E Bula Tale Tikoga na Luvequ Tagane
E a vakavulica vei au e dua na marama lewe ni noqu tabanalevu e dua na ivakavuvuli cecere sara me baleta na veivakacegui kamikamica e dau yaco mai ena vakabauti Jisu Karisito vakaidina kei na Nona Veisorovaki.
Na veivakalougatataki ni marama oqo e a yalataki vua na marau ni marama tina. Ia ena veiyabaki e tarava erau sa masulaka ka waraka vakaveiwatini me rau vakaluveni. E a qai yaco dina mai, ka sa rogoci na nodrau masu. Ena loma ni ciwa na vula erau sa maqusa voli ka marautaka tiko na nodrau vakavakarau. Erau a boroya e dua na rumu digitaki; voli na kena iyaya, isulu, kei na iyaya tale eso ni gone; ka rau masumasu. Era a qai kaya na vuniwai ni na sega ni rawa me na dua tale na luvena ni oti oqo, ka sa mai vakatabakidua kina na nona inakinaki ki na gone oqo.
Sa yaco mai na siga ni nona vakasucu na marama oqo ka rogoca na tagi ni luvena.
“E tagane totoka,” a kaya mai o nasi.
E a bobo na marama oqo ka cabora e dua na masu ni vakavinavinaka. Ni oti ga e va na miniti sa mate na gone oqo.
Ni oti e rua na macawa au a raici koya ena soqoni ni sakaramede. Me vaka ga ni daunisere, e a lako yani ki liu e loma ni valenilotu ka laki dabe e yasa ni oqani. Ena nona veiliutaki keimami a lagata “Au sa Kila ni Bula Tu” (Serenilotu, naba 38). E tucake vakadodonu ka wadrovu cake, e makualiliva na matana, ka veilauti na nona ivakaraitaki. Ena so na gauna e vaka me sega ni cavuta rawa na sere. E tiloqa ka mamakeukeu. Ka yaco me sa sega ni lagasere, ia e yavala tikoga na ligana, ka liutaki keimami ena neimami laga sere tiko.
Ni oti o ya, ka tuturu na wainimatana e baluna, e a wasea vakalekaleka ga na marama oqo na nona ivakadinadina ena veivosa rawarawa oqo: “Au kila ni bula tiko na noda Dauveivueti. Au kila ni sa dodonu sara o Koya ka sa lomani keda. Me baleta ga ni bula tiko o Koya, e bula tale tikoga na luvequ tagane.”
Au raica ena nona vakabauta e dua na veivakadeitaki ni sa bula dina tiko na noda Dauveivueti, ka sa rawa kina ena vuku ni Nona Veisorovaki me da kakua tale ni mate ka laki bula tawamudu. Sa mai kau lesu na luvena tagane na marama oqo, ia sa kila deivaki tu ni rau na semati vata tale ena dua na siga.