Eratou Vakanamata vei Karisito na Mataveiliutaki Taumada

“Ena veigauna taucoko ena loma ni yabaki, e sega ni dua e totoka cake me vaka na Kirisimasi,” e kaya ko Peresitedi Gordon B. Hinckley ena nodratou Lotu ni Kirisimasi na Mataveiliutaki Taumada ka dau vakayacori vakayabaki ena Vale ni Koniferedi e Salt Lake City, ka dau kaburaki ki vuravura raraba.

“E tarai ira na vakaleqai tu na yaloda. Sa vakamalumalumutaki na veicati ena loloma… . Sa tubu me kaukauwa cake vakalailai na loloma; sa lomasoli vakalevu cake vakalailai na yaloda. Eda sa malele vakalevu cake me da vaqaqacotaka na duru sa wadamele ka laveta cake na liga savu. E vakamarautaki na yalodra na gone. Sa yaco mai na ikuri ni cakamana. E drodro vakatitobu na marau.”

Ni oti na nona raica lesu na nona takali na tinana ni bera na Kirisimasi ni 1930 kei na gauna dredre ni nona takali na watina ena 2004, e qai kaya ko Peresitedi Hinckley: “E cila basikata na veika butobuto kece sara na kena iserau cecere na Luve ni Kalou, o Koya a solia na Nona bula me rawa kina ni da vakabulai. Oqo na ibalebale dina ni Kirisimasi, na dina ni Veisorovaki, ka mai rawata na Dauveivueti kei vuravura.”

E vakadinadinataka o Peresitedi Hinckley ni sa solia tu na iVakabula na inuinui ni veivakabulai vei keda kece, ena gauna sara mada ga oqo ni veivaluvaluti, ni veisaqasaqa, kei na veigauna ni leqa dredre.

E kaya ko Peresitedi Thomas S. Monson, na iMatai ni Daunivakasala ena Mataveiliutaki Taumada, na Kirisimasi e “gauna ni matavuvale; e gauna ni vakanananu lesu; e gauna ni vakavinavinaka.

“Na yalo ni Kirisimasi e yalo ni loloma kei na lomasoli kei na lomavinaka… . Na yalo ni Kirisimasi e dua na ka au nuitaka me dau tu e yaloda kece sara ka vakakina ena noda bula sega walega ena gauna oqo ia ena loma ni yabaki taucoko.”

E kaya ko Peresitedi Monson, ena noda maroroya na yalo ni Kirisimasi, eda sa maroroya tiko na Yalo i Karisito.

“Na veikidavaki ni ‘sega na tikina me nodratou’ erau a sega ni rogoca walega ko Josefa kei Meri ni bera na nona sucu ko Jisu, ia a sotava talega ko Koya ena veigauna eso ena Nona veiqaravi,” e kaya kina o Peresitedi Monson.

“Ena noda veivale nikua e tu na rumu ni kana, rumu ni moce, rumu ni veivakalasai. E tiko beka na rumu me baleti Karisito? Eda dau kunea na gauna ni … qaravi itavi ka ra tiki ni noda bula e veisiga. E tiko beka na noda gauna me baleti Karisito?”

E vakavuvulitaka ko Peresitedi James E. Faust, na iKarua ni Daunivakasala ena Mataveiliutaki Taumada, “ena gauna oqo ena dua na yabaki ni da vakananuma na nona sucu (na iVakabula), sa dodonu me da vakasamataka ena vakarokoroko titobu na Nona mate kei [na] veivakasavasavataki e tarava mai, na Tucaketale.”

Ena nona vosa, e goleva kina ko Peresitedi Faust e dua na nona ivakavuvuli “cecere ka bibi na iVakabula… : me ra cakava vei ira na tani na veika era sega ni rawa ni cakava vei ira vakataki ira.“

Na soli ka vuni e vakaraitayaloyalotaka na nona loloma na iVakabula, e kaya o Peresitedi Faust. “Au gadreva meu vakaraitaka na marau kei na vakavinavinaka vei ira kece era dolava na yalodra ka soli ka vei ira na tani.

“O ira era soli ka vuni era vakila na kamica ni Yalotabu e ragita na lomadra ena nodra cakava e dua na ka ena vukudra na tani ka na sega ni rawa ni kilai. Na soli ka vuni e vakasavasavataki vakalevu cake kina na veika e soli.”