ʻEletā Juan A. Uceda
ʻO e Kau Fitungofulú
ʻI he taimi ne kamata ʻeva ai ʻa ʻEletā Sione ʻAlipate ʻUkeita kia Malia ʻIsapela Penitesú—ʻa ia ko e fefine ne iku ʻo mali mo iá—naʻá ne ʻiloʻi ko ha tokotaha makehe ia. Naʻá na fakatou ului ki he Siasí ʻi heʻena ʻi he toʻu tupú peá na fakatou ngāue fakafaifekau ʻi hona fonua tupuʻanga ko Peluú.
Ka ko e fakapapau ko ia ʻa Sisitā ʻUkeita ke mali ʻi he temipalé naʻá ne ʻomi e liliú. Ko e temipale ofi taha he taimi ko iá ko e Temipale Sao Paulo ʻi Palāsilá. ʻOku fakamatala ʻa ʻEletā ʻUkeita ʻo pehē, “Ne feʻunga mo e ʻaho ʻe fitu pea toki aʻu ki ai, pea naʻe fakaʻaongaʻi e founga fefongongaʻaki kotoa ne ala maʻú. Naʻá ma heka pasi, kā, vaka, hoosi mo e saliote, lēlue, loli pea mo e vakapuna foki. ʻI heʻema aʻu atu ki he temipalé, naʻá ma ala atu ki he holisí ke fakapapauʻi ʻoku ʻikai ko ha misi. Ne hoko ia ko ha meʻa mahuʻinga kiate kimaua.”
Naʻá na mali ʻi he Temipale Sao Paulo Palāsilá ʻi he ʻaho 13 ʻo ʻEpeleli 1979. Ko ha mātuʻa kinaua ki ha fānau ʻe toko nima.
Ne fāʻeleʻi ʻa ʻEletā ʻUkeita ʻi Siulai ʻo e taʻu 1953 ʻi Lima Pelū kia Hōsea mo ʻAinise ʻAnituleti ʻUkeita. Hili ʻene kau ki he Siasí ʻi he 1972, ne ako ʻa ʻEletā ʻUkeita ki he tauhitohí mo e fetuʻutaki mo e kakaí ʻi he ʻInisititiuti Hōsea Maliatakui Kālosí ʻi Lima. Naʻá ne ako foki ki hono puleʻi ʻo e pisinisí ʻi he ʻInisititiuti ʻAnitino Lotolotó ʻi G.E. [Centro Andino de G.E. Institute] ʻo maʻu ai hono mataʻitohi B.A. ʻi he fetuʻutaki mo e kakaí mei he ʻUnivēsiti Seni Lui Konisaká [San Luis Gonzaga University].
Ne ngāue ʻa ʻEletā ʻUkeita ʻi he Potungāue Ako ʻa e Siasí ko ha talēkita fakaʻēlia ki Pelū mo Polivia. Naʻá ne hiki mei Pelū ki Niu Seesi ʻi ʻAmelika ʻi he 2003 ke tokoni ki heʻene tangataʻeikí ʻi hono faʻufaʻu ha pisinisi fakaako mo ako lea fakafonua.
Makehe mei heʻene ngāue fakafaifekaú, kuo hoko ʻa ʻEletā ʻUkeita ko ha aleaʻanga māʻolunga, pīsope, palesiteni fakasiteki, palesiteni ʻo e Misiona Lima Pelū Noaté pea ko ha Fitungofulu Fakaʻēlia. ʻOkú ne ngāue ʻeni ʻi he Kōlomu ʻUluaki ʻo e Kau Fitungofulú.
ʻOku pehē ʻe ʻEletā ʻUkeita, “ ʻOku ou maʻu ha fakamoʻoni mālohi ki he mālohi ʻo e maʻu fakahā fakatāutahá mei he Laumālie Māʻoniʻoní. Kuo toutou fakamoʻoniʻi mai ʻe he ngaahi fakamoʻoni ko iá ʻe he ngaahi tāpuaki ʻoku maʻu mei he talangofuá.”