Ena Vukei ira na Marama ena Nodra Tubu vaka-Dauveisiko na iTuvatuva Vou

Ena Julai ni 2010, era na raica e dua na veisau ena ivakarau makawa ni ituvatuva ni iVaqa ni Veisiko o ira na marama ena iSoqosoqo ni Veivukei ka ra volayaca tu ena mekasini ni Liaona kei na Ensign.

E kaya o Julie B. Beck, peresitedi raraba ni Soqosoqo ni Veivukei “Keitou vinakati ira kece na dauveisiko me ra kila ni veikacivi ni dauveisiko sa mai vua na Turaga ka me ra ciqoma na nodra ilesilesi ka me ra lomana, qarava, vakavulica ka veiqaravi vua e dua tale na tacidra, ena gauna vata era vakasamataka tiko kina na ka oqo.”

Na ituvatuva vou oqo ni ivaqa ena vukei ira na marama ena nodra kila na inaki ni iSoqosoqo ni Veivukei, vakavulici ira na marama me ra bulataka na inaki oqo, vakarautaka e dua na kena rai vakaivolatukutuku, ka solia eso na vakatutu ena sala ka na rawa kina vei ira na marama me ra wanonovi ira vakavinaka cake kina ka vakaqaqacotaki ira kina na vo ni marama.

“E dua na iyaragi ena liga ni dua na dauveisiko na iVaqa ni Veisiko. Ena gauna e vulica kina na kena itukutuku ka vakasamataki ira tiko na marama, ena kila mai kina na ka me wasea vata kei ira ka vakakina na ka me vakayacora vei ira,” a kaya o Sisita Beck.

Sa koto oqo e ra e dua na ivakaraitaki vou ni iVaqa ni Veisiko, ka vakakina na ivakamacala ni kena veika vou.

iDusidusi

iNaki ni iSoqosoqo ni Veivukei

iTukutuku

Taro ni Veiqaravi

Taro ni Kena Vakayacori

Mai na Keda iTukutuku Makawa

Mai na iVolanikalou

Eso Tale na iTukutuku

Ena vukei ira na dauveisiko ena nodra kila na veivakavulici ka vakakina na nodra vakayagataka na ivaqa na idusidusi oqo.

Era sa okati tale tikoga yani na inaki ni iSoqosoqo ni Veivukei: me vakatubura na vakabauta kei na yalododonu yadudua, vaqaqacotaka na matavuvale kei na itikotiko, ka vakasaqarai ira ka vukei ira era leqa tu.

Na uto ni itukutuku sa na solia sara tikoga mai vakadodonu na ivakasala e vakatabakidua ka vakakina ena kena gauna taudonu mai vei iratou na mataveiliutaki raraba ni iSoqosoqo ni Veivukei.

Na inaki ni taro oqo sai koya me vukei ira na dauveisiko me ra vakayacora na veivakauqeti me ra veiqaravi vakavinaka cake kina vei ira na marama era dau vakavulica.

E nakiti na taro oqo me ra vakayacora kina ena kena gauna donu na nodra cakacaka na marama yadua ni iSoqosoqo ni Veivukei ka vakakina na nona vakayagataka na itukutuku ena nona bula vakataki koya.

Mai na wiliki ni iyau soli vakaturaga ni iSoqosoqo ni Veivukei, sa na rawa kina vei ira na marama me ra rawata na veivakauqeti mai na isoqosoqo ka a tu mai ena Lotu taumada ka vakakina na parokaramu ni iSoqosoqo ni Veivukei ena gauna oqo. “Eda a vakauqeti ena nodra solibula ka da gadreva meda vakaitavi ena tarai cake ni matanitu ni Turaga ena noda gauna ni veiqaravi,” a kaya o Sisita Beck.

Na ivolanikalou oqo era na veivuke ena vuli, veivakavulici, kei na nodra vakayacora yadudua na itukutuku.

Na isema bibi ki na ivurevure tale eso ena rawa ni kunei mai na taba ni Mataveilawa, reliefsociety.lds.org.