Talanoataki Jisu Vei Au
Na kaukauwa ni nodra dui vakabauti Jisu Karisito ena vakarautaki [ira na luvemu] ki na bolebole ena dau yaco vakaidina ga mai vei ira.
Ni ko lesi mo na vosa ena iotioti ni soqoni ena koniferedi raraba, ko na vakarorogo ki na veimalanivosa yadua, ka vakarogoca se tiki cava ni nomu vosa ena tukuni mai ni bera ni ko vosa. E sega ni lesi na iulutaga, se cokoti vata na itoko. Sa dina, ni sala ni Turaga sa uasivi duadua. Ena taura na nodra sasaga ena masumasu na nodra vosa na tamata yadua ka cokonaka vata e dua na muavata vakayalo e vakasinaiti ena ivakatakila kei na kaukauwa. Na tokaruataki ni itoko, na veitaraicake ni ivakavuvuli, na ivakaro vakaparofita, na yalayala veilaveti—sa dua na cakamana ni muavata vakayalo oqo! Au vakadinadinataka ni da sa mai rogoca ka vakila na nanuma kei na lewa ni Turaga.
E vakatoka o Peresitedi Thomas S. Monson vei ira na itabatamata tubu tiko mai me ra “uasivi duadua ga”1 ka kaya vei ira na noda itabagone: “Ko ni tadu mai ki na vuravura oqo ena dua na gauna lagilagi. Na veimadigi sa tu e matamuni era sega ni vakaiyalayala.”2 Ia a qai veivakaroti talega vakaoqo, “E sa mai donumaki keda oqo e vuravura na veigauna dredre.”3 “Sa vakarawarawataki na veika bibi ka dredre, sa vakanadakui ka voroki na lawa ni Kalou ena veitikotiko raraba.”4 Sa wavoliti keda tu oqo na vakaitamera ni veika me vagolei keda vakatani. “E sasaga sara tiko kina vakaukauwa na vu ni ca meda coko ki na nona lawa ni veilawakitaki.”5
Eda sa tauri ira tu na itabatamata tubu cake tiko mai. Era tadu vata mai kei na nodra ilesilesi bibi kei na vuku vakayalo cecere ki na vuravura oqo. Sa sega kina ni rawa meda vakawalena na noda vakarautaki ira. Sa noda bolebole na itubutubu kei na qasenivuli o ya meda kakua ni tauyavutaka e dua na yavu vakayalo ki yalodra, ia meda irivaka tikoga na yameyame ni nodra yavu vakayalo ni yalodra, ka sa waqari oti tu ena bukawaqa ni nodra vakabauta ena bula taumada.
Ena yakavi nikua au gadreva meu vakamacalataka na nona vakamamasu e dua na gone mai na dua na sere ni Lalai:
Talanoataki Jisu vei au, niu dau taleitaka.
Na veika au kerea vua me tukuna vei au, ke tiko eke o koya.6
Ena noda vuravura nikua, sa gadrevi ki na gone, cauravou kei na goneyalewa yadua me na saumaki ga mai vakataki koya ki na dina. Me ra dui rawata ga na nodra rarama, ka me ra dui “tudei ka dredre me yavalati”7 ka vakabauta na Turaga o Jisu Karisito, galala mai vei ira na itubutubu, iliuliu ni itabagone, kei ira na itokani veitokoni.
Sa rawa me vaka na cagi cevaruru na italanoa kei Jisu ki na qilaiso waqa ni vakabauta ni yalodra na luveda. E kaya o Jisu,“Oi au na sala, kei na vu ni dina, kei na vu ni bula.”8 Na italanoa kei Jisu ni dau tukuni ka tukuni tikoga ena kauta mai na vakabauta na Turaga o Jisu Karisito ka qaqaco cake kina na yavu ni ivakadinadina. E tiko tale beka e dua na isolisoli yaga vakalevu cake me nodra na luveda?
E sa cokonaki tu beka na bula kei na ivakavuvuli i Jisu Karisito ena nodra vakasama kei na yalodra na luveda? Era dau nanuma beka na bula ni iVakabula ni ra vakasamataka voli na veika me ra cakava ena nodra bula? Ena ka bibi sara na veika oqo ena veiyabaki ka tu mai liu.
Era sa vakasamataka beka na luveda na matabose mai na bula taumada,9 na vanua—a kaya kina—o Jisu sa cecere duadua, “Ko i Au oqo, mo ni talai au”?10 Era na raica beka me sa yalodra ga mai me ra veiqaravi ni ra vakamuria na Nona ivakaraitaki?
Era dau nanuma beka na Nona a sucu vakaloloma,11 e a vakadavori na iVakabula kei vuravura ena nodra tikina na manumanu?12 E vukei ira beka na veika a yacoVua me ra kila vakavinaka cake kina na kedra itutu dina na iyau vakavuravura?
Era sa kila tiko beka ni dau vakavulica o Jisu, “Dou kerekere ka na soli vei kemudou”?13 E sa curuma beka na Nona masu ni vakavinavinaka14 kei na Nona kerekere vei Tamana15 na nodra vakasama na luveda ni ra tekiduru ka masulaka na nodra gagadre?
Eda sa tukuna beka vei ira ni sa dau lomani ira na gone o Jisu, ni sa dau mokoti ira, masulaki ira, ka tagi?16 Era sa kila beka na luveda ni sa dau tu vakarau o Jisu ka “dodoka tu yani na ligana me vukei [ira]”?17
Era sa vakaukauwataki beka ena italanoa ni lolo i Jisu18—ni da vakavulica vei ira na lawa ni lolo?
Ena nodra galili, era kila beka na luveda na galili ni iVakabula ni ra sa lako tani mai vua na Nona itokani, ka tarogi iratou na Nona iApositolo, “Dou sa via lako tani talega koi kemudou?”19
Era sa vakila beka na luveda na kaukauwa ni cakamana ni iVakabula? A vakabula o Jisu na tamata vukavuka,20 vakabula mera rai na mataboko.21 A vakani ira na 5 na udolu,22 vakamaravutaka na wasawasa,23 ka vakabulai Lasarusa mai na mate.24 Era sa vakabauta tiko beka na luveda ni “vakabauta ga sa vakayacori kina na cakacaka mana,”25 ka ra sa masulaka beka me yaco na cakacaka mana ki na nodra bula?
Era sa vakayaloqaqataki beka na luveda ena vosa ni iVakabula vua na turaga ni valenilotu: “Kakua ni yalolailai, vakadinata ga”?26
Era sa kila beka na luveda ni sa uasivi sara na Nona bula,27 na Nona cakacaka ni veinanumi, na Nona soli yani ka Vakarubeci vakararawa?28 Eda sa vakadinadinataka beka vei ira ni a yaco dina na Nona Tucaketale,29 na Nona a rairai vei ira na Nifai e Amerika,30 na Nona a rairai vei Parofita Josefa Simici ena Veikau Tabu?31
Era sa nanamaki tiko beka ki na Nona lesu mai ena lagilagi, ka na vakavinakataki kina na veika kecega, ka na tekiduru na duru vakaadua ga ka vakatusa na yame kecega ni ko Jisu na Karisito?32
Era kaya tiko beka na luveda, “Talanoataki Jisu vei au, niu dau taleitaka?”33
Kivei kemuni na itabagone kei na lalai: Mo ni rawata na nomuni ilesilesi bibi ka gugumatua vakalevu sara tiko vakayalo. Mo ni kilai Jisu vakalevu cake; cega na ivolanikalou. E dua na vakasama o ya mo ni wilika tale na ivola i Joni, ka veivosakitaka vata kei ira na nomuni itubutubu, qasenivuli, vakai kemuni talega.
Kivei kemuni na tama kei na tina, kemuni na tubudra kei na budra na gone, kei kemuni e sega na luvemuni ko ni sa dauveisusu dauloloma tiko vei ira na gone kei na itabagone, sa noqu ivakasala mo ni dau tukuni Jisu Karisito tikoga ena veigauna. Sa kaukauwa vakayalo cecere na yacana tabu. “Sa sega tale ni dua na yaca se na sala … me ra bula rawa kina na luve ni tamata, na yaca duadua ga i Karisito.”34
Kivei ira na tina era sa susuga tiko na luvedra ena nodra vuvale ka sega kina o tama, au yalataka vei kemuni ni ko tukuni Jisu Karisito, ko ni na vakila ni na vakalougatataki kemuni na kaukauwa mai lagi.
Ena gauna sa takali kina o watina, a qai susuga vaka-tina duadua o Sisita Stella Oaks na luvedrau lalai e tolu (oka kina o Elder Dallin H. Oaks35). A kaya kina vakaoqo: “A tukuni vei au ni lomani au na Turaga ka sa na tautauvata ga na noqu ilesilesi. Au a vakila e dua na loloma ni ovici au … [kau kila] ni na [tokoni keitou] o koya ena veika dredre [ena rawa ] ni yaco mai.”36
Sa noqu vakamamasu bibi oqo vei ira na tama: Ni yalovinaka mo ni dau vosa vakabibi vei ira na luvemuni baleta na iVakabula. Era gadreva tu na ivakaraitaki ni veivakadeitaki ni nomuni vakabauta, kei ira na tinadra.
E dina ni so na gauna era na sega beka ni vakarorogo ka vakabauta, ia na nomuni ivakadinadina baleti Jisu ena dau tikoga ena nodra vakasama kei na lomadra. Ko ni nanuma tiko beka na italanoa ni nona digitaka cala o Alama na nona sala? Ni sa lesu mai, a qai kaya:
“Au sa qai nanuma … ni a [tukuna] ko tamaqu … ni na lako mai ko Jisu Karisito, … me bokoca na nodra ivalavala ca na kai vuravura.
“Niu toboka rawa na vakanananu oqo, au tagica e yaloqu: Oi kemuni Jisu na Luve ni Kalou, ni lomani au mai.”37
Kakua ni leqataka, ke sega ni vakarorogo tiko e dua na luvemu. Sa cakacaka vata tiko kei iko na gauna kei na dina. Ena kena gauna donu, ena lesu mai na nomuni vosa me vaka ga ni sa mai lomalagi. Na nomuni ivakadinadina ena sega ni laivi ira na luvemuni.
Ni ko tukuni koya na iVakabula ena vakarokoroko—ena loma ni motoka, ena basi, ena gauna ni kana, ni ko tekiduru ena masu, ena gauna ni vuli ivolanikalou, se ena veitalanona ena loma ni bogi—na curuma na nomuni vosa na Yalo ni Turaga.38
Ni ko sa gumatua sara, na nomuni ivakadinadina baleti Jisu ena dewa vakamalua yani ki na lomadra na luvemuni. Era na vuki yani vei Tamadra Vakalomalagi ena masu malumalumu ka vakila na Nona veivakayarayarataki ena kaukauwa ni Yalo Tabu. Na kaukauwa ni nodra dui vakabauti Jisu Karisito ena vakarautaki ira ki na bolebole ena dau yaco vakaidina ga mai vei ira.39
Au a kilai Bill Forrest kei Debbie Hutchings ni keitou a vuli vata mai Brigham Young Univesiti. Sa lesu mai o Bill ena kaulotu. Rau sa mai veivinakati sara kei Debbie ka rau vakamau sara ena Valetabu na Oakland California. Rau laki tauyavu sara mai Mesa, e Arizona ka rau vakalougatataki ena lima na luvedrau tagane ka rua na yalewa. Rau a vakavulica o Bill kei Debbie vei iratou na gone me ratou lomana na Turaga o Jisu Karisito ni ratou sa lomani Koya. E kaya o Elder Daniel Forrest na luvedrau, ka sa kaulotu tiko oqo ena Tabana ni Kaulotu na Mexico Oaxaca, “Ni bera na vuli ena veimataka keitou sega ni calata me keitou wilika ka veiwaseitaka na ivolanikalou.”
Na luvedrau yalewa o Kara, e sa vakawati ka rua na luvena, ka se nanuma vinaka tikoga na nona dau draivataki koya o tamana vakamataka lailai ki na itaviqaravi e koronivuli. E kaya, “E dau taleitaka o tamaqu na vulica na veimalanivosa, ivolanikalou kei na serekali me vakasamataka tu [ka yaco ena veimataka oqori] keirau dau cavuqaqataka vata.” E dua vei ira na nona ivolanikalou talei o ya, “Mo drau nanuma mo drau tara na nomudrau yavu ena uluvatu ni noda i Vakabula, sai koya na Karisito na Luve ni Kalou, ia ni sa vakaliwava mai na tevoro na nona cagi kaukauwa, … ena sega ni rawai kemudrau [o koya] se dreti kemudrau sobu … , ni sa dei sara na uluvatu drau sa tara kina.”40
Ena Vakaraubuka ena macawa ni Siganimate ena yabaki 2000, ena 10 donu na yabaki sa oti, a veiqaravi tiko kina vaka-bisopi o Bill Forrest ena Tabanalevu na Estate Groves e Arizona. Ni draiva tiko ki cakacaka, ni se qai sivi ga e dua na maile (1.6 na kilomita), a coqai koya e dua na lori levu usa qereqere. Ratou a qai biubiu yani e muri o Debbie kei iratou na gone, ka vakidacala ni ratou sa sotava na vakacalaka levu oqo. A mate ena vakacalaka o ya o Bill. Sa mai kau tani vakatotolo na yalona vakalomalagi na watina daulomani ka tamadratou ki Vua ka sa valuta rawa na mate, na Luve ni Kalou, na lagilagi ni Nona Tucaketale ka dodonu me ratou a marautaka vata ena Siga Tabu ni Siganimate o ya.
A rawa vakacava vei Debbie kei na vitu na luvena (se qai yabaki lima o gone duadua ) me ratou kunea na kaukauwa eratou gadreva? E se qai yabaki 15 tiko kina o Kara, ena gauna a yaco kina na vakacalaka, ka a kaya vei au walega oqo: “Au vakavinavinaka vei [na kei ta] ena sala rau vakavulici au kina [baleta na iVakabula]. Rau dau vulica vata kei au na ivolanikalou, masu vata, ka rau ivakaraitaki ni Nona loloma, veikaroni, kei na vosota [na iVakabula] … E dau gauna vakaciriloloma vei au na Siganimate ena veiyabaki, niu dau vakasamataka na Nona bula, ilesilesi, kei na Tucaketale ni noda iVakabula, kau nanuma kina na bula nei tamaqu vakayago.”
E kaya o Elder Daniel Forrest: “Au yabaki 10 tiko ni a mate o tamaqu. A dua dina na gauna dredre vei au… . Sa dau bulataka tu o tinaqu na ivakavuvuli ni iVakabula. Au dau kauta voli tiko na beji ni yaca nei tamaqu ni nona a kaulotu e Sipeni. [E rua] vei ira na noqu malanivosa talei mai vei tamaqu e vakatoka oqo [o ya]: ‘E rawa me rau cakava e dua ga na ka sa rawa e rua na tamata kevaka e dua vei rau oqo na Turaga’ ka sa dodonu ‘Me noda yavu na iVakabula. Kevaka e sega eda na guce.’”
Sa vakasinaiti tu na lomadratou na luvei Forrest na vakabauti Jisu Karisito. Ena macawa ni Siganimate oqo, ka sa tini na yabaki na mate nei tamadratou, eratou sega ni guilecavi koya rawa, ia na bati gaga ni nona mate sa mai “vakaotia sara o Karisito.”41 Eratou sa kila tiko, ni vuku ga ni isolisoli tawa vakamacalataki rawa ni iVakabula, e rawa ni ratou na laki tiko vata tale kina kei tamadratou vakayago kei na Tamadratou Vakalomalagi.
Talanoataki Jisu vei au.
Eda na vakarau rogoca oqo na parofita ni Kalou. Ena Nona vosa baleti Nona parofita, a kaya kina na Turaga: “Ia mo dou vakabauta ka muria na ka sa tukuna, me vaka ga au sa tukuna vei kemudou.”42 Au vakadinadinataka ni o Peresitedi Thomas S. Monson sa gusu ni Turaga ena vuravura oqo.
Au vakadinadinataka ni o Jisu na Karisito, na nodra iVakabula na tamata kecega. Na Nona bula, Nona Veisorovaki, Nona Tucaketale, kei na Nona lesu mai sa namaki tiko ena yaco vakaidina me vaka ga ni cila mai na siga. Me vakacaucautaki tikoga na yacana ka sega ni mudu ka me tawamudu.43 Ena yaca tabu i Jisu Karisito, emeni.