iTokani ki na iTokani
Na Veivakauqeti ni Dua na Tina
“Mo kakua ni biuta na vunau i tinamu” (Vakaibalebale 1:8).
E marama taleitaki dina o tinaqu. Au ulumatua vei keitou na lewe walu na tagane, ka ratou lewe vitu tale tikoga na ganequ. Ena matavuvale levu vakaoqo, e levu sara kina na itavi nei tinaqu. Na ka vinaka duadua a qai cakava vei keitou o tinaqu o ya me keitou papitaiso ki na Lotu i Jisu Karisito ni Yalododonu Edaidai. A solia vei keitou na madigi me keitou vulica na veika e baleta na kosipeli. Na madigi oqo a qai veisautaka kina na neitou bula.
Au nanuma lesu na siga keitou a ciqomi rau kina na daukaulotu. Au a se qai yabaki 10 se 11 tiko kina. Erau a qai wasea na daukaulotu na itukutuku ni iMatai ni Raivotu. Ni sa rogoca kece na veika oqo o tinaqu sa papitaiso sara. E vakabauta o koya ni a raica vakaidina o Josefa Simici na Tamada kei na Luvena.
Keitou sa tekivu laki lotu. Taumada au a sega ni via ciqoma na kosipeli, ia erau a vakauqeti au na daukaulotu meu raica mada ga na veika e tukuni tiko kina. Niu sa cakava vakakina, au sa taleitaka dina. Kau sa vakavinavinaka kina vei tinaqu. A ciqoma o koya e dua na kena ivakadinadina ena imatai ga ni nodrau veisiko mai na daukaulotu. Vakatekivu mai na gauna a papitaiso kina, e se bera mada vakadua ni calata na soqoni ni Lotu.
Sa dua na ka na nona dautokoni keitou o tinaqu. E dau savata na neitou sote vulavula ena veisiga Vakarauwai me keitou na dara ena Sigatabu. Keitou daupolisitaka na neitou ivava kei na nodratou ivava na taci keitou kei na ganei keitou. Keitou vakaitikotiko ena dua na itikotiko raraba dravudravua mai Guatemala, ka ra dauvakadredrevaki keitou o ira na lewe ni itikotiko e kea ena Sigatabu ni keitou dau vakasote vulavula ka vakaneketai ki Lotu.
E dau vakauqeti keitou o tinaqu me keitou cakava ga na ka dodonu. Ena vuku ga ni nona veivakauqeti, keitou a gugumatua sara ga ena Lotu. Au nanuma sara ena dua na gauna, e a peresitedi ni Matawilivola ni Sigatabu tiko kina o tamaqu, e a peresitedi ni Lalai o ganequ ka qase vei au, e a peresitedi ni iSoqosoqo ni Veivukei o tinaqu, ka lewe va vei iratou na taciqu eratou dau veivotayaka, vakarautaka, ka masulaka na sakaramede.
Ena vuku ga ni neitou gagadre vakailavo, sa namaka tiko o tamaqu meu na laki cakacaka ka kauta mai na ilavo me bula kina na matavuvale. Au a vinakata meu na kaulotu, ia niu sa yacova na yabaki 19, e a kerei au meu wawa tale me dua na yabaki meu na qai laki kaulotu ni sa gadrevi meu na cakacaka tiko mada ga meu qarava kina na noqu matavuvale. Niu sa yabaki 20, e kerei au meu wawa tale me dua na yabaki meu qai laki kaulotu.
Niu sa voleka ni yabaki 21, a vinakata me kerea o koya meu wawa tale me dua na yabaki. Ia a qai tukuna vua o tinaqu, “Yalovinaka me sa laki kaulotu o koya, tou na vakalougatataki kina.” A qai yaco dina na ka oqo. Niu bera ni laki kaulotu, oi au ga kei na dua na taciqu gone keirau a cakacaka tiko me baleta na matavuvale. Ena gauna au sa laki kaulotu kina, eratou sa tekivu cakacaka kina e rua tale na taciqu kei na rua na qanequ erau qase cake vei au, sa qai mai vinaka cake kina na neitou bula vakailavo.
Na veivakalougatataki kei na veikacivi yadua au a ciqoma ena loma ni Lotu sa vakavuna meu rokova vakalevu cake kina na tinaqu. Ena veitiki yadua ni noqu bula, au dau nanuma kina na nona veivakauqeti kei na ivakaraitaki cecere. E sega sara ni vuli vinaka o tinaqu, ia na nona kila na veika dina ni kosipeli kei na vuku kei na yalomatuataki ni bula e cecere sara.
Au a marau niu se gone baleta ni dau tiko voli vata kei au o tinaqu e vale. E marama dauveikauwaitaki, ka dau saga me bula marau tiko. E dau vakayagataka e vuqa sara na gauna me tukuna vei keitou na kena italanoa ni se gone kei na italanoa kei buqu kei ira na noqu nei kei na momo kei na nona veimaliwai vata kei ira.
Au vakabauta na vunau me da dau rokovi ira na noda itubutubu. Na veika kece au vakayacora, edaidai mada ga, sa baleta ga na nona veivakauqeti o tinaqu.