Vakaraitaki ena Vidio: E Dua na Kequ Yaga

Sa ikoya oqo e dua na ilavelave ni vidio ka vakaraitaki ena soqoni raraba ni Goneyalewa ka vakayacori ena ika 27 ni Maji, 2010.

Peresitedi Thomas S. Monson: “Vakadua tale, kemuni na ganequ gone lomani, e dina ga ni dau tu ga na bolebole e vuravura, e vuqa vei ira o ni sotava tiko era sa baleta vakatabakidua ga na gauna oqo.”¹

Elaine S. Dalton, peresitedi raraba ni Goneyalewa:“Me rawa ni da bula dodonu ka dau bula dodonu tikoga, mo dinata na kemu ivakatakilakila vakalou ka tauyavutaka na ivalavala ni vakanananu kei na itovo ka yavutaki ena ivakatagedegede cecere ni bula savasava.”²

Peresitedi Henry B. Eyring, iMatai ni Daunivakasala ena Mataveiliutaki Taumada: “Au masuta mai vu ni yaloqu ni na vakalevutaki cake na nomuni vakabauta ni o ni luvena yalewa na Kalou.”³

Mary N. Cook, imatai ni daunivakasala ena mataveiliutaki raraba ni Goneyalewa: “Oi kemuni, na noqu goneyalewa lomani, o ni sa vakayacora oti e vuqa sara na digidigi vinaka. Ia sa dodonu mo ni tauyavutaka na ivakarau ni ivalavala dodonu ka na vakadeitaki kemuni ena sala oqo ena nomuni bula taucoko.”⁴

Peresitedi Dieter F. Uchtdorf, iKarua ni Daunivakasala ena Mataveiliutaki Taumada: “Kemuni na marama, ni vakabauta ka vakararavi ki na Yalotabu. Ni o ni cakacakataka na veigauna donu vinaka e yaco mai ena nomuni bula e veisiga e dua na ka rairai vinaka ka veivuke, o ni sa vakatorocaketaka tiko, sega walega ni vuravura e vakavolivoliti kemuni ia na vuravura talega ka tu e lomamuni.”⁵

Ann M. Dibb, ikarua ni daunivakasala ena mataveiliutaki raraba ni Goneyalewa: “Na veika lalai ka rawarawa o ni digitaka edaidai ena vakalevutaki me veivakalougatataki cecere ka lagilagi ni mataka.”⁶

Elaine S. Dalton, peresitedi raraba ni Goneyalewa: “E rawa beka vua e dua na goneyalewa bula dodonu me veisautaka na vuravura? Na kena isau e dua na ‘io!’… rogo levu. Sai koya na veika eda dau vakayacora e veisiga ena vaqaqacotaki iko mo dua na iliuliu ka ivakaraitaki—na masumasu e veisiga, na vuli ivolanikalou e veisiga, na talairawarawa e veisiga, na dau qaravi ira na tani e veisiga. Ni o ni vakayacora na veika oqo, o ni na tubu volekata kina na iVakabula ka yaco mo ni vakataki Koya vakalevu cake.”⁷

Peresitedi Thomas S. Monson: “Kemuni na noqu itokani gone, ni yaloqaqa… . Ko ni kila na veika e dodonu kei na ka cala, ka na sega ni dua na ka lasutaki, se vakacava sara na kena totoka, me na veisautaka na [dina] oqori. Kevaka era na cikevi iko na nomu itokani mo cakava e dua na ka o kila ni cala, mo tutaka sara ga o iko na dodonu, kevaka sara mada ga o na tu duadua.”⁸