Vakaraitaki na Parokaramu Vou ni iTavi Vua na Kalou

Me vaka a vakaraitaki ena koniferedi raraba, sa vakarabailevutaki ena ruku ni veidusimaki ni parofita bula e dua na parokaramu vou ni iTavi Vua na Kalou, me vukei ira na cauravou ena nodra tara cake na bula e qaqaco vakayalo ka me ra vakayacora na nodra itavi vakamatabete.

Ena soqoni ena mataka ni Vakarauwai a kaya kina na iMatai ni Daunivakasala ena Mataveiliutaki Taumada o Peresitedi Henry B. Eyring ni “[Parokaramu vou ni iTavi Vua na Kalou] e dua na iyaragi kaukauwa.” “Ena vakaqaqacotaka na nodra ivakadinadina na cauravou ka vakakina na nodra veiwekani kei na Kalou. Ena vukei ira ena nodra vuli ka vinakata me ra vakayacora vinaka na nodra itavi vakamatabete. Ena vaqaqacotaka na nodra veimaliwai kei ira na nodra itubutubu, vakalewe ni kuoramu, ka vakakina vata kei ira na nodra iliuliu.”

Sa vakarawarawataki ka vakatabakiduataki na parokaramu vou oqo ni iTavi Vua na Kalou. E tiko ena ivola oqo na veika e gadrevi ki na tolu na yabaki duidui ni bula, ka vakakina na idusidusi me baleti ira na itubutubu kei ira na iliuliu. Ena vakarautaki tiko ena 27 na vosa na ivola kei na veiiyaya kece sara me sala vata kaya ena maliwa ni June kei na Okosita ni 2010. Ena tomani tiko ena loma ni yabaki na kedra vakarautaki na ikuri ni vakadewataki ni iyaya.

Era na tuvalaki tiko na veiitaviqaravi me rawa ni ra vulica tiko kina na cauravou e dua na ivakavuvuli vakosipeli se itavi vakamatabete, vakayacora na ka era sa vulica, ka me ra qai wasea na ka era nanuma ka vakila kei ira na itubutubu, iliuliu ni Lotu, kei ira na nodra kuoramu.

“Me vaka e dua na dikoni, ivakavuvuli, se bete, o na vakaitavi ena veiitaviqaravi ka na vukea nomu tara cake na kaukauwa vakayalo ka vulica ka qarava na nomu itavi vakamatabete,” a kaya o David L. Beck, peresitedi raraba ni Cauravou, ena gauna ni soqoni ni matabete ena koniferedi raraba. “Ena dusimaki iko ena nomu ilakolako mo vakayacora na nomu itavi vua na Kalou, ka kunea na vakasakiti ni Matabete i Eroni, na parokaramu vou oqo ni iTavi Vua na Kalou.”

E navuci na parokaramu oqo me vakauqeti ira na cauravou me ra qarava vakaiira na nodra tubu, ia ena vakarautaka talega na madigi me vaqaqacotaka ka veimaliwai ena kedra maliwa na cauravou kei ira na nodra itubutubu, ira nodra iliuliu, kei ira na lewe ni nodra kuoramu. E levu vei ira na soqoni oqo e rawa me ra okati vata me lotu vakamatavuvale, soqoni ni kuoramu ka vakakina na itaviqaravi.

“Era vakaitavitaki ira sara ena dua na itavi bibi na itubutubu, iliuliu, kei na lewe ni kuoramu ena parokaramu vou ni iTavi Vua na Kalou,” A kaya ki na mekasini ni lotu o Baraca Beck. “Ena vakarautaka e veigauna na madigi ni vuli, vakaitavi kei na veiwasei na gauna ni soqoni ni kuoramu ena Sigatabu.”

Era sa vakauqeti na cauravou me ra se tei tomana tiko mada na nodra cakacaka ena parokaramu era sa tu rawa me yacova na gauna sa na vakayagataki kina na parokaramu vou ena nodra tabanalevu se tabana. Ena gauna ga sa na tekivutaki kina na parokaramu vou, me ra tekivu vakayacora sara na cauravou yadua na iwase ka salavata kei na itutu vakamatabete e sa tiko kina ena gauna oqo. Kevaka sa volekata yani na vakacavari ni veika e gadrevi ena rawati ni sitivikiti se metali ka taurivaki ena nona itutu ena ruku ni parokaramu taumada, sa rawa vua me vakacavara na veika e gadrevi oqori ena gauna vata e tekivutaka tiko kina na parokaramu vou.

“Na veiitaviqaravi yadua ena Qarava Vinaka na Noqu iTavi Vua na Kalou ena vukei iko ena nomu yaco mo lewe ni matabete ka vinakata vei iko na Turaga,” a kaya o Baraca Beck.

Ena vakarautaki tu ena kompiuta na ikuri ni ivakamacala kei na iyaya ena DutyToGod.lds.org.