Elder Kevin R. Duncan
Ena Vitusagavulu
Ni a se gone, e a dau guta sara tu mai o Elder Kevin Read Duncan me veiqaravi vakadaukaulotu. “Au a sega sara vakadua ni vakataratutu kina. Au a dau kila tu ga mai niu na vinakata meu kaulotu,” e a kaya.
Ni se bera ni yabaki 19, a sotava kina o Elder Duncan e dua vei ira na Vakaitutu Raraba ka veiqaravi tiko ena Tabana ni Kaulotu ka bolei koya me cavuqaqataka na veituberi ni kaulotu. E a vakayacora rawa na veibolei oqori, ka yaco e muri me kacivi ki na tabana ni kaulotu na Chile Santiago South. Na nona gauna vakadaukaulotu a vakadeitaka tale na nona lomana na veiqaravi vua na Turaga. “Au a kila niu a via dua na daukaulotu ena veisiga ni noqu bula taucoko,” a kaya o Elder Duncan.
A sucu o Elder Duncan, ena Okotova ni 1960, ka luvedrau tagane o David Henry kei LaRene Eliza Cook. E a tubu cake mai ena dua na itikotiko vakaiteitei ni matavuvale e West Point, Utah. A sega walega ni vakavulici koya ena cakacaka na nona bula tu ena iteitei ena nona gauna ni gonetagane, ia a vakavulici koya me taleitaka talega na cakacaka.
Na ivakavuvuli ni cakacaka o ya e a vukei koya me rawata kina mai na Brigham Young Univesiti na nona koroi ni vakadaunivika, e dua na koroi ni vuku vakadaunivika ni vakaicavacava, (master’s degree in accounting taxation), kei na na dua na koroi cecere ni vuku vakadaunilawa (juris doctorate in law). A tekivutaka na nona bula vakacakacaka vaka dua na loya ni ivakacavacava ka qai tauyavutaka e muri e dua na kabani ni kila ka vakalawa.
Rau a vakamau o Elder Duncan kei Nancy Elizabeth Smart, ena ika 27 ni June, 1986, ena valetabu na Salt Lake. Erau itubutubu ni lima na gone, okati kina e dua mai vei Wendy Wallentine, na imatai ni wati Elder Duncan ka sa mate.
Ni mai volekata e 20 na yabaki na nona a veiqaravi mai ena kaulotu e Chile, sa lesu tale o Elder Duncan, ena dua na ilesilesi ni veiqaravi ena Lotu me daunivakasala vakalawa raraba ni Lotu ena Ceva kei Aferika. Ena gauna vata e tiko mai kina e kea, a kacivi me vakatulewa ena Tabana ni Kaulotu na Chile Santiago North, ka vakaitikotiko ena itikotiko vata ga ka tiko kina ena nona a kaulotu tiko kina ni se cauravou.
Ni bera na nona kacivi ki na iMatai ni Kuoramu ni Vitusagavulu, a veiqaravi voli vaka daunivakasala vei bisopi, iliuliu ni kaulotu ni tabanalevu, matabose e cake, ka Vitusagavulu ni iWasewase ena iWasewase na Utah South.