Vakayacora Tikoga na Noda iTavi
Na itavi e sega ni gadrevi kina na vinaka sara, ia e gadrevi kina na yalodina. E sega ni o koya na ka e dodonu vakalawa; sa ikoya na cecere ni bula vakayalo.
Oqo na vuravura ni leqa. Na veileti kei na vakacaca era tu e veivanua kece. E vakilai ena so na gauna me vaka ni kawatamata sara ga e rawa me veretaki.
Veivakasalataki ena noda veisiga oqo, a kaya na Turaga, “Ena sakure na lomalagi kei na vuravura; raica ena yaco e vuqa na ka rarawa vei ira na luve ni tamata; ia au na taqomaki ira ga era sa noqu”1 E dodonu me da ciqoma na vakacegu cecere ena yalayala oqo.
E dina ga ni vakacaca e vakarusa taucoko “na ivakarau ni [noda bula],”2 e sega ni dodonu me ra biuta noda bula me kavoro tawamudu tu. E rawa me “uqeti [keda] me ra nanuma,”3 “me [da] yadra kina, ka kitaka na [noda] itavi vua na Kalou,”4 ka maroroi keda “eda sa vakayacora tikoga na [noda] itavi.”5
E Holland ena gauna ni iKarua ni iValu Levu, na matavuvale na Casper ten Boom eratou vakayagataka nodratou vale me nodra ivunivuni o ira era vakasasataki tiko mai vei ira na Nazis. Sa ikoya sara ga oqori na nodratou sala ni bula me bulataki kina na nodratou vakabauta va-Karisito. E va na lewe ni matavuvale eratou vakayalia nodratou bula me baleta na kena vakarautaki na idrodro oqo. O Corrie ten Boom kei Betsie, na ganena, erau a tiko me vica na vula rerevaki ena keba torosobu ni veivakararawataki e Ravensbruck. A mate e kea o Betsie—qai bula o Corrie.
E Ravensbruck, o Corrie kei Betsie erau vulica kina ni Kalou e vukei keda me da dau veivosoti. Salamuria yani na ivalu, a vakadeitaka o Corrie me wasea na itukutuku oqo. Ena dua na gauna, a qai vosa walega ki na dua na ilawalawa tamata e Jamani ka ra vakararawataki tu mai na revurevu ni ivalu. E vakaoqo na nona itukutuku, “E dauveivosoti na Kalou.” Ni oti o ya ena yalodina nei Corrie ten Boom a yaco mai kina na kena veivakalougatataki.
A lako mai vua e dua na turaga. E kilai koya sara me dua vei ira na ivakatawa dau veivakararawataki ena keba. “O cavuta na Ravensbruck ena nomu vosa,” a kaya. “O au e dua na ivakatawa e kea. Ia me tekivu mai na gauna o ya, au sa yaco meu lotu va-Karisito.” A vakamacalataka ni sa kerea na veivosoti ni Kalou ena veivakararawataki a vakayacora. A dodoka yani na ligana ka kerea, “E rawa mo vosoti au?”
E qai kaya o Corrie:
“E rawa me sega ni dede nona tucake tu e kea—dodoka mai na ligana—ia vei au e vaka me sa dede sara ga ena noqu veibo vata tiko kei na dua na cakacaka dredre duadua e dodonu meu cakava.
“… Na itukutuku ni dau veivosoti na Kalou e dua tiko na … kena ivakarau: me da vosoti ira era vakamavoataki keda.
“…‘Ni vukei au! E rawa meu laveta na ligaqu. E rawa meu cakava e vuqa na ka. Ni solia vei au na kena yalo.’
“ …Vakakau, vakamisini, au dodoka vakaukauwa yani na ligaqu ki na kena e dodo tu mai vei au. Ena noqu cakava, a qai yaco e dua na ka sega ni namaki. Na ka e yaco oqo a tekivu mai na vatuvatu ni tabaqu, cici sobu sara mai ligaqu, lade sara ena isema ni liga ikeirau. Oti o ya na veivakabulai ni katakata oqo e luvuca taucoko sara ga na yagoqu, ka laki tonawanawa mai kina na wai ni mataqu.
“ ‘Au sa vosoti iko, baraca,’ au sa tagi, ‘Ena vu ni yaloqu taucoko.’
Ena dua na gauna balavu keirau veiqumi liga tu kina, na ivakatawa e liu kei na kaivesu e liu. Au se bera vakadua ni bau kila na vakaitamera ni nona loloma na Kalou me vaka au sotava oqo.”6
Kivei ira era levea na ca ka bulataka na bula vinaka, era sasagataka na veisiga vinaka cake ka maroroya na ivakaro ni Kalou, e rawa me vinaka cake tikoga e veigauna na veika veitalia ga na sotavi ni leqa. Na iVakabula e vakaraitaka vei keda na kena salatu. Mai Kecisemani, na kauveilatai, kei na ibulubulu, a tucake o Koya ena qaqa, kauta mai na bula kei na inuinui kivei keda kece. E vakarota vei keda o Koya, “Mo lako mai, mo muri au.”7
Na veivakasalataki nei Peresitedi Thomas S. Monson : “Kevaka me da lako ka daga tiko e macawa, e dodonu me da cakava noda cau ki na bula. Kevaka meda vakayacora noda ilesilesi ka lesutale ka laki bula vata kei na Tamada mai Lomalagi, e dodonu me da maroroya Nona ivakaro ka tuvalaka noda bula me vakataka na iVakabula. Ni da cakava oqo, e sega walega ni da rawata na noda inaki ni bula tawamudu, ia eda na biuta tale tu ga mai na vuravura me vutuniyau vakalevu ka vinaka cake baleta walega na noda bulataka ka vakayacora na noda itavi.”8
Ena iVola Tabu era tiko kina na vosa veivakauqeti oqo: “Tou rogoca na itinitini ni ka kecega oqo: Mo rerevaka na Kalou, ka muria nona ivunau: ni sa ikoya ga oqo na itavi taucoko ni tamata.”9
Na Cava Na Ka Oqo E Vakatokai Me iTavi?
Na itavi au vosa kina sa ikoya na ka e namaki vei keda me da cakava ka me caka. Sa ikoya e dodonu me dua na bula savasava ka kacivaka mai vei keda vakayadua kei na itikotiko na ka e dodonu, dina, ka vakaturaga. Na itavi e sega ni gadrevi kina na taucoko, ia e gadrevi kina na igu. E sega ni o koya na ka e dodonu vakalawa; sa ikoya na cecere ni bula vakayalo. E sega ni maroroi ki na itutu levu se cecere; ia na kena dodonu me tiko ena dua na yavudei ni itavi vakatamata yadua, na dina, kei na yaloqaqa. Na vakayacori ni nona itavi e dua sa ikoya e dua na ivakaraitaki ni vakabauta.
E kaya kina o Peresitedi Monson: “Au lomana ka maroroya na vosa vakaturaga itavi.”10 Kemuni na lewe ni Lotu i Jisu Karisito, vakayacora tikoga na noda itavi sa ikoya na kena maroroi na noda veiyalayalati ena noda bula ni veisiga
Eda Vakaitavi Tiko Ena Vukui Cei Ka Cava Me Caka?
iMatai, noda itavi sa ikoya kivua na Kalou, na Tamada Tawamudu. Sa ikoya a vakatekivuna na yavu ni veivakabulai, sa bulia na lomalagi kei na vuravura, a buli Atama kei Ivi.11 Io sa ikoya na ivureniwai ni ka dina12 ni sa dauloloma,13 ka vuna e yaco kina na veivueti mai vei Karisito.14
Kaya o Peresitedi Joseph F. Smith: “Na veika kece eda taukena e lako mai vua na [Kalou]… . Na lomada kei keda eda sa dua walega na ibulibuli qele dregadregata mate. Na bula, na yalomatua, na vuku, veilewai, kaukauwa ni vakatulewa, era isolisoli kece ni Kalou kivei ira na luve ni tamata. E solia vei keda kece na noda kaukauwa vakayago vakakina noda kaukauwa vakayalo… . E dodonu me da rokova na Kalou ena noda yalomatua, kei na noda kaukauwa, kei na noda kila kei na noda vuku, vata kei na noda kaukauwa taucoko eda taukena. E dodonu me da vakasaqara me da caka vinaka e vuravura. Sa ikoya oqo na noda itavi.”15
E sega ni rawa vua e dua me cakava nona itavi vua na Kalou na Tamada kevaka e sega ni cakava vakakina vua na Luvena na Kalou, na Turaga o Jisu Karisito. Ni rokovi e dua e gadrevi kina na rokova e dua tale, me baleta ni sa lesia na Tamada ni sa ikoya walega e loma ena vuku ni yacai Karisito e rawa kina vua e dua me vakayacora taucoko na itavi oqo.16 Sai Koya na noda Dauniivakaraitaki, noda Dauveivueti, ka noda Tui.
Ena gauna era vakayacora kina na tagane kei na yalewa kei ira na gonetagane kei na goneyalewa na nodra itavi vua na Kalou, era vakila ni dodonu me ra cakava na nodra itavi kivua e dua tale, ki na nodra matavuvale, ki na nodra lotu kei na vanua, na veika kece sara e vakanuinuitaki me ra qarava. Sa nodra itavi me ra vakalevutaka nodra taledi ka me ra dau muria na lawa, ka tamata vinaka. Era yaco me ra vakamalumalutaki ira, ka talairawarawa, ka yalomalua. Na lewa maqosa e valuta na kena vakayacori; na talairawarawa e dusimaka nodra gugumatua. E vakasavasavataki ira na vakacegu. Era yaco me ra yalodina na lewenivanua, era yaco me ra mamakutu na lewenivanua, ka yaco me ra veitokani vata kei ira era veivolekati. E sa marautaka na Kalou ni lomalagi, sa vakacegui na vuravura, ka sa yaco me dua na vanua vinaka na vuravura oqo.17
Eda Kila Vakacava Noda Vakayacora Tikoga noda iTavi ena Gauna ni Dredre?
Me da masumasu! Sa ikoya na sala dina me da kila kina; sa ikoya na bula vakayadua e veitokoni ka semati ki lomalagi. A kaya o Pita na iApositolo, “Ni sa wanonovi ira na tamata yalododonu na mata ni Turaga, ka sa qara tu na daligana ki na nodra masu.”18
Na masu ena yalomalumalumu, yalodina, ka veivakauqeti e vakarawarawataka vei keda na veidusimaki vakalou eda gadreva vakalevu sara. O Brigham Young e vakasalataka, “Ni na so na gauna, era na kauwai ka vakaleqai tu … ; ia sa tukuni tu ga mai ena noda vakatulewa ni noda itavi me da daumasu.”19
E vakatavulica o Jisu:
“Raica au sa kaya vakaidina vei kemudou, mo dou dau vakatawa ka masu, me kakua ni rawai kemudou na vere; …
“O koya mo dou dau masu tikoga vei Tamaqu ena yacaqu; …
“Mo dou daumasu vakavuvale vei Tamaqu ena yacaqu, me ra kalougata kina na watimudou kei na luvemudou.”20
Me yaga na masu, e dodonu me na salavata kei na ituvatuva vakalomalagi. Na masu ni vakabauta e vuataka na vuanikau ena gauna e tiko vata kina na duavata, kei na duavata oqo e tiko ena gauna e veiuqeti kina ena masumasu na Yalo Tabu. Na Yalo e tokona na veika eda kerea.21 Ni sega na veidusimaki veiuqeti oqo, e vaka me da “kerea vakaca,”22 me da kerea walega na noda lewa ka sega na “Nona lewa.”23 E sa rui bibi noda dusimaki mai vua na Yalo Tabu ena noda masu me vaka me vakamamadataki mai na Yalo vata ga ena kena ciqomi na isau ni masu. Na masu vakaoqori e kauta mai na veivakalougatataki ni lomalagi baleta o Tamada “sa kila e liu na ka sa yaga vei [keda] a sa muri na [noda] kerekere vua,”24 ka sa sauma o Koya na veimasu yadua ena yalodina. Me kena itinitini, sa iKoya na Tamana kei na Luvena erau yalataka, “Dou kerekere ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou.”25
Au wasea noqu ivakadinadina ni da vakayacora tikoga na noda itavi e vakamatatataka na yalodina sega ni tatawasewase kei na vakabauta na Kalou, na Tamada Tawamudu, kei na Luvena, o Jisu Karisito, kei na kaukauwa ni masumasu. Na salatu oqo sa ikoya me ra lakova taucoko na luve ni Kalou era lomani Koya ka gadreva me maroroya Nona ivunau. Me baleti kemuni na gone, e veidusimaki ki na veika e rawati vakatamata yadua kei na vakavakarau; me baleti kemuni na uabula, e dusimaki kemuni ki na vakavoui ni vakabauta kei na kena iwali; me baleti kemuni na itabatamata qase sara, e veidusimaki ki na kena ituvatuva kei na vosota ena yalosavasava me yacova na ivakataotioti. E vakaiyayataki ira vakayadua na lako ena yalodina vata kei na kaukauwa ni Turaga, taqomaki koya mai na ivalavala ca ni veisiga, ka solia vua na kila ka “na itinitini ni ka kecega oqo [sa ikoya] mo Rerevaka na Kalou, ka muria nona ivunau: ni sa ikoya ga oqo na itavi taucoko ni tamata.”26 Ena yaca i Jisu Karisito, emeni.