau a qai vakacegui koya ena noqu tukuna vua na Veisorovaki kei na nona rawa ni bulataka ena nona bula. Au a vakamacalataka vua ni dua na inaki ni papitaiso kei na veivakadeitaki sai koya me na vakabula na yalodra o ira era sa veivutuni vakaidina, kau sega ni lomatarotarotaka ni sa yalona vakaidina kina.
Keirau a qai tinia na veivakatarogi ena masu. E a tiko dina e kea na Yalo ni Turaga, ka kaukauwa cake sara na noqu vakila mai na veivakatarogi au a dau vakayacora taumada.
Keirau a yaco yani kei noqu itokani ki valenilotu ni sa vakarau caka na papitaiso. Sa sega tale na gauna me keirau laki vosa vei Susie se nona matavuvale ni bera na papitaiso. Ni sa oti na sere kei na vosa, eratou a qai papitaiso—imatai o tinana, tarava o tamana, ka tarava sara o ganena, ka qai muri sara o Susie. E a kalawa yani ki na tobu, ka sa laurai votu e matana—na ivakaraitaki ni sa yaco tiko na nona veivakabulai na iVakavuvuli e yalona. Ni sa lamata mai wai, sa tonawanawa tu na matana ka vakakina o au. Sa mata mamarau cake vakalevu o koya, ka sa ramase na kena irairai. Au sa qai kila kina ena siga o ya na vuna e vakavulica kina na iVakabula vakaoqo, “Dou lako mai vei au, koi kemudou vakayadua ga … sa oca ka colata na icolacola bibi, ia kau na vakacegui kemudou” (Maciu 11:28).
Keirau a veivosaki ga vakalailai ni sa oti na soqoni. Au a qai kidavaki iratou na lewe ni matavuvale ki na matanitu ni Turaga. Niu sa lululu vei Susie, au via tukuna vua na kena sa rui bibi ki na noqu bula na veika kece oqo. Au a veivutuni talega ena noqu bula kau a vakila na kaukauwa ni Veisorovaki, ia au sa vakavinavinaka niu a mai vakila vakalevu cake na kena kaukauwa mai na kena au a sotava taumada ena vuku ga ni noqu mai veikilai kei Susie.
Na kena leweni na Lotu sa ibolebole e loma ka vakaikoya ga. Na nona lewena ena gauna sa vakacolati tu kina ena veika rarawa sa ibolebole levu cake sara kivei Susie, ka sa vakakina vei ira e vuqa na lewenilotu vou. Ia na Veisorovaki ga i Jisu Karisito sa voroki rawa kina na ibolebole o ya ka muataki kina na goneyalewa totoka oqo ni Kalou me saumaki mai ka vakabulai na yalona. E a vakavulica talega kina e dua na cauravou daukaulotu qaqa e dua na lesoni ni kena bulataki na Veisorovaki ena nona bula sara ga o koya.