Veikidavaki ki na Koniferedi
Vinaka vakalevu, kemuni na taciqu kei na ganequ, ena nomuni vakabauta kei na yalodina ki na kosipeli i Jisu Karisito.
Sa dua na ka vinaka, kemuni na taciqu kei na ganequ lomani, me da mai sota vata tale. Na koniferedi oqo sa ivakatakilakila ni ika 180 ni yabaki mai na gauna a tauyavu kina na Lotu. Eda sa vakavinavinaka vakalevu ena vukuna na Parofita o Josefa Simici, o koya a vakasaqara na dina, ka kunea, ena Nona veidusimaki na Turaga, a vakalesuya mai na kosipeli ka tauyavutaka na Lotu.
E toso tikoga na tubu ni Lotu me tekivu mai na siga ko ya ena 1830. Sa tomani tikoga na kena veisautaki na nodra bula e vuqa vakavuqa na tamata e veiyabaki ka dewa yani ki vuravura raraba ena nodra vakasaqarai ira era vaqara tu na dina na noda mataivalu daukaulotu. Vakadua tale eda kerei kemuni na lewe ni Lotu mo ni yacovi ira na saumaki vou mai se vei ira era sa lesu tale tiko mai ki na Lotu, me vakavolivoliti ira na loloma ka vukei ira me ra logaloga vinaka.
Vinaka vakalevu, kemuni na taciqu kei na ganequ, ena nomuni vakabauta kei na yalodina ki na kosipeli i Jisu Karisito. Vinaka vakalevu ena veika kece o ni sa cakava tiko ena nomuni veitabanalevu kei na tabana, ena nomuni iteki kei na tikina. O ni veiqaravi ena lomasoli ka veiqaravi vakavinaka ka cecere na vinaka ko ni sa rawata. Me vakalougatataki kemuni na Turaga ena nomuni segata mo ni muri Koya ka talairawarawa ki na Nona ivakaro.
Ena iotioti ni gauna eda a sota kina, sa tomana tikoga na Lotu na nona vakarautaka na veika ni veivuke raraba ka gadrevi-vakalevu sara ena veivanua eso e vuravura. Ena tolu na vula mada ga se qai oti yani oqo, a soli kina na veivuke raraba e Taiti, Mongolia, Bolivia, Peru, Arizona, Mexico, Potukali, kei Uganda, ka vakakina ena veivanua tale eso. Ena dua na gauna lekaleka se qai oti ga oqo eda a veivuke kina ki Haiti kei Chile ni oti na vakacaca ni uneune kei na sunami ena veivanua oqori. Eda vakaraitaka na noda loloma vei ira na noda lewe ni Lotu ka ra vakaleqai ena veigauna oqori. Ko ni sa dau nanumi tu ena neimami masu. Eda vakaraitaka na noda vakavinavinaka cecekia vei kemuni kece ena nomuni lomasoli mo ni veivuke ena noda sasaga ni veivuke raraba ena nomuni wasea na veika e tu vei kemuni ka vakakina, ena vuqa na gauna, na nomuni gauna, na nomuni taledi, kei na nomuni kila.
Na yabaki oqo sa ika 25 ni yabaki mai na gauna sa yaco kina me tiki ni noda sasaga vaka-welefea na parokaramu ni veivuke raraba. Ena sega ni rawa ni wili sara vakavinaka na levu ni tamata sa vukei mai na parokaramu oqo. Eda na segata tiko me da imatai ni veivuke e dau yaco yani ena gauna ni leqa vakaitamera, ena vanua cava ga e yaco kina.
Sa tomani tikoga na tubu kei na toso ki liu ni Lotu. Sa ivakatakilakila ni tubu oqo na noda tara valetabu. Ena dua na gauna se qai oti toka ga eda a kacivaka kina e dua na valetabu vou ka na tara e Payson, Utah. Eda sa kacivaka tale na cakacaka levu ni kena vakavoui na Valetabu e Ogden Utah. Ena loma ga ni tolu na vula mai oqo eda na vakatabuya kina na valetabu vovou e Vancouver, British Columbia; ena Bucabuca na Gila e Arizona; ka vakakina mai na Koro levu ko Cebu ena Yatu Filipaini. Ena mua ni yabaki ena vakatabui se vakatabui tale kina eso tale na valetabu. Eda na tomana tiko na tara valetabu e vuravura raraba ni sa tubu tiko na lewenilotu. Ena veiyabaki sa dau qaravi kina e milioni vakamilioni na cakacaka vakalotu ena veivaletabu ena vukudra na noda daulomani era sa yali yani. Me da yalodina tikoga ena kena qaravi na veicakacaka vakalotu vakaoqori me baleti ira era sa sega ni cakava rawa vakai ira.
E vuqa vei kemuni o ni sa kila tiko ni oti vakalailai na koniferedi ena Okotova, a lutu kina o Frances, na watiqu lomani, ka ramusu kina na dibina kei na tabana. Ni oti e rua na veisele vinaka kei na vica na macawa ni davo voli e valenibula, sa rawa me lesu yani ki vale. Sa toso vinaka tiko ka sa vinaka cake tikoga mai. A rawa ni tiko ena soqoni raraba ni Goneyalewa ena Vakarauwai sa oti ka nakita tiko me na tiko ena dua se rua na soqoni ena mua ni macawa oqo. E ka dina, ni vakasauri sara ga nona kaya, “Au lako nikua!” Ka sa tiko oqo! E duavata kei au ena kena vakaraitaki na vakavinavinaka levu vua na Tamada Vakalomalagi vakakina vei kemuni taucoko ena nomuni masu kei na nomuni vakanuinui vinaka ena vukuna.
Ena gauna oqo, kemuni na taciqu kei na ganequ, eda lako mai qo me da mai vakasalataki ka vakauqeti. Keimami kidavaki kemuni o ni se vou ki na Lotu. Eso tale vei kemuni o ni sotava tiko na leqa kei na bolebole, na rarawa, na mate. Keimami lomani kemuni ka keimami dau masulaki kemuni. E vuqa na itukutuku, ka kovuta na veiulutaga vakosipeli eso, ena soli tiko ena loma ni rua na siga mai oqo. O ira na turaga kei na marama era na vosa vei kemuni era a vakasaqara na veivuke mai lomalagi me baleta na itukutuku me ra tukuna.
Sa noqu masu me da na vakasinaiti ena Nona Yalotabu ni da vakarorogo ka vuli. Me vaka dina oqori, sa noqu masu ena yaca i Jisu Karisito, na noda Turaga ka iVakabula, emeni.