Jean A. Stevens

Tokoni ʻUluaki ʻi he Kau Palesitenisī Lahi ʻo e Palaimelí

ʻOku tui ʻa Sini ʻOloletesi Sitīveni ʻoku ʻi ai ha ola makehe ʻi he fānaú kotoa ʻi he taimi ʻoku nau ongoʻi ai e ʻofá ʻi heʻenau kei īkí. ʻOku tokoni ʻa hono ngāue ʻaki e ʻofá ki he fānaú ke nau ʻilo pea mo maʻu e mahino ki he ʻofa maʻongoʻonga ʻoku maʻu ʻe he Tamai Hēvaní mo e Fakamoʻuí kiate kinautolú.

Naʻe fāʻeleʻi ʻa Sisitā ʻĒveni kia Kalāloni mo Hēleni ʻOloletesi ʻi Nōvema ʻo e 1952 ʻi Sōleki Siti, ʻIutā ʻi ʻAmelika.

ʻOku pehē ʻe Sisitā Sitīveni, “Ne u tupu hake ʻi ha ongomātuʻa tui lahi. Naʻá na ʻofa ki he ʻEikí pea naʻá na akoʻi ʻa e ongoongoleleí ʻi homau ʻapí. Naʻe fakaofo ʻa e malava ʻe heʻeku faʻeé ʻo ʻofaʻi e kakaí.” ʻOkú ne manatuʻi naʻe talu mei heʻene kei siʻí ʻa ʻene ongoʻi ʻa hono ʻofaʻi ia ʻe heʻene ongomātuʻá pea mo ʻena saiʻia ke ngāue maʻá e ʻEikí.

Ne fokotuʻu ʻe Sisitā Sitīveni ʻa e sīpinga tatau ʻi hono fāmilí hili ʻa ʻene mali pea mo Maʻake Sitīveni ʻi he Temipale Sōleki Sití ʻi he ʻaho 12 ʻo Sepitema 1973. ʻOku ʻi ai haʻana fānau ʻe toko nima.

ʻOku loto houngaʻia ʻa Sisitā Sitīveni ke ngāue maʻá e ʻEikí kae tautautefito ʻene houngaʻiá koeʻuhí ko e faingamālie ke ngāue maʻá e fānau Palaimelí.

ʻOku pehē ʻe Sisitā Sitīveni, “ ʻOku ongoʻingofua ʻe he fānaú ʻa e ngaahi meʻa fakalaumālié. ʻOku nau omi ki he māmaní mo e loto tui. ʻOku lava ke ke ongoʻi ʻa honau natula faka-ʻOtuá ʻi heʻenau omi ki he māmaní he ko ʻenau toki mavahe mai mei he ʻao ʻo ʻenau Tamai Hēvaní.”

ʻOku tui ʻa Sisitā Sitīveni ʻoku maʻu ʻe he kau taki mo e kau faiako ʻi he Palaimelí ha fatongia mahuʻinga ʻi hono tokoniʻi e mātuʻá ke akoʻi ʻa e ongoongolelei ʻo Sīsū Kalaisí. ʻOkú ne pehē, “Ko ha feituʻu fakaʻofoʻofa e Palaimelí ke ongoʻi ai ʻe he fānaú ʻa e ʻofá pea ke fakamālohia ai ʻe he kau faiakó mo e kau takí ʻa e ngaahi lēsoni ʻoku akoʻi ʻi ʻapí.”

Kimuʻa pea ui ia ko e tokoni ʻuluaki ʻi he kau palesitenisī lahi ʻo e Palaimelí, ne ngāue ʻa Sisitā Sitīveni ʻi he poate lahi ʻa e Palaimelí. Naʻá ne hoko foki ko ha palesiteni Fineʻofa ʻi he uōtí, tokoni ʻi he kau palesitenisī ʻo e Palaimeli ʻa e uōtí pea mo ha faiako ʻo e Tokāteline ʻo e Ongoongoleleí. Ne ʻosi ʻa Sisitā Sitīveni mei he ʻUnivēsiti ʻo ʻIutaá mo ha mataʻitohi ʻi he fiká pea mo ha tohi fakamoʻoni fakafaiako.