Taro kei na Kena iSau

“E dua vei ira na noqu itokani ena Lotu e sega ni bulataka tiko eso na ivakarau ni kosipeli. Au sa lomaleqataki koya tiko. Meu veivuke vakacava?”

• Kakua ni toroya sobu na ivakatagedegede ni nomu bula ivakarau me baleta ga na nomu via vukea e dua na itokani.

• Masu me na vukei iko na Yalo Tabu mo kila na ka mo cakava, ka vakayacora sara!

• Vakabauta tiko na Tamada Vakalomalagi ena cakacaka e lomamu mo veisautaka kina na bula nei nomu itokani.

• Sureti nomu itokani ki na itavi qaravi e veivakabulabulataki me na vakila kina o koya na veivakauqeti ni Yalotabu ka me gadreva me vakayacora na vakatulewa dodonu

• Mo ivakaraitaki tiko ni muria na vunau ena kauta mai na marau.

Liaona

Sa rawa mo veivuke ena nomu veitokani kei koya. E saga tiko beka o nomu itokani oqo me kilai koya mada kei na vanua me sema kina. E gadreva tu o koya me vosa vua e dua, me salavata kei na dua ki na soqoni ni veivakabulabulataki, ka raica e dua e ivakaraitaki vinaka. Mo kakua ni raica ni ko sa yalododonu se vakalelewa, vakasaqara e dua na sala mo veivosaki kina kei koya me baleta na nomu a kakavaka mo gugumatua ka kune kalougata kina.

Tudei tiko ena nomu ivakatagedegede ni bula ivakarau. Ena veika kece o cakava, kakua ni toroya sobu na ivakatagedegede ni nomu bula ivakarau me baleta ga na nomu via vukea e dua na itokani. Lako tani mai na vanua ena sega ni dau tiko kina vei iko na Yalo Tabu. E dina ga ni ko na veitokani ka kauwaitaki koya tiko, ena rawa me na vakatulewa cala tikoga o koya. Sa rawa mo veimaliwai vata kei na so tale na tamata ka kakua ga ni ko rawai.

Mo na dau masu. Masulaki nomu itokani, ia mo masulaki iko talega. Masulaka na gauna donu mo vukei koya kina, ka masulaka mo na kila na veigauna donu oqo ni ra sa yaco mai ka mo dusimaki kina. Masulaka na veika o na cakava mo na veivakauqeti ena loloma Vakarisito vei nomu itokani, ka sega walega me na veisau kina. Ka mo vakayacora sara!

Kakua ni yalolailai. Ena rairai sega beka ni veisau sara vakadua o nomu itokani ena dua ga na gauna. Ena taura na gauna, kei na yalodina. E dina oqo, ko na sega ni kila na cakamana sa cakava tiko na nomu ivosavosa kei na nomu ivakaraitaki, ia kevaka o na laki kunei koya mai, ko sa cakava e dua na veisau. Na parofita o Jekope ena iVola i Momani e nanuma beka ni o luvena tagane o Inosi e a vakawalena tu ga na nona ivakavuvuli, ia ena dua na siga a qai voqa lesu vei Inosi “na ivakavuvuli ka a daurogoca vei [tamana],” ka a veivutuni (raica na Inosi 1:3–5). Ena cakamana na nomu vosa kei na nomu ivakaraitaki, e dina ga ni na sega ni yaco walega oqo.

Okati nomu itokani. Vakasamataka mada na vosa vakatautauvata ni iVakabula baleti koya na ivakatawa ni sipi ka a biuti ira tu na qele ni sipi e 99 me laki kunei koya mai e sa yali tu. E a sega ni laki sikovi koya walega na sipi sa yali o ya ka qai lesu duadua tale ki na qele ni sipi. E a kauti koya lesu mai na sipi e a yali. (Raica na Luke 15:4–7.) Sureti nomu itokani oqo ki na veisoqoni ni veivakabulabulataki era tiko kina na tamata e cecere na nodra ivakarau ni bula. Na veika vakaoqo ena vukea me na raica rawa o koya na veivakalougatataki ni bula dodonu ka na dau taleitaki ira e cecere na nodra ivakarau ni bula. Sa nuitaki, ni na raica rawa o koya na marau e kauta mai na soqo ni veivakabulabulataki e vinaka cake sara ki na marau vakaiyalayala e kauta mai na talaidredre.

Ni ko saga tiko mo vukei nomu itokani, mo nuitaka tiko na Turaga ni na vukei iko ni vinakata o Koya me digidigi donu talega o nomu itokani. Ena gauna sa veilakoyaki kina o Nifai me vukei ira na nona tamata, a qai kaya na Turaga vua, “Au na qisi iko mo kaukauwa ena vosa kei na nomu itavi” (Ilamani 10:5; vakamatatataki)—a vakayacora dina o Koya. Ena cakacaka na Tamada Vakalomalagi ki na nomu bula kevaka o na solia Vua na nomu gauna kei na nomu igu.

Dauwiliwili

E dua na noqu itokani a kaukauwa sara tu na nona lewena tiko na Lotu ena dua na gauna balavu. E dau lako duadua ga mai o koya baleta ni ratou sa sega tale ni via lako mai na nona matavuvale. Au taleitaka sara na nona gugumatua tiko kei na nona yaloqaqa. Ia ena dua na siga au rogoca ni sa sega tale ni lako mai ki lotu. Sa vakauqeti au sara vakaukauwa na Yalotabu meu na laki vosa vua. Au a tukuna vua niu taleitaka sara na nona lako tiko mada ga mai lotu o koya, kau a tukuna vua me kakua ni yalolailai. Ena Sigatabu e tarava a tiko ena soqoni ni sakaramede o koya ka sa lako tikoga mai ki lotu. Ena noda vakabauta ka bulataka tiko na kosipeli, sa rawa me da ivakaraitaki vinaka vei ira na noda itokani ka matanataka na noda lomana ka tokoni ira ena nodra gagadre.

Marina V., 18, Suwiteni

Mo itokani tikoga. Ena dau raici iko cake tiko o nomu itokani ka vakasarava tiko na nomu itovo. Ena vinakata tiko beka na ka e tiko vei iko; ia e sega ni kila me na rawata vakacava. E sega ni gadrevi mo vakadonuya na veika kece e tukuna se cakava o koya; me kila tikoga o koya ni ko kauwaitaki koya tiko. Ena dredre ena so na gauna, ia ena vakavotukana ga mai. Kerea na Turaga me vukei iko, ka na yaco vakakina.

Stephanie C., 16, Amerika

Au vakabauta ni vinaka cake mo na vosa ga vua. Vosa ga vakadodonu ia ena loloma. Ena gadrevi mo na yaloqaqa kina, kau nanuma ni vinaka cake mo masulaka mada ni bera ni ko laki vosa vua baleta mo na vukei kina. Eso talega na noqu itokani era vaka tu oqo, ia ni baleta ga niu gadreva me keimami lako vata ki na matanitu vakasilesitieli au sa saga tiko vakaukauwa meu muataki ira ki na salatu dodonu. E rawa mo na vakavinakataka talega na nomu bula me rawa kina ni laki cakacaka mana ki vua e dua tale. Sa ka bibi sara mo gumatuataka tikoga e veisiga mo tamata vinaka cake.

Eimi H., 17, Japani

Mo ivakaraitaki vinaka tiko vei nomu itokani oqo. Sureti koya ki na dua na itavi qaravi ni itabagone. Ena mana sara ke o lako vata kei koya. Wasea vua na nomu ivakadinadina me baleta na nomu kalougata ni ko vakamuria na ivakavuvuli ni kosipeli.

Jared Q., 16, Filipaini

E dua na noqu itokani e a sega ni muria eso na ivakavuvuli ni Lotu, kau sa mai veivutuni tu oqo niu a sega ni vosa vakadodonu vua. Tukuna vua na nomu itokani na lomamu, ka masulaki koya. Mo nona itokani tikoga ka mo qarauna ga mo kakua ni coko talega ena veika e vakayacora tiko o koya. Kevaka e cala bibi tukutuku vei nomu bisopi.

Deborah S., 14, Amerika

Kivei ira na noqu itokani au na vakayacora ga na itavi qaravi e veivakamarautaki ka veivakabulabulataki ka sega ni lakotani mai na ivakavuvuli ni kosipeli. Ena sala oqo ena raica rawa kina o koya e vuqa na sala ni bula marau ka sega ni gadrevi mo cakava na veika tawadodonu. Au na tokoni koya tikoga ena gauna ni nona cala ia au na vakasalataki koya ka vakaukauwataki koya ena noqu ivakaraitaki vinaka. E ka vinaka mo na vosa vua ka tukuna vua ni ko kauwaitaki koya tiko ka vakaraitaka ni nona malumalumu ena rawa me na laki qaqa kina (raica na Ica 12:27). Me kila o koya ni sai koya sara ga me na vakatulewa kina ia o na tu vakarau mo tokoni koya tiko. E gadrevi mo yaloqaqa tiko ka me kakua ni vakayavalati iko na nona malumalumu.

Jorge B., 17, Ecuador

Na ivakaraitaki ga e veivakauqeti sara vakalevu ena mataqali leqa vakaoqo. Me da na masulaki ira tikoga na noda itokani ena veisiga ka vukei ira ena sala e rawa. Sa rawa me da masu ka lolovaka vua na Tamada Vakalomalagi me solia vei keda na vosa matau me da cavuta me ra kila vakavinaka kina ni kena bulataki na kosipeli ena solia na marau.

Virginia C., 17, Uruguay

Na inaki ni sau ni taro vakaoqo me veivuke ka me veisautaka na rai, e sega ni okati me ivakavuvuli ni Lotu.

E vuqa vei ira na noda itabagone era sa laki dreti tu ena dua na sala butobuto ka ra temaki me ra vakayacora na ivalavala ca ni vuravura. Era sa gadreva tu e lomadra me ra vaqaqacotaki mai vei ira era sa tudei tu ena dina. Mai na bula dodonu vakaoqo vata kei na kena veivuke kei na yalo e veikauwaitaki, sa rawa mo veivueti mai ka veivakabulai. Sa na qai levu kina na nomu marau. Ena qai tawamudu kina na veivakalougatataki ko sa vakatikora.”

Peresitedi Thomas S. Monson, iMatai ni Daunivakasala ena Mataveiliutaki Taumada, “An Example of the Believers,” Ensign, Nov. 1992, 98.