Mai Rogoca na Domona E Dua na Parofita
Sa Yaco ena Mataka na Marau
Ena vica na yabaki sa oti, era a tabaka na veiniusipepa e Salt Lake City e dua na itukutuku me kilai me baleta e dua na itokani voleka sara ka a vakaleqai ni se tu vinaka sara tu ga na nona bula. Au a lako talega ki na vale ni wawa vata kei ira na tamata eso me keimami laki vakaraitaka na neimami rarawa [veitokoni] ki na turaga watina kei iratou na gone sa yali o tinadratou. E a mani raici au sara o Kelly, o koya e gone duadua, ka mai taura na ligaqu ni kilai au. “Lako mai,” e kaya mai, ka kauti au sara ki na kisi ni mate ka sa davo no kina o tinana daulomani. “Au sega ni tagi,” a kaya, “mo kua talega. E vuqa na gauna e dau tukuna vei au o tinaqu na mate kei na bula vata kei na Tamada Vakalomalagi. Au sa nei tinaqu kei tamaqu. Keitou na laki bula vata kece tale.” E votu mai vei au na vosa nei Daunisame: “Mai na gusudra na gonelalai … ko ni sa vakataudeitaka na vakavinavinaka” (Same 8:2).
Ena tonawanawa ni mataqu, au rai yani vei noqu itokani totoka oqo ni matadredredre tu ena vakabauta. E se qumia tikoga na ligaqu o koya ka na sega ni dua na nona siga ni inuinui kara. E vaqaqacotaki tu ena nona ivakadinadina tudei, ni sa kila tu ni bula ena laki tomani ni oti na mate, sa rawa kina vua, kei tamana, oi rau na ganena, tacina kei ira kece sara era kila talega na dina vakalou oqo me ra kaya yani ki vuravura: “Sa ia na tagi ena bogi, ia sa yaco ena mataka na marau” (Same 30:5).
Mai na vu ni yaloqu taucoko, au kila ni bula tiko na Kalou, ni o Luvena Daulomani sa isevu ni Tucaketale, ni kosipeli i Jisu Karisito sa ikoya na rarama e cila basikata na veimataka ni inuinui kara me ra na mataka ni marau.
Mai na vosa ena koniferedi raraba ni Epereli 1976.
Veika me vakasamataki
-
E sega ni ka ca me da tagicaka e dua na daulomani e sa mate. Na kena dina, ena vukei keda. Ia a sega ni via tagi o Kelly. Baleta na cava?
-
Na cava o nanuma e dau tukuna kina vakalevu vei Kelly o tinana na veika ni bula kei na mate?
-
E a yaco vakacava me isevu ni Tucaketale o Jisu (raica na 1 Korinica 15:23; 2 Nifai 2:8–9)? Veivosakitaka na veika oqo vata kei nomu itubutubu.