Nanuma

Qaqaco na Lewenilotu Duadua ena Matavuvale

Ena noqu bula taucoko au a lewenilotu duadua ga ena noqu matavuvale. Au dau sotava e vuqa na bolebole niu saga vakaukauwa meu bulataka na kosipeli. Na kena tu vei au na veivola ni Lotu veivakauqeti, vakabibi na Liaona, e vukea na noqu salavata tiko kei na Yalo Tabu.

Vinaka vakalevu na soli ivakasala tiko mai ena veivula ni kosipeli e dau veisautaka na bula.

Sandra Vinocuna, Ecuador

Domo ni Parofita

Na ilavelave ni Liaona ni Okotova 2005 au a taleitaka sara vakalevu. Au vakavinavinakataka vakalevu na veitukutuku era tu kina, vakabibi na vosa nei Peresitedi James E. Faust, “A Thousand Threads of Love.” Au vakabauta me da na wilika kece sara. Au sa vakavinavinakataka na Tamada Vakalomalagi ena nona vakalougatataki keda ena parofita me ra liutaki keda ena otioti ni gauna oqo.

Elder Emenike Hope Onwuchekwa, Nigeria Ibadan Mission

Vinaka vakalevu na iTukutuku ena PDF

E vakauqeta sara tikoga na noqu matavuvale na Liaona, ka dau vukea me keitou bulataka na kosipeli. Keimami sa mai kalougata ena vuku ni nomuni gugumatua. E sega walega ni qaqaco vakayalo ka vakaukauwataka na vakabauta na kena itukutuku, ia era totoka na kena iyaloyalo kei na ituvatuva.

Keimami sa vakavinavinakataka talega ni sa mai tabaki na veimekesini oqo ena veimataqali vosa ena PDF ena komupiuta—ka sa sega tale na kena kotivi ka vakacacani na ilavelave pepa! Niu vinakata ga meu vakabira e dua na vosa se iyaloyalo ena kato ni waililiwa (fridge) se kauta mai e dua na itukutuku ki na gauna ni veiwasei se lotu vakamatavuvale, au na tabaka ga na kena au vinakata. Totoka dina!

Christian Karlsson, Amerika

Me Kilai: Na Liaona e tabaki tu ena komupiuta ena vosa ni matanitu eso ena www.lds.org. Na kena Vakavalagi, kiliki ena “Gospel Library.” Na veivosa tale eso, kiliki ena mape kei vuravura (world map).

Na Vatutalei Makualiliva Duadua

Au sa vakavinavinakataka na ilavelave ni Liaona e dau tabaki mai. Ena ilavelave yadua, keitou sa mai kila kina oqo na inaki ni Turaga ka sa vaqaqacotaki na neimami ivakadinadina. Sa dina sara ni sa vatutalei makualiliva duadua ena iotitoi ni gauna oqo.

Na nodratou itukutuku na Mataveiliutaki Taumada e cokonaki keda me da bulataka na itovo ni iVakabula ka dau vakavulica vei keda na kosipeli savasava ni noda Turaga o Jisu Karisito. Ena duidui beka na noda itovo vakavanua, ia sa dua ga na noda inaki. E vakasinaiti au na yalo marau meu kila ni dua tale na Yalododonu Edaidai e tiko ena taudaku ni noqu vanua, ka vakakina ena tai kadua ni veiwasawasa lelevu e wilika tiko na mekesini vata ga oqo.

José Ramírez, Venezuela

Ena Noqu Vosa Ga

Oi au mai Ukraine, ia ena walu na vula sa oti, keirau a toki vakaveiwatini ki Idaho (e Amerika). Au sega ni kila vakavinaka na vosa Vakavalagi, ka so na gauna au sega ni kila vakavinaka na veika e tukuni tiko e valenilotu ena Sigatabu. Ia au vakila tikoga na Yalo Tabu ena soqoni, ia ena gauna oqo au sa vakavinavinaka niu sa mai wilika rawa na nodra vosa na noda iliuliu ena noqu vosa ga. Vei au mada ga, e kauta mai na Liaona na itukutuku vakalou.

Lena Cantor, Amerika

Au Vakavinavinaka Ga

Na Liaona sa noqu itokani ka dau vukei au. Ena veivula e dau bolei na noqu bula, ia ena vica na vula sa oti, au kila ni a volai na Liaona me baleti au kei na noqu bolebole. Au kila ni Kalou e vinakata me da marau ni da talairawarawa.

Georgia Adolpho Pahulaya, Filipaini