Kacivaka na Vale ni iYaya Makawa na iKawalu ni Veisisivi Cakacaka ni Liga ni Vuravura
Na Vale ni iYaya Makawa ni iTukutuku Makawa ni Lotu kei na Cakacaka ni Liga sa kacivaka na ulutaga ni kena iKawalu ni Veisisivi Cakacaka ni Liga ni Vuravura ka sureti ira na lewe ni Lotu e vuravura raraba me ra vakaitavi ena vakaraitaki ka me na vakayacori ena ika 20 ni Maji ki na ika 11 ni Okotova, 2009.
Na iulutaga ni vakaraitaki ka, “Nanuma na Veika Cecere ni Kalou,” e kovuta na veika era dau vakila na Yalododonu Edaidai ena veivanua kecega. Me na vakaraitaki ena cakacaka ni liga e dua na iulutaga, vakasama, italanoa, tamata se vanua ka sala vata kei na (1) na ivunau, vakabauta, kei na ivakavuvuli, ka okati kina na italanoa eso mai na ivolanikalou kei na nodra ivakavuvuli na parofita; (2) na veika e yaco, na vanua e yaco kina, kei na tamata yadua me baleta na itukutuku makawa ni Lotu kei ira na kena tamata; se (3) na kena vakayagataki na veika talei vakalotu ena bula ni Yalododonu Edaidai, ka okati kina na Lotu, matavuvale, kei na cakacaka ni tamata yadua.
E dola tu na veisisivi vei ira na lewe ni Lotu yabaki 18 se sivia ena ika 31 ni Tiseba, 2008. Me ra na vakaraitaka yani na daunicakacaka ni liga yadua e yadua na cakacaka. Ena marautaki na veimataqali cakacaka ni liga ena veitovo vakavanua ni vuravura raraba, kei na tabana ni itukutuku duidui. Na veika me mai vakaraitaki e dodonu me a sa vakacavari ena 1 ni Janueri, 2006.
Ena vakau yani na ivolasui [fomu] ni kere curu vei ira na daunicakacaka ni liga ena ivola ni vakau meli ni vale ni iyaya makawa ena Epereli ni 2008. Ena kunei talega na ivolasui[fomu] ena initaneti, o ya ena Mataveilawa ni vale ni iyaya makawa. Me na okati ena ivola ni vakau meli, volavola mai ki na vale ni iyaya makawa ena Eighth International Art Competition, Museum of Church History and Art, 45 North West Temple St., Rm. 200, Salt Lake City, UT, 84150-3470, USA, se ena i-meli, church museum@ldschurch.org.
Na imatai ni wavoki ni vakatulewa ena yavutaki ena itaba ni cakacaka ni liga e vakau vata mai kei na ivolasui [fomu] ni kere curu ena initaneti se ena meli ni bera na ika 10 ni Okotova, 2008. Ena vakatulewataki na cakacaka ni liga ena kena vakamacalataki vakavinaka na iulutaga, na taucoko kei na maqosa ni cakacaka ni liga kei na iyaya vakamisini e vakayagataki kina; kei na lewai vakamatau ni cakacaka, na vanua e vu mai kina, kei na daumaka ni cakacaka. Na icocovi e okati kina e vica na Tikite ni Volivoli, ka rawa ni voli kina eso na cakacaka ni liga mai na kena e vakasokumuna vata na Lotu; rauta ni 25 na iCocovi vakailavo ni Vakaitavi, ka ratou na vakatulewa kina na turaganilewa; kei na 3 na iCocovi vakailavo ena nodra Digidigi na Sarasara.
Me baleta na itukutuku tale eso ni veisisivi se me saravi na cakacaka ni liga mai na vakaraitaki ka sa oti, sikova na Mataveilawa ni vale ni iyaya makawa ena www.lds.org/church history/museum/competition.