Na Cava na Vuna a Tukuna Tiko Kina Vei Au na Yalotabu?
Ena vula ikatakata ni 1980, sa voleka sara tiko ni cava na noqu kaulotu mai na Tabana ni Kaulotu e Massachusetts. Ena dua na yakavi e a dua na ilokuloku me na vakavulici e dua na gonevuli ni vuli torocake me baleta na ituvatuva ni veivakabulai.
E vakavica ena gauna ni lesoni, au a voleka ni ulabaleti ena kaukauwa ni Yalo Tabu ni sa tukuna tikoga mai vei au ni sa ka dina sara na ivakavuvuli keirau vakavulica tiko. Au nanuma rawa na noqu a masu tiko e cake: “Au sa kila tiko na veika oqo. Au sa vakavulica oti vakalevu na lesoni oqo ena loma ni yabaki rua oqo. Au sa vakavinavinaka ki na noqu vakila na nomuni Yalotabu, ia au sa kerea mo ni vakadinadinataka vei koya talega na dauvakatataro oqo!”
Ni oti vakalailai na yakavi o ya, au a laki veivosaki kei noqu peresitedi ni kaulotu, ka a tukuna vei au ni a laucoqa mate o tinaqu ena dua na vakacalaka e gaunisala. Na leqa vakasauri vakaoqo e a tubu kina na rarawa bibi ki na noqu matavuvale kei na itikotiko raraba. Ia ni sa oti na luluqa ni yalo ena vuku ni veika sa mai yaco ka sa noqu madigi meu taleva lesu, au se kila vakavinaka tikoga oqo na kaukauwa ni nona veivakauqeti vei au na Yalotabu ena gauna ni lesoni me baleta na ituvatuva ni veivakabulai. Au sa kila ni oqo sa nona cakacaka e dua na Tamada sa dauloloma ka sa vakarautaki au meu ciqoma na mate sa vakarau yaco mai.
E sega ni yali vei au ena dua na siga na noqu vakananuma lesu na veikaroni kei na ivakavuvuli nei tinaqu. Ia e sega talega ni yali vei au e dua na siga meu sega kina ni nanuma na nona vakarautaki au e dua na Tamada Vakalomalagi dauloloma ena vuku ni mate sa roro tiko mai.