Ni sa Veivakaroti na Turaga
Na talairawarawa ena yalodina, se cava ga na levu ni kena icakacaka, ena kauta mai na veidusimaki, veivuke, kei na vakacegu ni Turaga.
E tukuni na kedrau italanoa e rua na dauveilakoyaki ni rau a sauma e dua na waqavuka lailai me vukataki rau ki na dua na drano vakayawa me rau laki siwa vakayabaki kina. Ni oti na nodrau katoa, a lesu tale o pailate me laki kauti rau lesu mai. Ia, a kaya vakatotolo sara vei rau na dausiwa oqo ni na sega ni rauti iratou na nona waqavuka lailai oqo, ena levu ni nodrau iyaya, kei na bibi ni ika rau sa rawata. E gadrevi me na lesu vakarua na waqavuka.
Ena gauna oqo, rau sa sega ni vinakata na dausiwa me rau sauma tale na ikarua ni- ilakolako. Ia ni sa vakadonui me vakatawani vakamaqosa na iusana ka soli tale e dua na ikuri ni ilavo, sa vakasaurarataki koya ga o pailate me tovolea me vuka.
Erau sigege ka kila na dausiwa ni sa saga vakaukauwa o pailate na waqavuka me vuka yani. Ia, ena vica ga na sekodi a vakanaulu sobu na waqavuka ka voca ena dua na vanua lolobo levu, ena mua ni drano o ya.
Sa sega ni yavala na waqavuka baleta ni sa vuka tani mai na ka dina e kilai levu tu me “idre e ra.” Na “idre e ra” e vakavuna me vuka cake vakalailai na waqavuka ena gauna sa uvuci kina na cagi ena kedrau tadrua na taba ni waqavuka kei na dela ni qele—ena gauna rau sa veivolekati kina. Vei koya oqo, ni sa vuka cake yani i cake na waqavuka mai na idre e ra, sa dodonu me sa vuka ga yani ka tubu ka kaukauwa ga vakataki koya, ia sa sega ni yaco rawa eke.
E kalougata ni sega ni dua a mavoa bibi, ni ratou sa vakilai iratou mai, ka taroga e dua na dausiwa vua e dua tale, “Na cava e yaco?” A sauma o koya kadua; “Tou a voca ni tou sa vuka—volekata ni dua na drau na iyate (91 m) mai na vanua tou a tau kina ena yabaki sa oti!”
Me vakataki rau na dausiwa oqo, eda dau vakabauta tu ni dua tale tiko na sala e rawarawa cake, e dua na itatakoso se imoimoi vou ki na ivakaro ni Turaga me na veirauti kei na noda bula yadudua. Na veivakasama vakaoqo ena sega ni kila ni talairawarawa dina ki na lawa ni Kalou ena kauta mai na Nona veivakalougatataki kei na veitaqomaki ia ni sega ni vakamuri na Nona lawa ena muataki keda ki na veika rarawa era sa kilai tu.
Ena gauna ni nona kacivi vaka-Peresitedi ni Lotu, a kaya kina o Harold B. Lee: “Na taqomaki ni Lotu e tiko ena nodra maroroya tiko na lewenilotu na vunau … Ni ra maroroya na vunau, ena yaco mai na veivakalougatataki”1
Ni da digitaka me da talaidredre ki na dua na vunau sa baleta (1) ni da sa vakadeitaka vei keda ni sega ni baleti keda na ivunau o ya; (2) noda sega ni vakabauta ni bibi na ivunau o ya se (3) noda sa kila vakaidina ni sa rui dredre me da talairawarawa ki na ivunau o ya
1. Na iVunau Oqo E Sega Ni Baleti Au:
Ni sa voleka ni cava na veiliutaki nei Solomoni na Tui a tukuna vua na Turaga mai vua e dua Nona parofita, “Au na … kaliraka tani vakaidina mai vei iko na matanitu, ka solia vua na nomu tamata.”2
Ni oti ga o ya, sa kila sara o Eaija na parofita ni tamata o ya me o Jeropoami, e dua na tamata “sa dau cakacaka”3 ka sa digitaki koya o Solomoni “me lewa na cakacaka kecega ena mataqali i Josefa.”4 E ilesilesi nei Jeropoami me dau gole mai na veiulunivanua nei Ifereimi, na vanua e vakaitikotiko kina, ki na koroturaga kei Jerusalemi. Ena dua na ilakolako oqori , a sotavi koya e gaunisala o Eaija. Mai vei Eaija, a kaya na Turaga, “Raica kau na … solia vei iko e tini na mataqali …” A vakasalataki Jeropoami talega, “Ia kevaka ko na … muria na noqu sala, … mo vakabauta na noqu ilesilesi kei na noqu ivakaro, … au na qai tiko vata kei iko, … ka soli ira na Isireli vei iko.”5
Ni sa rogoca oti na nona parofisai o Eaija, a vinakata o Solomoni me vakamatei Jeropoami ka vakavuna nona dro ki Ijipita.6 Ni sa mate o Solomoni sa lesu tale mai o Jeropoami ki na vualiku kei Isireli ka tekivu me liutaki ira na mataqali e tini ena vualiku.7
Ia, na ituvatuva ni nona liutaka na matanitu o Jeropoami e oka kina na vinaka kei na ca. A tauyavutaki Sikemi me koroturaga ni vanua o ya, na korolevu ni ivalavala vakalotu e cecere ka ra taleitaka na nona tamata. Ia e ka ni rarawa ni a vakacuruma eso na cakacaka ni qaravi tevoro ena nodra sokalou.8
A vakadeitaka o Jeropoami ni so na vunau ni Kalou e sega ni baleti koya. Ena vuku ni nona cakacaka oqori, era a vakamatei taucoko na nona kawa ena vuku ga ni a tekivutaka na cakacaka butobuto ki na nodra cakacaka tabu vakalotu, ka ra cemuri tani mai na nodra vanua na mataqali e tini kei Isireli.9
Me vaka ga na vuka tani mai na idre e ra ka levu cake na bibi mai na kena e rawa ni taura na taba ni waqavuka ni na yaco ga kina na leqa e veivakamatei, na noda vakamuria vakatikina se digitaka ga e vica na lawa ni Kalou ena sega ni kauta mai na taucoko ni veivakalougatataki ni talairawarawa.
2. E Sega Ni Bibi Na iVunau Oqo
Ni oti e tini vakacaca na yabaki a gole yani o Neamani, e dua na dauvala qaqa ni Siria, a “tamata qaqa ena ivalu”10 ki na nona koro dina mai Juta ka laki raica na tui, o Jiorami, me vakabulai mai na vukavuka.11
Sa kau sara o Neamani vei Ilaisa na parofita. “A sa tala e dua na italaki vei koya ko Ilaisa, ka kaya, Mo ni laki sili vakavitu ena Joritani, … ia ko na savasava mai.”12
Mai na yalayala vakaparofita ni veivakabulai oqo, a cudru sara kina o Neamani ni a sega ni laki sotavi koya yani o Ilaisa ka rubutaka na ivakaro vakaparofita me laki sili vakavitu ena Uciwai lailai ka vuvu na Joritani. Ena nona dokadoka e gadreva kina na veika cecere ka bibi, na veika me tautauvata kei na kena irogorogo kei na nona itutu ena vanua kei na matanitu.
E kalougata o Neamani, ni ra a vakauqeti koya na nona tamata se cava ga na ka e tukuna vua na parofita me cakava, ke vakamuria, ena kauta mai kina na veivakalougatataki ni Turaga. A vakamuria ga o Neamani na ivakaro rawarawa o ya ka laki sili ki na Uciwai na Joritani ni sa vakaroti kina, me isau ni nona talairawarawa, a vakabulai kina mai na nona vukavuka.13
Na talairawarawa ki na ivakaro ni Turaga, se cava ga na noda vakabauta ni sega ni ka bibi, ena kauta dina mai na Nona veivakalougatataki sa yalataki tu.
3. Sa Rui Dredre Na Vunau Oqo
Salamuria yani na ivakaro ni Turaga, a tokitaka na nona matavuvale o Liai ki na lekutu. Ena imatai ni vica na siga ena ilakolako o ya a vakasala o Liai vei Lemueli, na luvena tagane, me “tudei ka sega ni yavalati rawa, ena vakamuria na vunau ni Turaga!”14
Ia, ni sa yaco mai na ivakaro vakaparofita me lesu ki Jerusalemi me laki kau mai na peleti parasa, ka tiko kina na “kedra ivola tukutuku na Jiu,”15 rau a talaidredre na gonetagane qase oqo, ka rau kaya, “Sa rui dredre.”16
E dina ga ni rau a vosa kudrukudru na tuakana, na vakabauta kei na talairawarawa ki na veivakaroti ni Turaga nei Nifai a laki kauta rawa mai kina na peleti parasa. Sa tauyavutaki kina e dua na matanitu, sa maroroi na kena vosa, ka sa vakavulici kina na kosipeli i Jisu Karisito ki na veitabatamata ka muri mai.
Eso na gauna eda na vakaiulubaletaka ni sa kila vakavinaka tu na Turaga ni da na talaidredre baleta na keda ituvaki duatani ni na dredre, veivakamaduataki, se mosi na noda vakamuria na Nona lawa. Ia, na talairawarawa dina, se cava ga na levu ni kena icakacaka, ena kauta mai na veidusimaki, veivuke, kei na vakacegu ni Turaga.
A kerekere vakarua na Parofita o Josefa Simici vua na Turaga me rawa ni kauta o Martin Harris, e dua na nona itokani vinaka, na imatai ni 116 draunipepa sa vakadewataki oti ni ivola i Liai mai Harmony, Pennsylvania, ka lesu ki Palmyra. Ena veigauna yadua oqori, a vakasalataki Josefa kina na Turaga me kakua ni solia vei Mr. Harris na pepa.
A saga tiko o Martin me vakayagataka na pepa vakadewataki o ya me ivakadinadina me tarovi ira kina na nona ilawalawa ena nodra vakaucacataka na nona veitokani vata tiko kei Josefa Simici. Ena ikatolu ni kerekere sa solia kina na veivakadonui na Turaga vei Josefa.17
A qai vakayalia o Martin na pepa vakadewataki o ya ka yaco kina me kau tani na peleti mai vua na Parofita o Josefa Simici ena dua na gauna. Sa dua na lesoni mosimosi oqo me baleta na Parofita o Josefa Simici, a kaya kina vakaoqo: “Au cakava kina na lawa oqo: Ni sa vakarota na Turaga, cakava.”18 Sa rawa me noda talega na nona lawa oqo.
Na lewa ni Turaga ni da muria na Nona ivakaro e ka dina. Sa yalataka kina o Koya vei keda: “Ia kevaka ko sa muria na noqu vunau ka vosota me yacova na i vakataotioti ko na rawata na bula tawamudu …”19
E vakasalataki keda tale: “Koi au na Turaga, au sa yalololoma ka lomani ira era sa rerevaki au, ia sa ka ni marau meu vakalagilagi ira era sa qaravi au ena yalo sa dina ka dodonu, me yacova na i vakataotioti.”20
Na talairawarawa ki na ivakaro ni Turaga e vakarautaka vei keda na nuidei ena noda salatu digitaki, e rawa kina vei keda meda rawata na Nona veidusimaki kei na veivakasalataki ni da sa sasagataka tiko ka solia vei keda na madigi meda vakataka na noda iVakabula, o Jisu Karisito ka lesu ki na itikotiko nei Tamada.
Sa noqu masu ni da sasagataka tiko ena veisiga meda talairawarawa cake ki na lawa, cakacaka vakalotu, kei na ivakaro ni kosipeli i Jisu Karisito ni rawa me na vakalougatataka cake vakalevu o Koya na noda bula.
Au sa vakadinadinataka ni talairawarawa ki na ivakaro ni Kalou ena kauta mai na veivakalougatataki ni lomalagi; ka rau bula tiko na Tamada Vakalomalagi kei na Luvena, o Jisu Karisito; ni sa vosa ni Kalou na iVola i Momani, kei Peresitedi Thomas S. Monson sa parofita ni Turaga ena noda gauna oqo, ena yaca i Jisu Karisito, emeni.