Fanongonongo ʻo e Polokalama Foʻou ʻo e Fatongia ki he ʻOtuá

Hangē ko ia ne fanongonongo lolotonga e konifelenisi lahí, kuo faʻufaʻu ha polokalama foʻou ʻo e Fatongia ki he ʻOtuá ʻo fakatatau mo e fakahinohino ʻa e kau palōfita moʻuí ke tokoniʻi e kau talavoú ke langaki hake ʻa e mālohinga fakalaumālié mo fakahoko honau ngaahi fatongia ʻi he lakanga fakataulaʻeikí.

Naʻe pehē ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí lolotonga e fakataha he pongipongi Tokonakí, “[Ko e polokalama foʻou ʻo e Fatongia ki he ʻOtuá] ko ha meʻangāue mālohi ia. Te ne fakamālohia e fakamoʻoni ʻa e kau talavoú mo honau vā pea mo e ʻOtuá. Te ne tokoniʻi kinautolu ke nau ako pea nau loto ke fakahoko honau ngaahi fatongia ʻi he lakanga fakataulaʻeikí. Te ne fakamālohia honau vā mo ʻenau mātuʻá, kau mēmipa ʻo ʻenau kōlomú, pea mo honau kau takí.”

ʻOku ʻatā leva ke fakahoko ʻa e polokalama foʻou ʻo e Fatongia ki he ʻOtuá pea ʻoku tukutaha e tokangá ʻi he ngaahi meʻa mahuʻingá. ʻOku ʻi he kiʻi tohi pē ʻe taha ʻa e ngaahi fie maʻu ki he ngaahi kulupu kotoa ko ʻeni ʻe tolú, fakataha mo ha ngaahi fakahinohino ki he ngaahi mātuʻá mo e kau takí. ʻE maʻu atu e tohí fakataha mo e ngaahi nāunau fekauʻaki mo iá, ʻi ha ngaahi lea fakafonua ʻe 27, ʻi he vahaʻa ʻo Sune mo ʻAokosi 2010. ʻE hokohoko atu hono liliu ʻo e ngaahi nāunaú ki ha ngaahi lea fakafonua kehe pea ʻe lava ke maʻu atu ia he lolotonga ʻo e taʻú.

ʻOku fokotuʻutuʻu e ngaahi ʻekitivitií ke lava e kau talavoú ʻo ako ki ha tefitoʻi moʻoni ʻo e ongoongoleleí pe fatongia ʻi he lakanga fakataulaʻeikí, ngāueʻi meʻa ne nau ako ki aí, pea nau vahevahe ʻenau ngaahi fakakaukaú mo e meʻa ʻoku nau ongoʻí ki heʻenau mātuʻá, kau taki ʻo e Siasí, pe ko ʻenau kōlomú.

Naʻe pehē ʻe Tēvita L. Peki, ko e palesiteni lahi ʻo e Kau Talavoú, he lolotonga e fakataha ʻa e lakanga fakataulaʻeikí ʻi he konifelenisi lahí,“ ʻI hoʻomou hoko ko ha tīkoni, akonaki, mo e taulaʻeikí, te mou kau atu ai ki ha ngaahi ʻekitivitī ʻe tokoni ke fakamālohia fakalaumālie ai kimoutolu pea mou ako ai ke fakahoko homou ngaahi fatongia kotoa pē ʻo e lakanga fakataulaʻeikí. ʻE tataki koe ʻe he polokalama foʻou ʻo e Fatongia ki he ʻOtuá ʻi hoʻo fononga ko ia ke fakahoko ho fatongia ki he ʻOtuá mo ke ʻiloʻi ai e fakaʻeiʻeiki ʻo e Lakanga Taulaʻeiki Faka-Ēloné.”

ʻOku faʻufaʻu e polokalamá ke fakaʻaiʻai e kau talavoú ke nau tokanga ki heʻenau tupulaki ʻanautolú, pea ʻokú ne toe ʻomi foki e ngaahi faingamālie ke fakamālohia e ngaahi vā ʻo e kau talavoú mo ʻenau mātuʻá, kau takí, mo e kau mēmipa ʻo e kōlomú. ʻOku lava pē ʻo ngāue ʻaki e ngaahi ʻekitivitī lahi ʻi he efiafi fakafāmili ʻi ʻapí mo e ngaahi fakataha ʻa e kōlomú.

Naʻe fakahā ʻe Misa Peki ki he makasini ʻa e Siasí ʻo pehē, “ ʻOku fakahoko ʻe he ngaahi mātuʻá, kau takí pea mo e kau mēmipa ʻo e kōlomú ha ngaahi fatongia mahuʻinga ʻi he polokalama Fatongia ki he ʻOtuá. ʻE ʻoatu ʻe hoʻomou ngaahi fakataha fakakōlomu ʻi he Sāpate kotoa pē ha ngaahi faingamālie ke mou ako, ngāueʻi pea mo fevahevaheʻaki ai.”

ʻOku poupouʻi e kau talavoú ke hokohoko atu e ngāue ʻi he polokalama lolotongá kae ʻoua kuo fakahoko e polokalama foʻoú ʻi honau uōtí pe koló. Ko e taimi pē ʻe fakahoko ai e polokalama foʻoú, ʻe kamata ngāue leva e kau talavou takitaha ʻi he konga ʻoku kaunga tonu ki hono lakanga fakataulaʻeiki lolotongá. Kapau kuo mei kakato e ngaahi fie maʻu ki he tohi fakamoʻoní pe mētali ʻoku kaunga tonu ki hono lakangá ʻi he polokalama motuʻá, te ne fakakakato e ngaahi fie maʻu ko iá lolotonga ʻene kamata ngāue ʻi he polokalama foʻoú.

Naʻe pehē ʻe Misa Peki, “ ʻOku muimui ʻa e ʻekitivitī takitaha ʻi he Ko Hono Fakahoko ʻa Hoku Fatongia ki he ʻOtuá ʻi he sīpinga te ne tokoniʻi koe ke ke hoko ko ha tokotaha maʻu lakanga fakataulaʻeiki ʻoku hōifua ki ai ʻa e ʻEikí.

ʻE lava maʻu atu mo ha toe fakamatala kehe mo ha ngaahi nāunau ʻi he ʻinitanetí ʻi he DutyToGod.lds.org.