Vulici ni Nona Lawa na Kalou
“Dou kauta kece mai na sigana ki na lololo, me so kina na kakana ena noqu vale” (Malakai 3:10).
E dua na italanoa dina
Oqo sa ikatini ni usana,” a kaci yani o tamai Tevita. “Draiva yani ki na vanua cecere o ya.” E a rai yani o cauravou David O. McKay ki na vanua e dusia tiko o tamana. Na imatai ni ciwa nai usana eratou sa kauta rawa mai era sega sara ni co vinaka. Sa kila tiko o David ni vinakata tiko o tamana me na kau na ikatini ni usana ni co vinaka oqo ki na ilololo ni bisopi me nodratou ikatini. Ia e sega ni kila vinaka tiko o koya na vuna eratou sega ni solia ga vua na Turaga na co madu eratou sa kumuna tiko.
A kaya lesu o David vei tamana, “Me kua, me datou kauta ga na co era sa kau tiko mai.”
A sega ni vosa mai o tamai David. E a vakarau vosa tale yani o David ni sa raici tamana ni sa lako yani vakadodonu vua. Vakasauri ga sa mudu na cagi malua o ya, ka sa katakata warumisa mai na siga. Sa qusia o David na buno ni yadrena kei na dakuna. Sa kila sara ga o koya ni nona sa lako mai oqo o tamana e sega ni na mai vakatavitavia na dakuna ni a vosa takoso yani. Sa lako tiko mai oqo me mai vakatakila vei David e dua na ka bibi.
“E sega, David.” E a vunauci koya o tamana, ia na rogo malua ni domona e a vakarorogo matua sara kina o David. “Oqo na ikatini ni iusana, kei na kena e vinaka duadua ga me nona na Kalou.” E rai vagumatua o tamai David ki na matai luvena tagane ko sa rogoca vinaka na veika e tukuna. A qai vuki ka gole yani.
E a tiloqa o David ka vagolea yani na nona iusausa ki na vanua cecere o ya. Ni sa vakavodoka tiko na iusausa co madu ki na qiqi, sa vakasamataka sara na veika e vinakata o tamana me vakatavulica vua. Me vaka ni sa kila tiko o koya na lawa ni ikatini, me vakataka ga na talairawarawa kei na solibula, e gadreva o David me liu mada na nodratou veika ni bula. Ia e kaya na Kalou me kau yani na ulumatua ni manumanu kecega—na kena e vinaka duadua—ka mo ni solia Vua (raica na Vakarua 12:6).
“E dau solia o tamaqu na veika vinaka duadua vua na Kalou, ka qai neitou na kena e tarava,” e kaya o David. “Sai koya beka oqo na noda vakaliuca tiko na Turaga ena noda vakasama kei na noda bula.”
E a vuqa talega na gauna a raici tinana kina o David ni sauma vakailavo na nona ikatini. E a sega ni volia na veika e gadreva ka qai raica ke vo e dua na ka me ikatini, ia e a laki sauma taumada na nona ikatini kivei bisopi ka qai mai vakayagataka na kena ivovo. Na isevu kei na kena e vinaka duadua e soli me nona na Kalou.
E a vagolea yani o David na qiqi co madu ki na gaunisala kuvu ki na ilololo ni bisopi. E a laki vakelea ki na mata ni vale ka vakasobura na co madu. Oqo na solibula nei tamana me solia ga na veika vinaka ki vua na Turaga, ia sa kila vakavinaka tu o David ni oqo ga na ka e vinakata o tamana. Sa vinakata o koya me solia ga na veika vinaka vua na Turaga, me vaka ga sa solia na Tamada Vakalomalagi na Luvena sa Uasivi Sara ki vuravura.
Ni sa kauta lesu mai o David na nona qiqi ki vale, sa yaco mai vua e dua na yalo vakacegu. Sa vakavinavinaka vakalevu o koya ni a vakatavulica vua o tamana na lawa ni ikatini. Oqo e dua na lesoni ena dau nanuma tiko ena nona bula taucoko.
Lavetaki mai na Nodra iVakavuvuli na Peresitedi ni Lotu: David O. McKay (2003), xv. Peresitedi McKay (1873–1970) a lesi me ikaciwa ni Peresitedi ni Lotu, mai na 1951 ki na 1970.
“Na saumi ikatini sa ivakadinadina ni da sa ciqoma na lawa ni solibula. Ena vakarautaki keda talega ki na lawa ni solibula kei na lawa cecere tale eso ni matanitu vakasilesitieli.”
Elder Dallin H. Oaks ena Kuoramu ni iApositolo ni Le Tinikarua, “Tithing,” Ensign, Me 1994, 34.