Sa Veivuke Na Ka Kecega Me Ra Vinaka Kina
E rawa me da sega ni kila ena bula oqo se cava na vuna eda sotava kina na veika eda vakayacora, ia e rawa me da vakila na veivakadeitaki ni rawa me da tubu cake mai na veika eda sotava.
Ena noqu gauna ni gone au a dau vakanamata tu ki na vulaitubutubu vakayabaki. Ni sa dau tunutunu na draki, au sa dau vakarau tu ena itekitekivu ni gauna ni veitavi polo. Me vakataki ira e levu na gonetagane, au na gadreva meu yaco meu dua na dauqito veitavipolo cecere. Au nanuma lesu na italanoa ni dua na gonetagane gone sara ka vaka talega oqo na nona tatadra. Ena nona gadreva me yaco me dua na dauqito polo cecere duadua a vakasamataka me lai vakatovotovo itautuba. A qumia tu na polo ena dua na ligana kei na itavi ena ligana kadua qai viritaka imacawa na polo. Ena nona vinakata me tavia vakayawa sara na polo ena kena yawa duadua e rawata, e a qai cowiri ia a qai lutu na polo ka sega mada ga ni tara na kau ni itavi. Sega ni via vakasuka, e a cakava tale. Nona se qai vakarau viritaka sara ga na polo i macawa, a tubu cake nona guta ena gauna vata a vakasamataka tiko kina e dua na itavi kaukauwa. Ia e ka ni rarawa, a tautauvata tikoga na ka a yaco. E lutu tu ga na polo. Ia a kila me vaka ga e dua na dauqito polo vinaka, me na dau tolu nomu tavi ni bera ni o vakacegu. A solia taucoko nona igu, viritaka na polo i macawa, ka qai solia e dua na cowiri levu duadua e se bera vakadua ni bau vakayacora. Ni sa lutu tale e ra na polo, sa tekivu me tonawanawa na wainimatana. Vakasauri sara ga sa basika mai e dua na matadredredre vakaitamera, a qai kaya, “Sa dua na dauviri!”
O ikeda vakayadua eda sotava na veidredre kei na veivakatovolei, ka me vaka na kena ivakaraitaki rawarawa oqo, na noda na rawata kei na noda marau ena vakatau ena noda ivukivuki ena gauna eda sotava kina na veidredre oqori. O ikeda vakayadua eda na sotava na leqa veitalia se vanua cava ga eda tiko kina. Eda sa vakatavulici mai na ivolanikalou ni “sa kilikili me tu … na veibasai ni ka kecega.”1 O ikeda vakayadua eda na sotava na veigauna dredre, ia na taro sa ikoya e sega ni gauna cava eda na sotava kina ia eda sotava vakacava.
A vakatavulica o Paula na iApositolo e dua na lesoni taleitaki ena vica walega na yabaki ni bera nodra sotava na Yalododonu e Roma eso na veivakacacani kaukauwa ni dua na gauna va-Karisito. A tataunaka o Paula kivei ira na Yalododonu ni “sa veivuke na ka kecega me ra vinaka kina era sa lomana na Kalou.”2 Na Tamada Vakalomalagi, e taucoko ka maucokona nona lomani keda, e vakatara vei keda me da sotava na veika ka rawa kina vei keda me da vakatorocaketaka na ivakarau kei na ivalavala eda gadreva me da yaco kina me da vakataki-Karisito vakalevu cake sara. Na noda veivakatovolei era lako mai ena vuqa na kena ivukivuki, ia era na vakatara yadua vei keda me da yaco me da vakataki koya vakalevu cake sara na iVakabula ena noda vulica me da kila na vinaka e lako mai ena noda sotavi ira vakayadua. Ena noda kila na ivunau oqo, e rawa me da rawata na veivakadeitaki levu cake sara ni loloma nei Tamada. E rawa me da sega ni kila ena bula oqo se cava na vuna eda sotava kina na veika eda vakayacora, ia e rawa me da vakila na veivakadeitaki ni rawa me da tubu cake mai na veika eda sotava.
Au kidava ena gauna oqo ni rawarawa cake sara me da raica lesu ena gauna e sa mai cava kina e dua na veivakatovolei ka raica se cava eda sa vulica mai na veika eda sotava, ia na bolebole sa ikoya na noda rawata na vuna tawamudu ena gauna eda sotava tiko kina na noda veidredre. Kivei ira eso, na noda vakatovolei e rairai ka mamada tu ga, ia kivei keda kece eda sa lako curumi ira tiko na veika oqo, era ka dina na veivakatovolei ka gadrevi me da vakamalumalumutaki keda ena mata ni Kalou ka vuli mai Vua.
Ena Sigatabu ni Siganimate oqo, eda nanuma kina na nona bula na noda iVakabula. Sa iKoya eda gadreva me da muria na nona ivakaraitaki ena veika kece sara eda cakava. Meu tukuna mada e lima na ka e rawa me da vulica mai na iotioti ni auwa ni nona bula e vuravura na iVakabula ka ni na rawa me vukei keda ena noda sotava na noda dui veivakatovolei.
iMatai, e vakasaqara o Koya me kakua ni yaco Nona lewa ia na lewa ga nei Tamana. E tomana tu ga na Nona itavi tabu e dina ga ni lako curuma tu na veivakatovolei. Ena Nona sa vakacuvara sobu na matana ena Were e Kecisemani, a taroga o Koya, “Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa.” 3 Ena so na gauna eda dau sotava na mosi kei na rarawa ka rawa kina me da tubu ka vakavakarau me baleta na rawati ni veivakatovolei ena gauna sa bera mai. Meu taroga mada e dua na ka kivei kemuni na tina: “Ena rawa mo cakava eso na ka me vakavuna na mosi kei na tagi kivei ira na luvemuni ena gauna era sega ni cakava kina e dua na cala?” E dina e rawa vei iko! Na tina vinaka vakayadua ena kauta na luvena gone kivua na vuniwai me lai cula ka ra na biuta na valenivolavola nei vuniwai na gone vakayadua ena tagi. Na cava na vuna o cakava kina na ka o ya? E baleta nomu kila ni dua na mosi lailai ena gauna oqo ena taqomaki ira mai na mosi kei na vakararawataki ena gauna mai muri. Na Tamada mai Lomalagi e kila na itinitini mai na kena itekitekivu. E gadrevi me da muria na ivakaraitaki ni iVakabula ka vakabauti Koya.
iKarua, ena noda sotava na veivakatovolei, e dodonu me da vulica me da kakua ni vakacauoca se kudru. O Nifai, ena nona raivotu cecere ni solibula veisorovaki ni iVakabula e tukuna vei keda; “Era na vakanakuitataki Koya ka na vosota ga, era na yaviti Koya ka na vosota ga. Ia, era na kasiviti Koya ka na vosota ga ena vuku ni nona loloma kei na nona dauvosoti ira na luve ni tamata.”4 E dodonu me da dau tovolea wasoma me da vakadodonutaka na leqa ka vorata na veivakatovolei, ia me sosomitaka na taro, “A cava na vuna me o au kina?”se “Na cava au a cakava me saumi kina oqo vei au?” de rairai na taro e dodonu beka me, “Na cava meu cakava? Na cava e rawa meu vulica mai na veika au sotava oqo? Na cava meu veisautaka?”
Ena vica na yabaki sa oti ni keirau a se veiqaravi tiko vakaveiwatini e Venezuela, a biuta na vakacegu ni nona vuli torocake na luvei keirau tagane gone duadua me toki mai vei keirau. E sega ni vakacauoca, ia e laurai votu na nona sasaga kaukauwa ena nona lako yani ki na vanua oqo, na vanua e sa vou kina na veika kecega; ia ena dua na tavuki ni bula, a yaco na veika ni veivakatovolei me dua na veivakalougatataki vakaitamera ena nona bula. A rawata oqo mai na nona veisautaka nona vakanananu ka vakatulewa vinaka me rawa ka.
iKatolu, ena noda sotava noda veibolebole, e dodonu me da vakasaqara e levu cake na veivuke mai vua na Kalou. O koya mada ga na noda iVakabula kece sara, e a gadreva me masumasu, “vagumatua” me vaka nona a tiko ena Were o Kecisemani.5 E rawa ni da vulica me da rawata na vakabauta cecere kevaka eda vakayacora oqo. E dodonu me da nanuma ni vakawasoma na isaunitaro mai vua na Tamada Vakalomalagi e sega ni kauta tani na veivakatovolei mai vei keda ia e veivuke me vakaukauwataki keda ena noda lako sivita na veika eda sotava. Me vaka a vakayacora vei ira na daumuri Alama, na Turaga e rawa me “vakamamadataka na icolacola dou sa vakacolati kina, mo dou kakua ni vakila ni dou sa colata.”6 Ena noda vakatovolei, me da kakua ni yaloca se vakasavuliga, ia me da vakamuria na ivakaraitaki ni iVakabula ena nona yaco me soli koya kina, yalodina, ka dinata.
iKava, vulica mo veiqaravi ka nanumi ira na tani ena noda gauna mada ga ni vakatovolei. O Karisito sa ivakaraitaki cecere ni veiqaravi. E vakasinaiti Nona bula ena ivakaraitaki ni veivukei kei na qaravi ira na tani, kei na Nona isolisoli cecere duadua vei ira kece sa ikoya na veika e vakayacora o Koya me baleti keda. Me vaka a kaya o Koya , “Raica ko i au na Kalou; au sa vosota oti na veika oqo, me ra bula kina ko ira era sa veivutuni.”7 E dodonu me da veivutuni, ni oti, me da qai muria Nona ivakaraitaki ni veiqaravi. Ena noda qaravi ira na tani, me da guilecava noda dui leqa ena noda segata na vakamalumalumutaka na nodra mosi se logalogaca na tani, eda na vaqaqacotaki kina.
Ena noda koniferedi raraba sa oti, a kaya kina na noda parofita daulomani, o Peresitedi Thomas S. Monson, “Au vakabauta ni kaya eke vei keda na iVakabula kevaka me da sega ni vakayalia na noda bula ena vukudra na tani, ena sega soti ni vakaibalebale na noda bula tiko. O ira era bula voli ga me baleti ira tabakidua, era na raqosa ka vakayalia nodra bula, kei ira era vakayalia nodra bula ena nodra veiqaravi vei ira na tani era na tubu bulabula ka sereki—ia era na vakabulai.”8
iKalima,vosoti ira na tani ka kakua ni beitaki ira ena vuku ni keda ituvaki. Ena so na gauna eda vinakata me da kaya, “Kevaka me ra a sega ni cakava, keu a sega ni cakava na ka au cakava tu o ya.” Sa dau ivakarau tu vakatamata me dau beitaka e dua tani tale me levea kina na isau ni nona ivalavala. Na iVakabula, a raici ira era a vakoti Koya ki na kauveilatai ka vakamamasu vua na Tamana mai Lomalagi me “kakua ni cudruvi ira; ni ra sega ni kila na ka era sa kitaka.”9 E rawa beka me da na dau veivosoti vakalevu cake?
Ena noda sa lako sivita tiko na veivakatovolei ni bula, meda maroroya na kena rai tawamudu, me da kakua ni vosa kudrukudru, me da yaco me da dau masumasu vakalevu cake sara, me da qaravi ira na tani, ka da veivosovosoti vakaikeda vakayadudua. Ni da cakava oqo “sa [na] veivuke na ka kecega me ra vinaka kina ko i[keda] eda sa lomana na Kalou.”10 Au wasea e dua na ivakadinadina bula ka dina ni Tamada e lomani keda, ka tala mai o Koya na Luvena me vakaraitaka ka caramaka noda gaunisala. A vakararawataki o Koya, a mate o Koya, a tucaketale me rawa ni da bula ka gadreva o Koya “me da rawata na marau,”11 ena vakatovolei mada ga ni noda bula. Au cavuta na veika oqo ena yaca i Jisu Karisito, emeni.