Elder Juan A. Uceda

Ena Vitusagavulu

Ena gauna erau se qai tekivu veigadivi kina kei Maria Isabel Bendezú o Elder Juan Alberto Uceda Andrade—na marama ka a qai vakamautaka—e a kila kina ni a dua na marama digitaki. Erau a saumaki ruarua mai ki na Lotu ni rau a se itabagone, ka rau a veiqaravi vakadaukaulotu ruarua talega ena nodrau vanua, o Peru.

Ia na nona ile kaukauwa o Sisita Uceda, me vakamau ena valetabu, ka a vakayaco ka vei rau. Ena gauna o ya na valetabu voleka duadua sai koya ka tiko e São Paulo, Brazil. “E a taura e vitu na siga me dua e yaco yani kina, ena kena vakayagataki na veimataqali sala kece ni veilakoyaki,” a vakamacalataka o Elder Uceda. “Keitou a lako ena basi, motoka, waqa, ose, kareti, sitima, lori, ka vaka mada ga kina na waqavuka. Ena gauna keitou a yaco yani kina e valetabu, keitou a dodoka yani na ligai keitou me keitou tara na lalaga me keitou vakadinadinataka ga kina ni keitou sega ni tadra tiko. E a itekitekivu ni dua na gauna vei keirau.”

Rau a vakamau na veiwatini ena Valetabu na São Paulo Brazil ena ika 13 ni Epereli, 1979. Erau nodra itubutubu e lima na gone.

E a sucu o Elder Uceda ena Julai ni 1953 e Lima, Peru, vei rau o Juan Jose Uceda Perez kei Ines Andrade Uceda. Ni oti na nodrau lewena na Lotu ena 1972, e a vuli daunivika o Elder Uceda ka vakakina na veimaliwai vakamatatamata ena Jose Carlos Mariátegui Institute e Lima. E a vuli veiliutaki vakabisinisi talega ena Centro Andino de G.E. Institute ka rawata mai kina e dua na koroi ni vuku ena veimaliwai vakacakacaka mai na Univesiti na San Luis Gonzaga.

E a sa cakacaka oti o Elder Uceda ena iVakarau ni Vuli ni Lotu, vaka-dairekita ni iWasewase me baleti Peru kei Bolivia. Ena 2003 e a toki mai Peru ki New Jersey, e Merika, me vukei tamana ena tosoi ni dua na bisinisi ni veivakavulici kei na vulici ni vosa.

Me ikuri ni nona veiqaravi vakadaukaulotu, a sa veiqaravi oti ena matabose e cake, bisopi, peresitedi ni iteki, ka peresitedi ni Tabana ni Kaulotu na Lima Peru North ka vakakina ena Vitusagavulu ni iWasewase o Elder Uceda. Sa veiqaravi tiko ena gauna oqo ena iMatai ni Kuoramu ni Vitusagavulu.

“E maucokona vinaka tu na noqu ivakadinadina me baleta na ivakatakila yadudua mai vua na Yalo Tabu,” e a kaya o Elder Uceda. “E ivakadinadina tikoga o ya na veivakalougatataki e lako mai ena talairawarawa.”