Sa mai Cava na iMatai ni Tini na Yabaki ni Kena Vakayagataki Tiko mai na Vale ni Koniferedi
A dolava na ikarua ni tini na yabaki ni kena vakayagataki na Vale ni Koniferedi ena koniferedi ni Epereli. Ena loma ni imatai ni 10 na yabaki, e vuqa vakamilioni era a sotava kina na veika e duatani me vakilai mai na dua na mataqali vale vakaoqo, e gauna ni sivia na 100 na soqoni ni koniferedi raraba kei na 4,500 na veisoqoni tale eso, ka vakakina na kedra kakaburaki.
A vakayacori na imatai ni soqoni ni koniferedi raraba ena Vale ni Koniferedi ena 1 ni Epereli, 2000. E kaya kina eke o Peresitedi Gordon B. Hinckley (1910– 2008): “Ena vakadinadinataka [Na Vale ni Koniferedi] ni na dua tiko na ikuri levu ki na siti oqo. Ena sega walega ni dau vakayacori kina na noda koniferedi raraba, kei na so tale na soqoni vakalotu, ia ena dua talega na vale ni vakaraitaki ni itovo vakavanua mai vei ira e lewe vuqa na kenadau ni ivakaraitaki icakacaka ni liga. Eda nuitaka ni ra na gole mai eke o ira era sega ni lewenilotu, vakila na totoka ni vanua oqo, ka vakavinavinakataka” (“To All the World in Testimony,” Liahona, July 2000, 4; Ensign, May 2000, 4).
Ni oti e vula ono, ena ika 8 ni Okotova, a vakatabuya kina o Peresitedi Hinckley na vale levu oqo.
Me yacova mai oqo, sa voleka ni ra lewe vitu na milioni na vulagi era sa lako mai ki na Vale ni Koniferedi ka ra tiko ena 4,577 na soqoni. E sivia na 4.8 na milioni na vulagi era sa sarava oti na vale, ka sa ciqomi ira oti e sivia na lewe 5,500 na tamata rogo. Na veisoqo era vakayacori ena kena vale ni sarasara ka veitaravi kei na Vale ni Sarasara ni Koniferedi e oka kina na koniferedi raraba, 10 na soqoni raraba ni Goneyalewa, 10 na soqoni raraba ni Soqosoqo ni Veivukei, tolu na soqoni ni ivakananumi (oka kina na soqoni ni veibulu nei Peresitedi Hinckley), kei na 125 na vakatasuasua vakaivakatagi, sega ni okati kina na nodra iVunau kei na iVakatagi ni Matasere na Tabernacle, ka sa vakayacori oti vaka 186 ena Vale ni Koniferedi.
Sa tekivu me yaco na vosa nei Peresitedi Hinckley ena iwiliwili oqori.
Sa sotava oti o Brent Roberts, na dairekita ni valenivolavola liu ni iyauqaqa e vuqa na tamata ena vale oqo ka ra vakavinavinakataka na yalo era vakila e kea. “Era a curuma yani ena tonawanawa ni wai ni matadra kei na Yalotabu e yalodra,” e a kaya. “E sega walega ni vale, ia—sai Koya na Turaga, Nona cakacaka, kei na Yalona.”
A vakaraitaka o Peresitedi Hinckley na vale oqo ena mataka ni Siganimate ena gauna ni koniferedi raraba vakayabaki ni Epereli 1996.
Era a veivuke ki na rawati ni kena itutu duatani na vale oqo, na raici raraba ni veibolebole era a sotavi ena tara tiko ni Vale ni Koniferedi oqo. Me a tara ena dua na baba siro ena kedrau maliwa na Salalevu e Salt Lake City kei na Gaunisala na West Temple, na valenisarasara idabedabe 21,000 oqo. Eratou oka vata ena cakacaka e tolu na kabani lelevu ni taravale. A sega na duru ivakadei ni valenisarasara, oqori me vakadeitaka na kena na sega ni vakalatilatitaki ka e raici, ka dodonu gona kina me ra vakayagataka na dautaravale, na isema kaukamea babalavu 290-na fute- (88 mita) me rawa ni ra taura na bibi mai na maliwa ni 250 ki na 525 na paudi dua na idi vakarivirivi (17–37 na kilokaramu dua na senitimita vakarivirivi). Oqori me na taura rawa tiko na navunavu me baleta na kena veiloga ni senikau ena kena delavuvu. Era dau tu e rauta ni 1,000 na tamata cakacaka ena vanua oqo ena veisiga yadua ni kena vakayacori tiko.
Ena gauna e tara tiko kina, a bula mai na dua na covulaca duatani vakadua e Salt Lake City ena 1999, dina ga ni a mai cavuka kina e dua na kaukamea ni lave iyaya mai na kena misini vakaiyanaqa, ia a tomani tikoga na cakacaka.
A vakacavari vinaka ena kena gauna na vale, ka ra marautaka na kena iyaya kei na iyaubula vovou ni gauna oqo o ira na vulagi era gade yani kina. Me baleta na kena retioyaloyalo, e vakarautaka tu na Vale ni Koniferedi e dua na ka vakalivaliva ka kaukauwa sara na toboki ni kena sikinala. Na imatai ni kakaburaki ka kaukauwa sara na toboki ni kena sikinala me vakayacori e Utah a caka ena Vale ni Koniferedi ena gauna ni marautaki ni siganisucu ni yabaki 90 nei Peresitedi Hinckley, ena June ni 2000.
Era a bulia na ivakarau ni rorogo na idinia ena valenisarasara me vakarautaka na rorogo vinaka duadua—se ra vakarogoca tiko e dua e vosa na vulagi se ra vakarogo sere tiko—ena cakacakataki sara vakamatau na ka e buli tu kina na lalaga kei na doka ni vale, na levu ni tamata era na curu rawa kina, ka vakakina na kena ibe kei na itatara dakoba.
E kaya o Peresitedi Hinckley ni vakaraitaka tale tikoga na vale e dua na irairai e cecere. E raici rawa na cecere oqo ena gauna era tayabetaka yani kina na vulagi na veibuturara, ena vanua ka rawa ni laurai kina e dua na kena ivakatakarakara na iVakabula ka vakakina na kedra itaba mudu na Peresitedi ni Lotu; na taubale ena loga ni veisenikau ena kena delavuvu, ena kedra maliwa na veivunikau, senikau, veikaukau, kei na waisavu; na raici cake tu ni ciwa na cina ni lomalagi ena delani vale, ka rawa me ubi ni caka na vakatasuasua; ka marautaka na droini ka ra tu e loma ni vale taucoko, e levu sara vei ira ka ra sa raica oti na lewe ni Lotu ka voleka ni o ira kece sara era kena ka dina.
E vakaraitaki tu ena vale e vuqa sara na ka vakasakiti. E robota e 10 na eka (4 na eketea), se dua na siti. E tu ena vale oqo na wa vakalivaliva ka rawa me wavokita vakarua na vuravura. Sivia na 5,900 na qaloni (22,330 na lita) na wai era cowiri wavoki tu ena kena veimataniwai tovure kei na paipo ni wai tale eso ena veiminiti.
Ia, na ka levu duadua me baleta na vale oqo e sega ni maile ni wanilivaliva se na levu ni bibi e rawa ni taura na delana, se iwiliwili cava tale e tiko.
“E sega ni dua na ka mai na vale ni maroroi iyau makawa, e dina ga ni vakasakiti sara na kena tuvai,” a kaya o Peresitedi Hinckley. “E vanua me vakayagataki ena vukui Koya sa Kaukauwa Sara ka vakakina na rawati ni Nona inaki tawamudu” (“This Great Millennial Year,” Liahona, Jan. 2001, 80; Ensign, Nov. 2000, 67).