Na Galala Mo Danisi
E tasisi yani o goneyalewa daudanisi ena fuloa—ka mekemeke, cocowiriwiri, ka lade cake yani vakarawarawa sara ka tau tale i ra vakavinaka ka sega ni rogo. Sa mai matanataka tiko o koya na ivakaraitaki malumu ni bula galala.
Me vakataki ira ga na goneyalewa lalai eso, o Maria Victoria Rojas Rivera mai Chile—ka kilai tu me o Mavi vei ira na nona itokani—e a se qai yabaki va walega, sa vinakata o koya me goneyalewa daudanisi. Me vakataki ira ga na vo ni goneyalewa lalai tale eso, sa kila rawa o koya ni vakacegu kei na bula galala e a raica o koya ena fuloa ni danisi e vinakati kina na cakacaka vakaukauwa sara. Na sasaga kei na bula vakaivakarau e gadrevi kina me rawa ni goneyalewa daudanisi saumi sa ka dredre sara vei ira e vuqa na goneyalewa era tatadrataka tu.
Na iSau ni Tatadra
“Ni ko se gonelailai, ko sega tu ni kila na solibula ena gadrevi kina,” e kaya o Mavi. “Ena gauna au se qai tekivu vulica kina niu se yabaki 10, a kaya vei keimami na neimami qasenivuli ni veimama ni neimami bula taucoko keimami na vakayagataka ena danisi. Keimami na sega ni cakava e levu sara na ka.”
Oqo me vakataka na gauna ni gade kei na mataqali kakana eso. Ena vakayagataka sara vakalevu na gauna o Mavi ena vakaukauwa yago kei na vakatovotovo. Ena qarauna o koya na veika e kania. Ia ni oti na vuli kei na danisi, ena sega na gauna ni veigadivi kei ira na itokani.
Sa nanuma kina o Mavi ni nona tatadra oqo sa ka bibi dina ka sa na tovolea.
“Na veiyabaki ni gauna ni gone ena dau rawa me dau dredre toka,” e kaya o koya. “Era dau lomatarotaro na noqu itokani na vuna au sega kina ni kania eso na mataqali kakana se gade vata kei ira ni sa bogi levu.”
Na iSau ni Galala
Ni se gone o Mavi a vulica rawa kina ni veika e vaka me dau vesuka na nona galala sai koya sara ga o ya na sala me na sereki koya tani mai ena veika ena rawa me tarovi koya me rawata na nona inakinaki.
“Au sa lewa kina meu kakua ni gade ena bogi, kau sa digia ga meu vakatovotovo ka kakua ni lako vata kei ira na noqu itokani ki na loma ni taoni,” e kaya o Mavi. “Kevaka au sa wale ena vuku beka niu a gade vakadede ena bogi se’u sega ni kila e dua na moimoi ni danisi baleta niu sega ni vakatovotovotaka, au na sega ni rawa ni danisi.”
Na bula vakaivakarau vaka o ya e sega ni rawarawa, ia e kaya o Mavi ena vakavotukana ga mai.
“Na tamata kecega e dau tiko na gauna era na datuvu kina,” e kaya o Mavi, “ia sa tu ga vei iko na kaukauwa ni digidigi. Na bula vakaivakarau ena vaka me dau dredre toka, ia na bula vakaivakarau e ka ni digidigi. Kau sa digitaka meu ciqoma na ivakarau ni bula oqo meu na danisi rawa kina.”
E Dua na iNakinaki ni Dua na Gauna Balavu Cake
Ena so na gauna ni sasaga tiko me yaco me goneyalewa daudanisi, e a raica rawa kina o Mavi ni danisi e sega walega ni nona inakinaki vakatabakidua se na ka dina me na solibula kina.
Ena loma ni gauna oqori, a yaco vua e dua na gagadre me muri Jisu Karisito, a qai raica kina o koya ni veika sa vakatavulica vua na danisi me baleta na bula vakaivakarau me na bulataki vakakina ena cakacaka ni kosipeli. Me vaka ga na nodratou lomatarotarotaka na nona itokani na veika a vakayacora ena vuku ni danisi, eratou sa vakataroga vakakina na vuna sa mai bulataka kina e dua na ivakarau tudei ni ivakavuvuli ni kosipeli.
“Au a qai vakamacalataka ni sa tu vei keda na galala ni digidigi, kau sa digitaka kina meu ciqoma na ivakarau ni bula oqo meu sereki kina mai na ivalavala ca ka me tiko vata kei au na Yalo Tabu,” e kaya o koya.
Se me vaka ga a kaya na iVakabula, e dodonu vua e dua na tisaipeli me “colata ga na nona kauveilatai,” sa kena ibalebale me vakanadakuya na cakacaka butobuto kei na garogaro ca ni veika vakavuravura ka me muria ga na ivakaro ni Kalou (raica na iVakadewa nei Josefa Simici, Maciu 16:26). Na bula vakaivakarau vakaoqo ena solia vei keda “na galala kei na bula tawamudu ena vuku i Koya na Dauveisorovaki ni tamata kecega,” ia na talaidredre ki na ivakaro ena kauti keda me da laki “tiko vakabobula kei na mate me vaka na nona veivakabobulataki kei na nona inaki na tevoro” (2 Nifai 2:27).
“Na talairawarawa ena solia e dua na bula sereki kei na vakacegu ka sega ni mai na dua tale na ka,” e kaya o Mavi. “E sega ni yalani ga ena bula oqo na noqu inakinaki ia e laki oka ki na bula tawamudu.”
Sa Yaga na Solibula
E toso yani o Mavi ena buturara ni danisi me vaka e dua na draunikau e kuitaki ena uwa, ena nona dede ka veisau mai na dua na imoimoi ki na dua tale—na développé kei na pirouette, glissade kei na grand jeté.
Na goneyalewa daudanisi ena rawa me moica na ivukivuki ni yagona ia vei ira eso ena rawa me na ka mosimosi sara. Na galala ni moici ni yago vakaoqo sa ka bibi sara me ra kila ka raica o ira na sarasara. Ia e dina ga ni nodra imoimoi vakaoqo e dua na goneyalewa daudanisi e vaka me rairai rawarawa tu ga ena buturara, e sa dua dina na vakatovotovo levu sa cakava tiko mai.
Ni mai oti e walu na yabaki ni solibula kei na gauna a taurivaka ena voleka ni veisiga yadua, sa bulataka sara tikoga o koya na nona tatadra ena buturara—ka vakakina ena kosipeli.
“Era dau nanuma na tamata ni sa rui ka totoka ka taleitaki,” e kaya o Mavi. “Ia na imoimoi kece oqo era qarauni sara vakavinaka. E taura e dua na kaukauwa levu mo moici iko tu vaka o ya.”
Sa ka bibi dina vakaoqo na kosipeli. Na muri Karisito e gadrevi kina na yaloqaqa. Ka sa kamikamica dina na kena isau.
“Na kequ isau mai na noqu solibula o ya niu sa rawa ni danisi vaka o ya,” e kaya o Mavi. “Au sa yaloqaqa, kau sa vakila na veidusimaki ni Yalo Tabu ena noqu ikalawa kecega—ena buturara ka vakakina e tautuba.”
Se Bera ni Oti na Danisi
Me vaka e kaya o Nifai, ni gauna ga eda sa gadreva kina me da muria na Karisito ka da sa papitaisotaki ka vakadeitaki, eda sa gadrevi tikoga me da vosota tiko me yacova na ivakataotioti (raica na 2 Nifai 31:19–20). Kivei Mavi, sa na gadrevi vakakina na gugumatua vakaoqo ena nona danisi.
Ni oti na nona danisi e Paraguay, e a lesu tale ki Viña del Mar mai Chile, me laki veivakavulici e kea me vica na yabaki. Ia oqo e sa gadreva o koya me na toroya cake na ivakatagedegede ni nona danisi. Sa mai tuvanaka e dua na inakinaki vou ka sa laki gole sara kina ki Argentina, Jamani, Ailadi, kei Sipeni me laki vuli ka veivakatarogi kei ira na kabani eso ni danisi.
E sa kila tiko o koya me na sasaga tikoga—ena buturara ka vakakina ena kosipeli. Me na bula vakaivakarau tikoga kevaka e gadreva o koya me galala ena danisi. Ka me na vakabauta tikoga kevaka e gadreva o koya na galala e lako mai ena bula vakatisaipeli. “Kevaka dou sa muria tikoga na noqu vosa,” e kaya na Turaga, “dou sa qai noqu tisaipeli dina: ia dou na kila na ka dina, ia na ka dina ena sereki kemudou” (Joni 8:31–32).
Danisi vakavuku
Sa dua na ka na nona vakavakarautaki koya o Mavi me tu vinaka kina na nona bula kei na yagona. Me ikuri ni nona dauqarauna na ka e kania ka me dau vakacegu vakavinaka, e dau vakaukauwa yago vakalevu o Mavi, ka daudanisi ke lailai me lima na auwa ena voleka ni veisiga yadua. Ia e sega walega ni qarauna na nona bula ena vuku ni daudanisi.
“Me vaka niu dua na lewe ni Lotu, au sa kila tiko ni yagoqu sa valetabu ni yaloqu. Me vaka niu dua na kenadau, au sa gadreva me cakacaka vinaka tu na yagoqu, meu na taqomaka kina vakavinaka sara ena kena vinaka duadua au rawata. Ia ni’u sa lewenilotu, au sa kila oti tu meu na cakava na ka o ya.”
Na nona ivakadinadina me baleta na veivakauqeti bula ni Vosa ni Vuku e sa vaqaqacotaki ena veika a sotava ena gauna ni nona danisi. “Ni ko maroroya vakadodonu na yagomu, o na raica sara ga,” e kaya o koya.
E gadrevi mo maroroi iko kevaka o gadreva mo daudanisi, ia e kaya o Mavi, “E dodonu vei keda kece me da maroroya na yagoda, ke sega mada ga ni da daudanisi. Eda na sega kece ni digitaka na yagoda, ia sa dodonu ga me da marautaka ka maroroya na veika sa soli mai vei keda. Era sa isolisoli mai vua Kalou, ka sa soli mai me da vakayago ena dua na inaki.”