2010
Me Tiki ni Noda Bula na Koniferedi
Me 2010

O Ira era Vosa Vei Keda

Me Tiki ni Noda Bula na Koniferedi

Sa rawa mo ni vakayagataka eso vei ira na itukutuku, itaviqaravi, kei na taro oqo me vakatekivutaki kina na veivosaki vakamatavuvale se vakavure vakasama vei kemuni yadudua.

Sa rawa mo ni raica na vosa ni koniferedi raraba ena conference .lds.org. Sa rawa talega mo ni sarava ka wasea na veivakasama vakaitukutuku eso mai na vosa ni koniferedi sa oti ena mormonmessages.org.

Me Kilai: Na naba ni tabana e volai toka e vakatakilakilataka tiko na imatai ni tabana ni vosa o ya.

Me Baleti Ira na Gone

  • Sa rawa me vakaitavi na tamata kecega ena cakacaka ni tuva kawa ni matavuvale! E vakatututaka kina o Elder Russell M. Nelson ni sa rawa vei ira na gone me ra droinitaka e dua na ituvatuva ni kawa ni matavuvale (tabana e 91). Sa rawa vei ira na itubutubu me ra vukei ira me vakuri na yaca ni nodra qase e liu.

  • Wilika se tukuna tale na italanoa nei Elder Quentin L. Cook baleti ira na gone mai Samoa ni ra drotaka na sunami (tabana e 83). Me ra qai vakatakarakarataka na lewe ni matavuvale na kena sa kui yani ki loma ni vale na ualuvu ka vakayaloqaqataki ira me ra dro yani ki na “veivanua cecere,” me vakataka e dua na loga se idabedabe. Veivosakitaka na veivanua sa rawa meda kunea kina na veivanua cecere vakayalo ena gauna ni ualuvu ni ivalavala ca eda sa curuma tiko ena siga nikua.

  • A talanoataka o Elder D. Todd Christofferson na veika e baleti William Tyndale, ka a vakadewataka na iVolatabu ki na Vakavalagi (tabana e 32). Kerei ira na gone qase cake me ra wilika e dua na tiki ni ivolanikalou ena dua tale na vosa e sega ni nodra vosa. Ni ra tukuna ni ra sega ni rawata, sureti ira me ra wilika ena nomuni vosa ni vanua. Veivosakitaka na kena bibi me volai na ivolanikalou ena nomu vosa ni vanua.

  • Raica lesu, vata kei na nomu matavuvale e dua vei ira na vuqa na vosa ni koniferedi baleti Jisu Karisito. Lagata na “Tell Me the Stories of Jesus” (Children’s Songbook, 57). Veisoliyaka yani na pepa kei na penikau se peni kala. Sureti ira na luvemu me ra droinitaka e dua na italanoa taleitaki kei Jisu. Dou wilika vata na italanoa oqo mai na ivolanikalou.

Me Baleti Ira na iTabagone

  • Raica lesu na vosa nei Peresitedi Dieter F. Uchtdorf baleta na vosota (tabana e 56). Na cava eso na ivakavuvuli ni kosipeli kei na itovo e rawa me vakavulica vei keda na vosota? E rawa, me kena ivakaraitaki, na lolo se sega ni veigadivi me yacova sara na yabaki 16. O sa kune vinaka rawa vakacava kei na nomu matavuvale ni dou sa vosota rawa ena nomudou vakamuria na veika oqo kei na ivakavuvuli tale eso?

  • O iratou kece o Elder M. Russell Ballard, Elder Bradley D. Foster, Sisita Julie B. Beck, kei Sisita Elaine S. Dalton era vakavulica na veika e baleta na kedra ituvaki vakalou na marama (tabana e 18, 10, 98, kei na 120). Kevaka o dua na yalewa, ena vakayavalati iko vakacava na nodra vosa ena veika o nanuma baleti iko? Na cava o sa vulica rawa baleta na kemu inaki kei na isolisoli? Kevaka o dua na tagane, e vakauqeta vakacava na itukutuku oqo na nomu kilai tinamu, ganemu, itokani, kei na so tale na marama kei na goneyalewa ena nomu bula?

  • E vakavulica o Elder Jeffrey R. Holland: “Kevaka o sarava e dua na ka tawakilikili ena TV, bokoca. Ke vakatani e dua na iyaloyalo yavala, lako tani. Kevaka sa toso cake tiko e dua na veimaliwai tawadodonu, tagutuva. E vuqa vei ira na veivakauqeti vakaoqo … sa rawa me na vakaleqa na noda vakatulewa, vakamalumalumutaka na noda bula vakayalo, ka veimuataki yani ki na dua na ka ca” (tabana e 44). Dou veivosakitaka vakamatavuvale, na veika dou rawa ni cakava ki na nomudou itikotiko me dau tiko kina na Yalotabu. Raica mada na droini, sere kei na ivakatagi, ivola, qito ni vidio, kei na so tale na gacagaca ni veivakamarautaki e tiko vei kemudou ka biuta laivi na kena e sega ni kilikili.

Me Baleti Ira na Qase

  • Raica lesu vata kei na nomu matavuvale, na italanoa nei Peresitedi Thomas S. Monson me baleta na cauravou o Jason kei na nona matavuvale (tabana e 87). Veivosakitaka na kena rawa ni vakalougatataki keda na noda kila na yavu ni veivakabulai.

  • A wasea o Elder L. Tom Perry na sala a vakavulici iratou kina na luvena o tinana ena nona vakayagataka eso na ivakavuvuli a dau vakavulici ira kina na iSoqosoqo ni Veivukei (tabana e 29). Na cava eso na sala o rawa ni cokonaka kina na nomu veiqaravi ni Lotu vata kei na nomu ilesilesi vakamatavuvale?

  • E vakamatatataka kina o Elder Robert D. Hales na bibi ni noda veivosaki ka vakarorogo vei ira na gone kei na itabagone (tabana e 95). Na veigauna cava eso ko na rawa ni laki veivosaki rawa kina kei ira na luvemu? Na veika cava eso ko sa vulica ni ko vakarorogo vei ira? Ko na vakaraitaka rawa vakacava na nomu gadreva mo vakarorogo? Na sala cava beka ko na taura mo dau wasea kina na nomu ivakadinadina vei ira na gone kei ira na itabagone? Me kena ivakaraitaki, raica na vosa nei Elder David A. Bednar ena (tabana e 40).

  • Eso era a vosa baleta na bibi ni iTavi Vua na Kalou kei na Torocake Yadudua (raica na tabana 22, 54, 60, 95, kei na 117). Na cava o rawa ni cakava mera vukei kina na itabagone ena nomu bula mera rawa-ka kina mai na parokaramu oqo?