Cheryl A. Esplin

iKarua ni Daunivakasala ena Mataveiliutaki Raraba ni Lalai

E sega ni nanuma rawa o Cheryl Asay Esplin, ikarua ni daunivakasala ena mataveiliutaki raraba ni Lalai, me a bau sega ni vakabauti Tamada Vakalomalagi kei Jisu Karisito ena dua na gauna. “Au a vakavulici niu se yabaki lailai sara meu dau masu,” e a kaya. “Au nanuma na noqu dau masu meu vukei kina, ni bera niu qai cakava rawa tale e dua na ka, ka sa dau ciqoma vakaidina na isau ni noqu masu.”

Sucu ena Okotova ni 1944 vei rau o Orson kei Mildred Asay, a tubu cake o Sisita Esplin ena dua na itikotiko ni iteitei ka walu na maile (13 na kilomita) ki na tokalau kei Lovell, Wyoming, e Merika. E ikarua ni qase vei ratou e lewe ciwa na gone, ka sa dau kacivi vakavuqa tu kina me meimei. Ena nona dau veivakatawai tu kina vei ratou na ganena kei na tacina lalai, e nanuma lesu o Sisita Esplin na nona dau masulaka na veimaroroi me baleti ratou na nona matavuvale ni rau dau gole tu na nona itubutubu.

E a tauri ivola ni koroi ni vuku ena yavu ni veivakavulici (bachelor’s degree in elementary education) o Sisita Esplin mai na Univesiti na Brigham Young. E a sotavi Max Esplin na watina, ena gauna a vuli tiko kina, ka rau a vakamau ena Valetabu na St. George Utah enai 1 ni Sepiteba, 1967. E a tauri ena mataivalu, o Baraca Esplin ni oti nona tauri ivola, ka veivakavulici tiko vei ira na kalasi lima o Sisita Esplin me rua na yabaki volekata na nona matavuvale e Byron, Wyoming.

Sa veiqaravi oti ena mataisoqosoqo ni iSoqosoqo ni Veivukei, Goneyalewa, kei na mataisoqosoqo ni Lalai. Na nona ilesilesi se qai oti walega oqo sai koya ena matabose raraba ni Lalai. E a veiqaravi oti talega kei watina ena gauna a peresitedi tu kina ni Tabana ni Kaulotu na North Carolina Raleigh.

E lima na luvedrau na Esplins. E dau marautaka o Sisita Esplin me vakayagataka nona gauna vata kei ira na makubuna; era dau tavuteke panikeke kei na weifa, daramaka na veimataqali isulu, taubale vata, ka wili ivolanitalanoa vata.

E dau taleitaka o Sisita Esplin na itukutuku ena nona ivolanikalou talei, Vunau kei na Veiyalayalati 84:88: “Ia ko koya sa vakacegui kemudou sa vakacegui au talega, niu sa lako vata tiko kei kemudou. Au na tiko e yasamudou imatau ka tiko talega e yasamudou imawi; ia na noqu Yalo Tabu ena tiko e yalomudou; era na vakavolivoliti kemudou na noqu agilosi ka laveti kemudou cake.” E nuitaka ni ra na dau nanuma tiko na gone ni sa dau tu vakarau tu ga o Tamada Vakalomalagi vei ira ni ra masu.