iKuri ni Vakasama ena Gauna ni Veiwasei, Epereli 2007

Na veika oqo era ikuri ni vakasama e rawa me ra vakayagataka vata kei na Gauna ni Veiwasei ka tabaki ena Liaona ni Epereli 2007. Me baleta na lesoni, veidusimaki, kei na itavi qaravi ka sala vata kei na vakasama eso oqo, raica na “E Bula ko Koya!” ena draunipepa F4 kei na F5 ena iwasewase nodra na gone ena ivola oqo.

Vola na vosa cala ena papaloaloa. Tukuna vei ira na gone ni gauna era veivutuni kina era vukica na cala me donu. Kerei ira na gone me ra vukei iko mo vukica na vosa cala ki na donu ena nodra vakasamataka na veika e rawa ni ra cakava me ra veivutuni kina. Vakayagataka e tolu na veika e dau raici vakavuli (raica na “Raici Vakavuli,” Veituberi, Ai Lutua ni Bula [1999], 161–62) me soli kina na veigauna eso era na gadreva kina na gone me ra veivutuni. Ni oti na imatai ni veika me raici vakavuli, lagata e dua na sere se serenilotu me baleta na veivutuni, ka vakamacalataka ni veivutuni e ikarua ni ivakavuvuli ni kosipeli. Ni oti na ikarua ni veika e raici vakavuli lagata e dua na sere se serenilotu me baleta na veivutuni. Ni oti na ikatolu ni veika e raici vakavuli, lagata e dua na sere se serenilotu e baleta na veivosoti ka vakamacalataka ni na gadrevi me da vosoti ira era sa veivutuni. Bokoca na vosa cala mai na papaloaloa, ka vola na vosa donu. Cavuqaqataka mai na Noqu iVakatagedegede Vakosipeli, “Au na digitaka na dodonu. Au kila ni rawa niu veivutuni niu cakava e dua na cala.” Wasea na nomu ivakadinadina ni veivutuni kei na Veisorovaki i Jisu Karisito.
Vakamacalataka ni tu vua na noda parofita bula na idola kece ni matabete kei na dodonu ena Lotu nikua. Taura cake e dua na kena itaba na parofita. Vakamacalataka ni liutaka tiko o koya na Lotu ena nona vakatulewa e dua tale. Taroga vei ira na gone se o cei na tamata ko ya (o Jisu Karisito). Taura cake na itaba kei Jisu Karisito, ka biuta ena dela ni kena itaba na parofita, me vakaraitaka ni parofita e cakacaka ena ruku ni Nona vakatulewa. Vakaraitaka vei ira na gone na Liaona ni koniferedi ka se qai taba walega oqo. Vakamacalataka ni ena nona vosa vei keda ena koniferedi raraba na parofita, e vakavuvulitaka tiko kina vei keda na veika e vinakata ko Jisu Karisito me da rogoca ka raica. Digitaka vakamatau e va na iyatuvosa mai na nona itukutuku e se qai tukuna oti toka ga na parofita, ka sureti ira na gone era qase cake me ra wilika. Tuva e va na ka e rawa ni ra cakava na gone me ra muria kina na nona vosa na parofita. Me kena ivakaraitaki, ko na vola beka na “saumi ikatini,”“dau veivosoti,” se “wilika na ivolanikalou.” Sureti ira na gone me ra droinitaka e dua vei ira na vakasama oqo era na vinakata me ra cakacakataka me ra muria vakavinaka cake kina na parofita (raica na “iTavi Qaravi ni Droini,“ Veituberi, Ai Lutua ni Bula, 166–67). Digia e dua na sere se serenilotu me sala vata kei ira yadua na va na ivakavuvuli ka se qai tukuna oti ga na parofita. Sureti ira na gone era droinitaka na iyaloyalo ni ivakavuvuli oqori me ra tucake ena mata ni kalasi ka laveta cake na nodra droini ni ra lagata tiko na Lalai na sere o ya. Wasea na nomu ivakadinadina me baleta na bibi ni matabete.
Lagalaga Sere: “Agilosi ni Rairai Mai” (ena ivola oqo, t. F13). Ni bera ni o vakatavulica na sere oqo, vakatovotovo mo liutaka na kena ikadakada. E veisau na kena mita mai na 3/4 ki na 2/4 ena dua na ivakarau ena veilaini yadua.

Vakabira veiyawaki toka na veimalanivosa oqo —“Moronai,” “Delana ko Kumora,” “Nifaiti,” kei na “iVola i Momani.” Tukuna vei ira na gone ni sere oqori e baleta na va na ka oqo. Kerei ira me ra vukei iko mo biuta na veimalanivosa oqori ena kena ituvatuva ena sere. Lagata vei ira na sere, ka qai taroga se malanivosa cava me liu mai. Baleta ni imatai ni malanivosa na “agilosi ni rairai mai” na vosa dodonu na “Moronai.” Me ra lagata vata kei iko na malanivosa oqori ko ira na gone. Lagata tale vakatolu na sere, ka biuta vakadodonu e dua na malanivosa ena veigauna yadua. Vakamacalataka ni a taura ko Josefa Simici na peleti koula mai na Delana ko Kumora, ni peleti oqori e tu kina na kedra itukutuku na Nifai, ia na ivola talei ka tabu sai koya na iVola i Momani. Me vaka ni lekaleka ga na sere, lagata taucoko sara ena veigauna kece o taroga kina e dua na taro. Oqo ena vukei ira na gone me ra kila na qaqana kei na kena ikadakada taleitaki. Vakauqeti ira na gone me ra tukuna na italanoa ni iVola i Momani vei ira na nodra matavuvale ena nodra lagata na sere oqo. Wasea na nomu ivakadinadina ni dina na italanoa e lagati tiko ena sere.