E Dua na Qiri Sega ni Kilai
Ena Vakarauwai na ika 7 ni Feperueri, 2004, keirau a laki vakaicili kei na marama watiqu ena dua na otela mai Gijón ena vualiku kei Sipeni, kau sa peresitedi tiko kina ni Tabana ni Kaulotu e Sipeni. Ni keirau sa vakayakavi oti, au raica sara na noqu talevoni lailai ke tiko kina e dua na itukutuku au se bera ni taura. E a laurai kina ni a qiri mai e dua na daukaulotu. Au a raica na yacai koya a qiri mai ka tabaka na bulukau meu qiriti koya lesu.
E a sauma mai o daukaulotu na qiri, ni keirau sa veikidavaki, au a taroga se cava e vinakata. E a kurabui sara o koya ka kaya ni a sega ni qiri mai. Au a tukuna tale vua ni a volai tu na yacana ni a qiri mai, ia e a kaya deivaki tikoga ni a sega dina ni qiri mai.
Sa mai tini na neirau veivosaki, ia ni oti toka ga e lima na miniti e a qiriti au lesu mai ka kaya, “Peresitedi, e dua tiko na noqu leqa kau sa nuiqawaqawa tiko kina, kau sa sega ni cakava rawa kina e dua na ka. Au a masuta na Turaga ka kerea Vua me vukei au meu kila na ka meu cakava. Au a sega ni via qiriti kemuni, ia ena noqu sa masu tiko kina vua na Turaga ena ka meu cakava, o ni a qiri mai. Au a kurabui sara baleta niu a sega ni qiriti kemuni. Au sa qai kila ni sa tukuna tiko vei au na Turaga meu na vosa ga vei kemuni.”
E a balavu toka na neirau veivosaki, ka sa wali rawa kina na nona leqa.
Ni oti e rua na siga keirau a qai sota, kau a tarogi koya na cauravou daukaulotu oqo ke a qiriti au dina yani. “E sega, Peresitedi,” a sauma mai, “o ya na cakacaka ni Turaga.” E a vakadinadinataka ni nona talevoni a sega ni volai tu kina ni a qiriti au, sega mada ga ni vakacalakataka.
E kaya na Turaga, “Ia mo yalomalumalumu; raica ena tubera na ligamu na Turaga na nomu Kalou, ka vakayacora na nomu kerekere” (V&V 112:10). E kaya o Alama ni vakavulici Ilamani na luvena, “mo vakarogotaka vua na Turaga na nomu sala kecega, ia ena vakadodonutaka na nomu ilakolako ko Koya” (Alama 37:37). Me da vakayacora sara na veika e gadreva na Tamada Vakalomalagi me rawa kina ni da vakila na vakacegu eda na daugadreva voli. Na qiri e sega ni kilai o ya sa sega tale ni vakabekataki ni sai koya na isau ni masu nei cauravou daukaulotu o ya.